| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
6. சாரித்தஸிக்கா²பத³வண்ணனா
6. Cārittasikkhāpadavaṇṇanā
ஸப⁴த்தோ ஸமானோதி நிமந்தனப⁴த்தோதி போராணா. ஸந்தங் பி⁴க்கு²ங், அனாபுச்சா², புரேப⁴த்தங் பச்சா²ப⁴த்தங், அஞ்ஞத்ர ஸமயாதி அயமெத்த² சதுப்³பி³தா⁴ அனுபஞ்ஞத்தி. தத்த² ஸமயா த்³வே ஸமயா. ப⁴த்தியக⁴ரந்தி நிமந்திதஸ்ஸ க⁴ரங் வா ஸலாகாப⁴த்தாதி³தா³யகானங் வா க⁴ரங். ‘‘ஸமுட்டா²னாதீ³னி பட²மகதி²னஸதி³ஸானி, இத³ங் பன கிரியாகிரிய’’ந்தி பாடோ², ‘‘இத⁴ நிமந்தனா அகப்பியனிமந்தனா’’தி ஏகே.
Sabhattosamānoti nimantanabhattoti porāṇā. Santaṃ bhikkhuṃ, anāpucchā, purebhattaṃ pacchābhattaṃ, aññatra samayāti ayamettha catubbidhā anupaññatti. Tattha samayā dve samayā. Bhattiyagharanti nimantitassa gharaṃ vā salākābhattādidāyakānaṃ vā gharaṃ. ‘‘Samuṭṭhānādīni paṭhamakathinasadisāni, idaṃ pana kiriyākiriya’’nti pāṭho, ‘‘idha nimantanā akappiyanimantanā’’ti eke.
புரேப⁴த்தஞ்ச பிண்டா³ய, சரித்வா யதி³ பு⁴ஞ்ஜதி;
Purebhattañca piṇḍāya, caritvā yadi bhuñjati;
ஸியா பரம்பராபத்தி, பச்சா²ப⁴த்தங் ந ஸா ஸியா.
Siyā paramparāpatti, pacchābhattaṃ na sā siyā.
பச்சா²ப⁴த்தஞ்ச க³மிகோ, புப்³ப³கே³ஹங் யதி³ க³ச்சே²;
Pacchābhattañca gamiko, pubbagehaṃ yadi gacche;
ஏகே ஆபத்தியேவாதி, அனாபத்தீதி ஏகச்சே.
Eke āpattiyevāti, anāpattīti ekacce.
குலந்தரஸ்ஸோக்கமனே, ஆபத்திமதயோ ஹி தே;
Kulantarassokkamane, āpattimatayo hi te;
ஸமானப⁴த்தபச்சாஸா, இதி ஆஹு இதா⁴பரே.
Samānabhattapaccāsā, iti āhu idhāpare.
மதா க³ணிகப⁴த்தேன, ஸமெந்தி நங் நிமந்தனே;
Matā gaṇikabhattena, samenti naṃ nimantane;
விஸ்ஸஜ்ஜனங் ஸமானந்தி, ஏகே ஸம்முக²தாபரே.
Vissajjanaṃ samānanti, eke sammukhatāpare.
ஸன்னிட்டா²னத்தி²கேஹேவ, விசாரேதப்³ப³பே⁴த³தோ;
Sanniṭṭhānatthikeheva, vicāretabbabhedato;
விஞ்ஞூ சாரித்தமிச்சேவ, ஸிக்கா²பத³மித³ங் விதூ³. (வஜிர॰ டீ॰ பாசித்திய 294);
Viññū cārittamicceva, sikkhāpadamidaṃ vidū. (vajira. ṭī. pācittiya 294);
சாரித்தஸிக்கா²பத³வண்ணனா நிட்டி²தா.
Cārittasikkhāpadavaṇṇanā niṭṭhitā.
