| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. চঙ্কমসুত্তৰণ্ণনা
5. Caṅkamasuttavaṇṇanā
৯৯. মহাপঞ্ঞেসূতি ৰিপুলপঞ্ঞেসু। নন্তি সারিপুত্তত্থেরং। খন্ধন্তরন্তি খন্ধৰিভাগং, খন্ধানং ৰা অন্তরং ৰিসেসো অত্থীতি খন্ধন্তরো। এস নযো সেসেসুপি। পরিকম্মন্তি ইদ্ধিৰিধাধিগমস্স পুব্বভাগপরিকম্মঞ্চেৰ উত্তরপরিকম্মঞ্চ। আনিসংসন্তি ইদ্ধানিসংসঞ্চেৰ আনিসংসঞ্চ। অধিট্ঠানং ৰিকুব্বনন্তি অধিট্ঠানৰিধানঞ্চেৰ ৰিকুব্বনৰিধানঞ্চ। ৰুত্তনযেনেৰাতি ‘‘পথৰিং পত্থরন্তো ৰিযা’’তিআদিনা।
99.Mahāpaññesūti vipulapaññesu. Nanti sāriputtattheraṃ. Khandhantaranti khandhavibhāgaṃ, khandhānaṃ vā antaraṃ viseso atthīti khandhantaro. Esa nayo sesesupi. Parikammanti iddhividhādhigamassa pubbabhāgaparikammañceva uttaraparikammañca. Ānisaṃsanti iddhānisaṃsañceva ānisaṃsañca. Adhiṭṭhānaṃ vikubbananti adhiṭṭhānavidhānañceva vikubbanavidhānañca. Vuttanayenevāti ‘‘pathaviṃ pattharanto viyā’’tiādinā.
ধুতঙ্গপরিহারন্তি ধুতঙ্গানং পরিহরণৰিধিং। পরিহরণগ্গহণেনেৰ সমাদানং সিদ্ধং হোতীতি তং ন গহিতং। আনিসংসন্তি তংতংধুতঙ্গপরিহরণে দট্ঠব্বং আনিসংসমেৰ। সমোধানন্তি ‘‘এত্তকা পিণ্ডপাতপটিসংযুত্তা, এত্তকা সেনাসনপটিসংযুত্তা’’তি পচ্চযৰসেন অঞ্ঞমঞ্ঞঞ্চ অন্তোগধত্তা। অধিট্ঠানন্তি অধিট্ঠানৰিধিং। ভেদন্তি উক্কট্ঠাদিভেদঞ্চেৰ ভিন্নাকারঞ্চ।
Dhutaṅgaparihāranti dhutaṅgānaṃ pariharaṇavidhiṃ. Pariharaṇaggahaṇeneva samādānaṃ siddhaṃ hotīti taṃ na gahitaṃ. Ānisaṃsanti taṃtaṃdhutaṅgapariharaṇe daṭṭhabbaṃ ānisaṃsameva. Samodhānanti ‘‘ettakā piṇḍapātapaṭisaṃyuttā, ettakā senāsanapaṭisaṃyuttā’’ti paccayavasena aññamaññañca antogadhattā. Adhiṭṭhānanti adhiṭṭhānavidhiṃ. Bhedanti ukkaṭṭhādibhedañceva bhinnākārañca.
পরিকম্মন্তি ‘‘দিব্বচক্খু এৰং উপ্পাদেতব্বং, এৰং ৰিসোধেতব্ব’’ন্তিআদিনা পরিকম্মৰিধানং। আনিসংসন্তি পরেসং অজ্ঝাসযানুরূপাযতনাদিআনিসংসপভেদং। উপক্কিলেসন্তি সাধারণং অসাধারণং দুৰিধং উপক্কিলেসং। ৰিপস্সনাভাৰনুপক্কিলেসা হি দিব্বচক্খুস্স উপক্কিলেসাতি ৰেদিতব্বা।
Parikammanti ‘‘dibbacakkhu evaṃ uppādetabbaṃ, evaṃ visodhetabba’’ntiādinā parikammavidhānaṃ. Ānisaṃsanti paresaṃ ajjhāsayānurūpāyatanādiānisaṃsapabhedaṃ. Upakkilesanti sādhāraṇaṃ asādhāraṇaṃ duvidhaṃ upakkilesaṃ. Vipassanābhāvanupakkilesā hi dibbacakkhussa upakkilesāti veditabbā.
