| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁၇. စရိယာနာနတ္တဉာဏနိဒ္ဒေသော
17. Cariyānānattañāṇaniddeso
၆၈. ကထံ စရိယာဝဝတ္ထာနေ ပညာ စရိယာနာနတ္တေ ဉာဏံ? စရိယာတိ တိသ္သော စရိယာယော – ဝိညာဏစရိယာ, အညာဏစရိယာ, ဉာဏစရိယာ။
68. Kathaṃ cariyāvavatthāne paññā cariyānānatte ñāṇaṃ? Cariyāti tisso cariyāyo – viññāṇacariyā, aññāṇacariyā, ñāṇacariyā.
ကတမာ ဝိညာဏစရိယာ? ဒသ္သနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ ရူပေသု, ဒသ္သနဋ္ဌော စက္ခုဝိညာဏံ ဝိညာဏစရိယာ ရူပေသု, ဒိဋ္ဌတ္တာ အဘိနိရောပနာ ဝိပာကမနောဓာတု 1 ဝိညာဏစရိယာ ရူပေသု, အဘိနိရောပိတတ္တာ ဝိပာကမနောဝိညာဏဓာတု ဝိညာဏစရိယာ ရူပေသု။ သဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ သဒ္ဒေသု, သဝနတ္ထော သောတဝိညာဏံ ဝိညာဏစရိယာ သဒ္ဒေသု, သုတတ္တာ အဘိနိရောပနာ ဝိပာကမနောဓာတု ဝိညာဏစရိယာ သဒ္ဒေသု, အဘိနိရောပိတတ္တာ ဝိပာကမနောဝိညာဏဓာတု ဝိညာဏစရိယာ သဒ္ဒေသု။ ဃာယနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ ဂန္ဓေသု, ဃာယနဋ္ဌော 2 ဃာနဝိညာဏံ ဝိညာဏစရိယာ ဂန္ဓေသု, ဃာယိတတ္တာ အဘိနိရောပနာ ဝိပာကမနောဓာတု ဝိညာဏစရိယာ ဂန္ဓေသု, အဘိနိရောပိတတ္တာ ဝိပာကမနောဝိညာဏဓာတု ဝိညာဏစရိယာ ဂန္ဓေသု။ သာယနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ ရသေသု, သာယနဋ္ဌော ဇိဝ္ဟာဝိညာဏံ ဝိညာဏစရိယာ ရသေသု, သာယိတတ္တာ အဘိနိရောပနာ ဝိပာကမနောဓာတု ဝိညာဏစရိယာ ရသေသု, အဘိနိရောပိတတ္တာ ဝိပာကမနောဝိညာဏဓာတု ဝိညာဏစရိယာ ရသေသု။ ဖုသနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ ဖောဋ္ဌဗ္ဗေသု, ဖုသနဋ္ဌော ကာယဝိညာဏံ ဝိညာဏစရိယာ ဖောဋ္ဌဗ္ဗေသု, ဖုဋ္ဌတ္တာ အဘိနိရောပနာ ဝိပာကမနောဓာတု ဝိညာဏစရိယာ ဖောဋ္ဌဗ္ဗေသု, အဘိနိရောပိတတ္တာ ဝိပာကမနောဝိညာဏဓာတု ဝိညာဏစရိယာ ဖောဋ္ဌဗ္ဗေသု။ ဝိဇာနနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ ဓမ္မေသု, ဝိဇာနနဋ္ဌော မနောဝိညာဏံ ဝိညာဏစရိယာ ဓမ္မေသု, ဝိညာတတ္တာ အဘိနိရောပနာ ဝိပာကမနောဓာတု ဝိညာဏစရိယာ ဓမ္မေသု, အဘိနိရောပိတတ္တာ ဝိပာကမနောဝိညာဏဓာတု ဝိညာဏစရိယာ ဓမ္မေသု။
