| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. சங்கமஸுத்தவண்ணனா
5. Caṅkamasuttavaṇṇanā
99. பஞ்சமே பஸ்ஸத² நோதி பஸ்ஸத² நு. ஸப்³பே³ கோ² ஏதேதி ஸாரிபுத்தத்தே²ரோ ப⁴க³வதா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் மஹாபஞ்ஞானங் யதி³த³ங் ஸாரிபுத்தோ’’தி (அ॰ நி॰ 1.189) மஹாபஞ்ஞேஸு ஏதத³க்³கே³ ட²பிதோ. இதி நங் ‘‘க²ந்த⁴ந்தரங் தா⁴த்வந்தரங் ஆயதனந்தரங் ஸதிபட்டா²னபோ³தி⁴பக்கி²யத⁴ம்மந்தரங் திலக்க²ணாஹதங் க³ம்பீ⁴ரங் பஞ்ஹங் புச்சி²ஸ்ஸாமா’’தி மஹாபஞ்ஞாவ பரிவாரெந்தி. ஸோபி தேஸங் பத²விங் பத்த²ரெந்தோ விய ஸினேருபாத³தோ வாலிகங் உத்³த⁴ரந்தோ விய சக்கவாளபப்³ப³தங் பி⁴ந்த³ந்தோ விய ஸினேருங் உக்கி²பந்தோ விய ஆகாஸங் வித்தா²ரெந்தோ விய சந்தி³மஸூரியே உட்டா²பெந்தோ விய ச புச்சி²தபுச்சி²தங் கதே²தி. தேன வுத்தங் ‘‘ஸப்³பே³ கோ² ஏதே, பி⁴க்க²வே, பி⁴க்கூ² மஹாபஞ்ஞா’’தி.
99. Pañcame passatha noti passatha nu. Sabbe kho eteti sāriputtatthero bhagavatā ‘‘etadaggaṃ, bhikkhave, mama sāvakānaṃ bhikkhūnaṃ mahāpaññānaṃ yadidaṃ sāriputto’’ti (a. ni. 1.189) mahāpaññesu etadagge ṭhapito. Iti naṃ ‘‘khandhantaraṃ dhātvantaraṃ āyatanantaraṃ satipaṭṭhānabodhipakkhiyadhammantaraṃ tilakkhaṇāhataṃ gambhīraṃ pañhaṃ pucchissāmā’’ti mahāpaññāva parivārenti. Sopi tesaṃ pathaviṃ pattharento viya sinerupādato vālikaṃ uddharanto viya cakkavāḷapabbataṃ bhindanto viya sineruṃ ukkhipanto viya ākāsaṃ vitthārento viya candimasūriye uṭṭhāpento viya ca pucchitapucchitaṃ katheti. Tena vuttaṃ ‘‘sabbe kho ete, bhikkhave, bhikkhū mahāpaññā’’ti.
மஹாமொக்³க³ல்லானோபி ப⁴க³வதா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் இத்³தி⁴மந்தானங் யதி³த³ங் மஹாமொக்³க³ல்லானோ’’தி இத்³தி⁴மந்தேஸு ஏதத³க்³கே³ ட²பிதோ. இதி நங் ‘‘பரிகம்மங் ஆனிஸங்ஸங் அதி⁴ட்டா²னங் விகுப்³ப³னங் புச்சி²ஸ்ஸாமா’’தி இத்³தி⁴மந்தோவ பரிவாரெந்தி. ஸோபி தேஸங் வுத்தனயேனேவ புச்சி²தபுச்சி²தங் கதே²தி. தேன வுத்தங் ‘‘ஸப்³பே³ கோ² ஏதே, பி⁴க்க²வே, பி⁴க்கூ² மஹித்³தி⁴கா’’தி.
Mahāmoggallānopi bhagavatā ‘‘etadaggaṃ, bhikkhave, mama sāvakānaṃ bhikkhūnaṃ iddhimantānaṃ yadidaṃ mahāmoggallāno’’ti iddhimantesu etadagge ṭhapito. Iti naṃ ‘‘parikammaṃ ānisaṃsaṃ adhiṭṭhānaṃ vikubbanaṃ pucchissāmā’’ti iddhimantova parivārenti. Sopi tesaṃ vuttanayeneva pucchitapucchitaṃ katheti. Tena vuttaṃ ‘‘sabbe kho ete, bhikkhave, bhikkhū mahiddhikā’’ti.
