| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৮. চঙ্কমনদাযকত্থেরঅপদানৰণ্ণনা
8. Caṅkamanadāyakattheraapadānavaṇṇanā
অত্থদস্সিস্স মুনিনোতিআদিকং আযস্মতো চঙ্কমনদাযকত্থেরস্স অপদানং। অযম্পাযস্মা পুরিমবুদ্ধেসু কতাধিকারো তেসু তেসু ভৰেসু ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে একস্মিং কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা উচ্চৰত্থুকং সুধাপরিকম্মকতং রজতরাসিসদিসং সোভমানং চঙ্কমং কারেত্ৰা মুত্তদলসদিসং সেতপুলিনং অত্থরিত্ৰা ভগৰতো অদাসি। পটিগ্গহেসি ভগৰা, চঙ্কমং পটিগ্গহেত্ৰা চ পন সুখং কাযচিত্তসমাধিং অপ্পেত্ৰা ‘‘অযং অনাগতে গোতমস্স ভগৰতো সাসনে সাৰকো ভৰিস্সতী’’তি ব্যাকাসি। সো তেন পুঞ্ঞকম্মেন দেৰমনুস্সেসু অপরাপরং সংসরন্তো দ্ৰে সম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিপ্পত্তো সদ্ধাসম্পন্নো সাসনে পব্বজিত্ৰা নচিরস্সেৰ অরহত্তং পত্ৰা কতপুঞ্ঞনামেন চঙ্কমনদাযকত্থেরোতি পাকটো অহোসি।
Atthadassissamuninotiādikaṃ āyasmato caṅkamanadāyakattherassa apadānaṃ. Ayampāyasmā purimabuddhesu katādhikāro tesu tesu bhavesu vivaṭṭūpanissayāni puññāni upacinanto atthadassissa bhagavato kāle ekasmiṃ kulagehe nibbatto viññutaṃ patto satthari pasīditvā uccavatthukaṃ sudhāparikammakataṃ rajatarāsisadisaṃ sobhamānaṃ caṅkamaṃ kāretvā muttadalasadisaṃ setapulinaṃ attharitvā bhagavato adāsi. Paṭiggahesi bhagavā, caṅkamaṃ paṭiggahetvā ca pana sukhaṃ kāyacittasamādhiṃ appetvā ‘‘ayaṃ anāgate gotamassa bhagavato sāsane sāvako bhavissatī’’ti byākāsi. So tena puññakammena devamanussesu aparāparaṃ saṃsaranto dve sampattiyo anubhavitvā imasmiṃ buddhuppāde ekasmiṃ kulagehe nibbatto vuddhippatto saddhāsampanno sāsane pabbajitvā nacirasseva arahattaṃ patvā katapuññanāmena caṅkamanadāyakattheroti pākaṭo ahosi.
৯৩. সো একদিৰসং অত্তনা পুব্বে কতপুঞ্ঞকম্মং সরিত্ৰা সোমনস্সজাতো পুব্বচরিতাপদানং পকাসেন্তো অত্থদস্সিস্স মুনিনোতিআদিমাহ। তত্থ অত্থদস্সিস্সাতি অত্থং পযোজনং ৰুদ্ধিং ৰিরূল়্হিং নিব্বানং দক্খতি পস্সতীতি অত্থদস্সী, অথ ৰা অত্থং নিব্বানং দস্সনসীলো জাননসীলোতি অত্থদস্সী, তস্স অত্থদস্সিস্স মুনিনো মোনেন ঞাণেন সমন্নাগতস্স ভগৰতো মনোরমং মনল্লীনং ভাৰনীযং মনসি কাতব্বং চঙ্কমং কারেসিন্তি সম্বন্ধো। সেসং ৰুত্তনযানুসারেনেৰ সুৰিঞ্ঞেয্যমেৰাতি।
93. So ekadivasaṃ attanā pubbe katapuññakammaṃ saritvā somanassajāto pubbacaritāpadānaṃ pakāsento atthadassissa muninotiādimāha. Tattha atthadassissāti atthaṃ payojanaṃ vuddhiṃ virūḷhiṃ nibbānaṃ dakkhati passatīti atthadassī, atha vā atthaṃ nibbānaṃ dassanasīlo jānanasīloti atthadassī, tassa atthadassissa munino monena ñāṇena samannāgatassa bhagavato manoramaṃ manallīnaṃ bhāvanīyaṃ manasi kātabbaṃ caṅkamaṃ kāresinti sambandho. Sesaṃ vuttanayānusāreneva suviññeyyamevāti.
চঙ্কমনদাযকত্থেরঅপদানৰণ্ণনা সমত্তা।
Caṅkamanadāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৮. চঙ্কমনদাযকত্থেরঅপদানং • 8. Caṅkamanadāyakattheraapadānaṃ