Katamā viññāṇacariyā? Dassanatthāya āvajjanakiriyābyākatā viññāṇacariyā rūpesu, dassanaṭṭho cakkhuviññāṇaṃ viññāṇacariyā rūpesu, diṭṭhattā abhiniropanā vipākamanodhātu 3 viññāṇacariyā rūpesu, abhiniropitattā vipākamanoviññāṇadhātu viññāṇacariyā rūpesu. Savanatthāya āvajjanakiriyābyākatā viññāṇacariyā saddesu, savanattho sotaviññāṇaṃ viññāṇacariyā saddesu, sutattā abhiniropanā vipākamanodhātu viññāṇacariyā saddesu, abhiniropitattā vipākamanoviññāṇadhātu viññāṇacariyā saddesu. Ghāyanatthāya āvajjanakiriyābyākatā viññāṇacariyā gandhesu, ghāyanaṭṭho 4 ghānaviññāṇaṃ viññāṇacariyā gandhesu, ghāyitattā abhiniropanā vipākamanodhātu viññāṇacariyā gandhesu, abhiniropitattā vipākamanoviññāṇadhātu viññāṇacariyā gandhesu. Sāyanatthāya āvajjanakiriyābyākatā viññāṇacariyā rasesu, sāyanaṭṭho jivhāviññāṇaṃ viññāṇacariyā rasesu, sāyitattā abhiniropanā vipākamanodhātu viññāṇacariyā rasesu, abhiniropitattā vipākamanoviññāṇadhātu viññāṇacariyā rasesu. Phusanatthāya āvajjanakiriyābyākatā viññāṇacariyā phoṭṭhabbesu, phusanaṭṭho kāyaviññāṇaṃ viññāṇacariyā phoṭṭhabbesu, phuṭṭhattā abhiniropanā vipākamanodhātu viññāṇacariyā phoṭṭhabbesu, abhiniropitattā vipākamanoviññāṇadhātu viññāṇacariyā phoṭṭhabbesu. Vijānanatthāya āvajjanakiriyābyākatā viññāṇacariyā dhammesu, vijānanaṭṭho manoviññāṇaṃ viññāṇacariyā dhammesu, viññātattā abhiniropanā vipākamanodhātu viññāṇacariyā dhammesu, abhiniropitattā vipākamanoviññāṇadhātu viññāṇacariyā dhammesu.
၆၉. ဝိညာဏစရိယာတိ ကေနဋ္ဌေန ဝိညာဏစရိယာ? နီရာဂာ စရတီတိ – ဝိညာဏစရိယာ။ နိဒ္ဒောသာ စရတီတိ – ဝိညာဏစရိယာ။ နိမ္မောဟာ စရတီတိ – ဝိညာဏစရိယာ။ နိမ္မာနာ စရတီတိ – ဝိညာဏစရိယာ။ နိဒ္ဒိဋ္ဌိ စရတီတိ – ဝိညာဏစရိယာ နိဥဒ္ဓစ္စာ စရတီတိ – ဝိညာဏစရိယာ။ နိဗ္ဗိစိကိစ္ဆာ စရတီတိ – ဝိညာဏစရိယာ။ နာနုသယာ စရတီတိ – ဝိညာဏစရိယာ။ ရာဂဝိပ္ပယုတ္တာ စရတီတိ – ဝိညာဏစရိယာ။ ဒောသဝိပ္ပယုတ္တာ စရတီတိ – ဝိညာဏစရိယာ။ မောဟဝိပ္ပယုတ္တာ စရတီတိ – ဝိညာဏစရိယာ။ မာနဝိပ္ပယုတ္တာ စရတီတိ – ဝိညာဏစရိယာ။ ဒိဋ္ဌိဝိပ္ပယုတ္တာ စရတီတိ – ဝိညာဏစရိယာ။ ဥဒ္ဓစ္စဝိပ္ပယုတ္တာ စရတီတိ – ဝိညာဏစရိယာ။ ဝိစိကိစ္ဆာဝိပ္ပယုတ္တာ စရတီတိ – ဝိညာဏစရိယာ။ အနုသယဝိပ္ပယုတ္တာ စရတီတိ – ဝိညာဏစရိယာ။ ကုသလေဟိ ကမ္မေဟိ သမ္ပယုတ္တာ စရတီတိ – ဝိညာဏစရိယာ။ အကုသလေဟိ ကမ္မေဟိ ဝိပ္ပယုတ္တာ စရတီတိ – ဝိညာဏစရိယာ။ သာဝဇ္ဇေဟိ ကမ္မေဟိ ဝိပ္ပယုတ္တာ စရတီတိ – ဝိညာဏစရိယာ။ အနဝဇ္ဇေဟိ ကမ္မေဟိ သမ္ပယုတ္တာ စရတီတိ – ဝိညာဏစရိယာ။ ကဏ္ဟေဟိ ကမ္မေဟိ ဝိပ္ပယုတ္တာ စရတီတိ – ဝိညာဏစရိယာ။ သုက္ကေဟိ ကမ္မေဟိ သမ္ပယုတ္တာ စရတီတိ – ဝိညာဏစရိယာ။ သုခုဒ္ရယေဟိ ကမ္မေဟိ သမ္ပယုတ္တာ စရတီတိ – ဝိညာဏစရိယာ။ ဒုက္ခုဒ္ရယေဟိ ကမ္မေဟိ ဝိပ္ပယုတ္တာ စရတီတိ – ဝိညာဏစရိယာ။ သုခဝိပာကေဟိ ကမ္မေဟိ သမ္ပယုတ္တာ စရတီတိ – ဝိညာဏစရိယာ။ ဒုက္ခဝိပာကေဟိ ကမ္မေဟိ ဝိပ္ပယုတ္တာ စရတီတိ – ဝိညာဏစရိယာ။ ဝိညာတေ စရတီတိ – ဝိညာဏစရိယာ။ ဝိညာဏသ္သ ဧဝရူပာ စရိယာ ဟောတီတိ – ဝိညာဏစရိယာ။ ပကတိပရိသုဒ္ဓမိဒံ စိတ္တံ နိက္ကိလေသဋ္ဌေနာတိ – ဝိညာဏစရိယာ။ အယံ ဝိညာဏစရိယာ။
69.Viññāṇacariyāti kenaṭṭhena viññāṇacariyā? Nīrāgā caratīti – viññāṇacariyā. Niddosā caratīti – viññāṇacariyā. Nimmohā caratīti – viññāṇacariyā. Nimmānā caratīti – viññāṇacariyā. Niddiṭṭhi caratīti – viññāṇacariyā niuddhaccā caratīti – viññāṇacariyā. Nibbicikicchā caratīti – viññāṇacariyā. Nānusayā caratīti – viññāṇacariyā. Rāgavippayuttā caratīti – viññāṇacariyā. Dosavippayuttā caratīti – viññāṇacariyā. Mohavippayuttā caratīti – viññāṇacariyā. Mānavippayuttā caratīti – viññāṇacariyā. Diṭṭhivippayuttā caratīti – viññāṇacariyā. Uddhaccavippayuttā caratīti – viññāṇacariyā. Vicikicchāvippayuttā caratīti – viññāṇacariyā. Anusayavippayuttā caratīti – viññāṇacariyā. Kusalehi kammehi sampayuttā caratīti – viññāṇacariyā. Akusalehi kammehi vippayuttā caratīti – viññāṇacariyā. Sāvajjehi kammehi vippayuttā caratīti – viññāṇacariyā. Anavajjehi kammehi sampayuttā caratīti – viññāṇacariyā. Kaṇhehi kammehi vippayuttā caratīti – viññāṇacariyā. Sukkehi kammehi sampayuttā caratīti – viññāṇacariyā. Sukhudrayehi kammehi sampayuttā caratīti – viññāṇacariyā. Dukkhudrayehi kammehi vippayuttā caratīti – viññāṇacariyā. Sukhavipākehi kammehi sampayuttā caratīti – viññāṇacariyā. Dukkhavipākehi kammehi vippayuttā caratīti – viññāṇacariyā. Viññāte caratīti – viññāṇacariyā. Viññāṇassa evarūpā cariyā hotīti – viññāṇacariyā. Pakatiparisuddhamidaṃ cittaṃ nikkilesaṭṭhenāti – viññāṇacariyā. Ayaṃ viññāṇacariyā.
