| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
жад̇уб̣б̣ид̇хавинаяаад̣̇игат̇ааван̣н̣анаа
Catubbidhavinayādikathāvaṇṇanā
45. нийхарид̇ваад̇и баал̣ид̇о уд̣̇д̇харид̇ваа, д̇ат̇аа хи ‘‘бан̃жахубаали, ан̇г̇зхи саманнааг̇ад̇зна бхигкунаа наануяун̃ж̇ид̇аб̣б̣ам̣. гад̇амзхи бан̃жахи? суд̇д̇ам̣ на ж̇аанаад̇и, суд̇д̇аануломам̣ на ж̇аанаад̇ий’’д̇иаад̣̇ибаал̣ид̇о суд̇д̇ам̣ суд̇д̇аануломан̃жа нийхарим̣су. ‘‘анаабад̇д̇и звам̣ амхаагам̣ аажарияаанам̣ уг̇г̇ахо барибужчаад̇и бхан̣ад̇ий’’д̇и звамаад̣̇ид̇о аажарияаваад̣̇ам̣. ‘‘ааяасмаа убаали звамааха – ‘анаабад̇д̇и, аавусо, субинанд̇знаа’д̇и’’ звамаад̣̇ид̇о ад̇д̇ано мад̇им̣ нийхарим̣су, саа жа т̇зрасса ад̇д̇аномад̇и суд̇д̇зна сан̇г̇ахид̇ад̇д̇аа суд̇д̇ам̣ ж̇аад̇ам̣, зваман̃н̃ааби суд̇д̇аад̣̇ийхи сан̇г̇ахид̇аава г̇ахзд̇аб̣б̣аа, нзд̇араад̇и взд̣̇ид̇аб̣б̣ам̣. ат̇а ваа нийхарид̇ваад̇и вибхаж̇ид̇ваа саадтагат̇ам̣ сагалам̣ винаяабидагам̣ суд̇д̇аад̣̇ийсу жад̇уусу бад̣̇зсзсу багкибид̇ваа жад̇уд̇хаа вибхаж̇ид̇ваа винаяам̣ багаасзсум̣ д̇аб̣б̣инимуд̇д̇асса абхааваад̇и ад̇хиббааяо. вуд̇д̇анд̇и нааг̇асзнад̇т̇зрзна милинд̣̇абан̃хз вуд̇д̇ам̣. ган̣таад̣̇иван̣н̣уббад̇д̇идтаанагаран̣аад̣̇ийхи аахарид̇ваа ад̇д̇ано важийвин̃н̃ад̇д̇ияаава бхаасид̇аважанам̣ аахажжабад̣̇ам̣. расод̇и сааро ‘‘бад̇д̇арасо’’д̇иаад̣̇ийсу (д̇ха. са. 628-630) вияа, бадигкид̇д̇аанун̃н̃аад̇асуд̇д̇асаарод̇и ад̇т̇о, расод̇и ваа лагкан̣ам̣ бадивад̇т̇угам̣ ануд̣̇д̇харид̇ваа лагкан̣аануломзна вуд̇д̇ад̇д̇аа. д̇хаммасан̇г̇аахагаад̣̇иаажарияавам̣сзна аабхад̇аа адтагат̇аа аажарияавам̣сод̇и ааха ‘‘аажарияавам̣сод̇и аажарияаваад̣̇о’’д̇и.
45.Nīharitvāti pāḷito uddharitvā, tathā hi ‘‘pañcahupāli, aṅgehi samannāgatena bhikkhunā nānuyuñjitabbaṃ. Katamehi pañcahi? Suttaṃ na jānāti, suttānulomaṃ na jānātī’’tiādipāḷito suttaṃ suttānulomañca nīhariṃsu. ‘‘Anāpatti evaṃ amhākaṃ ācariyānaṃ uggaho paripucchāti bhaṇatī’’ti evamādito ācariyavādaṃ. ‘‘Āyasmā upāli evamāha – ‘anāpatti, āvuso, supinantenā’ti’’ evamādito attano matiṃ nīhariṃsu, sā ca therassa attanomati suttena saṅgahitattā suttaṃ jātaṃ, evamaññāpi suttādīhi saṅgahitāva gahetabbā, netarāti veditabbaṃ. Atha vā nīharitvāti vibhajitvā sāṭṭhakathaṃ sakalaṃ vinayapiṭakaṃ suttādīsu catūsu padesesu pakkhipitvā catudhā vibhajitvā vinayaṃ pakāsesuṃ tabbinimuttassa abhāvāti adhippāyo. Vuttanti nāgasenattherena milindapañhe vuttaṃ. Kaṇṭhādivaṇṇuppattiṭṭhānakaraṇādīhi āharitvā attano vacīviññattiyāva bhāsitavacanaṃ āhaccapadaṃ. Rasoti sāro ‘‘pattaraso’’tiādīsu (dha. sa. 628-630) viya, paṭikkhittaanuññātasuttasāroti attho, rasoti vā lakkhaṇaṃ paṭivatthukaṃ anuddharitvā lakkhaṇānulomena vuttattā. Dhammasaṅgāhakādiācariyavaṃsena ābhatā aṭṭhakathā ācariyavaṃsoti āha ‘‘ācariyavaṃsoti ācariyavādo’’ti.
