| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༡༧. ཙརིཡཱནཱནཏྟཉཱཎནིདྡེསོ
17. Cariyānānattañāṇaniddeso
༦༨. ཀཐཾ ཙརིཡཱཝཝཏྠཱནེ པཉྙཱ ཙརིཡཱནཱནཏྟེ ཉཱཎཾ? ཙརིཡཱཏི ཏིསྶོ ཙརིཡཱཡོ – ཝིཉྙཱཎཙརིཡཱ, ཨཉྙཱཎཙརིཡཱ, ཉཱཎཙརིཡཱ།
68. Kathaṃ cariyāvavatthāne paññā cariyānānatte ñāṇaṃ? Cariyāti tisso cariyāyo – viññāṇacariyā, aññāṇacariyā, ñāṇacariyā.
ཀཏམཱ ཝིཉྙཱཎཙརིཡཱ? དསྶནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ རཱུཔེསུ, དསྶནཊྛོ ཙཀྑུཝིཉྙཱཎཾ ཝིཉྙཱཎཙརིཡཱ རཱུཔེསུ, དིཊྛཏྟཱ ཨབྷིནིརོཔནཱ ཝིཔཱཀམནོདྷཱཏུ 1 ཝིཉྙཱཎཙརིཡཱ རཱུཔེསུ, ཨབྷིནིརོཔིཏཏྟཱ ཝིཔཱཀམནོཝིཉྙཱཎདྷཱཏུ ཝིཉྙཱཎཙརིཡཱ རཱུཔེསུ། སཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ སདྡེསུ, སཝནཏྠོ སོཏཝིཉྙཱཎཾ ཝིཉྙཱཎཙརིཡཱ སདྡེསུ, སུཏཏྟཱ ཨབྷིནིརོཔནཱ ཝིཔཱཀམནོདྷཱཏུ ཝིཉྙཱཎཙརིཡཱ སདྡེསུ, ཨབྷིནིརོཔིཏཏྟཱ ཝིཔཱཀམནོཝིཉྙཱཎདྷཱཏུ ཝིཉྙཱཎཙརིཡཱ སདྡེསུ། གྷཱཡནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ གནྡྷེསུ, གྷཱཡནཊྛོ 2 གྷཱནཝིཉྙཱཎཾ ཝིཉྙཱཎཙརིཡཱ གནྡྷེསུ, གྷཱཡིཏཏྟཱ ཨབྷིནིརོཔནཱ ཝིཔཱཀམནོདྷཱཏུ ཝིཉྙཱཎཙརིཡཱ གནྡྷེསུ, ཨབྷིནིརོཔིཏཏྟཱ ཝིཔཱཀམནོཝིཉྙཱཎདྷཱཏུ ཝིཉྙཱཎཙརིཡཱ གནྡྷེསུ། སཱཡནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ རསེསུ, སཱཡནཊྛོ ཛིཝ྄ཧཱཝིཉྙཱཎཾ ཝིཉྙཱཎཙརིཡཱ རསེསུ, སཱཡིཏཏྟཱ ཨབྷིནིརོཔནཱ ཝིཔཱཀམནོདྷཱཏུ ཝིཉྙཱཎཙརིཡཱ རསེསུ, ཨབྷིནིརོཔིཏཏྟཱ ཝིཔཱཀམནོཝིཉྙཱཎདྷཱཏུ ཝིཉྙཱཎཙརིཡཱ རསེསུ། ཕུསནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ ཕོཊྛབྦེསུ, ཕུསནཊྛོ ཀཱཡཝིཉྙཱཎཾ ཝིཉྙཱཎཙརིཡཱ ཕོཊྛབྦེསུ, ཕུཊྛཏྟཱ ཨབྷིནིརོཔནཱ ཝིཔཱཀམནོདྷཱཏུ ཝིཉྙཱཎཙརིཡཱ ཕོཊྛབྦེསུ, ཨབྷིནིརོཔིཏཏྟཱ ཝིཔཱཀམནོཝིཉྙཱཎདྷཱཏུ ཝིཉྙཱཎཙརིཡཱ ཕོཊྛབྦེསུ། ཝིཛཱནནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ དྷམྨེསུ, ཝིཛཱནནཊྛོ མནོཝིཉྙཱཎཾ ཝིཉྙཱཎཙརིཡཱ དྷམྨེསུ, ཝིཉྙཱཏཏྟཱ ཨབྷིནིརོཔནཱ ཝིཔཱཀམནོདྷཱཏུ ཝིཉྙཱཎཙརིཡཱ དྷམྨེསུ, ཨབྷིནིརོཔིཏཏྟཱ ཝིཔཱཀམནོཝིཉྙཱཎདྷཱཏུ ཝིཉྙཱཎཙརིཡཱ དྷམྨེསུ།
Katamā viññāṇacariyā? Dassanatthāya āvajjanakiriyābyākatā viññāṇacariyā rūpesu, dassanaṭṭho cakkhuviññāṇaṃ viññāṇacariyā rūpesu, diṭṭhattā abhiniropanā vipākamanodhātu 3 viññāṇacariyā rūpesu, abhiniropitattā vipākamanoviññāṇadhātu viññāṇacariyā rūpesu. Savanatthāya āvajjanakiriyābyākatā viññāṇacariyā saddesu, savanattho sotaviññāṇaṃ viññāṇacariyā saddesu, sutattā abhiniropanā vipākamanodhātu viññāṇacariyā saddesu, abhiniropitattā vipākamanoviññāṇadhātu viññāṇacariyā saddesu. Ghāyanatthāya āvajjanakiriyābyākatā viññāṇacariyā gandhesu, ghāyanaṭṭho 4 ghānaviññāṇaṃ viññāṇacariyā gandhesu, ghāyitattā abhiniropanā vipākamanodhātu viññāṇacariyā gandhesu, abhiniropitattā vipākamanoviññāṇadhātu viññāṇacariyā gandhesu. Sāyanatthāya āvajjanakiriyābyākatā viññāṇacariyā rasesu, sāyanaṭṭho jivhāviññāṇaṃ viññāṇacariyā rasesu, sāyitattā abhiniropanā vipākamanodhātu viññāṇacariyā rasesu, abhiniropitattā vipākamanoviññāṇadhātu viññāṇacariyā rasesu. Phusanatthāya āvajjanakiriyābyākatā viññāṇacariyā phoṭṭhabbesu, phusanaṭṭho kāyaviññāṇaṃ viññāṇacariyā phoṭṭhabbesu, phuṭṭhattā abhiniropanā vipākamanodhātu viññāṇacariyā phoṭṭhabbesu, abhiniropitattā vipākamanoviññāṇadhātu viññāṇacariyā phoṭṭhabbesu. Vijānanatthāya āvajjanakiriyābyākatā viññāṇacariyā dhammesu, vijānanaṭṭho manoviññāṇaṃ viññāṇacariyā dhammesu, viññātattā abhiniropanā vipākamanodhātu viññāṇacariyā dhammesu, abhiniropitattā vipākamanoviññāṇadhātu viññāṇacariyā dhammesu.
༦༩. ཝིཉྙཱཎཙརིཡཱཏི ཀེནཊྛེན ཝིཉྙཱཎཙརིཡཱ? ནཱིརཱགཱ ཙརཏཱིཏི – ཝིཉྙཱཎཙརིཡཱ། ནིདྡོསཱ ཙརཏཱིཏི – ཝིཉྙཱཎཙརིཡཱ། ནིམྨོཧཱ ཙརཏཱིཏི – ཝིཉྙཱཎཙརིཡཱ། ནིམྨཱནཱ ཙརཏཱིཏི – ཝིཉྙཱཎཙརིཡཱ། ནིདྡིཊྛི ཙརཏཱིཏི – ཝིཉྙཱཎཙརིཡཱ ནིཨུདྡྷཙྩཱ ཙརཏཱིཏི – ཝིཉྙཱཎཙརིཡཱ། ནིབྦིཙིཀིཙྪཱ ཙརཏཱིཏི – ཝིཉྙཱཎཙརིཡཱ། ནཱནུསཡཱ ཙརཏཱིཏི – ཝིཉྙཱཎཙརིཡཱ། རཱགཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། དོསཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། མོཧཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། མཱནཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། དིཊྛིཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། ཨུདྡྷཙྩཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། ཝིཙིཀིཙྪཱཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། ཨནུསཡཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། ཀུསལེཧི ཀམྨེཧི སམྤཡུཏྟཱ ཙརཏཱིཏི – ཝིཉྙཱཎཙརིཡཱ། ཨཀུསལེཧི ཀམྨེཧི ཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། སཱཝཛྫེཧི