| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৬. চারিত্তসিক্খাপদৰণ্ণনা
6. Cārittasikkhāpadavaṇṇanā
অন্তোউপচারসীমায দস্সনূপচারে ভিক্খুং দিস্ৰাতি যত্থ ঠিতস্স কুলানি পযিরুপাসনচিত্তং উপ্পন্নং, ততো পট্ঠায গচ্ছন্তো অন্তোউপচারসীমায দস্সনূপচারে ভিক্খুং পস্সে ৰা অভিমুখে ৰা দিস্ৰা। পকতিৰচনেনাতি যং দ্ৰাদসহত্থব্ভন্তরে ঠিতেন সোতুং সক্কা, তাদিসেন ৰচনেন, ইতো চিতো চ পরিযেসিত্ৰা আরোচনকিচ্চং পন নত্থি। যো হি এৰং পরিযেসিতব্বো, সো অসন্তোযেৰ। তেনাহ ‘‘তাদিস’’ন্তিআদি। অনাপুচ্ছিত্ৰাতি অনারোচেত্ৰা।
Antoupacārasīmāya dassanūpacāre bhikkhuṃ disvāti yattha ṭhitassa kulāni payirupāsanacittaṃ uppannaṃ, tato paṭṭhāya gacchanto antoupacārasīmāya dassanūpacāre bhikkhuṃ passe vā abhimukhe vā disvā. Pakativacanenāti yaṃ dvādasahatthabbhantare ṭhitena sotuṃ sakkā, tādisena vacanena, ito cito ca pariyesitvā ārocanakiccaṃ pana natthi. Yo hi evaṃ pariyesitabbo, so asantoyeva. Tenāha ‘‘tādisa’’ntiādi. Anāpucchitvāti anārocetvā.
অন্তরারামভিক্খুনুপস্সযতিত্থিযসেয্যপটিক্কমনভত্তিযঘরানীতি এত্থ অন্তরারামন্তি অন্তোগামে ৰিহারো। পটিক্কমনন্তি আসনসালা। ভত্তিযঘরন্তি নিমন্তিতঘরং ৰা সলাকভত্তাদিদাযকানং ৰা ঘরং। আপদাসূতি জীৰিতব্রহ্মচরিযন্তরাযেসু। কিরিযাকিরিযন্তি এত্থ কুলেসু চারিত্তাপজ্জনং কিরিযং, অনাপুচ্ছনং অকিরিযন্তি ৰেদিতব্বং।
Antarārāmabhikkhunupassayatitthiyaseyyapaṭikkamanabhattiyagharānīti ettha antarārāmanti antogāme vihāro. Paṭikkamananti āsanasālā. Bhattiyagharanti nimantitagharaṃ vā salākabhattādidāyakānaṃ vā gharaṃ. Āpadāsūti jīvitabrahmacariyantarāyesu. Kiriyākiriyanti ettha kulesu cārittāpajjanaṃ kiriyaṃ, anāpucchanaṃ akiriyanti veditabbaṃ.
চারিত্তসিক্খাপদৰণ্ণনা নিট্ঠিতা।
Cārittasikkhāpadavaṇṇanā niṭṭhitā.
