| Library / Tipiṭaka / तिपिटक • Tipiṭaka / चूळवग्गपाळि • Cūḷavaggapāḷi |
३. चत्तालीसकं
3. Cattālīsakaṃ
१६०. तेन खो पन समयेन अञ्ञतरो भिक्खु परिवसन्तो विब्भमि। सो पुन पच्चागन्त्वा भिक्खू उपसम्पदं याचि। भगवतो एतमत्थं आरोचेसुं।
160. Tena kho pana samayena aññataro bhikkhu parivasanto vibbhami. So puna paccāgantvā bhikkhū upasampadaṃ yāci. Bhagavato etamatthaṃ ārocesuṃ.
‘‘इध पन, भिक्खवे, भिक्खु परिवसन्तो विब्भमति। विब्भन्तकस्स, भिक्खवे, परिवासो न रुहति। सो चे पुन उपसम्पज्जति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो, अवसेसो परिवसितब्बो।
‘‘Idha pana, bhikkhave, bhikkhu parivasanto vibbhamati. Vibbhantakassa, bhikkhave, parivāso na ruhati. So ce puna upasampajjati, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho, avaseso parivasitabbo.
‘‘इध पन, भिक्खवे, भिक्खु परिवसन्तो सामणेरो होति। सामणेरस्स, भिक्खवे, परिवासो न रुहति। सो चे पुन उपसम्पज्जति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो, अवसेसो परिवसितब्बो।
‘‘Idha pana, bhikkhave, bhikkhu parivasanto sāmaṇero hoti. Sāmaṇerassa, bhikkhave, parivāso na ruhati. So ce puna upasampajjati, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho, avaseso parivasitabbo.
‘‘इध पन, भिक्खवे, भिक्खु परिवसन्तो उम्मत्तको होति। उम्मत्तकस्स, भिक्खवे, परिवासो न रुहति। सो चे पुन अनुम्मत्तको होति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो, अवसेसो परिवसितब्बो।
‘‘Idha pana, bhikkhave, bhikkhu parivasanto ummattako hoti. Ummattakassa, bhikkhave, parivāso na ruhati. So ce puna anummattako hoti, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho, avaseso parivasitabbo.
‘‘इध पन, भिक्खवे, भिक्खु परिवसन्तो खित्तचित्तो होति। खित्तचित्तस्स, भिक्खवे, परिवासो न रुहति। सो चे पुन अखित्तचित्तो होति, तस्स तदेव पुरिमं परिवासदानं। यो परिवासो दिन्नो सुदिन्नो, यो पुरिवुत्थो सुपरिवुत्थो, अवसेसो परिवसितब्बो।
‘‘Idha pana, bhikkhave, bhikkhu parivasanto khittacitto hoti. Khittacittassa, bhikkhave, parivāso na ruhati. So ce puna akhittacitto hoti, tassa tadeva purimaṃ parivāsadānaṃ. Yo parivāso dinno sudinno, yo purivuttho suparivuttho, avaseso parivasitabbo.
‘‘इध पन, भिक्खवे, भिक्खु परिवसन्तो वेदनाट्टो होति। वेदनाट्टस्स , भिक्खवे, परिवासो न रुहति। सो चे पुन अवेदनाट्टो होति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो, अवसेसो परिवसितब्बो।
‘‘Idha pana, bhikkhave, bhikkhu parivasanto vedanāṭṭo hoti. Vedanāṭṭassa , bhikkhave, parivāso na ruhati. So ce puna avedanāṭṭo hoti, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho, avaseso parivasitabbo.
‘‘इध पन, भिक्खवे, भिक्खु परिवसन्तो, आपत्तिया अप्पटिकम्मे, उक्खिपिय्यति। उक्खित्तकस्स, भिक्खवे, परिवासो न रुहति। सो चे पुन ओसारिय्यति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो, अवसेसो परिवसितब्बो।
‘‘Idha pana, bhikkhave, bhikkhu parivasanto, āpattiyā appaṭikamme, ukkhipiyyati. Ukkhittakassa, bhikkhave, parivāso na ruhati. So ce puna osāriyyati, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho, avaseso parivasitabbo.
‘‘इध पन, भिक्खवे, भिक्खु परिवसन्तो, पापिकाय दिट्ठिया, अप्पटिनिस्सग्गे, उक्खिपिय्यति। उक्खित्तकस्स, भिक्खवे, परिवासो न रुहति। सो चे पुन ओसारिय्यति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो, अवसेसो परिवसितब्बो।
‘‘Idha pana, bhikkhave, bhikkhu parivasanto, pāpikāya diṭṭhiyā, appaṭinissagge, ukkhipiyyati. Ukkhittakassa, bhikkhave, parivāso na ruhati. So ce puna osāriyyati, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho, avaseso parivasitabbo.