ཀམྨེཧི ཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། ཨནཝཛྫེཧི ཀམྨེཧི སམྤཡུཏྟཱ ཙརཏཱིཏི – ཝིཉྙཱཎཙརིཡཱ། ཀཎྷེཧི ཀམྨེཧི ཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། སུཀྐེཧི ཀམྨེཧི སམྤཡུཏྟཱ ཙརཏཱིཏི – ཝིཉྙཱཎཙརིཡཱ། སུཁུདྲཡེཧི ཀམྨེཧི སམྤཡུཏྟཱ ཙརཏཱིཏི – ཝིཉྙཱཎཙརིཡཱ། དུཀྑུདྲཡེཧི ཀམྨེཧི ཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། སུཁཝིཔཱཀེཧི ཀམྨེཧི སམྤཡུཏྟཱ ཙརཏཱིཏི – ཝིཉྙཱཎཙརིཡཱ། དུཀྑཝིཔཱཀེཧི ཀམྨེཧི ཝིཔྤཡུཏྟཱ ཙརཏཱིཏི – ཝིཉྙཱཎཙརིཡཱ། ཝིཉྙཱཏེ ཙརཏཱིཏི – ཝིཉྙཱཎཙརིཡཱ། ཝིཉྙཱཎསྶ ཨེཝརཱུཔཱ ཙརིཡཱ ཧོཏཱིཏི – ཝིཉྙཱཎཙརིཡཱ། པཀཏིཔརིསུདྡྷམིདཾ ཙིཏྟཾ ནིཀྐིལེསཊྛེནཱཏི – ཝིཉྙཱཎཙརིཡཱ། ཨཡཾ ཝིཉྙཱཎཙརིཡཱ།
69.Viññāṇacariyāti kenaṭṭhena viññāṇacariyā? Nīrāgā caratīti – viññāṇacariyā. Niddosā caratīti – viññāṇacariyā. Nimmohā caratīti – viññāṇacariyā. Nimmānā caratīti – viññāṇacariyā. Niddiṭṭhi caratīti – viññāṇacariyā niuddhaccā caratīti – viññāṇacariyā. Nibbicikicchā caratīti – viññāṇacariyā. Nānusayā caratīti – viññāṇacariyā. Rāgavippayuttā caratīti – viññāṇacariyā. Dosavippayuttā caratīti – viññāṇacariyā. Mohavippayuttā caratīti – viññāṇacariyā. Mānavippayuttā caratīti – viññāṇacariyā. Diṭṭhivippayuttā caratīti – viññāṇacariyā. Uddhaccavippayuttā caratīti – viññāṇacariyā. Vicikicchāvippayuttā caratīti – viññāṇacariyā. Anusayavippayuttā caratīti – viññāṇacariyā. Kusalehi kammehi sampayuttā caratīti – viññāṇacariyā. Akusalehi kammehi vippayuttā caratīti – viññāṇacariyā. Sāvajjehi kammehi vippayuttā caratīti – viññāṇacariyā. Anavajjehi kammehi sampayuttā caratīti – viññāṇacariyā. Kaṇhehi kammehi vippayuttā caratīti – viññāṇacariyā. Sukkehi kammehi sampayuttā caratīti – viññāṇacariyā. Sukhudrayehi kammehi sampayuttā caratīti – viññāṇacariyā. Dukkhudrayehi kammehi vippayuttā caratīti – viññāṇacariyā. Sukhavipākehi kammehi sampayuttā caratīti – viññāṇacariyā. Dukkhavipākehi kammehi vippayuttā caratīti – viññāṇacariyā. Viññāte caratīti – viññāṇacariyā. Viññāṇassa evarūpā cariyā hotīti – viññāṇacariyā. Pakatiparisuddhamidaṃ cittaṃ nikkilesaṭṭhenāti – viññāṇacariyā. Ayaṃ viññāṇacariyā.
