| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
6. சாரித்தஸிக்கா²பத³வண்ணனா
6. Cārittasikkhāpadavaṇṇanā
298. ச²ட்டே² ‘‘பரியேஸித்வா ஆரோசனகிச்சங் நாம நத்தீ²’’தி வுத்தத்தா யோ அபரியேஸிதப்³போ³ உபஸங்கமிதுங் யுத்தட்டா²னே தி³ஸ்ஸதி, ஸோ ஸசேபி பகதிவசனஸ்ஸ ஸவனூபசாரங் அதிக்கம்ம டி²தோ உபக³ந்த்வா ஆபுச்சி²தப்³போ³. தேனாஹ ‘‘அபி ச…பே॰… யங் பஸ்ஸதி, ஸோ ஆபுச்சி²தப்³போ³’’திஆதி³.
298. Chaṭṭhe ‘‘pariyesitvā ārocanakiccaṃ nāma natthī’’ti vuttattā yo apariyesitabbo upasaṅkamituṃ yuttaṭṭhāne dissati, so sacepi pakativacanassa savanūpacāraṃ atikkamma ṭhito upagantvā āpucchitabbo. Tenāha ‘‘api ca…pe… yaṃ passati, so āpucchitabbo’’tiādi.
302. அனாபத்திவாரே செத்த² அந்தராராமாதீ³னஞ்ஞேவ வுத்தத்தா விஹாரதோ கா³மவீதி²ங் அனுஞ்ஞாதகாரணங் வினா அதிக்கமந்தஸ்ஸாபி ஆபத்தி ஹோதி, ந பன க⁴ரூபசாரங் அதிக்கமந்தஸ்ஸேவ.
302. Anāpattivāre cettha antarārāmādīnaññeva vuttattā vihārato gāmavīthiṃ anuññātakāraṇaṃ vinā atikkamantassāpi āpatti hoti, na pana gharūpacāraṃ atikkamantasseva.
யங் பன பாளியங் ‘‘அஞ்ஞஸ்ஸ க⁴ரூபசாரங் ஓக்கமந்தஸ்ஸ…பே॰… பட²மங் பாத³ங் உம்மாரங் அதிக்காமேதீ’’திஆதி³ வுத்தங். தங் கா³மே பவிட்ட²ங் ஸந்தா⁴ய வுத்தங், ததா²பி அஞ்ஞஸ்ஸ க⁴ரூபசாரங் அனோக்கமித்வா வீதி²மஜ்ஜே²னேவ க³ந்த்வா இச்சி²திச்சி²தக⁴ரத்³வாராபி⁴முகே² ட²த்வா மனுஸ்ஸே ஓலோகெத்வா க³ச்ச²ந்தஸ்ஸாபி பாசித்தியமேவ. தத்த² கேசி ‘‘வீதி²யங் அதிக்கமந்தஸ்ஸ க⁴ரூபசாரக³ணனாய ஆபத்தியோ’’தி வத³ந்தி. அஞ்ஞே பன ‘‘யானி குலானி உத்³தி³ஸ்ஸ க³தோ, தேஸங் க³ணனாயா’’தி. பஞ்சன்னங் போ⁴ஜனானங் அஞ்ஞதரேன நிமந்தனஸாதி³யனங், ஸந்தங் பி⁴க்கு²ங் அனாபுச்ச²னா, ப⁴த்தியக⁴ரதோ அஞ்ஞக⁴ரூபஸங்கமனங், மஜ்ஜ²ன்ஹிகானதிக்கமோ, ஸமயாபதா³னங் அபா⁴வோதி இமானெத்த² பஞ்ச அங்கா³னி.
Yaṃ pana pāḷiyaṃ ‘‘aññassa gharūpacāraṃ okkamantassa…pe… paṭhamaṃ pādaṃ ummāraṃ atikkāmetī’’tiādi vuttaṃ. Taṃ gāme paviṭṭhaṃ sandhāya vuttaṃ, tathāpi aññassa gharūpacāraṃ anokkamitvā vīthimajjheneva gantvā icchiticchitagharadvārābhimukhe ṭhatvā manusse oloketvā gacchantassāpi pācittiyameva. Tattha keci ‘‘vīthiyaṃ atikkamantassa gharūpacāragaṇanāya āpattiyo’’ti vadanti. Aññe pana ‘‘yāni kulāni uddissa gato, tesaṃ gaṇanāyā’’ti. Pañcannaṃ bhojanānaṃ aññatarena nimantanasādiyanaṃ, santaṃ bhikkhuṃ anāpucchanā, bhattiyagharato aññagharūpasaṅkamanaṃ, majjhanhikānatikkamo, samayāpadānaṃ abhāvoti imānettha pañca aṅgāni.
சாரித்தஸிக்கா²பத³வண்ணனா நிட்டி²தா.
Cārittasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 5. அசேலகவக்³கோ³ • 5. Acelakavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 6. சாரித்தஸிக்கா²பத³வண்ணனா • 6. Cārittasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. சாரித்தஸிக்கா²பத³வண்ணனா • 6. Cārittasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. சாரித்தஸிக்கா²பத³ங் • 6. Cārittasikkhāpadaṃ
