| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
6. චාරිත්‌තසික්‌ඛාපදවණ්‌ණනා
6. Cārittasikkhāpadavaṇṇanā
298. ඡට්‌ඨෙ ‘‘පරියෙසිත්‌වා ආරොචනකිච්‌චං නාම නත්‌ථී’’ති වුත්‌තත්‌තා යො අපරියෙසිතබ්‌බො උපසඞ්‌කමිතුං යුත්‌තට්‌ඨානෙ දිස්‌සති, සො සචෙපි පකතිවචනස්‌ස සවනූපචාරං අතික්‌කම්‌ම ඨිතො උපගන්‌ත්‌වා ආපුච්‌ඡිතබ්‌බො. තෙනාහ ‘‘අපි ච…පෙ.… යං පස්‌සති, සො ආපුච්‌ඡිතබ්‌බො’’තිආදි.
298. Chaṭṭhe ‘‘pariyesitvā ārocanakiccaṃ nāma natthī’’ti vuttattā yo apariyesitabbo upasaṅkamituṃ yuttaṭṭhāne dissati, so sacepi pakativacanassa savanūpacāraṃ atikkamma ṭhito upagantvā āpucchitabbo. Tenāha ‘‘api ca…pe… yaṃ passati, so āpucchitabbo’’tiādi.
302. අනාපත්‌තිවාරෙ චෙත්‌ථ අන්‌තරාරාමාදීනඤ්‌ඤෙව වුත්‌තත්‌තා විහාරතො ගාමවීථිං අනුඤ්‌ඤාතකාරණං විනා අතික්‌කමන්‌තස්‌සාපි ආපත්‌ති හොති, න පන ඝරූපචාරං අතික්‌කමන්‌තස්‌සෙව.
302. Anāpattivāre cettha antarārāmādīnaññeva vuttattā vihārato gāmavīthiṃ anuññātakāraṇaṃ vinā atikkamantassāpi āpatti hoti, na pana gharūpacāraṃ atikkamantasseva.
යං පන පාළියං ‘‘අඤ්‌ඤස්‌ස ඝරූපචාරං ඔක්‌කමන්‌තස්‌ස…පෙ.… පඨමං පාදං උම්‌මාරං අතික්‌කාමෙතී’’තිආදි වුත්‌තං. තං ගාමෙ පවිට්‌ඨං සන්‌ධාය වුත්‌තං, තථාපි අඤ්‌ඤස්‌ස ඝරූපචාරං අනොක්‌කමිත්‌වා වීථිමජ්‌ඣෙනෙව ගන්‌ත්‌වා ඉච්‌ඡිතිච්‌ඡිතඝරද්‌වාරාභිමුඛෙ ඨත්‌වා මනුස්‌සෙ ඔලොකෙත්‌වා ගච්‌ඡන්‌තස්‌සාපි පාචිත්‌තියමෙව. තත්‌ථ කෙචි ‘‘වීථියං අතික්‌කමන්‌තස්‌ස ඝරූපචාරගණනාය ආපත්‌තියො’’ති වදන්‌ති. අඤ්‌ඤෙ පන ‘‘යානි කුලානි උද්‌දිස්‌ස ගතො, තෙසං ගණනායා’’ති. පඤ්‌චන්‌නං භොජනානං අඤ්‌ඤතරෙන නිමන්‌තනසාදියනං, සන්‌තං භික්‌ඛුං අනාපුච්‌ඡනා, භත්‌තියඝරතො අඤ්‌ඤඝරූපසඞ්‌කමනං, මජ්‌ඣන්‌හිකානතික්‌කමො, සමයාපදානං අභාවොති ඉමානෙත්‌ථ පඤ්‌ච අඞ්‌ගානි.
Yaṃ pana pāḷiyaṃ ‘‘aññassa gharūpacāraṃ okkamantassa…pe… paṭhamaṃ pādaṃ ummāraṃ atikkāmetī’’tiādi vuttaṃ. Taṃ gāme paviṭṭhaṃ sandhāya vuttaṃ, tathāpi aññassa gharūpacāraṃ anokkamitvā vīthimajjheneva gantvā icchiticchitagharadvārābhimukhe ṭhatvā manusse oloketvā gacchantassāpi pācittiyameva. Tattha keci ‘‘vīthiyaṃ atikkamantassa gharūpacāragaṇanāya āpattiyo’’ti vadanti. Aññe pana ‘‘yāni kulāni uddissa gato, tesaṃ gaṇanāyā’’ti. Pañcannaṃ bhojanānaṃ aññatarena nimantanasādiyanaṃ, santaṃ bhikkhuṃ anāpucchanā, bhattiyagharato aññagharūpasaṅkamanaṃ, majjhanhikānatikkamo, samayāpadānaṃ abhāvoti imānettha pañca aṅgāni.
චාරිත්‌තසික්‌ඛාපදවණ්‌ණනා නිට්‌ඨිතා.
Cārittasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 5. අචෙලකවග්‌ගො • 5. Acelakavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 6. චාරිත්‌තසික්‌ඛාපදවණ්‌ණනා • 6. Cārittasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 6. චාරිත්‌තසික්‌ඛාපදවණ්‌ණනා • 6. Cārittasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 6. චාරිත්‌තසික්‌ඛාපදං • 6. Cārittasikkhāpadaṃ