ཀཏམཱ ཨཉྙཱཎཙརིཡཱ? མནཱཔིཡེསུ རཱུཔེསུ རཱགསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; རཱགསྶ ཛཝནཱ ཨཉྙཱཎཙརིཡཱ། ཨམནཱཔིཡེསུ རཱུཔེསུ དོསསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; དོསསྶ ཛཝནཱ ཨཉྙཱཎཙརིཡཱ། ཏདུབྷཡེན ཨསམཔེཀྑནསྨིཾ ཝཏྠུསྨིཾ མོཧསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; མོཧསྶ ཛཝནཱ ཨཉྙཱཎཙརིཡཱ། ཝིནིབནྡྷསྶ མཱནསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; མཱནསྶ ཛཝནཱ ཨཉྙཱཎཙརིཡཱ། པརཱམཊྛཱཡ དིཊྛིཡཱ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; དིཊྛིཡཱ ཛཝནཱ ཨཉྙཱཎཙརིཡཱ། ཝིཀྑེཔགཏསྶ ཨུདྡྷཙྩསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; ཨུདྡྷཙྩསྶ ཛཝནཱ ཨཉྙཱཎཙརིཡཱ། ཨནིཊྛངྒཏཱཡ ཝིཙིཀིཙྪཱཡ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; ཝིཙིཀིཙྪཱཡ ཛཝནཱ ཨཉྙཱཎཙརིཡཱ། ཐཱམགཏསྶ ཨནུསཡསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ ; ཨནུསཡསྶ ཛཝནཱ ཨཉྙཱཎཙརིཡཱ།
Katamā aññāṇacariyā? Manāpiyesu rūpesu rāgassa javanatthāya āvajjanakiriyābyākatā viññāṇacariyā; rāgassa javanā aññāṇacariyā. Amanāpiyesu rūpesu dosassa javanatthāya āvajjanakiriyābyākatā viññāṇacariyā; dosassa javanā aññāṇacariyā. Tadubhayena asamapekkhanasmiṃ vatthusmiṃ mohassa javanatthāya āvajjanakiriyābyākatā viññāṇacariyā; mohassa javanā aññāṇacariyā. Vinibandhassa mānassa javanatthāya āvajjanakiriyābyākatā viññāṇacariyā; mānassa javanā aññāṇacariyā. Parāmaṭṭhāya diṭṭhiyā javanatthāya āvajjanakiriyābyākatā viññāṇacariyā; diṭṭhiyā javanā aññāṇacariyā. Vikkhepagatassa uddhaccassa javanatthāya āvajjanakiriyābyākatā viññāṇacariyā; uddhaccassa javanā aññāṇacariyā. Aniṭṭhaṅgatāya vicikicchāya javanatthāya āvajjanakiriyābyākatā viññāṇacariyā; vicikicchāya javanā aññāṇacariyā. Thāmagatassa anusayassa javanatthāya āvajjanakiriyābyākatā viññāṇacariyā ; anusayassa javanā aññāṇacariyā.
