| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
சத்தாரோனிஸ்ஸயாதி³கதா²வண்ணனா
Cattāronissayādikathāvaṇṇanā
128. ஏகபோரிஸா வாதிஆதி³ ஸத்தானங் ஸரீரச்சா²யங் பாதே³ஹி மினித்வா ஜானநப்பகாரத³ஸ்ஸனங். ச²ஸத்தபத³பரமதா ஹி சா²யா ‘‘போரிஸா’’தி வுச்சதி. இத³ஞ்ச உதுப்பமாணாசிக்க²னாதி³ ச ஆக³ந்துகேஹி ஸத்³தி⁴ங் வீமங்ஸித்வா வுட்³ட⁴னவபா⁴வங் ஞத்வா வந்த³னவந்தா³பனாதி³கரணத்த²ங் வுத்தங். ஏதி ஆக³ச்ச²தி, க³ச்ச²தி சாதி உது, ஸோவ பமியதே அனேன ஸங்வச்ச²ரந்தி பமாணந்தி ஆஹ ‘‘உதுயேவ உதுப்பமாண’’ந்தி. அபரிபுண்ணாதி உபஸம்பதா³தி³வஸேன அபரிபுண்ணா. யதி³ உதுவேமஜ்ஜே² உபஸம்பாதி³தோ, ததா³ தஸ்மிங் உதும்ஹி அவஸிட்ட²தி³வஸாசிக்க²னங் ‘‘தி³வஸபா⁴கா³சிக்க²ன’’ந்தி த³ஸ்ஸேதி. தேனாஹ ‘‘யத்தகேஹி தி³வஸேஹி யஸ்ஸ யோ உது அபரிபுண்ணோ, தே தி³வஸே’’தி. தத்த² யஸ்ஸ தங் க²ணங் லத்³தூ⁴பஸம்பத³ஸ்ஸ புக்³க³லஸ்ஸ ஸம்ப³ந்தீ⁴ யோ உது யத்தகேஹி தி³வஸேஹி அபரிபுண்ணோ, தே தி³வஸேதி யோஜனா.
128.Ekaporisā vātiādi sattānaṃ sarīracchāyaṃ pādehi minitvā jānanappakāradassanaṃ. Chasattapadaparamatā hi chāyā ‘‘porisā’’ti vuccati. Idañca utuppamāṇācikkhanādi ca āgantukehi saddhiṃ vīmaṃsitvā vuḍḍhanavabhāvaṃ ñatvā vandanavandāpanādikaraṇatthaṃ vuttaṃ. Eti āgacchati, gacchati cāti utu, sova pamiyate anena saṃvaccharanti pamāṇanti āha ‘‘utuyeva utuppamāṇa’’nti. Aparipuṇṇāti upasampadādivasena aparipuṇṇā. Yadi utuvemajjhe upasampādito, tadā tasmiṃ utumhi avasiṭṭhadivasācikkhanaṃ ‘‘divasabhāgācikkhana’’nti dasseti. Tenāha ‘‘yattakehi divasehi yassa yo utu aparipuṇṇo, te divase’’ti. Tattha yassa taṃ khaṇaṃ laddhūpasampadassa puggalassa sambandhī yo utu yattakehi divasehi aparipuṇṇo, te divaseti yojanā.
சா²யாதி³கமேவ ஸப்³ப³ங் ஸங்க³ஹெத்வா கா³யிதப்³ப³தோ கதே²தப்³ப³தோ ஸங்கீ³தீதி ஆஹ ‘‘இத³மேவா’’திஆதி³. தத்த² ஏகதோ கத்வா ஆசிக்கி²தப்³ப³ங். த்வங் கிங் லப⁴ஸீதி த்வங் உபஸம்பாத³னகாலே கதரவஸ்ஸங், கதரஉதுஞ்ச லப⁴ஸி, கதரஸ்மிங் தே உபஸம்பதா³ லத்³தா⁴தி அத்தோ². வஸ்ஸந்தி வஸ்ஸானஉது. இத³ஞ்ச ஸங்வச்ச²ராசிக்க²னங் வினா வுத்தம்பி ந ஞாயதீதி இமினா உதுஆசிக்க²னேனேவ ஸாஸனவஸ்ஸேஸு வா கலியுக³வஸ்ஸாதீ³ஸு வா ஸஹஸ்ஸிமே வா ஸதிமே வா அஸுகங் உதுங் லபா⁴மீதி த³ஸ்ஸிதந்தி த³ட்ட²ப்³ப³ங். ‘‘சா²யா’’தி இத³ங் பாளியங் ஆக³தபடிபாடிங் ஸந்தா⁴ய வுத்தங். வத்தப்³ப³கமதோ பன கலியுக³வஸ்ஸாதீ³ஸு ஸப்³ப³தே³ஸபஸித்³தே⁴ஸு அஸுகவஸ்ஸே அஸுகஉதும்ஹி அஸுகமாஸே அஸுகே கண்ஹே வா ஸுக்கே வா பக்கே² அஸுகதிதி²வாரவிஸேஸயுத்தே நக்க²த்தே புப்³ப³ண்ஹாதி³தி³வஸபா⁴கே³ எத்தகே சா²யாபமாணே, நாடி³காபமாணே வா மயா உபஸம்பதா³ லத்³தா⁴தி வதெ³ய்யாஸீதி ஏவங் ஆசிக்கி²தப்³ப³ங். ‘‘இத³ங் ஸுட்டு² உக்³க³ஹெத்வா ஆக³ந்துகேஹி வுட்³ட⁴படிபாடிங் ஞத்வா படிபஜ்ஜாஹீ’’தி வத்தப்³ப³ங். பாளியங் கிஸ்ஸ த்வந்தி கிங் த்வங் எத்தகங் காலங் அகாஸீதி அத்தோ².