மஹாகஸ்ஸபோபி ப⁴க³வதா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் து⁴தவாதா³னங் யதி³த³ங் மஹாகஸ்ஸபோ’’தி து⁴தவாதே³ஸு ஏதத³க்³கே³ ட²பிதோ. இதி நங் ‘‘து⁴தங்க³பரிஹாரங் ஆனிஸங்ஸங் ஸமோதா⁴னங் அதி⁴ட்டா²னங் பே⁴த³ங் புச்சி²ஸ்ஸாமா’’தி து⁴தவாதா³வ பரிவாரெந்தி. ஸோபி தேஸங் ததே²வ புச்சி²தபுச்சி²தங் ப்³யாகரோதி. தேன வுத்தங் ‘‘ஸப்³பே³ கோ² ஏதே, பி⁴க்க²வே, பி⁴க்கூ² து⁴தவாதா³’’தி.
Mahākassapopi bhagavatā ‘‘etadaggaṃ, bhikkhave, mama sāvakānaṃ bhikkhūnaṃ dhutavādānaṃ yadidaṃ mahākassapo’’ti dhutavādesu etadagge ṭhapito. Iti naṃ ‘‘dhutaṅgaparihāraṃ ānisaṃsaṃ samodhānaṃ adhiṭṭhānaṃ bhedaṃ pucchissāmā’’ti dhutavādāva parivārenti. Sopi tesaṃ tatheva pucchitapucchitaṃ byākaroti. Tena vuttaṃ ‘‘sabbe kho ete, bhikkhave, bhikkhū dhutavādā’’ti.
அனுருத்³த⁴த்தே²ரோபி ப⁴க³வதா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் தி³ப்³ப³சக்கு²கானங் யதி³த³ங் அனுருத்³தோ⁴’’தி (அ॰ நி॰ 1.192) தி³ப்³ப³சக்கு²கேஸு ஏதத³க்³கே³ ட²பிதோ. இதி நங் ‘‘தி³ப்³ப³சக்கு²ஸ்ஸ பரிகம்மங் ஆனிஸங்ஸங் உபக்கிலேஸங் புச்சி²ஸ்ஸாமா’’தி தி³ப்³ப³சக்கு²காவ பரிவாரெந்தி. ஸோபி தேஸங் ததே²வ புச்சி²தபுச்சி²தங் கதே²தி. தேன வுத்தங் ‘‘ஸப்³பே³ கோ² ஏதே, பி⁴க்க²வே, பி⁴க்கூ² தி³ப்³ப³சக்கு²கா’’தி.
Anuruddhattheropi bhagavatā ‘‘etadaggaṃ, bhikkhave, mama sāvakānaṃ bhikkhūnaṃ dibbacakkhukānaṃ yadidaṃ anuruddho’’ti (a. ni. 1.192) dibbacakkhukesu etadagge ṭhapito. Iti naṃ ‘‘dibbacakkhussa parikammaṃ ānisaṃsaṃ upakkilesaṃ pucchissāmā’’ti dibbacakkhukāva parivārenti. Sopi tesaṃ tatheva pucchitapucchitaṃ katheti. Tena vuttaṃ ‘‘sabbe kho ete, bhikkhave, bhikkhū dibbacakkhukā’’ti.
புண்ணத்தே²ரோபி ப⁴க³வதா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் த⁴ம்மகதி²கானங் யதி³த³ங் புண்ணோ மந்தாணிபுத்தோ’’தி (அ॰ நி॰ 1.196) த⁴ம்மகதி²கேஸு ஏதத³க்³கே³ ட²பிதோ. இதி நங் ‘‘த⁴ம்மகதா²ய ஸங்கே²பவித்தா²ரக³ம்பீ⁴ருத்தானவிசித்ரகதா²தீ³ஸு தங் தங் ஆகாரங் புச்சி²ஸ்ஸாமா’’தி த⁴ம்மகதி²காவ பரிவாரெந்தி. ஸோபி தேஸங் ‘‘ஆவுஸோ, த⁴ம்மகதி²கேன நாம ஆதி³தோ பரிஸங் வண்ணேதுங் வட்டதி, மஜ்ஜே² ஸுஞ்ஞதங் பகாஸேதுங், அந்தே சதுஸச்சவஸேன கூடங் க³ண்ஹிது’’ந்தி ஏவங் தங் தங் த⁴ம்மகதா²னயங் ஆசிக்க²தி. தேன வுத்தங் ‘‘ஸப்³பே³ கோ² ஏதே, பி⁴க்க²வே, பி⁴க்கூ² த⁴ம்மகதி²கா’’தி.