མནཱཔིཡེསུ སདྡེསུ…པེ॰… མནཱཔིཡེསུ གནྡྷེསུ…པེ॰… མནཱཔིཡེསུ རསེསུ…པེ॰… མནཱཔིཡེསུ ཕོཊྛབྦེསུ…པེ॰… མནཱཔིཡེསུ དྷམྨེསུ རཱགསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; རཱགསྶ ཛཝནཱ ཨཉྙཱཎཙརིཡཱ། ཨམནཱཔིཡེསུ དྷམྨེསུ དོསསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; དོསསྶ ཛཝནཱ ཨཉྙཱཎཙརིཡཱ། ཏདུབྷཡེན ཨསམཔེཀྑནསྨིཾ ཝཏྠུསྨིཾ མོཧསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; མོཧསྶ ཛཝནཱ ཨཉྙཱཎཙརིཡཱ། ཝིནིབནྡྷསྶ མཱནསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; མཱནསྶ ཛཝནཱ ཨཉྙཱཎཙརིཡཱ། པརཱམཊྛཱཡ དིཊྛིཡཱ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; དིཊྛིཡཱ ཛཝནཱ ཨཉྙཱཎཙརིཡཱ། ཝིཀྑེཔགཏསྶ ཨུདྡྷཙྩསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; ཨུདྡྷཙྩསྶ ཛཝནཱ ཨཉྙཱཎཙརིཡཱ; ཨནིཊྛངྒཏཱཡ ཝིཙིཀིཙྪཱཡ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; ཝིཙིཀིཙྪཱཡ ཛཝནཱ ཨཉྙཱཎཙརིཡཱ། ཐཱམགཏསྶ ཨནུསཡསྶ ཛཝནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; ཨནུསཡསྶ ཛཝནཱ ཨཉྙཱཎཙརིཡཱ།
Manāpiyesu saddesu…pe… manāpiyesu gandhesu…pe… manāpiyesu rasesu…pe… manāpiyesu phoṭṭhabbesu…pe… manāpiyesu dhammesu rāgassa javanatthāya āvajjanakiriyābyākatā viññāṇacariyā; rāgassa javanā aññāṇacariyā. Amanāpiyesu dhammesu dosassa javanatthāya āvajjanakiriyābyākatā viññāṇacariyā; dosassa javanā aññāṇacariyā. Tadubhayena asamapekkhanasmiṃ vatthusmiṃ mohassa javanatthāya āvajjanakiriyābyākatā viññāṇacariyā; mohassa javanā aññāṇacariyā. Vinibandhassa mānassa javanatthāya āvajjanakiriyābyākatā viññāṇacariyā; mānassa javanā aññāṇacariyā. Parāmaṭṭhāya diṭṭhiyā javanatthāya āvajjanakiriyābyākatā viññāṇacariyā; diṭṭhiyā javanā aññāṇacariyā. Vikkhepagatassa uddhaccassa javanatthāya āvajjanakiriyābyākatā viññāṇacariyā; uddhaccassa javanā aññāṇacariyā; aniṭṭhaṅgatāya vicikicchāya javanatthāya āvajjanakiriyābyākatā viññāṇacariyā; vicikicchāya javanā aññāṇacariyā. Thāmagatassa anusayassa javanatthāya āvajjanakiriyābyākatā viññāṇacariyā; anusayassa javanā aññāṇacariyā.
༧༠. ཨཉྙཱཎཙརིཡཱཏི ཀེནཊྛེན ཨཉྙཱཎཙརིཡཱ? སརཱགཱ ཙརཏཱིཏི – ཨཉྙཱཎཙརིཡཱ། སདོསཱ ཙརཏཱིཏི – ཨཉྙཱཎཙརིཡཱ། སམོཧཱ ཙརཏཱིཏི – ཨཉྙཱཎཙརིཡཱ། སམཱནཱ ཙརཏཱིཏི – ཨཉྙཱཎཙརིཡཱ། སདིཊྛི ཙརཏཱིཏི – ཨཉྙཱཎཙརིཡཱ། སཨུདྡྷཙྩཱ ཙརཏཱིཏི – ཨཉྙཱཎཙརིཡཱ། སཝིཙིཀིཙྪཱ ཙརཏཱིཏི – ཨཉྙཱཎཙརིཡཱ། སཱནུསཡཱ ཙརཏཱིཏི – ཨཉྙཱཎཙརིཡཱ ། རཱགསམྤཡུཏྟཱ ཙརཏཱིཏི – ཨཉྙཱཎཙརིཡཱ། དོསསམྤཡུཏྟཱ ཙརཏཱིཏི – ཨཉྙཱཎཙརིཡཱ། མོཧསམྤཡུཏྟཱ ཙརཏཱིཏི – ཨཉྙཱཎཙརིཡཱ། མཱནསམྤཡུཏྟཱ ཙརཏཱིཏི – ཨཉྙཱཎཙརིཡཱ ། དིཊྛིསམྤཡུཏྟཱ ཙརཏཱིཏི – ཨཉྙཱཎཙརིཡཱ། ཨུདྡྷཙྩསམྤཡུཏྟཱ ཙརཏཱིཏི – ཨཉྙཱཎཙརིཡཱ། ཝིཙིཀིཙྪཱསམྤཡུཏྟཱ ཙརཏཱིཏི – ཨཉྙཱཎཙརིཡཱ། ཨནུསཡསམྤཡུཏྟཱ ཙརཏཱིཏི – ཨཉྙཱཎཙརིཡཱ། ཀུསལེཧི ཀམྨེཧི ཝིཔྤཡུཏྟཱ ཙརཏཱིཏི – ཨཉྙཱཎཙརིཡཱ། ཨཀུསལེཧི ཀམྨེཧི སམྤཡུཏྟཱ ཙརཏཱིཏི – ཨཉྙཱཎཙརིཡཱ། སཱཝཛྫེཧི ཀམྨེཧི སམྤཡུཏྟཱ ཙརཏཱིཏི – ཨཉྙཱཎཙརིཡཱ། ཨནཝཛྫེཧི ཀམྨེཧི ཝིཔྤཡུཏྟཱ ཙརཏཱིཏི – ཨཉྙཱཎཙརིཡཱ ། ཀཎྷེཧི ཀམྨེཧི སམྤཡུཏྟཱ ཙརཏཱིཏི – ཨཉྙཱཎཙརིཡཱ། སུཀྐེཧི ཀམྨེཧི ཝིཔྤཡུཏྟཱ ཙརཏཱིཏི – ཨཉྙཱཎཙརིཡཱ། སུཁུདྲཡེཧི ཀམྨེཧི ཝིཔྤཡུཏྟཱ ཙརཏཱིཏི – ཨཉྙཱཎཙརིཡཱ། དུཀྑུདྲཡེཧི ཀམྨེཧི སམྤཡུཏྟཱ ཙརཏཱིཏི – ཨཉྙཱཎཙརིཡཱ། སུཁཝིཔཱཀེཧི ཀམྨེཧི ཝིཔྤཡུཏྟཱ ཙརཏཱིཏི – ཨཉྙཱཎཙརིཡཱ། དུཀྑཝིཔཱཀེཧི ཀམྨེཧི སམྤཡུཏྟཱ ཙརཏཱིཏི – ཨཉྙཱཎཙརིཡཱ། ཨཉྙཱཏེ ཙརཏཱིཏི – ཨཉྙཱཎཙརིཡཱ། ཨཉྙཱཎསྶ ཨེཝརཱུཔཱ ཙརིཡཱ ཧོཏཱིཏི – ཨཉྙཱཎཙརིཡཱ། ཨཡཾ ཨཉྙཱཎཙརིཡཱ།
70.Aññāṇacariyāti kenaṭṭhena aññāṇacariyā? Sarāgā caratīti – aññāṇacariyā. Sadosā caratīti – aññāṇacariyā. Samohā caratīti – aññāṇacariyā. Samānā caratīti – aññāṇacariyā. Sadiṭṭhi caratīti – aññāṇacariyā. Sauddhaccā caratīti – aññāṇacariyā. Savicikicchā caratīti – aññāṇacariyā. Sānusayā caratīti – aññāṇacariyā . Rāgasampayuttā caratīti – aññāṇacariyā. Dosasampayuttā caratīti – aññāṇacariyā. Mohasampayuttā caratīti – aññāṇacariyā. Mānasampayuttā caratīti – aññāṇacariyā . Diṭṭhisampayuttā caratīti – aññāṇacariyā. Uddhaccasampayuttā caratīti – aññāṇacariyā. Vicikicchāsampayuttā caratīti – aññāṇacariyā. Anusayasampayuttā caratīti – aññāṇacariyā. Kusalehi kammehi vippayuttā caratīti – aññāṇacariyā. Akusalehi kammehi sampayuttā caratīti – aññāṇacariyā. Sāvajjehi kammehi sampayuttā caratīti – aññāṇacariyā. Anavajjehi kammehi vippayuttā caratīti – aññāṇacariyā . Kaṇhehi kammehi sampayuttā caratīti – aññāṇacariyā. Sukkehi kammehi vippayuttā caratīti – aññāṇacariyā. Sukhudrayehi kammehi vippayuttā caratīti – aññāṇacariyā. Dukkhudrayehi kammehi sampayuttā caratīti – aññāṇacariyā. Sukhavipākehi kammehi vippayuttā caratīti – aññāṇacariyā. Dukkhavipākehi kammehi sampayuttā caratīti – aññāṇacariyā. Aññāte caratīti – aññāṇacariyā. Aññāṇassa evarūpā cariyā hotīti – aññāṇacariyā. Ayaṃ aññāṇacariyā.
