| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
༦. ཙཱརིཏྟསིཀྑཱཔདཝཎྞནཱ
6. Cārittasikkhāpadavaṇṇanā
༢༩༨. ཚཊྛེ ‘‘པརིཡེསིཏྭཱ ཨཱརོཙནཀིཙྩཾ ནཱམ ནཏྠཱི’’ཏི ཝུཏྟཏྟཱ ཡོ ཨཔརིཡེསིཏབྦོ ཨུཔསངྐམིཏུཾ ཡུཏྟཊྛཱནེ དིསྶཏི, སོ སཙེཔི པཀཏིཝཙནསྶ སཝནཱུཔཙཱརཾ ཨཏིཀྐམྨ ཋིཏོ ཨུཔགནྟྭཱ ཨཱཔུཙྪིཏབྦོ། ཏེནཱཧ ‘‘ཨཔི ཙ…པེ॰… ཡཾ པསྶཏི, སོ ཨཱཔུཙྪིཏབྦོ’’ཏིཨཱདི།
298. Chaṭṭhe ‘‘pariyesitvā ārocanakiccaṃ nāma natthī’’ti vuttattā yo apariyesitabbo upasaṅkamituṃ yuttaṭṭhāne dissati, so sacepi pakativacanassa savanūpacāraṃ atikkamma ṭhito upagantvā āpucchitabbo. Tenāha ‘‘api ca…pe… yaṃ passati, so āpucchitabbo’’tiādi.
༣༠༢. ཨནཱཔཏྟིཝཱརེ ཙེཏྠ ཨནྟརཱརཱམཱདཱིནཉྙེཝ ཝུཏྟཏྟཱ ཝིཧཱརཏོ གཱམཝཱིཐིཾ ཨནུཉྙཱཏཀཱརཎཾ ཝིནཱ ཨཏིཀྐམནྟསྶཱཔི ཨཱཔཏྟི ཧོཏི, ན པན གྷརཱུཔཙཱརཾ ཨཏིཀྐམནྟསྶེཝ།
302. Anāpattivāre cettha antarārāmādīnaññeva vuttattā vihārato gāmavīthiṃ anuññātakāraṇaṃ vinā atikkamantassāpi āpatti hoti, na pana gharūpacāraṃ atikkamantasseva.
ཡཾ པན པཱལི༹ཡཾ ‘‘ཨཉྙསྶ གྷརཱུཔཙཱརཾ ཨོཀྐམནྟསྶ…པེ॰… པཋམཾ པཱདཾ ཨུམྨཱརཾ ཨཏིཀྐཱམེཏཱི’’ཏིཨཱདི ཝུཏྟཾ། ཏཾ གཱམེ པཝིཊྛཾ སནྡྷཱཡ ཝུཏྟཾ, ཏཐཱཔི ཨཉྙསྶ གྷརཱུཔཙཱརཾ ཨནོཀྐམིཏྭཱ ཝཱིཐིམཛ྄ཛྷེནེཝ གནྟྭཱ ཨིཙྪིཏིཙྪིཏགྷརདྭཱརཱབྷིམུཁེ ཋཏྭཱ མནུསྶེ ཨོལོཀེཏྭཱ གཙྪནྟསྶཱཔི པཱཙིཏྟིཡམེཝ། ཏཏྠ ཀེཙི ‘‘ཝཱིཐིཡཾ ཨཏིཀྐམནྟསྶ གྷརཱུཔཙཱརགཎནཱཡ ཨཱཔཏྟིཡོ’’ཏི ཝདནྟི། ཨཉྙེ པན ‘‘ཡཱནི ཀུལཱནི ཨུདྡིསྶ གཏོ, ཏེསཾ གཎནཱཡཱ’’ཏི། པཉྩནྣཾ བྷོཛནཱནཾ ཨཉྙཏརེན ནིམནྟནསཱདིཡནཾ, སནྟཾ བྷིཀྑུཾ ཨནཱཔུཙྪནཱ, བྷཏྟིཡགྷརཏོ ཨཉྙགྷརཱུཔསངྐམནཾ, མཛ྄ཛྷནྷིཀཱནཏིཀྐམོ, སམཡཱཔདཱནཾ ཨབྷཱཝོཏི ཨིམཱནེཏྠ པཉྩ ཨངྒཱནི།
Yaṃ pana pāḷiyaṃ ‘‘aññassa gharūpacāraṃ okkamantassa…pe… paṭhamaṃ pādaṃ ummāraṃ atikkāmetī’’tiādi vuttaṃ. Taṃ gāme paviṭṭhaṃ sandhāya vuttaṃ, tathāpi aññassa gharūpacāraṃ anokkamitvā vīthimajjheneva gantvā icchiticchitagharadvārābhimukhe ṭhatvā manusse oloketvā gacchantassāpi pācittiyameva. Tattha keci ‘‘vīthiyaṃ atikkamantassa gharūpacāragaṇanāya āpattiyo’’ti vadanti. Aññe pana ‘‘yāni kulāni uddissa gato, tesaṃ gaṇanāyā’’ti. Pañcannaṃ bhojanānaṃ aññatarena nimantanasādiyanaṃ, santaṃ bhikkhuṃ anāpucchanā, bhattiyagharato aññagharūpasaṅkamanaṃ, majjhanhikānatikkamo, samayāpadānaṃ abhāvoti imānettha pañca aṅgāni.
ཙཱརིཏྟསིཀྑཱཔདཝཎྞནཱ ནིཊྛིཏཱ།
Cārittasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༥. ཨཙེལཀཝགྒོ • 5. Acelakavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༦. ཙཱརིཏྟསིཀྑཱཔདཝཎྞནཱ • 6. Cārittasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༦. ཙཱརིཏྟསིཀྑཱཔདཝཎྞནཱ • 6. Cārittasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༦. ཙཱརིཏྟསིཀྑཱཔདཾ • 6. Cārittasikkhāpadaṃ