१६१. ‘‘इध पन, भिक्खवे, भिक्खु मूलायपटिकस्सनारहो विब्भमति। विब्भन्तकस्स, भिक्खवे, मूलायपटिकस्सना न रुहति। सो चे पुन उपसम्पज्जति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो। सो भिक्खु मूलाय पटिकस्सितब्बो।
161. ‘‘Idha pana, bhikkhave, bhikkhu mūlāyapaṭikassanāraho vibbhamati. Vibbhantakassa, bhikkhave, mūlāyapaṭikassanā na ruhati. So ce puna upasampajjati, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho. So bhikkhu mūlāya paṭikassitabbo.
‘‘इध पन, भिक्खवे, भिक्खु मूलायपटिकस्सनारहो सामणेरो होति…पे॰… उम्मत्तको होति…पे॰… खित्तचित्तो होति…पे॰… वेदनाट्टो होति…पे॰… आपत्तिया अदस्सने उक्खिपिय्यति…पे॰… आपत्तिया अप्पटिकम्मे उक्खिपिय्यति…पे॰… पापिकाय दिट्ठिया, अप्पटिनिस्सग्गे, उक्खिपिय्यति। उक्खित्तकस्स, भिक्खवे, मूलायपटिकस्सना न रुहति। सो चे पुन ओसारिय्यति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो। सो भिक्खु मूलाय पटिकस्सितब्बो।
‘‘Idha pana, bhikkhave, bhikkhu mūlāyapaṭikassanāraho sāmaṇero hoti…pe… ummattako hoti…pe… khittacitto hoti…pe… vedanāṭṭo hoti…pe… āpattiyā adassane ukkhipiyyati…pe… āpattiyā appaṭikamme ukkhipiyyati…pe… pāpikāya diṭṭhiyā, appaṭinissagge, ukkhipiyyati. Ukkhittakassa, bhikkhave, mūlāyapaṭikassanā na ruhati. So ce puna osāriyyati, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho. So bhikkhu mūlāya paṭikassitabbo.
१६२. ‘‘इध पन, भिक्खवे, भिक्खु मानत्तारहो विब्भमति। विब्भन्तकस्स, भिक्खवे, मानत्तदानं न रुहति। सो चे पुन उपसम्पज्जति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो। तस्स भिक्खुनो मानत्तं दातब्बं।
162. ‘‘Idha pana, bhikkhave, bhikkhu mānattāraho vibbhamati. Vibbhantakassa, bhikkhave, mānattadānaṃ na ruhati. So ce puna upasampajjati, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho. Tassa bhikkhuno mānattaṃ dātabbaṃ.
‘‘इध पन, भिक्खवे, भिक्खु मानत्तारहो सामणेरो होति…पे॰… उम्मत्तको होति…पे॰… खित्तचित्तो होति…पे॰… वेदनाट्टो होति…पे॰… आपत्तिया अदस्सने, उक्खिपिय्यति…पे॰… आपत्तिया अप्पटिकम्मे, उक्खिपिय्यति…पे॰… पापिकाय दिट्ठिया, अप्पटिनिस्सग्गे , उक्खिपिय्यति। उक्खित्तकस्स, भिक्खवे, मानत्तदानं न रुहति। सो चे पुन ओसारिय्यति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो। तस्स भिक्खुनो मानत्तं दातब्बं।
‘‘Idha pana, bhikkhave, bhikkhu mānattāraho sāmaṇero hoti…pe… ummattako hoti…pe… khittacitto hoti…pe… vedanāṭṭo hoti…pe… āpattiyā adassane, ukkhipiyyati…pe… āpattiyā appaṭikamme, ukkhipiyyati…pe… pāpikāya diṭṭhiyā, appaṭinissagge , ukkhipiyyati. Ukkhittakassa, bhikkhave, mānattadānaṃ na ruhati. So ce puna osāriyyati, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho. Tassa bhikkhuno mānattaṃ dātabbaṃ.
१६३. ‘‘इध पन, भिक्खवे, भिक्खु मानत्तं चरन्तो विब्भमति। विब्भन्तकस्स, भिक्खवे , मानत्तचरिया न रुहति। सो चे पुन उपसम्पज्जति तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो; यं मानत्तं दिन्नं सुदिन्नं, यं मानत्तं चिण्णं सुचिण्णं, अवसेसं चरितब्बं।
163. ‘‘Idha pana, bhikkhave, bhikkhu mānattaṃ caranto vibbhamati. Vibbhantakassa, bhikkhave , mānattacariyā na ruhati. So ce puna upasampajjati tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho; yaṃ mānattaṃ dinnaṃ sudinnaṃ, yaṃ mānattaṃ ciṇṇaṃ suciṇṇaṃ, avasesaṃ caritabbaṃ.
‘‘इध पन, भिक्खवे, भिक्खु मानत्तं चरन्तो सामणेरो होति…पे॰… उम्मत्तको होति…पे॰… खित्तचित्तो होति…पे॰… वेदनाट्टो होति…पे॰… आपत्तिया अदस्सने, उक्खिपिय्यति…पे॰… आपत्तिया अप्पटिकम्मे, उक्खिपिय्यति…पे॰… पापिकाय दिट्ठिया, अप्पटिनिस्सग्गे, उक्खिपिय्यति। उक्खित्तकस्स, भिक्खवे, मानत्तचरिया न रुहति। सो चे पुन ओसारिय्यति, तस्स तदेव पुरिमं परिवासदानं। यो परिवासो दिन्नो सुदिन्नो, यो पुरिवुत्थो सुपरिवुत्थो; यं मानत्तं दिन्नं सुदिन्नं, यं मानत्तं चिण्णं सुचिण्णं, अवसेसं चरितब्बं।
‘‘Idha pana, bhikkhave, bhikkhu mānattaṃ caranto sāmaṇero hoti…pe… ummattako hoti…pe… khittacitto hoti…pe… vedanāṭṭo hoti…pe… āpattiyā adassane, ukkhipiyyati…pe… āpattiyā appaṭikamme, ukkhipiyyati…pe… pāpikāya diṭṭhiyā, appaṭinissagge, ukkhipiyyati. Ukkhittakassa, bhikkhave, mānattacariyā na ruhati. So ce puna osāriyyati, tassa tadeva purimaṃ parivāsadānaṃ. Yo parivāso dinno sudinno, yo purivuttho suparivuttho; yaṃ mānattaṃ dinnaṃ sudinnaṃ, yaṃ mānattaṃ ciṇṇaṃ suciṇṇaṃ, avasesaṃ caritabbaṃ.
१६४. ‘‘इध पन, भिक्खवे, भिक्खु अब्भानारहो विब्भमति। विब्भन्तकस्स, भिक्खवे, अब्भानं न रुहति। सो चे पुन उपसम्पज्जति , तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो; यं मानत्तं दिन्नं सुदिन्नं, यं मानत्तं चिण्णं सुचिण्णं। सो भिक्खु अब्भेतब्बो।
164. ‘‘Idha pana, bhikkhave, bhikkhu abbhānāraho vibbhamati. Vibbhantakassa, bhikkhave, abbhānaṃ na ruhati. So ce puna upasampajjati , tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho; yaṃ mānattaṃ dinnaṃ sudinnaṃ, yaṃ mānattaṃ ciṇṇaṃ suciṇṇaṃ. So bhikkhu abbhetabbo.
‘‘इध पन, भिक्खवे, भिक्खु अब्भानारहो सामणेरो होति…पे॰… उम्मत्तको होति…पे॰…
‘‘Idha pana, bhikkhave, bhikkhu abbhānāraho sāmaṇero hoti…pe… ummattako hoti…pe…
खित्तचित्तो होति…पे॰… वेदनाट्टो होति…पे॰… आपत्तिया अदस्सने, उक्खिपिय्यति…पे॰… आपत्तिया अप्पटिकम्मे, उक्खिपिय्यति…पे॰… पापिकाय दिट्ठिया, अप्पटिनिस्सग्गे, उक्खिपिय्यति। उक्खित्तकस्स, भिक्खवे, अब्भानं न रुहति। सो चे पुन ओसारिय्यति, तस्स तदेव पुरिमं परिवासदानं। यो परिवासो दिन्नो सुदिन्नो, यो परिवुत्थो सुपरिवुत्थो; यं मानत्तं दिन्नं सुदिन्नं, यं मानत्तं चिण्णं सुचिण्णं। सो भिक्खु अब्भेतब्बो।
Khittacitto hoti…pe… vedanāṭṭo hoti…pe… āpattiyā adassane, ukkhipiyyati…pe… āpattiyā appaṭikamme, ukkhipiyyati…pe… pāpikāya diṭṭhiyā, appaṭinissagge, ukkhipiyyati. Ukkhittakassa, bhikkhave, abbhānaṃ na ruhati. So ce puna osāriyyati, tassa tadeva purimaṃ parivāsadānaṃ. Yo parivāso dinno sudinno, yo parivuttho suparivuttho; yaṃ mānattaṃ dinnaṃ sudinnaṃ, yaṃ mānattaṃ ciṇṇaṃ suciṇṇaṃ. So bhikkhu abbhetabbo.
चत्तालीसकं समत्तं।
Cattālīsakaṃ samattaṃ.
Footnotes:
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / चूळवग्ग-अट्ठकथा • Cūḷavagga-aṭṭhakathā / सुद्धन्तपरिवासादिकथा • Suddhantaparivāsādikathā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / सुद्धन्तपरिवासादिकथा • Suddhantaparivāsādikathā
