Library / Tipiṭaka / ติปิฎก • Tipiṭaka / อิติวุตฺตกปาฬิ • Itivuttakapāḷi

    ๑๑. จรสุตฺตํ

    11. Carasuttaṃ

    ๑๑๐. วุตฺตเญฺหตํ ภควตา, วุตฺตมรหตาติ เม สุตํ –

    110. Vuttañhetaṃ bhagavatā, vuttamarahatāti me sutaṃ –

    ‘‘จรโต เจปิ, ภิกฺขเว, ภิกฺขุโน อุปฺปชฺชติ กามวิตโกฺก วา พฺยาปาทวิตโกฺก วา วิหิํสาวิตโกฺก วาฯ ตเญฺจ, ภิกฺขเว, ภิกฺขุ อธิวาเสติ นปฺปชหติ น วิโนเทติ น พฺยนฺตีกโรติ 1 อนภาวํ คเมติฯ จรมฺปิ, ภิกฺขเว, ภิกฺขุ เอวํภูโต อนาตาปี อโนตฺตาปี 2 สตตํ สมิตํ กุสีโต หีนวีริโยติ วุจฺจติฯ

    ‘‘Carato cepi, bhikkhave, bhikkhuno uppajjati kāmavitakko vā byāpādavitakko vā vihiṃsāvitakko vā. Tañce, bhikkhave, bhikkhu adhivāseti nappajahati na vinodeti na byantīkaroti 3 anabhāvaṃ gameti. Carampi, bhikkhave, bhikkhu evaṃbhūto anātāpī anottāpī 4 satataṃ samitaṃ kusīto hīnavīriyoti vuccati.

    ‘‘ฐิตสฺส เจปิ, ภิกฺขเว, ภิกฺขุโน อุปฺปชฺชติ กามวิตโกฺก วา พฺยาปาทวิตโกฺก วา วิหิํสาวิตโกฺก วาฯ ตเญฺจ, ภิกฺขเว, ภิกฺขุ อธิวาเสติ นปฺปชหติ น วิโนเทติ น พฺยนฺตีกโรติ น อนภาวํ คเมติฯ ฐิโตปิ, ภิกฺขเว, ภิกฺขุ เอวํภูโต อนาตาปี อโนตฺตาปี สตตํ สมิตํ กุสีโต หีนวีริโยติ วุจฺจติฯ

    ‘‘Ṭhitassa cepi, bhikkhave, bhikkhuno uppajjati kāmavitakko vā byāpādavitakko vā vihiṃsāvitakko vā. Tañce, bhikkhave, bhikkhu adhivāseti nappajahati na vinodeti na byantīkaroti na anabhāvaṃ gameti. Ṭhitopi, bhikkhave, bhikkhu evaṃbhūto anātāpī anottāpī satataṃ samitaṃ kusīto hīnavīriyoti vuccati.

    ‘‘นิสินฺนสฺส เจปิ, ภิกฺขเว, ภิกฺขุโน อุปฺปชฺชติ กามวิตโกฺก วา พฺยาปาทวิตโกฺก วา วิหิํสาวิตโกฺก วาฯ ตเญฺจ, ภิกฺขเว, ภิกฺขุ อธิวาเสติ นปฺปชหติ น วิโนเทติ น พฺยนฺตีกโรติ น อนภาวํ คเมติฯ นิสิโนฺนปิ, ภิกฺขเว, ภิกฺขุ เอวํภูโต อนาตาปี อโนตฺตาปี สตตํ สมิตํ กุสีโต หีนวีริโยติ วุจฺจติฯ

    ‘‘Nisinnassa cepi, bhikkhave, bhikkhuno uppajjati kāmavitakko vā byāpādavitakko vā vihiṃsāvitakko vā. Tañce, bhikkhave, bhikkhu adhivāseti nappajahati na vinodeti na byantīkaroti na anabhāvaṃ gameti. Nisinnopi, bhikkhave, bhikkhu evaṃbhūto anātāpī anottāpī satataṃ samitaṃ kusīto hīnavīriyoti vuccati.

