| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၈. စင္ကမနဒာယကတ္ထေရအပဒာနဝဏ္ဏနာ
8. Caṅkamanadāyakattheraapadānavaṇṇanā
အတ္ထဒသ္သိသ္သ မုနိနောတိအာဒိကံ အာယသ္မတော စင္ကမနဒာယကတ္ထေရသ္သ အပဒာနံ။ အယမ္ပာယသ္မာ ပုရိမဗုဒ္ဓေသု ကတာဓိကာရော တေသု တေသု ဘဝေသု ဝိဝဋ္ဋူပနိသ္သယာနိ ပုညာနိ ဥပစိနန္တော အတ္ထဒသ္သိသ္သ ဘဂဝတော ကာလေ ဧကသ္မိံ ကုလဂေဟေ နိဗ္ဗတ္တော ဝိညုတံ ပတ္တော သတ္ထရိ ပသီဒိတ္ဝာ ဥစ္စဝတ္ထုကံ သုဓာပရိကမ္မကတံ ရဇတရာသိသဒိသံ သောဘမာနံ စင္ကမံ ကာရေတ္ဝာ မုတ္တဒလသဒိသံ သေတပုလိနံ အတ္ထရိတ္ဝာ ဘဂဝတော အဒာသိ။ ပဋိဂ္ဂဟေသိ ဘဂဝာ, စင္ကမံ ပဋိဂ္ဂဟေတ္ဝာ စ ပန သုခံ ကာယစိတ္တသမာဓိံ အပ္ပေတ္ဝာ ‘‘အယံ အနာဂတေ ဂောတမသ္သ ဘဂဝတော သာသနေ သာဝကော ဘဝိသ္သတီ’’တိ ဗ္ယာကာသိ။ သော တေန ပုညကမ္မေန ဒေဝမနုသ္သေသု အပရာပရံ သံသရန္တော ဒ္ဝေ သမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဧကသ္မိံ ကုလဂေဟေ နိဗ္ဗတ္တော ဝုဒ္ဓိပ္ပတ္တော သဒ္ဓာသမ္ပန္နော သာသနေ ပဗ္ဗဇိတ္ဝာ နစိရသ္သေဝ အရဟတ္တံ ပတ္ဝာ ကတပုညနာမေန စင္ကမနဒာယကတ္ထေရောတိ ပာကဋော အဟောသိ။
Atthadassissamuninotiādikaṃ āyasmato caṅkamanadāyakattherassa apadānaṃ. Ayampāyasmā purimabuddhesu katādhikāro tesu tesu bhavesu vivaṭṭūpanissayāni puññāni upacinanto atthadassissa bhagavato kāle ekasmiṃ kulagehe nibbatto viññutaṃ patto satthari pasīditvā uccavatthukaṃ sudhāparikammakataṃ rajatarāsisadisaṃ sobhamānaṃ caṅkamaṃ kāretvā muttadalasadisaṃ setapulinaṃ attharitvā bhagavato adāsi. Paṭiggahesi bhagavā, caṅkamaṃ paṭiggahetvā ca pana sukhaṃ kāyacittasamādhiṃ appetvā ‘‘ayaṃ anāgate gotamassa bhagavato sāsane sāvako bhavissatī’’ti byākāsi. So tena puññakammena devamanussesu aparāparaṃ saṃsaranto dve sampattiyo anubhavitvā imasmiṃ buddhuppāde ekasmiṃ kulagehe nibbatto vuddhippatto saddhāsampanno sāsane pabbajitvā nacirasseva arahattaṃ patvā katapuññanāmena caṅkamanadāyakattheroti pākaṭo ahosi.
၉၃. သော ဧကဒိဝသံ အတ္တနာ ပုဗ္ဗေ ကတပုညကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော အတ္ထဒသ္သိသ္သ မုနိနောတိအာဒိမာဟ။ တတ္ထ အတ္ထဒသ္သိသ္သာတိ အတ္ထံ ပယောဇနံ ဝုဒ္ဓိံ ဝိရူဠ္ဟိံ နိဗ္ဗာနံ ဒက္ခတိ ပသ္သတီတိ အတ္ထဒသ္သီ, အထ ဝာ အတ္ထံ နိဗ္ဗာနံ ဒသ္သနသီလော ဇာနနသီလောတိ အတ္ထဒသ္သီ, တသ္သ အတ္ထဒသ္သိသ္သ မုနိနော မောနေန ဉာဏေန သမန္နာဂတသ္သ ဘဂဝတော မနောရမံ မနလ္လီနံ ဘာဝနီယံ မနသိ ကာတဗ္ဗံ စင္ကမံ ကာရေသိန္တိ သမ္ဗန္ဓော။ သေသံ ဝုတ္တနယာနုသာရေနေဝ သုဝိညေယ္ယမေဝာတိ။
93. So ekadivasaṃ attanā pubbe katapuññakammaṃ saritvā somanassajāto pubbacaritāpadānaṃ pakāsento atthadassissa muninotiādimāha. Tattha atthadassissāti atthaṃ payojanaṃ vuddhiṃ virūḷhiṃ nibbānaṃ dakkhati passatīti atthadassī, atha vā atthaṃ nibbānaṃ dassanasīlo jānanasīloti atthadassī, tassa atthadassissa munino monena ñāṇena samannāgatassa bhagavato manoramaṃ manallīnaṃ bhāvanīyaṃ manasi kātabbaṃ caṅkamaṃ kāresinti sambandho. Sesaṃ vuttanayānusāreneva suviññeyyamevāti.
စင္ကမနဒာယကတ္ထေရအပဒာနဝဏ္ဏနာ သမတ္တာ။
Caṅkamanadāyakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၈. စင္ကမနဒာယကတ္ထေရအပဒာနံ • 8. Caṅkamanadāyakattheraapadānaṃ
