| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
8. චඞ්‌කමනදායකත්‌ථෙරඅපදානවණ්‌ණනා
8. Caṅkamanadāyakattheraapadānavaṇṇanā
අත්‌ථදස්‌සිස්‌ස මුනිනොතිආදිකං ආයස්‌මතො චඞ්‌කමනදායකත්‌ථෙරස්‌ස අපදානං. අයම්‌පායස්‌මා පුරිමබුද්‌ධෙසු කතාධිකාරො තෙසු තෙසු භවෙසු විවට්‌ටූපනිස්‌සයානි පුඤ්‌ඤානි උපචිනන්‌තො අත්‌ථදස්‌සිස්‌ස භගවතො කාලෙ එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌තො සත්‌ථරි පසීදිත්‌වා උච්‌චවත්‌ථුකං සුධාපරිකම්‌මකතං රජතරාසිසදිසං සොභමානං චඞ්‌කමං කාරෙත්‌වා මුත්‌තදලසදිසං සෙතපුලිනං අත්‌ථරිත්‌වා භගවතො අදාසි. පටිග්‌ගහෙසි භගවා, චඞ්‌කමං පටිග්‌ගහෙත්‌වා ච පන සුඛං කායචිත්‌තසමාධිං අප්‌පෙත්‌වා ‘‘අයං අනාගතෙ ගොතමස්‌ස භගවතො සාසනෙ සාවකො භවිස්‌සතී’’ති බ්‍යාකාසි. සො තෙන පුඤ්‌ඤකම්‌මෙන දෙවමනුස්‌සෙසු අපරාපරං සංසරන්‌තො ද්‌වෙ සම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො වුද්‌ධිප්‌පත්‌තො සද්‌ධාසම්‌පන්‌නො සාසනෙ පබ්‌බජිත්‌වා නචිරස්‌සෙව අරහත්‌තං පත්‌වා කතපුඤ්‌ඤනාමෙන චඞ්‌කමනදායකත්‌ථෙරොති පාකටො අහොසි.
Atthadassissamuninotiādikaṃ āyasmato caṅkamanadāyakattherassa apadānaṃ. Ayampāyasmā purimabuddhesu katādhikāro tesu tesu bhavesu vivaṭṭūpanissayāni puññāni upacinanto atthadassissa bhagavato kāle ekasmiṃ kulagehe nibbatto viññutaṃ patto satthari pasīditvā uccavatthukaṃ sudhāparikammakataṃ rajatarāsisadisaṃ sobhamānaṃ caṅkamaṃ kāretvā muttadalasadisaṃ setapulinaṃ attharitvā bhagavato adāsi. Paṭiggahesi bhagavā, caṅkamaṃ paṭiggahetvā ca pana sukhaṃ kāyacittasamādhiṃ appetvā ‘‘ayaṃ anāgate gotamassa bhagavato sāsane sāvako bhavissatī’’ti byākāsi. So tena puññakammena devamanussesu aparāparaṃ saṃsaranto dve sampattiyo anubhavitvā imasmiṃ buddhuppāde ekasmiṃ kulagehe nibbatto vuddhippatto saddhāsampanno sāsane pabbajitvā nacirasseva arahattaṃ patvā katapuññanāmena caṅkamanadāyakattheroti pākaṭo ahosi.
93. සො එකදිවසං අත්‌තනා පුබ්‌බෙ කතපුඤ්‌ඤකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො අත්‌ථදස්‌සිස්‌ස මුනිනොතිආදිමාහ. තත්‌ථ අත්‌ථදස්‌සිස්‌සාති අත්‌ථං පයොජනං වුද්‌ධිං විරූළ්‌හිං නිබ්‌බානං දක්‌ඛති පස්‌සතීති අත්‌ථදස්‌සී, අථ වා අත්‌ථං නිබ්‌බානං දස්‌සනසීලො ජානනසීලොති අත්‌ථදස්‌සී, තස්‌ස අත්‌ථදස්‌සිස්‌ස මුනිනො මොනෙන ඤාණෙන සමන්‌නාගතස්‌ස භගවතො මනොරමං මනල්‌ලීනං භාවනීයං මනසි කාතබ්‌බං චඞ්‌කමං කාරෙසින්‌ති සම්‌බන්‌ධො. සෙසං වුත්‌තනයානුසාරෙනෙව සුවිඤ්‌ඤෙය්‍යමෙවාති.
93. So ekadivasaṃ attanā pubbe katapuññakammaṃ saritvā somanassajāto pubbacaritāpadānaṃ pakāsento atthadassissa muninotiādimāha. Tattha atthadassissāti atthaṃ payojanaṃ vuddhiṃ virūḷhiṃ nibbānaṃ dakkhati passatīti atthadassī, atha vā atthaṃ nibbānaṃ dassanasīlo jānanasīloti atthadassī, tassa atthadassissa munino monena ñāṇena samannāgatassa bhagavato manoramaṃ manallīnaṃ bhāvanīyaṃ manasi kātabbaṃ caṅkamaṃ kāresinti sambandho. Sesaṃ vuttanayānusāreneva suviññeyyamevāti.
චඞ්‌කමනදායකත්‌ථෙරඅපදානවණ්‌ණනා සමත්‌තා.
Caṅkamanadāyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 8. චඞ්‌කමනදායකත්‌ථෙරඅපදානං • 8. Caṅkamanadāyakattheraapadānaṃ
