| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
৬৫. চত্তারি অকরণীযানি
65. Cattāri akaraṇīyāni
১২৯. তেন খো পন সমযেন ভিক্খূ অঞ্ঞতরং ভিক্খুং উপসম্পাদেত্ৰা এককং ওহায পক্কমিংসু। সো পচ্ছা এককোৰ আগচ্ছন্তো অন্তরামগ্গে পুরাণদুতিযিকায সমাগঞ্ছি। সা এৰমাহ – ‘‘কিংদানি পব্বজিতোসী’’তি? ‘‘আম, পব্বজিতোম্হী’’তি। ‘‘দুল্লভো খো পব্বজিতানং মেথুনো ধম্মো; এহি, মেথুনং ধম্মং পটিসেৰা’’তি। সো তস্সা মেথুনং ধম্মং পটিসেৰিত্ৰা চিরেন অগমাসি। ভিক্খূ এৰমাহংসু – ‘‘কিস্স ত্ৰং, আৰুসো, এৰং চিরং অকাসী’’তি? অথ খো সো ভিক্খু ভিক্খূনং এতমত্থং আরোচেসি। ভিক্খূ ভগৰতো এতমত্থং আরোচেসুং । অনুজানামি, ভিক্খৰে, উপসম্পাদেত্ৰা দুতিযং দাতুং, চত্তারি চ অকরণীযানি আচিক্খিতুং –
129. Tena kho pana samayena bhikkhū aññataraṃ bhikkhuṃ upasampādetvā ekakaṃ ohāya pakkamiṃsu. So pacchā ekakova āgacchanto antarāmagge purāṇadutiyikāya samāgañchi. Sā evamāha – ‘‘kiṃdāni pabbajitosī’’ti? ‘‘Āma, pabbajitomhī’’ti. ‘‘Dullabho kho pabbajitānaṃ methuno dhammo; ehi, methunaṃ dhammaṃ paṭisevā’’ti. So tassā methunaṃ dhammaṃ paṭisevitvā cirena agamāsi. Bhikkhū evamāhaṃsu – ‘‘kissa tvaṃ, āvuso, evaṃ ciraṃ akāsī’’ti? Atha kho so bhikkhu bhikkhūnaṃ etamatthaṃ ārocesi. Bhikkhū bhagavato etamatthaṃ ārocesuṃ . Anujānāmi, bhikkhave, upasampādetvā dutiyaṃ dātuṃ, cattāri ca akaraṇīyāni ācikkhituṃ –
‘‘উপসম্পন্নেন ভিক্খুনা মেথুনো ধম্মো ন পটিসেৰিতব্বো, অন্তমসো তিরচ্ছানগতাযপি। যো ভিক্খু মেথুনং ধম্মং পটিসেৰতি, অস্সমণো হোতি অসক্যপুত্তিযো। সেয্যথাপি নাম পুরিসো সীসচ্ছিন্নো অভব্বো তেন সরীরবন্ধনেন জীৰিতুং, এৰমেৰ ভিক্খু মেথুনং ধম্মং পটিসেৰিত্ৰা অস্সমণো হোতি অসক্যপুত্তিযো। তং তে যাৰজীৰং অকরণীযং।
‘‘Upasampannena bhikkhunā methuno dhammo na paṭisevitabbo, antamaso tiracchānagatāyapi. Yo bhikkhu methunaṃ dhammaṃ paṭisevati, assamaṇo hoti asakyaputtiyo. Seyyathāpi nāma puriso sīsacchinno abhabbo tena sarīrabandhanena jīvituṃ, evameva bhikkhu methunaṃ dhammaṃ paṭisevitvā assamaṇo hoti asakyaputtiyo. Taṃ te yāvajīvaṃ akaraṇīyaṃ.
‘‘উপসম্পন্নেন ভিক্খুনা অদিন্নং থেয্যসঙ্খাতং ন আদাতব্বং, অন্তমসো তিণসলাকং উপাদায। যো ভিক্খু পাদং ৰা পাদারহং ৰা অতিরেকপাদং ৰা অদিন্নং থেয্যসঙ্খাতং আদিযতি, অস্সমণো হোতি অসক্যপুত্তিযো। সেয্যথাপি নাম পণ্ডুপলাসো বন্ধনা পমুত্তো অভব্বো হরিতত্থায, এৰমেৰ ভিক্খু পাদং ৰা পাদারহং ৰা অতিরেকপাদং ৰা অদিন্নং থেয্যসঙ্খাতং আদিযিত্ৰা অস্সমণো হোতি অসক্যপুত্তিযো। তং তে যাৰজীৰং অকরণীযং।
‘‘Upasampannena bhikkhunā adinnaṃ theyyasaṅkhātaṃ na ādātabbaṃ, antamaso tiṇasalākaṃ upādāya. Yo bhikkhu pādaṃ vā pādārahaṃ vā atirekapādaṃ vā adinnaṃ theyyasaṅkhātaṃ ādiyati, assamaṇo hoti asakyaputtiyo. Seyyathāpi nāma paṇḍupalāso bandhanā pamutto abhabbo haritatthāya, evameva bhikkhu pādaṃ vā pādārahaṃ vā atirekapādaṃ vā adinnaṃ theyyasaṅkhātaṃ ādiyitvā assamaṇo hoti asakyaputtiyo. Taṃ te yāvajīvaṃ akaraṇīyaṃ.
‘‘উপসম্পন্নেন ভিক্খুনা সঞ্চিচ্চ পাণো জীৰিতা ন ৰোরোপেতব্বো, অন্তমসো কুন্থকিপিল্লিকং উপাদায। যো ভিক্খু সঞ্চিচ্চ মনুস্সৰিগ্গহং জীৰিতা ৰোরোপেতি, অন্তমসো গব্ভপাতনং উপাদায, অস্সমণো হোতি অসক্যপুত্তিযো। সেয্যথাপি নাম পুথুসিলা দ্ৰেধা ভিন্না অপ্পটিসন্ধিকা হোতি, এৰমেৰ ভিক্খু সঞ্চিচ্চ মনুস্সৰিগ্গহং জীৰিতা ৰোরোপেত্ৰা অস্সমণো হোতি অসক্যপুত্তিযো । তং তে যাৰজীৰং অকরণীযং।
‘‘Upasampannena bhikkhunā sañcicca pāṇo jīvitā na voropetabbo, antamaso kunthakipillikaṃ upādāya. Yo bhikkhu sañcicca manussaviggahaṃ jīvitā voropeti, antamaso gabbhapātanaṃ upādāya, assamaṇo hoti asakyaputtiyo. Seyyathāpi nāma puthusilā dvedhā bhinnā appaṭisandhikā hoti, evameva bhikkhu sañcicca manussaviggahaṃ jīvitā voropetvā assamaṇo hoti asakyaputtiyo . Taṃ te yāvajīvaṃ akaraṇīyaṃ.
‘‘উপসম্পন্নেন ভিক্খুনা উত্তরিমনুস্সধম্মো ন উল্লপিতব্বো, অন্তমসো ‘সুঞ্ঞাগারে অভিরমামী’তি। যো ভিক্খু পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি ঝানং ৰা ৰিমোক্খং ৰা সমাধিং ৰা সমাপত্তিং ৰা মগ্গং ৰা ফলং ৰা, অস্সমণো হোতি অসক্যপুত্তিযো। সেয্যথাপি নাম তালো মত্থকচ্ছিন্নো অভব্বো পুন ৰিরুল়্হিযা, এৰমেৰ ভিক্খু পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপিত্ৰা অস্সমণো হোতি অসক্যপুত্তিযো। তং তে যাৰজীৰং অকরণীয’’ন্তি।
‘‘Upasampannena bhikkhunā uttarimanussadhammo na ullapitabbo, antamaso ‘suññāgāre abhiramāmī’ti. Yo bhikkhu pāpiccho icchāpakato asantaṃ abhūtaṃ uttarimanussadhammaṃ ullapati jhānaṃ vā vimokkhaṃ vā samādhiṃ vā samāpattiṃ vā maggaṃ vā phalaṃ vā, assamaṇo hoti asakyaputtiyo. Seyyathāpi nāma tālo matthakacchinno abhabbo puna viruḷhiyā, evameva bhikkhu pāpiccho icchāpakato asantaṃ abhūtaṃ uttarimanussadhammaṃ ullapitvā assamaṇo hoti asakyaputtiyo. Taṃ te yāvajīvaṃ akaraṇīya’’nti.
চত্তারি অকরণীযানি নিট্ঠিতানি।
Cattāri akaraṇīyāni niṭṭhitāni.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / চত্তারোনিস্সযাদিকথা • Cattāronissayādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / চত্তারোনিস্সযাদিকথাৰণ্ণনা • Cattāronissayādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৬৪. চত্তারোনিস্সযাদিকথা • 64. Cattāronissayādikathā