Puṇṇattheropi bhagavatā ‘‘etadaggaṃ, bhikkhave, mama sāvakānaṃ bhikkhūnaṃ dhammakathikānaṃ yadidaṃ puṇṇo mantāṇiputto’’ti (a. ni. 1.196) dhammakathikesu etadagge ṭhapito. Iti naṃ ‘‘dhammakathāya saṅkhepavitthāragambhīruttānavicitrakathādīsu taṃ taṃ ākāraṃ pucchissāmā’’ti dhammakathikāva parivārenti. Sopi tesaṃ ‘‘āvuso, dhammakathikena nāma ādito parisaṃ vaṇṇetuṃ vaṭṭati, majjhe suññataṃ pakāsetuṃ, ante catusaccavasena kūṭaṃ gaṇhitu’’nti evaṃ taṃ taṃ dhammakathānayaṃ ācikkhati. Tena vuttaṃ ‘‘sabbe kho ete, bhikkhave, bhikkhū dhammakathikā’’ti.
உபாலித்தே²ரோபி ப⁴க³வதா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் வினயத⁴ரானங் யதி³த³ங் உபாலீ’’தி (அ॰ நி॰ 1.228) வினயத⁴ரேஸு ஏதத³க்³கே³ ட²பிதோ. இதி நங் ‘‘க³ருகலஹுகங் ஸதேகிச்ச²அதேகிச்ச²ங் ஆபத்தானாபத்திங் புச்சி²ஸ்ஸாமா’’தி வினயத⁴ராவ பரிவாரெந்தி. ஸோபி தேஸங் புச்சி²தபுச்சி²தங் ததே²வ கதே²தி. தேன வுத்தங் ‘‘ஸப்³பே³ கோ² ஏதே, பி⁴க்க²வே, பி⁴க்கூ² வினயத⁴ரா’’தி.
Upālittheropi bhagavatā ‘‘etadaggaṃ, bhikkhave, mama sāvakānaṃ bhikkhūnaṃ vinayadharānaṃ yadidaṃ upālī’’ti (a. ni. 1.228) vinayadharesu etadagge ṭhapito. Iti naṃ ‘‘garukalahukaṃ satekicchaatekicchaṃ āpattānāpattiṃ pucchissāmā’’ti vinayadharāva parivārenti. Sopi tesaṃ pucchitapucchitaṃ tatheva katheti. Tena vuttaṃ ‘‘sabbe kho ete, bhikkhave, bhikkhū vinayadharā’’ti.
ஆனந்த³த்தே²ரோபி ப⁴க³வதா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் ப³ஹுஸ்ஸுதானங் யதி³த³ங் ஆனந்தோ³’’தி (அ॰ நி॰ 1.223) ப³ஹுஸ்ஸுதேஸு ஏதத³க்³கே³ ட²பிதோ. இதி நங் ‘‘த³ஸவித⁴ங் ப்³யஞ்ஜனபு³த்³தி⁴ங் அட்டு²ப்பத்திங் அனுஸந்தி⁴ங் புப்³பா³பரங் புச்சி²ஸ்ஸாமா’’தி ப³ஹுஸ்ஸுதாவ பரிவாரெந்தி. ஸோபி தேஸங் ‘‘இத³ங் ஏவங் வத்தப்³ப³ங், இத³ங் ஏவங் க³ஹேதப்³ப³’’ந்தி ஸப்³ப³ங் கதே²தி. தேன வுத்தங் ‘‘ஸப்³பே³ கோ² ஏதே, பி⁴க்க²வே, பி⁴க்கூ² ப³ஹுஸ்ஸுதா’’தி.