༧༡. ཀཏམཱ ཉཱཎཙརིཡཱ? ཨནིཙྩཱནུཔསྶནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; ཨནིཙྩཱནུཔསྶནཱ ཉཱཎཙརིཡཱ། དུཀྑཱནུཔསྶནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; དུཀྑཱནུཔསྶནཱ ཉཱཎཙརིཡཱ། ཨནཏྟཱནུཔསྶནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; ཨནཏྟཱནུཔསྶནཱ ཉཱཎཙརིཡཱ། ནིབྦིདཱནུཔསྶནཏྠཱཡ…པེ॰… ཝིརཱགཱནུཔསྶནཏྠཱཡ… ནིརོདྷཱནུཔསྶནཏྠཱཡ… པཊིནིསྶགྒཱནུཔསྶནཏྠཱཡ… ཁཡཱནུཔསྶནཏྠཱཡ… ཝཡཱནུཔསྶནཏྠཱཡ… ཝིཔརིཎཱམཱནུཔསྶནཏྠཱཡ… ཨནིམིཏྟཱནུཔསྶནཏྠཱཡ… ཨཔྤཎིཧིཏཱནུཔསྶནཏྠཱཡ… སུཉྙཏཱནུཔསྶནཏྠཱཡ… ཨདྷིཔཉྙཱདྷམྨཱནུཔསྶནཏྠཱཡ… ཡཐཱབྷཱུཏཉཱཎདསྶནཏྠཱཡ… ཨཱདཱིནཝཱནུཔསྶནཏྠཱཡ… པཊིསངྑཱནུཔསྶནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ; པཊིསངྑཱནུཔསྶནཱ ཉཱཎཙརིཡཱ། ཝིཝཊྚནཱནུཔསྶནཱ ཉཱཎཙརིཡཱ། སོཏཱཔཏྟིམགྒོ ཉཱཎཙརིཡཱ། སོཏཱཔཏྟིཕལསམཱཔཏྟི ཉཱཎཙརིཡཱ། སཀདཱགཱམིམགྒོ ཉཱཎཙརིཡཱ། སཀདཱགཱམིཕལསམཱཔཏྟི ཉཱཎཙརིཡཱ། ཨནཱགཱམིམགྒོ ཉཱཎཙརིཡཱ། ཨནཱགཱམིཕལསམཱཔཏྟི ཉཱཎཙརིཡཱ། ཨརཧཏྟམགྒོ ཉཱཎཙརིཡཱ། ཨརཧཏྟཕལསམཱཔཏྟི ཉཱཎཙརིཡཱ།
71. Katamā ñāṇacariyā? Aniccānupassanatthāya āvajjanakiriyābyākatā viññāṇacariyā; aniccānupassanā ñāṇacariyā. Dukkhānupassanatthāya āvajjanakiriyābyākatā viññāṇacariyā; dukkhānupassanā ñāṇacariyā. Anattānupassanatthāya āvajjanakiriyābyākatā viññāṇacariyā; anattānupassanā ñāṇacariyā. Nibbidānupassanatthāya…pe… virāgānupassanatthāya… nirodhānupassanatthāya… paṭinissaggānupassanatthāya… khayānupassanatthāya… vayānupassanatthāya… vipariṇāmānupassanatthāya… animittānupassanatthāya… appaṇihitānupassanatthāya… suññatānupassanatthāya… adhipaññādhammānupassanatthāya… yathābhūtañāṇadassanatthāya… ādīnavānupassanatthāya… paṭisaṅkhānupassanatthāya āvajjanakiriyābyākatā viññāṇacariyā; paṭisaṅkhānupassanā ñāṇacariyā. Vivaṭṭanānupassanā ñāṇacariyā. Sotāpattimaggo ñāṇacariyā. Sotāpattiphalasamāpatti ñāṇacariyā. Sakadāgāmimaggo ñāṇacariyā. Sakadāgāmiphalasamāpatti ñāṇacariyā. Anāgāmimaggo ñāṇacariyā. Anāgāmiphalasamāpatti ñāṇacariyā. Arahattamaggo ñāṇacariyā. Arahattaphalasamāpatti ñāṇacariyā.
