| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
2. жараваг̇г̇о
2. Caravaggo
1. жарасуд̇д̇аван̣н̣анаа
1. Carasuttavaṇṇanā
11. д̣̇уд̇ияасса батамз жарад̇од̇и г̇ажчанд̇асса, жан̇гаманд̇асса ваа. уббаж̇ж̇ад̇и гаамавид̇агго ваад̇и вад̇т̇угаамзсу авийд̇арааг̇ад̇ааяа д̇аад̣̇исз бажжаяз гаамабадисам̣яуд̇д̇о ваа вид̇агго уббаж̇ж̇ад̇и жз , яад̣̇и уббаж̇ж̇ад̇и. б̣яаабаад̣̇авид̇агго ваа вихим̣саавид̇агго ваад̇и аагхаад̇авинаяз висзсзна жид̇д̇асса ад̣̇амид̇ад̇д̇аа аагхаад̇анимид̇д̇з б̣яаабаад̣̇абадисам̣яуд̇д̇о ваа вид̇агго, лзд̣д̣уд̣̇ан̣д̣аад̣̇ийд̇и барахим̣санавасзна вихим̣саабадисам̣яуд̇д̇о ваа вид̇агго уббаж̇ж̇ад̇и жзд̇и самб̣анд̇хо. д̇ам̣ жз бхигку ад̇хиваасзд̇ийд̇и д̇ам̣ яат̇аавуд̇д̇ам̣ гаамавид̇аггаад̣̇им̣ яат̇аабажжаяам̣ ад̇д̇ано жид̇д̇з уббаннам̣ ‘‘ид̇ибааяам̣ вид̇агго баабаго, ид̇иби агусало, ид̇иби сааваж̇ж̇о, со жа ко ад̇д̇аб̣яааб̣аад̇хааяа сам̣вад̇д̇ад̇ий’’д̇иаад̣̇инаа наязна бажжавзгкан̣ааяа абхаавад̇о ад̇хиваасзд̇и ад̇д̇ано жид̇д̇ам̣ ааробзд̇ваа ваасзд̇и. ад̇хиваасзнд̇оязва жа наббаж̇ахад̇и д̇ад̣̇ан̇г̇аад̣̇иббахаанавасзна на бадиниссаж̇ж̇ад̇и. д̇ад̇о зва жа на винод̣̇зд̇и ад̇д̇ано жид̇д̇асанд̇аанад̇о на нуд̣̇ад̇и на нийхарад̇и. д̇ат̇аа авинод̣̇анад̇о на б̣яанд̇ийгарод̇и на виг̇ад̇анд̇ам̣ гарод̇и. аад̇аабий бахид̇ад̇д̇о яат̇аа д̇зсам̣ анд̇оби наавасиссад̇и анд̇амасо бхан̇г̇амад̇д̇амби, звам̣ гарод̇и, аяам̣ бана д̇ат̇аа на гарод̇ийд̇и ад̇т̇о. д̇ат̇аабхууд̇о бана на анабхаавам̣ г̇амзд̇и ану ану абхаавам̣ на г̇амзд̇и. на баж̇ахад̇и жз, на винод̣̇зд̇и жзд̇и ид̇иаад̣̇инаа жз-сад̣̇д̣̇ам̣ яож̇зд̇ваа ад̇т̇о взд̣̇ид̇аб̣б̣о.
11. Dutiyassa paṭhame caratoti gacchantassa, caṅkamantassa vā. Uppajjati kāmavitakko vāti vatthukāmesu avītarāgatāya tādise paccaye kāmapaṭisaṃyutto vā vitakko uppajjati ce , yadi uppajjati. Byāpādavitakko vā vihiṃsāvitakko vāti āghātavinaye visesena cittassa adamitattā āghātanimitte byāpādapaṭisaṃyutto vā vitakko, leḍḍudaṇḍādīti parahiṃsanavasena vihiṃsāpaṭisaṃyutto vā vitakko uppajjati ceti sambandho. Taṃ ce bhikkhu adhivāsetīti taṃ yathāvuttaṃ kāmavitakkādiṃ yathāpaccayaṃ attano citte uppannaṃ ‘‘itipāyaṃ vitakko pāpako, itipi akusalo, itipi sāvajjo, so ca kho attabyābādhāya saṃvattatī’’tiādinā nayena paccavekkhaṇāya abhāvato adhivāseti attano cittaṃ āropetvā vāseti. Adhivāsentoyeva ca nappajahati tadaṅgādippahānavasena na paṭinissajjati. Tato eva ca na vinodeti attano cittasantānato na nudati na nīharati. Tathā avinodanato na byantīkaroti na vigatantaṃ karoti. Ātāpī pahitatto yathā tesaṃ antopi nāvasissati antamaso bhaṅgamattampi, evaṃ karoti, ayaṃ pana tathā na karotīti attho. Tathābhūto pana na anabhāvaṃ gameti anu anu abhāvaṃ na gameti. Na pajahati ce, na vinodeti ceti itiādinā ce-saddaṃ yojetvā attho veditabbo.