Ānandattheropi bhagavatā ‘‘etadaggaṃ, bhikkhave, mama sāvakānaṃ bhikkhūnaṃ bahussutānaṃ yadidaṃ ānando’’ti (a. ni. 1.223) bahussutesu etadagge ṭhapito. Iti naṃ ‘‘dasavidhaṃ byañjanabuddhiṃ aṭṭhuppattiṃ anusandhiṃ pubbāparaṃ pucchissāmā’’ti bahussutāva parivārenti. Sopi tesaṃ ‘‘idaṃ evaṃ vattabbaṃ, idaṃ evaṃ gahetabba’’nti sabbaṃ katheti. Tena vuttaṃ ‘‘sabbe kho ete, bhikkhave, bhikkhū bahussutā’’ti.
தே³வத³த்தோ பன பாபிச்சோ² இச்சா²பகதோ, தேன நங் ‘‘குலஸங்க³ண்ஹனபரிஹாரங் நானப்பகாரகங் கோஹஞ்ஞதங் புச்சி²ஸ்ஸாமா’’தி பாபிச்சா²வ பரிவாரெந்தி. ஸோபி தேஸங் தங் தங் நியாமங் ஆசிக்க²தி. தேன வுத்தங் ‘‘ஸப்³பே³ கோ² ஏதே, பி⁴க்க²வே, பி⁴க்கூ² பாபிச்சா²’’தி.
Devadatto pana pāpiccho icchāpakato, tena naṃ ‘‘kulasaṅgaṇhanaparihāraṃ nānappakārakaṃ kohaññataṃ pucchissāmā’’ti pāpicchāva parivārenti. Sopi tesaṃ taṃ taṃ niyāmaṃ ācikkhati. Tena vuttaṃ ‘‘sabbe kho ete, bhikkhave, bhikkhū pāpicchā’’ti.
கஸ்மா பனேதே அவிதூ³ரே சங்கமிங்ஸூதி. ‘‘தே³வத³த்தோ ஸத்த²ரி பது³ட்ட²சித்தோ அனத்த²ம்பி காதுங் உபக்கமெய்யா’’தி ஆரக்க²க்³க³ஹணத்த²ங். அத² தே³வத³த்தோ கஸ்மா சங்கமீதி? ‘‘அகாரகோ அயங், யதி³ காரகோ ப⁴வெய்ய, ந இத⁴ ஆக³ச்செ²ய்யா’’தி அத்தனோ கததோ³ஸபடிச்சா²த³னத்த²ங். கிங் பன தே³வத³த்தோ ப⁴க³வதோ அனத்த²ங் காதுங் ஸமத்தோ², ப⁴க³வதோ வா ஆரக்க²கிச்சங் அத்தீ²தி? நத்தி². தேன வுத்தங் ‘‘அட்டா²னமேதங், ஆனந்த³, அனவகாஸோ, யங் ததா²க³தோ பரூபக்கமேன பரினிப்³பா³யெய்யா’’தி (சூளவ॰ 341). பி⁴க்கூ² பன ஸத்த²ரி கா³ரவேன ஆக³தா. தேனேவ ப⁴க³வா ஏவங் வத்வா ‘‘விஸ்ஸஜ்ஜேஹி, ஆனந்த³, பி⁴க்கு²ஸங்க⁴’’ந்தி விஸ்ஸஜ்ஜாபேஸி. பஞ்சமங்.
Kasmā panete avidūre caṅkamiṃsūti. ‘‘Devadatto satthari paduṭṭhacitto anatthampi kātuṃ upakkameyyā’’ti ārakkhaggahaṇatthaṃ. Atha devadatto kasmā caṅkamīti? ‘‘Akārako ayaṃ, yadi kārako bhaveyya, na idha āgaccheyyā’’ti attano katadosapaṭicchādanatthaṃ. Kiṃ pana devadatto bhagavato anatthaṃ kātuṃ samattho, bhagavato vā ārakkhakiccaṃ atthīti? Natthi. Tena vuttaṃ ‘‘aṭṭhānametaṃ, ānanda, anavakāso, yaṃ tathāgato parūpakkamena parinibbāyeyyā’’ti (cūḷava. 341). Bhikkhū pana satthari gāravena āgatā. Teneva bhagavā evaṃ vatvā ‘‘vissajjehi, ānanda, bhikkhusaṅgha’’nti vissajjāpesi. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. சங்கமஸுத்தங் • 5. Caṅkamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. சங்கமஸுத்தவண்ணனா • 5. Caṅkamasuttavaṇṇanā