Chāyādikameva sabbaṃ saṅgahetvā gāyitabbato kathetabbato saṅgītīti āha ‘‘idamevā’’tiādi. Tattha ekato katvā ācikkhitabbaṃ. Tvaṃ kiṃ labhasīti tvaṃ upasampādanakāle kataravassaṃ, katarautuñca labhasi, katarasmiṃ te upasampadā laddhāti attho. Vassanti vassānautu. Idañca saṃvaccharācikkhanaṃ vinā vuttampi na ñāyatīti iminā utuācikkhaneneva sāsanavassesu vā kaliyugavassādīsu vā sahassime vā satime vā asukaṃ utuṃ labhāmīti dassitanti daṭṭhabbaṃ. ‘‘Chāyā’’ti idaṃ pāḷiyaṃ āgatapaṭipāṭiṃ sandhāya vuttaṃ. Vattabbakamato pana kaliyugavassādīsu sabbadesapasiddhesu asukavasse asukautumhi asukamāse asuke kaṇhe vā sukke vā pakkhe asukatithivāravisesayutte nakkhatte pubbaṇhādidivasabhāge ettake chāyāpamāṇe, nāḍikāpamāṇe vā mayā upasampadā laddhāti vadeyyāsīti evaṃ ācikkhitabbaṃ. ‘‘Idaṃ suṭṭhu uggahetvā āgantukehi vuḍḍhapaṭipāṭiṃ ñatvā paṭipajjāhī’’ti vattabbaṃ. Pāḷiyaṃ kissa tvanti kiṃ tvaṃ ettakaṃ kālaṃ akāsīti attho.
130. உபஸம்பத³ங் யாசீதி பப்³ப³ஜ்ஜஞ்ச உபஸம்பத³ஞ்ச யாசீதி அத்தோ². பஸ்ஸிஸ்ஸாமீதி எத்த² வத³தீதி ஸேஸோ, ஏவங் உபரிபி. ‘‘ஓஸாரேதப்³போ³’’தி இமினா புரிமோ உக்கி²த்தபா⁴வோ விப்³ப⁴மித்வா புன லத்³தூ⁴பஸம்பத³ம்பி ந முஞ்சதி. தேன ச ஸம்பு⁴ஞ்ஜனாதீ³ஸுபி பி⁴க்கூ²னங் பாசித்தியமேவாதி த³ஸ்ஸேதி. அனாபத்தி ஸம்போ⁴கே³ ஸங்வாஸேதி எத்த² ஸஹஸெய்யாபி ஸங்க³ஹிதாதி த³ட்ட²ப்³ப³ங். எத்த² சாயமதி⁴ப்பாயோ – யஸ்மா அயங் ஓஸாரிதத்தா பகதத்தோ, தஸ்மா உக்கி²த்தஸம்போ⁴கா³தி³பச்சயேன பாசித்தியேனெத்த² அனாபத்தீதி. யோ பன ஆபத்திட்டா²னே அனாபத்திதி³ட்டி²தாய ஆபத்திங் ந பஸ்ஸதி, தேனேவ படிகம்மம்பி ந கரோதி, ஸோ யஸ்மா எத்தாவதா அலஜ்ஜீ நாம ந ஹோதி. பண்ணத்திங் ஞத்வா வீதிக்கமங் கரொந்தோ ஏவ ஹி அலஜ்ஜீ நாம ஹோதி. ‘‘ஸஞ்சிச்ச ஆபத்திங் ஆபஜ்ஜதீ’’திஆதி³ (பரி॰ 359) ஹி வுத்தங். தஸ்மா எத்த² அலஜ்ஜிஸம்போ⁴கா³தி³பச்சயா து³க்கடாபத்தினியமோ நத்தி². தேன ஸாபெத்த² ஆபத்தி ந வுத்தாதி த³ட்ட²ப்³ப³ங். யோ பனெத்த² இமங் அதி⁴ப்பாயங் அஸல்லக்கெ²ந்தேன கேனசி ‘‘அனாபத்தி ஸம்போ⁴கே³ ஸங்வாஸே’’தி இமினா பாசித்தியேன அனாபத்தி வுத்தா, அலஜ்ஜிஸம்போ⁴க³பச்சயா து³க்கடங் பன ஆபஜ்ஜதி ஏவாதி ஆபத்தினியமோ வுத்தோ, ஸோ அலஜ்ஜித்தே ஸதி ஏவ வுத்தோ, நாஸதீதி த³ட்ட²ப்³ப³ங்.
