| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. சங்கமனதா³யகத்தே²ரஅபதா³னவண்ணனா
8. Caṅkamanadāyakattheraapadānavaṇṇanā
அத்த²த³ஸ்ஸிஸ்ஸ முனினோதிஆதி³கங் ஆயஸ்மதோ சங்கமனதா³யகத்தே²ரஸ்ஸ அபதா³னங். அயம்பாயஸ்மா புரிமபு³த்³தே⁴ஸு கதாதி⁴காரோ தேஸு தேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ அத்த²த³ஸ்ஸிஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ ஸத்த²ரி பஸீதி³த்வா உச்சவத்து²கங் ஸுதா⁴பரிகம்மகதங் ரஜதராஸிஸதி³ஸங் ஸோப⁴மானங் சங்கமங் காரெத்வா முத்தத³லஸதி³ஸங் ஸேதபுலினங் அத்த²ரித்வா ப⁴க³வதோ அதா³ஸி. படிக்³க³ஹேஸி ப⁴க³வா, சங்கமங் படிக்³க³ஹெத்வா ச பன ஸுக²ங் காயசித்தஸமாதி⁴ங் அப்பெத்வா ‘‘அயங் அனாக³தே கோ³தமஸ்ஸ ப⁴க³வதோ ஸாஸனே ஸாவகோ ப⁴விஸ்ஸதீ’’தி ப்³யாகாஸி. ஸோ தேன புஞ்ஞகம்மேன தே³வமனுஸ்ஸேஸு அபராபரங் ஸங்ஸரந்தோ த்³வே ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ வுத்³தி⁴ப்பத்தோ ஸத்³தா⁴ஸம்பன்னோ ஸாஸனே பப்³ப³ஜித்வா நசிரஸ்ஸேவ அரஹத்தங் பத்வா கதபுஞ்ஞனாமேன சங்கமனதா³யகத்தே²ரோதி பாகடோ அஹோஸி.
Atthadassissamuninotiādikaṃ āyasmato caṅkamanadāyakattherassa apadānaṃ. Ayampāyasmā purimabuddhesu katādhikāro tesu tesu bhavesu vivaṭṭūpanissayāni puññāni upacinanto atthadassissa bhagavato kāle ekasmiṃ kulagehe nibbatto viññutaṃ patto satthari pasīditvā uccavatthukaṃ sudhāparikammakataṃ rajatarāsisadisaṃ sobhamānaṃ caṅkamaṃ kāretvā muttadalasadisaṃ setapulinaṃ attharitvā bhagavato adāsi. Paṭiggahesi bhagavā, caṅkamaṃ paṭiggahetvā ca pana sukhaṃ kāyacittasamādhiṃ appetvā ‘‘ayaṃ anāgate gotamassa bhagavato sāsane sāvako bhavissatī’’ti byākāsi. So tena puññakammena devamanussesu aparāparaṃ saṃsaranto dve sampattiyo anubhavitvā imasmiṃ buddhuppāde ekasmiṃ kulagehe nibbatto vuddhippatto saddhāsampanno sāsane pabbajitvā nacirasseva arahattaṃ patvā katapuññanāmena caṅkamanadāyakattheroti pākaṭo ahosi.
93. ஸோ ஏகதி³வஸங் அத்தனா புப்³பே³ கதபுஞ்ஞகம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ அத்த²த³ஸ்ஸிஸ்ஸ முனினோதிஆதி³மாஹ. தத்த² அத்த²த³ஸ்ஸிஸ்ஸாதி அத்த²ங் பயோஜனங் வுத்³தி⁴ங் விரூள்ஹிங் நிப்³பா³னங் த³க்க²தி பஸ்ஸதீதி அத்த²த³ஸ்ஸீ, அத² வா அத்த²ங் நிப்³பா³னங் த³ஸ்ஸனஸீலோ ஜானநஸீலோதி அத்த²த³ஸ்ஸீ, தஸ்ஸ அத்த²த³ஸ்ஸிஸ்ஸ முனினோ மோனேன ஞாணேன ஸமன்னாக³தஸ்ஸ ப⁴க³வதோ மனோரமங் மனல்லீனங் பா⁴வனீயங் மனஸி காதப்³ப³ங் சங்கமங் காரேஸிந்தி ஸம்ப³ந்தோ⁴. ஸேஸங் வுத்தனயானுஸாரேனேவ ஸுவிஞ்ஞெய்யமேவாதி.
93. So ekadivasaṃ attanā pubbe katapuññakammaṃ saritvā somanassajāto pubbacaritāpadānaṃ pakāsento atthadassissa muninotiādimāha. Tattha atthadassissāti atthaṃ payojanaṃ vuddhiṃ virūḷhiṃ nibbānaṃ dakkhati passatīti atthadassī, atha vā atthaṃ nibbānaṃ dassanasīlo jānanasīloti atthadassī, tassa atthadassissa munino monena ñāṇena samannāgatassa bhagavato manoramaṃ manallīnaṃ bhāvanīyaṃ manasi kātabbaṃ caṅkamaṃ kāresinti sambandho. Sesaṃ vuttanayānusāreneva suviññeyyamevāti.
சங்கமனதா³யகத்தே²ரஅபதா³னவண்ணனா ஸமத்தா.
Caṅkamanadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. சங்கமனதா³யகத்தே²ரஅபதா³னங் • 8. Caṅkamanadāyakattheraapadānaṃ