    ‘‘สยานสฺส เจปิ, ภิกฺขเว, ภิกฺขุโน ชาครสฺส อุปฺปชฺชติ กามวิตโกฺก วา พฺยาปาทวิตโกฺก วา วิหิํสาวิตโกฺก วาฯ ตเญฺจ, ภิกฺขเว, ภิกฺขุ อธิวาเสติ นปฺปชหติ น วิโนเทติ น พฺยนฺตีกโรติ น อนภาวํ คเมติฯ สยาโนปิ, ภิกฺขเว, ภิกฺขุ ชาคโร เอวํภูโต อนาตาปี อโนตฺตาปี สตตํ สมิตํ กุสีโต หีนวีริโยติ วุจฺจติฯ

    ‘‘Sayānassa cepi, bhikkhave, bhikkhuno jāgarassa uppajjati kāmavitakko vā byāpādavitakko vā vihiṃsāvitakko vā. Tañce, bhikkhave, bhikkhu adhivāseti nappajahati na vinodeti na byantīkaroti na anabhāvaṃ gameti. Sayānopi, bhikkhave, bhikkhu jāgaro evaṃbhūto anātāpī anottāpī satataṃ samitaṃ kusīto hīnavīriyoti vuccati.

    ‘‘จรโต เจปิ, ภิกฺขเว, ภิกฺขุโน อุปฺปชฺชติ กามวิตโกฺก วา พฺยาปาทวิตโกฺก วา วิหิํสาวิตโกฺก วาฯ ตเญฺจ, ภิกฺขเว, ภิกฺขุ นาธิวาเสติ ปชหติ วิโนเทติ พฺยนฺตีกโรติ อนภาวํ คเมติฯ จรมฺปิ, ภิกฺขเว, ภิกฺขุ เอวํภูโต อาตาปี โอตฺตาปี 5 สตตํ สมิตํ อารทฺธวีริโย ปหิตโตฺตติ วุจฺจติฯ

    ‘‘Carato cepi, bhikkhave, bhikkhuno uppajjati kāmavitakko vā byāpādavitakko vā vihiṃsāvitakko vā. Tañce, bhikkhave, bhikkhu nādhivāseti pajahati vinodeti byantīkaroti anabhāvaṃ gameti. Carampi, bhikkhave, bhikkhu evaṃbhūto ātāpī ottāpī 6 satataṃ samitaṃ āraddhavīriyo pahitattoti vuccati.

    ‘‘ฐิตสฺส เจปิ, ภิกฺขเว, ภิกฺขุโน อุปฺปชฺชติ กามวิตโกฺก วา พฺยาปาทวิตโกฺก วา วิหิํสาวิตโกฺก วาฯ ตเญฺจ, ภิกฺขเว, ภิกฺขุ นาธิวาเสติ ปชหติ วิโนเทติ พฺยนฺตีกโรติ อนภาวํ คเมติฯ ฐิโตปิ, ภิกฺขเว, ภิกฺขุ เอวํภูโต อาตาปี โอตฺตาปี สตตํ สมิตํ อารทฺธวีริโย ปหิตโตฺตติ วุจฺจติฯ

    ‘‘Ṭhitassa cepi, bhikkhave, bhikkhuno uppajjati kāmavitakko vā byāpādavitakko vā vihiṃsāvitakko vā. Tañce, bhikkhave, bhikkhu nādhivāseti pajahati vinodeti byantīkaroti anabhāvaṃ gameti. Ṭhitopi, bhikkhave, bhikkhu evaṃbhūto ātāpī ottāpī satataṃ samitaṃ āraddhavīriyo pahitattoti vuccati.

    ‘‘นิสินฺนสฺส เจปิ, ภิกฺขเว, ภิกฺขุโน อุปฺปชฺชติ กามวิตโกฺก วา พฺยาปาทวิตโกฺก วา วิหิํสาวิตโกฺก วาฯ ตเญฺจ, ภิกฺขเว, ภิกฺขุ นาธิวาเสติ ปชหติ วิโนเทติ พฺยนฺตีกโรติ อนภาวํ คเมติฯ นิสิโนฺนปิ, ภิกฺขเว, ภิกฺขุ เอวํภูโต อาตาปี โอตฺตาปี สตตํ สมิตํ อารทฺธวีริโย ปหิตโตฺตติ วุจฺจติฯ

    ‘‘Nisinnassa cepi, bhikkhave, bhikkhuno uppajjati kāmavitakko vā byāpādavitakko vā vihiṃsāvitakko vā. Tañce, bhikkhave, bhikkhu nādhivāseti pajahati vinodeti byantīkaroti anabhāvaṃ gameti. Nisinnopi, bhikkhave, bhikkhu evaṃbhūto ātāpī ottāpī satataṃ samitaṃ āraddhavīriyo pahitattoti vuccati.