ကတမာ အညာဏစရိယာ? မနာပိယေသု ရူပေသု ရာဂသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ရာဂသ္သ ဇဝနာ အညာဏစရိယာ။ အမနာပိယေသု ရူပေသု ဒောသသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ဒောသသ္သ ဇဝနာ အညာဏစရိယာ။ တဒုဘယေန အသမပေက္ခနသ္မိံ ဝတ္ထုသ္မိံ မောဟသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; မောဟသ္သ ဇဝနာ အညာဏစရိယာ။ ဝိနိဗန္ဓသ္သ မာနသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; မာနသ္သ ဇဝနာ အညာဏစရိယာ။ ပရာမဋ္ဌာယ ဒိဋ္ဌိယာ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ဒိဋ္ဌိယာ ဇဝနာ အညာဏစရိယာ။ ဝိက္ခေပဂတသ္သ ဥဒ္ဓစ္စသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ဥဒ္ဓစ္စသ္သ ဇဝနာ အညာဏစရိယာ။ အနိဋ္ဌင္ဂတာယ ဝိစိကိစ္ဆာယ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ဝိစိကိစ္ဆာယ ဇဝနာ အညာဏစရိယာ။ ထာမဂတသ္သ အနုသယသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ ; အနုသယသ္သ ဇဝနာ အညာဏစရိယာ။
Katamā aññāṇacariyā? Manāpiyesu rūpesu rāgassa javanatthāya āvajjanakiriyābyākatā viññāṇacariyā; rāgassa javanā aññāṇacariyā. Amanāpiyesu rūpesu dosassa javanatthāya āvajjanakiriyābyākatā viññāṇacariyā; dosassa javanā aññāṇacariyā. Tadubhayena asamapekkhanasmiṃ vatthusmiṃ mohassa javanatthāya āvajjanakiriyābyākatā viññāṇacariyā; mohassa javanā aññāṇacariyā. Vinibandhassa mānassa javanatthāya āvajjanakiriyābyākatā viññāṇacariyā; mānassa javanā aññāṇacariyā. Parāmaṭṭhāya diṭṭhiyā javanatthāya āvajjanakiriyābyākatā viññāṇacariyā; diṭṭhiyā javanā aññāṇacariyā. Vikkhepagatassa uddhaccassa javanatthāya āvajjanakiriyābyākatā viññāṇacariyā; uddhaccassa javanā aññāṇacariyā. Aniṭṭhaṅgatāya vicikicchāya javanatthāya āvajjanakiriyābyākatā viññāṇacariyā; vicikicchāya javanā aññāṇacariyā. Thāmagatassa anusayassa javanatthāya āvajjanakiriyābyākatā viññāṇacariyā ; anusayassa javanā aññāṇacariyā.