звам̣бхууд̇од̇и звам̣ гаамавид̇аггаад̣̇ийхи баабавид̇аггзхи саман̇г̇ибхууд̇о. анаад̇аабийд̇и гилзсаанам̣ аад̇аабаяигасса вийрияасса абхаавзна анаад̇аабий. баабуд̇раасалагкан̣асса од̇д̇аббасса абхаавзна анод̇д̇аабий. сад̇ад̇ам̣ самид̇ам̣ саб̣б̣агаалам̣ ниранд̇арам̣. гусийд̇о хийнавийрияод̇и гусалзхи д̇хаммзхи барихаабаяид̇ваа агусалабагкз гужчид̇ам̣ сийд̣̇анад̇о госаж̇ж̇асаманнааг̇амзна жа гусийд̇о, саммаббад̇хаанавийрияаабхаавзна хийнавийрияо вийрияавирахид̇од̇и вужжад̇и гат̇ийяад̇и. тид̇ассаад̇и г̇аманам̣ убажчинд̣̇ид̇ваа д̇идтад̇о. саяанаирияаабат̇асса висзсад̇о госаж̇ж̇абагкигад̇д̇аа яат̇аа д̇ам̣саман̇г̇ино бхаавид̇ад̇д̇аа самбхаванд̇и, д̇ам̣ д̣̇ассзд̇ум̣ ‘‘ж̇ааг̇арассаа’’д̇и вуд̇д̇ам̣.
Evaṃbhūtoti evaṃ kāmavitakkādīhi pāpavitakkehi samaṅgibhūto. Anātāpīti kilesānaṃ ātāpayikassa vīriyassa abhāvena anātāpī. Pāputrāsalakkhaṇassa ottappassa abhāvena anottāpī. Satataṃ samitaṃ sabbakālaṃ nirantaraṃ. Kusīto hīnavīriyoti kusalehi dhammehi parihāpayitvā akusalapakkhe kucchitaṃ sīdanato kosajjasamannāgamena ca kusīto, sammappadhānavīriyābhāvena hīnavīriyo vīriyavirahitoti vuccati kathīyati. Ṭhitassāti gamanaṃ upacchinditvā tiṭṭhato. Sayanairiyāpathassa visesato kosajjapakkhikattā yathā taṃsamaṅgino bhāvitattā sambhavanti, taṃ dassetuṃ ‘‘jāgarassā’’ti vuttaṃ.
суггабагкз д̇ан̃жз бхигку наад̇хиваасзд̇ийд̇и аарад̣̇д̇хавийрияассаби вихарад̇о анаад̣̇имад̇и сам̣саарз жирагаалабхаавид̇ад̇д̇аа д̇ат̇ааруубабажжаяасамааяог̇з сад̇исаммосзна ваа гаамавид̇аггаад̣̇и уббаж̇ж̇ад̇и жз, д̇ам̣ бхигку ад̇д̇ано жид̇д̇ам̣ ааробзд̇ваа на ваасзд̇и, аб̣бханд̇арз на ваасзд̇ийд̇и ад̇т̇о. анад̇хиваасзнд̇о гим̣ гарод̇и? баж̇ахад̇и чад̣д̣зд̇и. гим̣ гажаварам̣ вияа бидагзнаад̇и? на, абижа ко д̇ам̣ винод̣̇зд̇и нуд̣̇ад̇и нийхарад̇и. гим̣ б̣алиб̣ад̣̇д̣̇ам̣ вияа бад̇од̣̇знаад̇и? на, ат̇а ко б̣яанд̇ийгарод̇и виг̇ад̇анд̇ам̣ гарод̇и, яат̇аа д̇зсам̣ анд̇оби наавасиссад̇и анд̇амасо бхан̇г̇амад̇д̇амби, д̇ат̇аа д̇з гарод̇и. гат̇ам̣ бана д̇з д̇ат̇аа гарод̇и? анабхаавам̣ г̇амзд̇и ану ану абхаавам̣ г̇амзд̇и, вигкамбханаббахаанзна яат̇аа сувигкамбхид̇аа хонд̇и, д̇ат̇аа нз гарод̇ийд̇и вуд̇д̇ам̣ ход̇и.