130.Upasampadaṃ yācīti pabbajjañca upasampadañca yācīti attho. Passissāmīti ettha vadatīti seso, evaṃ uparipi. ‘‘Osāretabbo’’ti iminā purimo ukkhittabhāvo vibbhamitvā puna laddhūpasampadampi na muñcati. Tena ca sambhuñjanādīsupi bhikkhūnaṃ pācittiyamevāti dasseti. Anāpatti sambhoge saṃvāseti ettha sahaseyyāpi saṅgahitāti daṭṭhabbaṃ. Ettha cāyamadhippāyo – yasmā ayaṃ osāritattā pakatatto, tasmā ukkhittasambhogādipaccayena pācittiyenettha anāpattīti. Yo pana āpattiṭṭhāne anāpattidiṭṭhitāya āpattiṃ na passati, teneva paṭikammampi na karoti, so yasmā ettāvatā alajjī nāma na hoti. Paṇṇattiṃ ñatvā vītikkamaṃ karonto eva hi alajjī nāma hoti. ‘‘Sañcicca āpattiṃ āpajjatī’’tiādi (pari. 359) hi vuttaṃ. Tasmā ettha alajjisambhogādipaccayā dukkaṭāpattiniyamo natthi. Tena sāpettha āpatti na vuttāti daṭṭhabbaṃ. Yo panettha imaṃ adhippāyaṃ asallakkhentena kenaci ‘‘anāpatti sambhoge saṃvāse’’ti iminā pācittiyena anāpatti vuttā, alajjisambhogapaccayā dukkaṭaṃ pana āpajjati evāti āpattiniyamo vutto, so alajjitte sati eva vutto, nāsatīti daṭṭhabbaṃ.
131. வினயம்ஹீதிஆதி³கா³தா²ஸு நிக்³க³ஹானந்தி நிக்³க³ஹகரணேஸு. பாபிச்சே²தி பாபபுக்³க³லானங் நிக்³க³ஹகரணேஸு, லஜ்ஜீனங் பக்³க³ஹேஸு ச பேஸலானங் ஸுகா²வஹே மஹந்தே வினயம்ஹி யதா² அத்த²காரீ அத்தா²னுகு³ணங் கரொந்தோவ யஸ்மா யோனிஸோ படிபஜ்ஜதி நாம ஹோதி, தஸ்மா உத்³தா³னங் பவக்கா²மீதி ஸம்ப³ந்த⁴யோஜனா த³ட்ட²ப்³பா³. ஸேஸங் ஸப்³ப³த்த² ஸுவிஞ்ஞெய்யமேவ.
131.Vinayamhītiādigāthāsu niggahānanti niggahakaraṇesu. Pāpiccheti pāpapuggalānaṃ niggahakaraṇesu, lajjīnaṃ paggahesu ca pesalānaṃ sukhāvahe mahante vinayamhi yathā atthakārī atthānuguṇaṃ karontova yasmā yoniso paṭipajjati nāma hoti, tasmā uddānaṃ pavakkhāmīti sambandhayojanā daṭṭhabbā. Sesaṃ sabbattha suviññeyyameva.
சத்தாரோனிஸ்ஸயாதி³கதா²வண்ணனா நிட்டி²தா.
Cattāronissayādikathāvaṇṇanā niṭṭhitā.
இதி ஸமந்தபாஸாதி³காய வினயட்ட²கதா²ய விமதிவினோத³னியங்
Iti samantapāsādikāya vinayaṭṭhakathāya vimativinodaniyaṃ
மஹாக²ந்த⁴கவண்ணனானயோ நிட்டி²தோ.
Mahākhandhakavaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
64. சத்தாரோ நிஸ்ஸயா • 64. Cattāro nissayā
66. ஆபத்தியா அத³ஸ்ஸனே உக்கி²த்தகவத்தூ²னி • 66. Āpattiyā adassane ukkhittakavatthūni
67. தஸ்ஸுத்³தா³னங் • 67. Tassuddānaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / சத்தாரோனிஸ்ஸயாதி³கதா² • Cattāronissayādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / சத்தாரோனிஸ்ஸயாதி³கதா²வண்ணனா • Cattāronissayādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / சத்தாரோனிஸ்ஸயாதி³கதா²வண்ணனா • Cattāronissayādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 64. சத்தாரோனிஸ்ஸயாதி³கதா² • 64. Cattāronissayādikathā