မနာပိယေသု သဒ္ဒေသု။ပေ.။ မနာပိယေသု ဂန္ဓေသု။ပေ.။ မနာပိယေသု ရသေသု။ပေ.။ မနာပိယေသု ဖောဋ္ဌဗ္ဗေသု။ပေ.။ မနာပိယေသု ဓမ္မေသု ရာဂသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ရာဂသ္သ ဇဝနာ အညာဏစရိယာ။ အမနာပိယေသု ဓမ္မေသု ဒောသသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ဒောသသ္သ ဇဝနာ အညာဏစရိယာ။ တဒုဘယေန အသမပေက္ခနသ္မိံ ဝတ္ထုသ္မိံ မောဟသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; မောဟသ္သ ဇဝနာ အညာဏစရိယာ။ ဝိနိဗန္ဓသ္သ မာနသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; မာနသ္သ ဇဝနာ အညာဏစရိယာ။ ပရာမဋ္ဌာယ ဒိဋ္ဌိယာ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ဒိဋ္ဌိယာ ဇဝနာ အညာဏစရိယာ။ ဝိက္ခေပဂတသ္သ ဥဒ္ဓစ္စသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ဥဒ္ဓစ္စသ္သ ဇဝနာ အညာဏစရိယာ; အနိဋ္ဌင္ဂတာယ ဝိစိကိစ္ဆာယ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ဝိစိကိစ္ဆာယ ဇဝနာ အညာဏစရိယာ။ ထာမဂတသ္သ အနုသယသ္သ ဇဝနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; အနုသယသ္သ ဇဝနာ အညာဏစရိယာ။
Manāpiyesu saddesu…pe… manāpiyesu gandhesu…pe… manāpiyesu rasesu…pe… manāpiyesu phoṭṭhabbesu…pe… manāpiyesu dhammesu rāgassa javanatthāya āvajjanakiriyābyākatā viññāṇacariyā; rāgassa javanā aññāṇacariyā. Amanāpiyesu dhammesu dosassa javanatthāya āvajjanakiriyābyākatā viññāṇacariyā; dosassa javanā aññāṇacariyā. Tadubhayena asamapekkhanasmiṃ vatthusmiṃ mohassa javanatthāya āvajjanakiriyābyākatā viññāṇacariyā; mohassa javanā aññāṇacariyā. Vinibandhassa mānassa javanatthāya āvajjanakiriyābyākatā viññāṇacariyā; mānassa javanā aññāṇacariyā. Parāmaṭṭhāya diṭṭhiyā javanatthāya āvajjanakiriyābyākatā viññāṇacariyā; diṭṭhiyā javanā aññāṇacariyā. Vikkhepagatassa uddhaccassa javanatthāya āvajjanakiriyābyākatā viññāṇacariyā; uddhaccassa javanā aññāṇacariyā; aniṭṭhaṅgatāya vicikicchāya javanatthāya āvajjanakiriyābyākatā viññāṇacariyā; vicikicchāya javanā aññāṇacariyā. Thāmagatassa anusayassa javanatthāya āvajjanakiriyābyākatā viññāṇacariyā; anusayassa javanā aññāṇacariyā.