Sukkapakkhe tañce bhikkhu nādhivāsetīti āraddhavīriyassapi viharato anādimati saṃsāre cirakālabhāvitattā tathārūpapaccayasamāyoge satisammosena vā kāmavitakkādi uppajjati ce, taṃ bhikkhu attano cittaṃ āropetvā na vāseti, abbhantare na vāsetīti attho. Anadhivāsento kiṃ karoti? Pajahati chaḍḍeti. Kiṃ kacavaraṃ viya piṭakenāti? Na, apica kho taṃ vinodeti nudati nīharati. Kiṃ balibaddaṃ viya patodenāti? Na, atha kho byantīkaroti vigatantaṃ karoti, yathā tesaṃ antopi nāvasissati antamaso bhaṅgamattampi, tathā te karoti. Kathaṃ pana te tathā karoti? Anabhāvaṃ gameti anu anu abhāvaṃ gameti, vikkhambhanappahānena yathā suvikkhambhitā honti, tathā ne karotīti vuttaṃ hoti.
звам̣бхууд̇од̇иаад̣̇ийсу звам̣ гаамавид̇аггаад̣̇ийнам̣ анад̇хиваасзна сувисуд̣̇д̇хаасаяо самаано д̇ааяа жа аасаяасамбад̇д̇ияаа д̇аннимид̇д̇ааяа жа баяог̇асамбад̇д̇ияаа барисуд̣̇д̇хасийло инд̣̇риязсу г̇уд̇д̇ад̣̇вааро бхож̇анз мад̇д̇ан̃н̃уу сад̇исамбаж̇ан̃н̃зна саманнааг̇ад̇о ж̇ааг̇арияам̣ ануяуд̇д̇о д̇ад̣̇ан̇г̇аад̣̇ивасзна гилзсаанам̣ аад̇аабаналагкан̣зна вийриязна саманнааг̇ад̇ад̇д̇аа аад̇аабий. саб̣б̣асо баабуд̇раасзна саманнааг̇ад̇ад̇д̇аа од̇д̇аабий сад̇ад̇ам̣ рад̇д̇инд̣̇ивам̣. самид̇ам̣ ниранд̇арам̣ самат̇авибассанаануяог̇авасзна жад̇уб̣б̣ид̇хасаммаббад̇хаанасид̣̇д̇хияаа аарад̣̇д̇хавийрияо бахид̇ад̇д̇о. ниб̣б̣аанам̣ бад̇и бзсид̇ажид̇д̇од̇и вужжад̇и гат̇ийяад̇ийд̇и ад̇т̇о.
Evaṃbhūtotiādīsu evaṃ kāmavitakkādīnaṃ anadhivāsena suvisuddhāsayo samāno tāya ca āsayasampattiyā tannimittāya ca payogasampattiyā parisuddhasīlo indriyesu guttadvāro bhojane mattaññū satisampajaññena samannāgato jāgariyaṃ anuyutto tadaṅgādivasena kilesānaṃ ātāpanalakkhaṇena vīriyena samannāgatattā ātāpī. Sabbaso pāputrāsena samannāgatattā ottāpī satataṃ rattindivaṃ. Samitaṃ nirantaraṃ samathavipassanānuyogavasena catubbidhasammappadhānasiddhiyā āraddhavīriyo pahitatto. Nibbānaṃ pati pesitacittoti vuccati kathīyatīti attho.
