| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৬. চারিত্তসিক্খাপদৰণ্ণনা
6. Cārittasikkhāpadavaṇṇanā
২৯৪. ছট্ঠসিক্খাপদে – দেথাৰুসো ভত্তন্তি এত্থ তং কির ভত্তং অভিহটং অহোসি, তস্মা এৰমাহংসু। অনভিহটে পন এৰং ৰত্তুং ন লব্ভতি, পযুত্তৰাচা হোতি।
294. Chaṭṭhasikkhāpade – dethāvuso bhattanti ettha taṃ kira bhattaṃ abhihaṭaṃ ahosi, tasmā evamāhaṃsu. Anabhihaṭe pana evaṃ vattuṃ na labbhati, payuttavācā hoti.
২৯৫. তেন হি ভিক্খৰে পটিগ্গহেত্ৰা নিক্খিপথাতি ইদং পন ভগৰা কুলস্স সদ্ধানুরক্খণত্থায আহ। যদি ‘‘ভাজেত্ৰা খাদথা’’তি ৰদেয্য, মনুস্সানং পসাদঞ্ঞথত্তং সিযা। উস্সারিযিত্থাতি পটিহরিযিত্থ; ঘরংযেৰ নং গহেত্ৰা অগমংসূতি ৰুত্তং হোতি।
295.Tena hi bhikkhave paṭiggahetvā nikkhipathāti idaṃ pana bhagavā kulassa saddhānurakkhaṇatthāya āha. Yadi ‘‘bhājetvā khādathā’’ti vadeyya, manussānaṃ pasādaññathattaṃ siyā. Ussāriyitthāti paṭihariyittha; gharaṃyeva naṃ gahetvā agamaṃsūti vuttaṃ hoti.
২৯৮. সন্তং ভিক্খুন্তি এত্থ কিত্তাৰতা সন্তো হোতি, কিত্তাৰতা অসন্তোতি? অন্তোৰিহারে যত্থ ঠিতস্স কুলানি পযিরুপাসনচিত্তং উপ্পন্নং, ততো পট্ঠায যং পস্সে ৰা অভিমুখে ৰা পস্সতি, যস্স সক্কা হোতি পকতিৰচনেন আরোচেতুং, অযং সন্তো নাম। ইতো চিতো চ পরিযেসিত্ৰা আরোচনকিচ্চং নাম নত্থি। যো হি এৰং পরিযেসিতব্বো, সো অসন্তোযেৰ। অপিচ অন্তোউপচারসীমায ভিক্খুং দিস্ৰা আপুচ্ছিস্সামীতি গন্ত্ৰা তত্থ যং পস্সতি, সো আপুচ্ছিতব্বো। নো চে পস্সতি, অসন্তং ভিক্খুং অনাপুচ্ছা পৰিট্ঠো নাম হোতি।
298.Santaṃ bhikkhunti ettha kittāvatā santo hoti, kittāvatā asantoti? Antovihāre yattha ṭhitassa kulāni payirupāsanacittaṃ uppannaṃ, tato paṭṭhāya yaṃ passe vā abhimukhe vā passati, yassa sakkā hoti pakativacanena ārocetuṃ, ayaṃ santo nāma. Ito cito ca pariyesitvā ārocanakiccaṃ nāma natthi. Yo hi evaṃ pariyesitabbo, so asantoyeva. Apica antoupacārasīmāya bhikkhuṃ disvā āpucchissāmīti gantvā tattha yaṃ passati, so āpucchitabbo. No ce passati, asantaṃ bhikkhuṃ anāpucchā paviṭṭho nāma hoti.
৩০২. অন্তরারামন্তি অন্তোগামে ৰিহারো হোতি, তং গচ্ছতি। ভত্তিযঘরন্তি নিমন্তিতঘরং ৰা সলাকভত্তাদিদাযকানং ৰা ঘরং। আপদাসূতি জীৰিতব্রহ্মচরিযন্তরাযেসু সতি গন্তুং ৰট্টতি। সেসমেত্থ উত্তানমেৰ।
302.Antarārāmanti antogāme vihāro hoti, taṃ gacchati. Bhattiyagharanti nimantitagharaṃ vā salākabhattādidāyakānaṃ vā gharaṃ. Āpadāsūti jīvitabrahmacariyantarāyesu sati gantuṃ vaṭṭati. Sesamettha uttānameva.
কথিনসমুট্ঠানং – কাযৰাচতো কাযৰাচাচিত্ততো চ সমুট্ঠাতি, কিরিযাকিরযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি।
Kathinasamuṭṭhānaṃ – kāyavācato kāyavācācittato ca samuṭṭhāti, kiriyākirayaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
চারিত্তসিক্খাপদং ছট্ঠং।
Cārittasikkhāpadaṃ chaṭṭhaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৫. অচেলকৰগ্গো • 5. Acelakavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৬. চারিত্তসিক্খাপদৰণ্ণনা • 6. Cārittasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৬. চারিত্তসিক্খাপদৰণ্ণনা • 6. Cārittasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৬. চারিত্তসিক্খাপদৰণ্ণনা • 6. Cārittasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৬. চারিত্তসিক্খাপদং • 6. Cārittasikkhāpadaṃ
