| Library / Tipiṭaka / திபிடக • Tipiṭaka / த⁴ம்மஸங்க³ணீ-அனுடீகா • Dhammasaṅgaṇī-anuṭīkā |
சதுப்³பி³தா⁴தி³ரூபஸங்க³ஹவண்ணனா
Catubbidhādirūpasaṅgahavaṇṇanā
586. சித்ததோ ஏவ ஸமுட்டா²தீதி சித்தஸமுட்டா²னந்தி இமமேவ அத்த²ங் க³ஹெத்வா ‘‘விஞ்ஞத்திது³காதீ³ஹி ஸமானக³திகோ சித்தஸமுட்டா²னது³கோ’’தி வுத்தங் . வினிவத்திதே ஹி ஸாமஞ்ஞே யங் ரூபங் ஜனகபச்சயேஸு சித்ததோ ஸமுட்டா²தி, தங் சித்ததோ ஏவ ஸமுட்டா²தீதி. விஞ்ஞத்திது³காதீ³ஹீதி ஆதி³-ஸத்³தே³ன சித்தஸஹபு⁴சித்தானுபரிவத்திது³கே ஸங்க³ண்ஹாதி. லப்³ப⁴மானோதி யங் தங் ரூபங் உபாதா³, தங் அத்தி² சித்தஸமுட்டா²னங், அத்தி² ந சித்தஸமுட்டா²னங். யங் தங் ரூபங் நுபாதா³, தங் அத்தி² சித்தஸமுட்டா²னங், அத்தி² ந சித்தஸமுட்டா²னந்தி ஏவங் லப்³ப⁴மானோ. ஸனித³ஸ்ஸனது³காதீ³னந்தி ஆதி³-ஸத்³தே³ன ஸப்படிக⁴மஹாபூ⁴தது³காத³யோ ஸங்க³ண்ஹாதி. தேனாதி சித்தஸமுட்டா²னது³கேன. தஸ்ஸாதி சித்தஸமுட்டா²னது³கஸ்ஸேவ. அஞ்ஞே பனாதி விஞ்ஞத்திசித்தஸமுட்டா²னசித்தஸஹபு⁴சித்தானுபரிவத்திது³கேஹி அஞ்ஞேபி பகிண்ணகது³கா.
586. Cittato eva samuṭṭhātīti cittasamuṭṭhānanti imameva atthaṃ gahetvā ‘‘viññattidukādīhi samānagatiko cittasamuṭṭhānaduko’’ti vuttaṃ . Vinivattite hi sāmaññe yaṃ rūpaṃ janakapaccayesu cittato samuṭṭhāti, taṃ cittato eva samuṭṭhātīti. Viññattidukādīhīti ādi-saddena cittasahabhucittānuparivattiduke saṅgaṇhāti. Labbhamānoti yaṃ taṃ rūpaṃ upādā, taṃ atthi cittasamuṭṭhānaṃ, atthi na cittasamuṭṭhānaṃ. Yaṃ taṃ rūpaṃ nupādā, taṃ atthi cittasamuṭṭhānaṃ, atthi na cittasamuṭṭhānanti evaṃ labbhamāno. Sanidassanadukādīnanti ādi-saddena sappaṭighamahābhūtadukādayo saṅgaṇhāti. Tenāti cittasamuṭṭhānadukena. Tassāti cittasamuṭṭhānadukasseva. Aññe panāti viññatticittasamuṭṭhānacittasahabhucittānuparivattidukehi aññepi pakiṇṇakadukā.
ஸத்³தா³யதனஸ்ஸ ஏகந்ததோ அனுபாதி³ன்னத்தா ‘‘ஸோதஸம்ப²ஸ்ஸாரம்மணது³காத³யோ வஜ்ஜெத்வா’’தி வுத்தங். சதுக்கா லப்³ப⁴ந்தீதி யங் தங் ரூபங் உபாதி³ன்னங், தங் அத்தி² சக்கு²ஸம்ப²ஸ்ஸஸ்ஸ ஆரம்மணங், அத்தி² சக்கு²ஸம்ப²ஸ்ஸஸ்ஸ நாரம்மணங். யங் தங் ரூபங் அனுபாதி³ன்னங், தங் அத்தி² சக்கு²ஸம்ப²ஸ்ஸஸ்ஸ ஆரம்மணங், அத்தி² சக்கு²ஸம்ப²ஸ்ஸஸ்ஸ நாரம்மணந்தி ஏவமாத³யோ ஸப்³பா³ரம்மணபா³ஹிராயதனாதி³லப்³ப⁴மானது³கேஹி யோஜனாயங் சதுக்கா லப்³ப⁴ந்தீதி ஸம்ப³ந்தோ⁴. அவஸேஸேஹீதி ஆரம்மணபா³ஹிராயதனரூபதா⁴துது³காதி³தோ லப்³ப⁴மானது³கேஹீதி வுத்தது³கராஸிதோ அவஸேஸேஹி. தேஸந்தி உபாதி³ன்னஉபாதி³ன்னுபாதா³னியசித்தஸமுட்டா²னது³கானங். அஞ்ஞேஸந்தி உபாதி³ன்னது³காதி³தோ அஞ்ஞேஸங் உபாதா³து³காதீ³னங். வத்து²து³காதீ³ஹீதி ஆதி³-ஸத்³தே³ன சக்கா²யதனது³காத³யோ ஸங்க³ண்ஹாதி. எத்தா²பி அவஸேஸேஹி தேஸங் அஞ்ஞேஸஞ்ச யோஜனாய சதுக்கா ந லப்³ப⁴ந்தீதி ஸம்ப³ந்தோ⁴.
Saddāyatanassa ekantato anupādinnattā ‘‘sotasamphassārammaṇadukādayo vajjetvā’’ti vuttaṃ. Catukkā labbhantīti yaṃ taṃ rūpaṃ upādinnaṃ, taṃ atthi cakkhusamphassassa ārammaṇaṃ, atthi cakkhusamphassassa nārammaṇaṃ. Yaṃ taṃ rūpaṃ anupādinnaṃ, taṃ atthi cakkhusamphassassa ārammaṇaṃ, atthi cakkhusamphassassa nārammaṇanti evamādayo sabbārammaṇabāhirāyatanādilabbhamānadukehi yojanāyaṃ catukkā labbhantīti sambandho. Avasesehīti ārammaṇabāhirāyatanarūpadhātudukādito labbhamānadukehīti vuttadukarāsito avasesehi. Tesanti upādinnaupādinnupādāniyacittasamuṭṭhānadukānaṃ. Aññesanti upādinnadukādito aññesaṃ upādādukādīnaṃ. Vatthudukādīhīti ādi-saddena cakkhāyatanadukādayo saṅgaṇhāti. Etthāpi avasesehi tesaṃ aññesañca yojanāya catukkā na labbhantīti sambandho.
சதுப்³பி³தா⁴தி³ரூபஸங்க³ஹவண்ணனா நிட்டி²தா.
Catubbidhādirūpasaṅgahavaṇṇanā niṭṭhitā.
உத்³தே³ஸவண்ணனா நிட்டி²தா.
Uddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / மாதிகா • Mātikā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā / சதுப்³பி³தா⁴தி³ரூபஸங்க³ஹா • Catubbidhādirūpasaṅgahā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / சதுப்³பி³தா⁴தி³ரூபஸங்க³ஹவண்ணனா • Catubbidhādirūpasaṅgahavaṇṇanā