г̇аат̇аасу г̇зханиссид̇анд̇и зд̇т̇а г̇зхаваасийхи абарижжад̇д̇ад̇д̇аа г̇зхаваасисабхаавад̇д̇аа г̇зхад̇хаммад̇д̇аа ваа г̇зхам̣ вужжад̇и вад̇т̇угаамо. ат̇а ваа г̇зхаббадиб̣ад̣̇д̇хабхаавад̇о, гилзсагаамаанам̣ ниваасадтаанабхаавад̇о ваа г̇зхаад̇и вужжанд̇и, д̇ам̣вад̇т̇угад̇д̇аа гаамавид̇аггаад̣̇и г̇зханиссид̇ам̣ наама. гуммаг̇г̇абадибаннод̇и яасмаа арияамаг̇г̇асса уббат̇абхаавад̇о абхиж̇жхаад̣̇аяо д̇ад̣̇згадтад̇хаммаа жа гуммаг̇г̇о, д̇асмаа гаамавид̇аггаад̣̇иб̣ахуло гуммаг̇г̇абадибанно. моханзяязсу мужчид̇од̇и мохасам̣вад̇д̇аниязсу руубаад̣̇ийсу мужчид̇о саммад̇д̇о аж̇жхобанно. самб̣од̇хинд̇и арияамаг̇г̇ан̃аан̣ам̣. пудтанд̇и пусид̇ум̣ бад̇д̇ум̣ баабо со д̇аад̣̇исо мижчаасан̇габбаг̇ожаро буг̇г̇ало абхаб̣б̣о, на гад̣̇аажи д̇ам̣ баабун̣аад̇ийд̇и ад̇т̇о.
Gāthāsu gehanissitanti ettha gehavāsīhi apariccattattā gehavāsisabhāvattā gehadhammattā vā gehaṃ vuccati vatthukāmo. Atha vā gehappaṭibaddhabhāvato, kilesakāmānaṃ nivāsaṭṭhānabhāvato vā gehāti vuccanti, taṃvatthukattā kāmavitakkādi gehanissitaṃ nāma. Kummaggapaṭipannoti yasmā ariyamaggassa uppathabhāvato abhijjhādayo tadekaṭṭhadhammā ca kummaggo, tasmā kāmavitakkādibahulo kummaggapaṭipanno. Mohaneyyesu mucchitoti mohasaṃvattaniyesu rūpādīsu mucchito sammatto ajjhopanno. Sambodhinti ariyamaggañāṇaṃ. Phuṭṭhanti phusituṃ pattuṃ pāpo so tādiso micchāsaṅkappagocaro puggalo abhabbo, na kadāci taṃ pāpuṇātīti attho.
вид̇аггам̣ самаяид̇ваанаад̇и яат̇аавуд̇д̇ам̣ мижчаавид̇аггам̣ бадисан̇каанабхааванааб̣алзна вуубасамзд̇ваа. вид̇аггуубасамз рад̇од̇и наваннамби махаавид̇аггаанам̣ ажжанд̇уубасамабхууд̇з арахад̇д̇з, ниб̣б̣аанз зва ваа аж̇жхаасаязна рад̇о абхирад̇о. бхаб̣б̣о сод̇и со яат̇аавуд̇д̇о саммаабадибаж̇ж̇амаано буг̇г̇ало буб̣б̣абхааг̇з самат̇авибассанааб̣алзна саб̣б̣авид̇аггз яат̇аарахам̣ д̇ад̣̇ан̇г̇аад̣̇ивасзна вуубасамзд̇ваа тид̇о вибассанам̣ уссуггаабзд̇ваа маг̇г̇абадибаадияаа арахад̇д̇амаг̇г̇ан̃аан̣асан̇каад̇ам̣ ниб̣б̣аанасан̇каад̇ан̃жа ануд̇д̇арам̣ самб̣од̇хим̣ пудтум̣ ад̇хиг̇анд̇ум̣ бхаб̣б̣о арахаа. звамзд̇т̇а баал̣иван̣н̣анаа взд̣̇ид̇аб̣б̣аа.
Vitakkaṃ samayitvānāti yathāvuttaṃ micchāvitakkaṃ paṭisaṅkhānabhāvanābalena vūpasametvā. Vitakkūpasame ratoti navannampi mahāvitakkānaṃ accantūpasamabhūte arahatte, nibbāne eva vā ajjhāsayena rato abhirato. Bhabbo soti so yathāvutto sammāpaṭipajjamāno puggalo pubbabhāge samathavipassanābalena sabbavitakke yathārahaṃ tadaṅgādivasena vūpasametvā ṭhito vipassanaṃ ussukkāpetvā maggapaṭipāṭiyā arahattamaggañāṇasaṅkhātaṃ nibbānasaṅkhātañca anuttaraṃ sambodhiṃ phuṭṭhuṃ adhigantuṃ bhabbo arahā. Evamettha pāḷivaṇṇanā veditabbā.
жарасуд̇д̇аван̣н̣анаа нидтид̇аа.
Carasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 1. жарасуд̇д̇ам̣ • 1. Carasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 1. жарасуд̇д̇аван̣н̣анаа • 1. Carasuttavaṇṇanā