    ‘‘สยานสฺส เจปิ, ภิกฺขเว, ภิกฺขุโน ชาครสฺส อุปฺปชฺชติ กามวิตโกฺก วา พฺยาปาทวิตโกฺก วา วิหิํสาวิตโกฺก วาฯ ตเญฺจ, ภิกฺขเว, ภิกฺขุ นาธิวาเสติ ปชหติ วิโนเทติ พฺยนฺตีกโรติ อนภาวํ คเมติฯ สยาโนปิ, ภิกฺขเว, ภิกฺขุ ชาคโร เอวํภูโต อาตาปี โอตฺตาปี สตตํ สมิตํ อารทฺธวีริโย ปหิตโตฺตติ วุจฺจตี’’ติฯ เอตมตฺถํ ภควา อโวจฯ ตเตฺถตํ อิติ วุจฺจติ –

    ‘‘Sayānassa cepi, bhikkhave, bhikkhuno jāgarassa uppajjati kāmavitakko vā byāpādavitakko vā vihiṃsāvitakko vā. Tañce, bhikkhave, bhikkhu nādhivāseti pajahati vinodeti byantīkaroti anabhāvaṃ gameti. Sayānopi, bhikkhave, bhikkhu jāgaro evaṃbhūto ātāpī ottāpī satataṃ samitaṃ āraddhavīriyo pahitattoti vuccatī’’ti. Etamatthaṃ bhagavā avoca. Tatthetaṃ iti vuccati –

    ‘‘จรํ วา ยทิ วา ติฎฺฐํ, นิสิโนฺน อุท วา สยํ;

    ‘‘Caraṃ vā yadi vā tiṭṭhaṃ, nisinno uda vā sayaṃ;

    โย วิตกฺกํ วิตเกฺกติ, ปาปกํ เคหนิสฺสิตํฯ

    Yo vitakkaṃ vitakketi, pāpakaṃ gehanissitaṃ.

    ‘‘กุมฺมคฺคํ ปฎิปโนฺน 7 โส, โมหเนเยฺยสุ มุจฺฉิโต;

    ‘‘Kummaggaṃ paṭipanno 8 so, mohaneyyesu mucchito;

    อภโพฺพ ตาทิโส ภิกฺขุ, ผุฎฺฐุํ สโมฺพธิมุตฺตมํฯ

    Abhabbo tādiso bhikkhu, phuṭṭhuṃ sambodhimuttamaṃ.

    ‘‘โย จ จรํ วา ติฎฺฐํ วา 9, นิสิโนฺน อุท วา สยํ;

    ‘‘Yo ca caraṃ vā tiṭṭhaṃ vā 10, nisinno uda vā sayaṃ;

    วิตกฺกํ สมยิตฺวาน, วิตกฺกูปสเม รโต;

    Vitakkaṃ samayitvāna, vitakkūpasame rato;

    ภโพฺพ โส ตาทิโส ภิกฺขุ, ผุฎฺฐุํ สโมฺพธิมุตฺตม’’นฺติฯ

    Bhabbo so tādiso bhikkhu, phuṭṭhuṃ sambodhimuttama’’nti.

    อยมฺปิ อโตฺถ วุโตฺต ภควตา, อิติ เม สุตนฺติฯ เอกาทสมํฯ

    Ayampi attho vutto bhagavatā, iti me sutanti. Ekādasamaṃ.




    Next: ๑๒. สมฺปนฺนสีลสุตฺตํ • 12. Sampannasīlasuttaṃ




    Footnotes:
    1. พฺยนฺติกโรติ (สี. ปี.), พฺยนฺตํ กโรติ (ก.)
    2. อโนตฺตปฺปี (สพฺพตฺถ) ทุกนิปาเต, องฺคุตฺตเร ๑.๔.๑๑ ปสฺสิตพฺพํ
    3. byantikaroti (sī. pī.), byantaṃ karoti (ka.)
    4. anottappī (sabbattha) dukanipāte, aṅguttare 1.4.11 passitabbaṃ
    5. โอตฺตปฺปี (สพฺพตฺถ)
    6. ottappī (sabbattha)
    7. กุมฺมคฺคปฺปฎิปโนฺน (อ. นิ. ๔.๑๑)
    8. kummaggappaṭipanno (a. ni. 4.11)
    9. โย จรํ วา ยทิ วา ติฎฺฐํ (สฺยา.), โย จรํ วาถ ติฎฺฐํ วา (สี. ก.)
    10. yo caraṃ vā yadi vā tiṭṭhaṃ (syā.), yo caraṃ vātha tiṭṭhaṃ vā (sī. ka.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อิติวุตฺตก-อฎฺฐกถา • Itivuttaka-aṭṭhakathā / ๑๑. จรสุตฺตวณฺณนา • 11. Carasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact