| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
64. சத்தாரோனிஸ்ஸயாதி³கதா²
64. Cattāronissayādikathā
128. உபஸம்பன்னஸமனந்தரமேவாதி உபஸம்பன்னோ ஹுத்வா ஸமனந்தரமேவ, ந காலந்தரேதி அத்தோ². ஏகபோரிஸாதி எத்த² போரிஸஸத்³தோ³ உபரி வித்த²தே பு⁴ஜபமாணே ச போஸபமாணே ச வத்ததி. புரிஸஸ்ஸ பமாணா போரிஸா, பமாணத்தே² ணபச்சயோ. சா²யாதி ஆதபாபா⁴வோ. மேதப்³பா³தி பமேதப்³பா³. ‘‘வஸ்ஸானோ’’திஆதி³ ‘‘உதுபமாணங் ஆசிக்கி²தப்³ப³’’ந்தி எத்த² ஆசிக்க²ணாகாரத³ஸ்ஸனங். உதுனோ பமாணந்தி அத்த²ங் நிவாரெந்தோ ஆஹ ‘‘எத்த² சா’’திஆதி³. அரதி புனப்புனங் க³ச்ச²தீதி உது , பமியதி ஸங்வச்ச²ரோ பரிச்சி²ஜ்ஜியதி அனேனாதி பமாணங். யத்தகேஹி தி³வஸேஹி அபரிபுண்ணோதி ஸம்ப³ந்தோ⁴. யஸ்ஸாதி தி³வஸபா⁴க³ஸ்ஸ. யோ உது அபரிபுண்ணோ, தஸ்ஸ உதுனோதி பாட²ஸேஸோ யோஜேதப்³போ³. ‘‘உதுபமாணங் ஆசிக்கி²தப்³ப³ங், தி³வஸபா⁴கோ³ ஆசிக்கி²தப்³போ³’’தி பதா³னங் அபரம்பி அத்த²விகப்பங் த³ஸ்ஸெந்தோ ஆஹ ‘‘அத² வா’’திஆதி³. தத்த² அயங் நாம உதூதி அயங் உது வஸ்ஸானோ நாமாதி வா ஹேமந்தோ நாமாதி வா கி³ம்ஹோ நாமாதி வா. புப்³ப³ன்ஹோதி அஹஸ்ஸ புப்³போ³ புப்³ப³ன்ஹோ. தத்த² பச்சி²மனயோவ பாஸங்ஸதரோ. கஸ்மா? புரிமனயே உதுபரிபுண்ணே தி³வஸபா⁴கா³சிக்க²ணஸ்ஸ அபா⁴வா, பச்சி²மனயே பன பரிபுண்ணங் வா அபரிபுண்ணங் வா உதுபமாணங் ஆசிக்கி²தப்³ப³ங். உபஸம்பன்னதி³வஸபா⁴கோ³வ ‘‘புப்³ப³ன்ஹோ’’தி வா ‘‘ஸாயன்ஹோ’’தி வா ஆசிக்கி²தப்³போ³. ஸங்கீ³தீதி எத்த² ஸங் ஏகதோ கத்வா கா³யிதப்³பா³ கதே²தப்³பா³தி ஸங்கீ³தீதி வசனத்த²ங் த³ஸ்ஸெந்தோ ஆஹ ‘‘இத³மேவ ஸப்³ப³ங் ஏகதோ கத்வா’’திஆதி³. தத்த² கிந்தி கிங் உதுங். இத³ங் நாமாதி இத³ங் நாம உதுங். வதெ³ய்யாஸீதி ஆக³ந்துகானங் வுட்³ட⁴னவகபா⁴வாதி³ஞாபனத்த²ங் கதெ²ய்யாஸி.
128.Upasampannasamanantaramevāti upasampanno hutvā samanantarameva, na kālantareti attho. Ekaporisāti ettha porisasaddo upari vitthate bhujapamāṇe ca posapamāṇe ca vattati. Purisassa pamāṇā porisā, pamāṇatthe ṇapaccayo. Chāyāti ātapābhāvo. Metabbāti pametabbā. ‘‘Vassāno’’tiādi ‘‘utupamāṇaṃ ācikkhitabba’’nti ettha ācikkhaṇākāradassanaṃ. Utuno pamāṇanti atthaṃ nivārento āha ‘‘ettha cā’’tiādi. Arati punappunaṃ gacchatīti utu, pamiyati saṃvaccharo paricchijjiyati anenāti pamāṇaṃ. Yattakehi divasehi aparipuṇṇoti sambandho. Yassāti divasabhāgassa. Yo utu aparipuṇṇo, tassa utunoti pāṭhaseso yojetabbo. ‘‘Utupamāṇaṃ ācikkhitabbaṃ, divasabhāgo ācikkhitabbo’’ti padānaṃ aparampi atthavikappaṃ dassento āha ‘‘atha vā’’tiādi. Tattha ayaṃ nāma utūti ayaṃ utu vassāno nāmāti vā hemanto nāmāti vā gimho nāmāti vā. Pubbanhoti ahassa pubbo pubbanho. Tattha pacchimanayova pāsaṃsataro. Kasmā? Purimanaye utuparipuṇṇe divasabhāgācikkhaṇassa abhāvā, pacchimanaye pana paripuṇṇaṃ vā aparipuṇṇaṃ vā utupamāṇaṃ ācikkhitabbaṃ. Upasampannadivasabhāgova ‘‘pubbanho’’ti vā ‘‘sāyanho’’ti vā ācikkhitabbo. Saṃgītīti ettha saṃ ekato katvā gāyitabbā kathetabbāti saṃgītīti vacanatthaṃ dassento āha ‘‘idameva sabbaṃ ekato katvā’’tiādi. Tattha kinti kiṃ utuṃ. Idaṃ nāmāti idaṃ nāma utuṃ. Vadeyyāsīti āgantukānaṃ vuḍḍhanavakabhāvādiñāpanatthaṃ katheyyāsi.
129. து³தியந்தி ஸஹாயங் பி⁴க்கு²ங் வா ஸாமணேரங் வா புரிஸங் வா. அகரணீயானீதி உபஸம்பன்னேஹி அகத்தப்³பா³னி. பண்டு³பலாஸோதி எத்த² பண்டூ³தி ஸேதபீதமிஸ்ஸோ வண்ணோ, பலாஸஸத்³தோ³ பண்ணவாசகோ, ந ஹரிதவாசகோ, நாபி கிங்ஸுகது³மவாசகோதி த³ஸ்ஸெந்தோ ஆஹ ‘‘பண்டு³வண்ணோ பண்ணோ’’தி. பண்டு³பலாஸோதி ஸமாஸோபி ப்³யாஸோபி யுத்தோயேவ. ஸமாஸகாலே பண்டு³ யஸ்ஸத்தீ²தி பண்டு³, ஸோயேவ பலாஸோ பண்டு³பலாஸோதி காதப்³போ³. புப்ப²ப²லாதி³ங் ப³ந்த⁴தீதி ப³ந்த⁴னந்தி வசனத்தே²ன ப³ந்த⁴னஸத்³தோ³ வண்டபரியாயோதி ஆஹ ‘‘வண்டதோ’’தி. புது²ஸிலாதி (ம॰ நி॰ அட்ட²॰ 3.60) எத்த² புது²ஸத்³தோ³ மஹந்தபரியாயோதி ஆஹ ‘‘மஹாஸிலா’’தி.
129.Dutiyanti sahāyaṃ bhikkhuṃ vā sāmaṇeraṃ vā purisaṃ vā. Akaraṇīyānīti upasampannehi akattabbāni. Paṇḍupalāsoti ettha paṇḍūti setapītamisso vaṇṇo, palāsasaddo paṇṇavācako, na haritavācako, nāpi kiṃsukadumavācakoti dassento āha ‘‘paṇḍuvaṇṇo paṇṇo’’ti. Paṇḍupalāsoti samāsopi byāsopi yuttoyeva. Samāsakāle paṇḍu yassatthīti paṇḍu, soyeva palāso paṇḍupalāsoti kātabbo. Pupphaphalādiṃ bandhatīti bandhananti vacanatthena bandhanasaddo vaṇṭapariyāyoti āha ‘‘vaṇṭato’’ti. Puthusilāti (ma. ni. aṭṭha. 3.60) ettha puthusaddo mahantapariyāyoti āha ‘‘mahāsilā’’ti.
130. தஸ்ஸாதி உக்கே²பனீயகம்மாரஹஸ்ஸ பி⁴க்கு²னோ. ஸாமக்³கீ³தி ஸங்க⁴ஸாமக்³கீ³. தேனாதி உக்கே²பனீயகம்மாரஹேன பி⁴க்கு²னா. ஸம்போ⁴கே³தி ஆமிஸேன ச த⁴ம்மேன ச ஸம்போ⁴க³ஹேது. எத்த² ஸஹஸெய்யாபி ஸங்க³ஹிதா ஆபத்திபா⁴வதோ. அனாபத்தீதி அனுக்கி²த்தகபா⁴வதோ பாசித்தியாபத்தியா அனாபத்தி, அலஜ்ஜிலக்க²ணாபா⁴வதோ து³க்கடேன அனாபத்தீதி த³ட்ட²ப்³ப³ங்.
130.Tassāti ukkhepanīyakammārahassa bhikkhuno. Sāmaggīti saṅghasāmaggī. Tenāti ukkhepanīyakammārahena bhikkhunā. Sambhogeti āmisena ca dhammena ca sambhogahetu. Ettha sahaseyyāpi saṅgahitā āpattibhāvato. Anāpattīti anukkhittakabhāvato pācittiyāpattiyā anāpatti, alajjilakkhaṇābhāvato dukkaṭena anāpattīti daṭṭhabbaṃ.
இதி ஸமந்தபாஸாதி³காய வினயஸங்வண்ணனாய
Iti samantapāsādikāya vinayasaṃvaṇṇanāya
த்³வாஸத்ததிஅதி⁴கவத்து²ஸதபடிமண்டி³தஸ்ஸ மஹாக²ந்த⁴கஸ்ஸ
Dvāsattatiadhikavatthusatapaṭimaṇḍitassa mahākhandhakassa
அத்த²வண்ணனாய யோஜனா ஸமத்தா.
Atthavaṇṇanāya yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
64. சத்தாரோ நிஸ்ஸயா • 64. Cattāro nissayā
65. சத்தாரி அகரணீயானி • 65. Cattāri akaraṇīyāni
66. ஆபத்தியா அத³ஸ்ஸனே உக்கி²த்தகவத்தூ²னி • 66. Āpattiyā adassane ukkhittakavatthūni
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / சத்தாரோனிஸ்ஸயாதி³கதா² • Cattāronissayādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / சத்தாரோனிஸ்ஸயாதி³கதா²வண்ணனா • Cattāronissayādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / சத்தாரோனிஸ்ஸயாதி³கதா²வண்ணனா • Cattāronissayādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சத்தாரோனிஸ்ஸயாதி³கதா²வண்ணனா • Cattāronissayādikathāvaṇṇanā