ཉཱཎཙརིཡཱཏི ཀེནཊྛེན ཉཱཎཙརིཡཱ? ནཱིརཱགཱ ཙརཏཱིཏི – ཉཱཎཙརིཡཱ། ནིདྡོསཱ ཙརཏཱིཏི – ཉཱཎཙརིཡཱ…པེ॰… ནཱནུསཡཱ ཙརཏཱིཏི – ཉཱཎཙརིཡཱ། རཱགཝིཔྤཡུཏྟཱ ཙརཏཱིཏི – ཉཱཎཙརིཡཱ། དོསཝིཔྤཡུཏྟཱ ཙརཏཱིཏི – ཉཱཎཙརིཡཱ། མོཧཝིཔྤཡུཏྟཱ ཙརཏཱིཏི – ཉཱཎཙརིཡཱ། མཱནཝིཔྤཡུཏྟཱ…པེ॰… དིཊྛིཝིཔྤཡུཏྟཱ… ཨུདྡྷཙྩཝིཔྤཡུཏྟཱ… ཝིཙིཀིཙྪཱཝིཔྤཡུཏྟཱ… ཨནུསཡཝིཔྤཡུཏྟཱ… ཀུསལེཧི ཀམྨེཧི སམྤཡུཏྟཱ… ཨཀུསལེཧི ཀམྨེཧི ཝིཔྤཡུཏྟཱ… སཱཝཛྫེཧི ཀམྨེཧི ཝིཔྤཡུཏྟཱ… ཨནཝཛྫེཧི ཀམྨེཧི སམྤཡུཏྟཱ… ཀཎྷེཧི ཀམྨེཧི ཝིཔྤཡུཏྟཱ… སུཀྐེཧི ཀམྨེཧི སམྤཡུཏྟཱ… སུཁུདྲཡེཧི ཀམྨེཧི སམྤཡུཏྟཱ… དུཀྑུདྲཡེཧི ཀམྨེཧི ཝིཔྤཡུཏྟཱ… སུཁཝིཔཱཀེཧི ཀམྨེཧི སམྤཡུཏྟཱ ཙརཏཱིཏི – ཉཱཎཙརིཡཱ། དུཀྑཝིཔཱཀེཧི ཀམྨེཧི ཝིཔྤཡུཏྟཱ ཙརཏཱིཏི – ཉཱཎཙརིཡཱ། ཉཱཏེ ཙརཏཱིཏི – ཉཱཎཙརིཡཱ ། ཉཱཎསྶ ཨེཝརཱུཔཱ ཙརིཡཱ ཧོཏཱིཏི – ཉཱཎཙརིཡཱ། ཨཡཾ ཉཱཎཙརིཡཱ། ཨཉྙཱ ཝིཉྙཱཎཙརིཡཱ, ཨཉྙཱ ཨཉྙཱཎཙརིཡཱ, ཨཉྙཱ ཉཱཎཙརིཡཱཏི། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘ཙརིཡཱཝཝཏྠཱནེ པཉྙཱ ཙརིཡཱནཱནཏྟེ ཉཱཎཾ’’།
Ñāṇacariyāti kenaṭṭhena ñāṇacariyā? Nīrāgā caratīti – ñāṇacariyā. Niddosā caratīti – ñāṇacariyā…pe… nānusayā caratīti – ñāṇacariyā. Rāgavippayuttā caratīti – ñāṇacariyā. Dosavippayuttā caratīti – ñāṇacariyā. Mohavippayuttā caratīti – ñāṇacariyā. Mānavippayuttā…pe… diṭṭhivippayuttā… uddhaccavippayuttā… vicikicchāvippayuttā… anusayavippayuttā… kusalehi kammehi sampayuttā… akusalehi kammehi vippayuttā… sāvajjehi kammehi vippayuttā… anavajjehi kammehi sampayuttā… kaṇhehi kammehi vippayuttā… sukkehi kammehi sampayuttā… sukhudrayehi kammehi sampayuttā… dukkhudrayehi kammehi vippayuttā… sukhavipākehi kammehi sampayuttā caratīti – ñāṇacariyā. Dukkhavipākehi kammehi vippayuttā caratīti – ñāṇacariyā. Ñāte caratīti – ñāṇacariyā . Ñāṇassa evarūpā cariyā hotīti – ñāṇacariyā. Ayaṃ ñāṇacariyā. Aññā viññāṇacariyā, aññā aññāṇacariyā, aññā ñāṇacariyāti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘cariyāvavatthāne paññā cariyānānatte ñāṇaṃ’’.
ཙརིཡཱནཱནཏྟཉཱཎནིདྡེསོ སཏྟརསམོ།
Cariyānānattañāṇaniddeso sattarasamo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༡༧. ཙརིཡཱནཱནཏྟཉཱཎནིདྡེསཝཎྞནཱ • 17. Cariyānānattañāṇaniddesavaṇṇanā