၇၀. အညာဏစရိယာတိ ကေနဋ္ဌေန အညာဏစရိယာ? သရာဂာ စရတီတိ – အညာဏစရိယာ။ သဒောသာ စရတီတိ – အညာဏစရိယာ။ သမောဟာ စရတီတိ – အညာဏစရိယာ။ သမာနာ စရတီတိ – အညာဏစရိယာ။ သဒိဋ္ဌိ စရတီတိ – အညာဏစရိယာ။ သဥဒ္ဓစ္စာ စရတီတိ – အညာဏစရိယာ။ သဝိစိကိစ္ဆာ စရတီတိ – အညာဏစရိယာ။ သာနုသယာ စရတီတိ – အညာဏစရိယာ ။ ရာဂသမ္ပယုတ္တာ စရတီတိ – အညာဏစရိယာ။ ဒောသသမ္ပယုတ္တာ စရတီတိ – အညာဏစရိယာ။ မောဟသမ္ပယုတ္တာ စရတီတိ – အညာဏစရိယာ။ မာနသမ္ပယုတ္တာ စရတီတိ – အညာဏစရိယာ ။ ဒိဋ္ဌိသမ္ပယုတ္တာ စရတီတိ – အညာဏစရိယာ။ ဥဒ္ဓစ္စသမ္ပယုတ္တာ စရတီတိ – အညာဏစရိယာ။ ဝိစိကိစ္ဆာသမ္ပယုတ္တာ စရတီတိ – အညာဏစရိယာ။ အနုသယသမ္ပယုတ္တာ စရတီတိ – အညာဏစရိယာ။ ကုသလေဟိ ကမ္မေဟိ ဝိပ္ပယုတ္တာ စရတီတိ – အညာဏစရိယာ။ အကုသလေဟိ ကမ္မေဟိ သမ္ပယုတ္တာ စရတီတိ – အညာဏစရိယာ။ သာဝဇ္ဇေဟိ ကမ္မေဟိ သမ္ပယုတ္တာ စရတီတိ – အညာဏစရိယာ။ အနဝဇ္ဇေဟိ ကမ္မေဟိ ဝိပ္ပယုတ္တာ စရတီတိ – အညာဏစရိယာ ။ ကဏ္ဟေဟိ ကမ္မေဟိ သမ္ပယုတ္တာ စရတီတိ – အညာဏစရိယာ။ သုက္ကေဟိ ကမ္မေဟိ ဝိပ္ပယုတ္တာ စရတီတိ – အညာဏစရိယာ။ သုခုဒ္ရယေဟိ ကမ္မေဟိ ဝိပ္ပယုတ္တာ စရတီတိ – အညာဏစရိယာ။ ဒုက္ခုဒ္ရယေဟိ ကမ္မေဟိ သမ္ပယုတ္တာ စရတီတိ – အညာဏစရိယာ။ သုခဝိပာကေဟိ ကမ္မေဟိ ဝိပ္ပယုတ္တာ စရတီတိ – အညာဏစရိယာ။ ဒုက္ခဝိပာကေဟိ ကမ္မေဟိ သမ္ပယုတ္တာ စရတီတိ – အညာဏစရိယာ။ အညာတေ စရတီတိ – အညာဏစရိယာ။ အညာဏသ္သ ဧဝရူပာ စရိယာ ဟောတီတိ – အညာဏစရိယာ။ အယံ အညာဏစရိယာ။
70.Aññāṇacariyāti kenaṭṭhena aññāṇacariyā? Sarāgā caratīti – aññāṇacariyā. Sadosā caratīti – aññāṇacariyā. Samohā caratīti – aññāṇacariyā. Samānā caratīti – aññāṇacariyā. Sadiṭṭhi caratīti – aññāṇacariyā. Sauddhaccā caratīti – aññāṇacariyā. Savicikicchā caratīti – aññāṇacariyā. Sānusayā caratīti – aññāṇacariyā . Rāgasampayuttā caratīti – aññāṇacariyā. Dosasampayuttā caratīti – aññāṇacariyā. Mohasampayuttā caratīti – aññāṇacariyā. Mānasampayuttā caratīti – aññāṇacariyā . Diṭṭhisampayuttā caratīti – aññāṇacariyā. Uddhaccasampayuttā caratīti – aññāṇacariyā. Vicikicchāsampayuttā caratīti – aññāṇacariyā. Anusayasampayuttā caratīti – aññāṇacariyā. Kusalehi kammehi vippayuttā caratīti – aññāṇacariyā. Akusalehi kammehi sampayuttā caratīti – aññāṇacariyā. Sāvajjehi kammehi sampayuttā caratīti – aññāṇacariyā. Anavajjehi kammehi vippayuttā caratīti – aññāṇacariyā . Kaṇhehi kammehi sampayuttā caratīti – aññāṇacariyā. Sukkehi kammehi vippayuttā caratīti – aññāṇacariyā. Sukhudrayehi kammehi vippayuttā caratīti – aññāṇacariyā. Dukkhudrayehi kammehi sampayuttā caratīti – aññāṇacariyā. Sukhavipākehi kammehi vippayuttā caratīti – aññāṇacariyā. Dukkhavipākehi kammehi sampayuttā caratīti – aññāṇacariyā. Aññāte caratīti – aññāṇacariyā. Aññāṇassa evarūpā cariyā hotīti – aññāṇacariyā. Ayaṃ aññāṇacariyā.