সঙ্খেপৰিত্থারগম্ভীরুত্তানৰিচিত্রকথাদীসূতি সঙ্খেপো ৰিত্থারো গম্ভীরতা উত্তানতা ৰিচিত্রভাৰো নেয্যত্থতা নীতত্থতাতি এৰমাদীসু ধম্মস্স কথেতব্বপ্পকারেসু তং তং কথেতব্বাকারং।
Saṅkhepavitthāragambhīruttānavicitrakathādīsūti saṅkhepo vitthāro gambhīratā uttānatā vicitrabhāvo neyyatthatā nītatthatāti evamādīsu dhammassa kathetabbappakāresu taṃ taṃ kathetabbākāraṃ.
ইতি-সদ্দো আদিঅত্থো, পকারত্থো ৰা। তেন –
Iti-saddo ādiattho, pakārattho vā. Tena –
‘‘আদিম্হি সীলং দেসেয্য, (দী॰ নি॰ অট্ঠ॰ ১.১৯০; ম॰ নি॰ অট্ঠ॰ ১.২৯১)
‘‘Ādimhi sīlaṃ deseyya, (dī. ni. aṭṭha. 1.190; ma. ni. aṭṭha. 1.291)
মজ্ঝে চিত্তং ৰিনিদ্দিসে।
Majjhe cittaṃ viniddise;
অন্তে পঞ্ঞা কথেতব্বা,
Ante paññā kathetabbā,
এসো ধম্মকথাৰিধো’’তি॥ –
Eso dhammakathāvidho’’ti. –
এৰং কথেতব্বাকারং সঙ্গণ্হাতি।
Evaṃ kathetabbākāraṃ saṅgaṇhāti.
‘‘সিথিলং ধনিতঞ্চ দীঘরস্সং, গরুকং লহুকঞ্চ নিগ্গহীতং।
‘‘Sithilaṃ dhanitañca dīgharassaṃ, garukaṃ lahukañca niggahītaṃ;
সম্বন্ধং ৰৰত্থিতং ৰিমুত্তং, দসধা ব্যঞ্জনবুদ্ধিযা পভেদো’’তি॥ (দী॰ নি॰ ১.১৯০; ম॰ নি॰ অট্ঠ॰ ১.২৯১; পরি॰ ৪৮৫) –
Sambandhaṃ vavatthitaṃ vimuttaṃ, dasadhā byañjanabuddhiyā pabhedo’’ti. (dī. ni. 1.190; ma. ni. aṭṭha. 1.291; pari. 485) –
এৰং ৰুত্তং দসৰিধং ব্যঞ্জনবুদ্ধিং। অট্ঠুপ্পত্তিন্তি তস্স তস্স সুত্তস্স জাতকস্স চ অট্ঠুপ্পত্তিং। অনুসন্ধিন্তি পচ্ছানুসন্ধিআদিঅনুসন্ধিং। পুব্বাপরন্তি সম্বন্ধং। ইদং পদং এৰং ৰত্তব্বং, ইদং পুব্বাপরং এৰং গহেতব্বন্তি।
Evaṃ vuttaṃ dasavidhaṃ byañjanabuddhiṃ. Aṭṭhuppattinti tassa tassa suttassa jātakassa ca aṭṭhuppattiṃ. Anusandhinti pacchānusandhiādianusandhiṃ. Pubbāparanti sambandhaṃ. Idaṃ padaṃ evaṃ vattabbaṃ, idaṃ pubbāparaṃ evaṃ gahetabbanti.
কুলসঙ্গণ্হনপরিহারন্তি লাভুপ্পাদনত্থং কুলানং সঙ্গণ্হনৰিধিনো পরিহরণং তন্নিযমিতং একন্তিকং কুলসঙ্গহণৰিধিং।
Kulasaṅgaṇhanaparihāranti lābhuppādanatthaṃ kulānaṃ saṅgaṇhanavidhino pariharaṇaṃ tanniyamitaṃ ekantikaṃ kulasaṅgahaṇavidhiṃ.
চঙ্কমসুত্তৰণ্ণনা নিট্ঠিতা।
Caṅkamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. চঙ্কমসুত্তং • 5. Caṅkamasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. চঙ্কমসুত্তৰণ্ণনা • 5. Caṅkamasuttavaṇṇanā
