| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
6. චාරිත්‌තසික්‌ඛාපදවණ්‌ණනා
6. Cārittasikkhāpadavaṇṇanā
294. ඡට්‌ඨසික්‌ඛාපදෙ – දෙථාවුසො භත්‌තන්‌ති එත්‌ථ තං කිර භත්‌තං අභිහටං අහොසි, තස්‌මා එවමාහංසු. අනභිහටෙ පන එවං වත්‌තුං න ලබ්‌භති, පයුත්‌තවාචා හොති.
294. Chaṭṭhasikkhāpade – dethāvuso bhattanti ettha taṃ kira bhattaṃ abhihaṭaṃ ahosi, tasmā evamāhaṃsu. Anabhihaṭe pana evaṃ vattuṃ na labbhati, payuttavācā hoti.
295. තෙන හි භික්‌ඛවෙ පටිග්‌ගහෙත්‌වා නික්‌ඛිපථාති ඉදං පන භගවා කුලස්‌ස සද්‌ධානුරක්‌ඛණත්‌ථාය ආහ. යදි ‘‘භාජෙත්‌වා ඛාදථා’’ති වදෙය්‍ය, මනුස්‌සානං පසාදඤ්‌ඤථත්‌තං සියා. උස්‌සාරියිත්‌ථාති පටිහරියිත්‌ථ; ඝරංයෙව නං ගහෙත්‌වා අගමංසූති වුත්‌තං හොති.
295.Tena hi bhikkhave paṭiggahetvā nikkhipathāti idaṃ pana bhagavā kulassa saddhānurakkhaṇatthāya āha. Yadi ‘‘bhājetvā khādathā’’ti vadeyya, manussānaṃ pasādaññathattaṃ siyā. Ussāriyitthāti paṭihariyittha; gharaṃyeva naṃ gahetvā agamaṃsūti vuttaṃ hoti.
298. සන්‌තං භික්‌ඛුන්‌ති එත්‌ථ කිත්‌තාවතා සන්‌තො හොති, කිත්‌තාවතා අසන්‌තොති? අන්‌තොවිහාරෙ යත්‌ථ ඨිතස්‌ස කුලානි පයිරුපාසනචිත්‌තං උප්‌පන්‌නං, තතො පට්‌ඨාය යං පස්‌සෙ වා අභිමුඛෙ වා පස්‌සති, යස්‌ස සක්‌කා හොති පකතිවචනෙන ආරොචෙතුං, අයං සන්‌තො නාම. ඉතො චිතො ච පරියෙසිත්‌වා ආරොචනකිච්‌චං නාම නත්‌ථි. යො හි එවං පරියෙසිතබ්‌බො, සො අසන්‌තොයෙව. අපිච අන්‌තොඋපචාරසීමාය භික්‌ඛුං දිස්‌වා ආපුච්‌ඡිස්‌සාමීති ගන්‌ත්‌වා තත්‌ථ යං පස්‌සති, සො ආපුච්‌ඡිතබ්‌බො. නො චෙ පස්‌සති, අසන්‌තං භික්‌ඛුං අනාපුච්‌ඡා පවිට්‌ඨො නාම හොති.
298.Santaṃ bhikkhunti ettha kittāvatā santo hoti, kittāvatā asantoti? Antovihāre yattha ṭhitassa kulāni payirupāsanacittaṃ uppannaṃ, tato paṭṭhāya yaṃ passe vā abhimukhe vā passati, yassa sakkā hoti pakativacanena ārocetuṃ, ayaṃ santo nāma. Ito cito ca pariyesitvā ārocanakiccaṃ nāma natthi. Yo hi evaṃ pariyesitabbo, so asantoyeva. Apica antoupacārasīmāya bhikkhuṃ disvā āpucchissāmīti gantvā tattha yaṃ passati, so āpucchitabbo. No ce passati, asantaṃ bhikkhuṃ anāpucchā paviṭṭho nāma hoti.
302. අන්‌තරාරාමන්‌ති අන්‌තොගාමෙ විහාරො හොති, තං ගච්‌ඡති. භත්‌තියඝරන්‌ති නිමන්‌තිතඝරං වා සලාකභත්‌තාදිදායකානං වා ඝරං. ආපදාසූති ජීවිතබ්‍රහ්‌මචරියන්‌තරායෙසු සති ගන්‌තුං වට්‌ටති. සෙසමෙත්‌ථ උත්‌තානමෙව.
302.Antarārāmanti antogāme vihāro hoti, taṃ gacchati. Bhattiyagharanti nimantitagharaṃ vā salākabhattādidāyakānaṃ vā gharaṃ. Āpadāsūti jīvitabrahmacariyantarāyesu sati gantuṃ vaṭṭati. Sesamettha uttānameva.
කථිනසමුට්‌ඨානං – කායවාචතො කායවාචාචිත්‌තතො ච සමුට්‌ඨාති, කිරියාකිරයං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, වචීකම්‌මං, තිචිත්‌තං, තිවෙදනන්‌ති.
Kathinasamuṭṭhānaṃ – kāyavācato kāyavācācittato ca samuṭṭhāti, kiriyākirayaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
චාරිත්‌තසික්‌ඛාපදං ඡට්‌ඨං.
Cārittasikkhāpadaṃ chaṭṭhaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 5. අචෙලකවග්‌ගො • 5. Acelakavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 6. චාරිත්‌තසික්‌ඛාපදවණ්‌ණනා • 6. Cārittasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. චාරිත්‌තසික්‌ඛාපදවණ්‌ණනා • 6. Cārittasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 6. චාරිත්‌තසික්‌ඛාපදවණ්‌ණනා • 6. Cārittasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 6. චාරිත්‌තසික්‌ඛාපදං • 6. Cārittasikkhāpadaṃ