၇၁. ကတမာ ဉာဏစရိယာ? အနိစ္စာနုပသ္သနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; အနိစ္စာနုပသ္သနာ ဉာဏစရိယာ။ ဒုက္ခာနုပသ္သနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ဒုက္ခာနုပသ္သနာ ဉာဏစရိယာ။ အနတ္တာနုပသ္သနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; အနတ္တာနုပသ္သနာ ဉာဏစရိယာ။ နိဗ္ဗိဒာနုပသ္သနတ္ထာယ။ပေ.။ ဝိရာဂာနုပသ္သနတ္ထာယ။ နိရောဓာနုပသ္သနတ္ထာယ။ ပဋိနိသ္သဂ္ဂာနုပသ္သနတ္ထာယ။ ခယာနုပသ္သနတ္ထာယ။ ဝယာနုပသ္သနတ္ထာယ။ ဝိပရိဏာမာနုပသ္သနတ္ထာယ။ အနိမိတ္တာနုပသ္သနတ္ထာယ။ အပ္ပဏိဟိတာနုပသ္သနတ္ထာယ။ သုညတာနုပသ္သနတ္ထာယ။ အဓိပညာဓမ္မာနုပသ္သနတ္ထာယ။ ယထာဘူတဉာဏဒသ္သနတ္ထာယ။ အာဒီနဝာနုပသ္သနတ္ထာယ။ ပဋိသင္ခာနုပသ္သနတ္ထာယ အာဝဇ္ဇနကိရိယာဗ္ယာကတာ ဝိညာဏစရိယာ; ပဋိသင္ခာနုပသ္သနာ ဉာဏစရိယာ။ ဝိဝဋ္ဋနာနုပသ္သနာ ဉာဏစရိယာ။ သောတာပတ္တိမဂ္ဂော ဉာဏစရိယာ။ သောတာပတ္တိဖလသမာပတ္တိ ဉာဏစရိယာ။ သကဒာဂာမိမဂ္ဂော ဉာဏစရိယာ။ သကဒာဂာမိဖလသမာပတ္တိ ဉာဏစရိယာ။ အနာဂာမိမဂ္ဂော ဉာဏစရိယာ။ အနာဂာမိဖလသမာပတ္တိ ဉာဏစရိယာ။ အရဟတ္တမဂ္ဂော ဉာဏစရိယာ။ အရဟတ္တဖလသမာပတ္တိ ဉာဏစရိယာ။
71. Katamā ñāṇacariyā? Aniccānupassanatthāya āvajjanakiriyābyākatā viññāṇacariyā; aniccānupassanā ñāṇacariyā. Dukkhānupassanatthāya āvajjanakiriyābyākatā viññāṇacariyā; dukkhānupassanā ñāṇacariyā. Anattānupassanatthāya āvajjanakiriyābyākatā viññāṇacariyā; anattānupassanā ñāṇacariyā. Nibbidānupassanatthāya…pe… virāgānupassanatthāya… nirodhānupassanatthāya… paṭinissaggānupassanatthāya… khayānupassanatthāya… vayānupassanatthāya… vipariṇāmānupassanatthāya… animittānupassanatthāya… appaṇihitānupassanatthāya… suññatānupassanatthāya… adhipaññādhammānupassanatthāya… yathābhūtañāṇadassanatthāya… ādīnavānupassanatthāya… paṭisaṅkhānupassanatthāya āvajjanakiriyābyākatā viññāṇacariyā; paṭisaṅkhānupassanā ñāṇacariyā. Vivaṭṭanānupassanā ñāṇacariyā. Sotāpattimaggo ñāṇacariyā. Sotāpattiphalasamāpatti ñāṇacariyā. Sakadāgāmimaggo ñāṇacariyā. Sakadāgāmiphalasamāpatti ñāṇacariyā. Anāgāmimaggo ñāṇacariyā. Anāgāmiphalasamāpatti ñāṇacariyā. Arahattamaggo ñāṇacariyā. Arahattaphalasamāpatti ñāṇacariyā.
ဉာဏစရိယာတိ ကေနဋ္ဌေန ဉာဏစရိယာ? နီရာဂာ စရတီတိ – ဉာဏစရိယာ။ နိဒ္ဒောသာ စရတီတိ – ဉာဏစရိယာ။ပေ.။ နာနုသယာ စရတီတိ – ဉာဏစရိယာ။ ရာဂဝိပ္ပယုတ္တာ စရတီတိ – ဉာဏစရိယာ။ ဒောသဝိပ္ပယုတ္တာ စရတီတိ – ဉာဏစရိယာ။ မောဟဝိပ္ပယုတ္တာ စရတီတိ – ဉာဏစရိယာ။ မာနဝိပ္ပယုတ္တာ။ပေ.။ ဒိဋ္ဌိဝိပ္ပယုတ္တာ။ ဥဒ္ဓစ္စဝိပ္ပယုတ္တာ။ ဝိစိကိစ္ဆာဝိပ္ပယုတ္တာ။ အနုသယဝိပ္ပယုတ္တာ။ ကုသလေဟိ ကမ္မေဟိ သမ္ပယုတ္တာ။ အကုသလေဟိ ကမ္မေဟိ ဝိပ္ပယုတ္တာ။ သာဝဇ္ဇေဟိ ကမ္မေဟိ ဝိပ္ပယုတ္တာ။ အနဝဇ္ဇေဟိ ကမ္မေဟိ သမ္ပယုတ္တာ။ ကဏ္ဟေဟိ ကမ္မေဟိ ဝိပ္ပယုတ္တာ။ သုက္ကေဟိ ကမ္မေဟိ သမ္ပယုတ္တာ။ သုခုဒ္ရယေဟိ ကမ္မေဟိ သမ္ပယုတ္တာ။ ဒုက္ခုဒ္ရယေဟိ ကမ္မေဟိ ဝိပ္ပယုတ္တာ။ သုခဝိပာကေဟိ ကမ္မေဟိ သမ္ပယုတ္တာ စရတီတိ – ဉာဏစရိယာ။ ဒုက္ခဝိပာကေဟိ ကမ္မေဟိ ဝိပ္ပယုတ္တာ စရတီတိ – ဉာဏစရိယာ။ ဉာတေ စရတီတိ – ဉာဏစရိယာ ။ ဉာဏသ္သ ဧဝရူပာ စရိယာ ဟောတီတိ – ဉာဏစရိယာ။ အယံ ဉာဏစရိယာ။ အညာ ဝိညာဏစရိယာ, အညာ အညာဏစရိယာ, အညာ ဉာဏစရိယာတိ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘စရိယာဝဝတ္ထာနေ ပညာ စရိယာနာနတ္တေ ဉာဏံ’’။
Ñāṇacariyāti kenaṭṭhena ñāṇacariyā? Nīrāgā caratīti – ñāṇacariyā. Niddosā caratīti – ñāṇacariyā…pe… nānusayā caratīti – ñāṇacariyā. Rāgavippayuttā caratīti – ñāṇacariyā. Dosavippayuttā caratīti – ñāṇacariyā. Mohavippayuttā caratīti – ñāṇacariyā. Mānavippayuttā…pe… diṭṭhivippayuttā… uddhaccavippayuttā… vicikicchāvippayuttā… anusayavippayuttā… kusalehi kammehi sampayuttā… akusalehi kammehi vippayuttā… sāvajjehi kammehi vippayuttā… anavajjehi kammehi sampayuttā… kaṇhehi kammehi vippayuttā… sukkehi kammehi sampayuttā… sukhudrayehi kammehi sampayuttā… dukkhudrayehi kammehi vippayuttā… sukhavipākehi kammehi sampayuttā caratīti – ñāṇacariyā. Dukkhavipākehi kammehi vippayuttā caratīti – ñāṇacariyā. Ñāte caratīti – ñāṇacariyā . Ñāṇassa evarūpā cariyā hotīti – ñāṇacariyā. Ayaṃ ñāṇacariyā. Aññā viññāṇacariyā, aññā aññāṇacariyā, aññā ñāṇacariyāti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘cariyāvavatthāne paññā cariyānānatte ñāṇaṃ’’.
စရိယာနာနတ္တဉာဏနိဒ္ဒေသော သတ္တရသမော။
Cariyānānattañāṇaniddeso sattarasamo.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁၇. စရိယာနာနတ္တဉာဏနိဒ္ဒေသဝဏ္ဏနာ • 17. Cariyānānattañāṇaniddesavaṇṇanā