винаяабидагз баал̣ийд̇и ид̇ха ад̇хигааравасзна вуд̇д̇ам̣. сзсабидагзсуби суд̇д̇аад̣̇ижад̇унаяаа яат̇аануруубам̣ лаб̣бханд̇зва. махаабад̣̇зсаад̇и махааогаасаа махаависаяаа, д̇з ад̇т̇ад̇о ‘‘яам̣, бхигкавз’’д̇иаад̣̇ибаал̣ивасзна агаббияаануломад̇о габбияаануломад̇о жа буг̇г̇алзхи наяад̇о д̇ат̇аа д̇ат̇аа г̇аяхамаанаа ад̇т̇анаяаа зва. д̇з хи бхаг̇авад̇аа саруубад̇о авуд̇д̇зсуби бадигкид̇д̇аануломзсу, анун̃н̃аад̇аануломзсу жа сзсзсу гижжзсу нивад̇д̇ибавад̇д̇ихзд̇уд̇ааяа махааг̇ожараад̇и ‘‘махаабад̣̇зсаа’’д̇и вуд̇д̇аа, на бана ‘‘яам̣, бхигкавз, маяаа ид̣̇ам̣ на габбад̇ий’’д̇иаад̣̇инаа вуд̇д̇аа саад̇хиббааяаа баал̣иязва д̇ассаа суд̇д̇з бавидтад̇д̇аа. ‘‘суд̇д̇аануломамби суд̇д̇з од̇аарзд̇аб̣б̣ам̣…бз… суд̇д̇амзва б̣алавад̇ара’’нд̇и (баараа. адта. 1.45) хи вуд̇д̇ам̣, на хзсаа саад̇хиббааяаа баал̣и суд̇д̇з од̇аарзд̇аб̣б̣аа, на г̇ахзд̇аб̣б̣аа ваа ход̇и, язнааяам̣ суд̇д̇аануломам̣ сияаа. д̇асмаа имам̣ баал̣иад̇хиббааяам̣ ниссааяа буг̇г̇алзхи г̇ахид̇аа яат̇аавуд̇д̇аад̇т̇аава суд̇д̇аануломам̣. д̇аббагаасагад̇д̇аа бана аяам̣ баал̣иби суд̇д̇аануломанд̇и г̇ахзд̇аб̣б̣ам̣, д̇знааха яз бхаг̇авад̇аа звам̣ вуд̇д̇аад̇иаад̣̇и. яам̣ бхигкавзд̇иаад̣̇ибаал̣инаязна хи буг̇г̇алзхи г̇ахзд̇аб̣б̣аа яз агаббияаануломаад̣̇аяо ад̇т̇аа вуд̇д̇аа, д̇з махаабад̣̇зсаад̇и ад̇т̇о.
Vinayapiṭake pāḷīti idha adhikāravasena vuttaṃ. Sesapiṭakesupi suttādicatunayā yathānurūpaṃ labbhanteva. Mahāpadesāti mahāokāsā mahāvisayā, te atthato ‘‘yaṃ, bhikkhave’’tiādipāḷivasena akappiyānulomato kappiyānulomato ca puggalehi nayato tathā tathā gayhamānā atthanayā eva. Te hi bhagavatā sarūpato avuttesupi paṭikkhittānulomesu, anuññātānulomesu ca sesesu kiccesu nivattipavattihetutāya mahāgocarāti ‘‘mahāpadesā’’ti vuttā, na pana ‘‘yaṃ, bhikkhave, mayā idaṃ na kappatī’’tiādinā vuttā sādhippāyā pāḷiyeva tassā sutte paviṭṭhattā. ‘‘Suttānulomampi sutte otāretabbaṃ…pe… suttameva balavatara’’nti (pārā. aṭṭha. 1.45) hi vuttaṃ, na hesā sādhippāyā pāḷi sutte otāretabbā, na gahetabbā vā hoti, yenāyaṃ suttānulomaṃ siyā. Tasmā imaṃ pāḷiadhippāyaṃ nissāya puggalehi gahitā yathāvuttaatthāva suttānulomaṃ. Tappakāsakattā pana ayaṃ pāḷipi suttānulomanti gahetabbaṃ, tenāha ye bhagavatā evaṃ vuttātiādi. Yaṃ bhikkhavetiādipāḷinayena hi puggalehi gahetabbā ye akappiyānulomādayo atthā vuttā, te mahāpadesāti attho.
бхаг̇авад̇о багин̣н̣агад̣̇зсанаабхууд̇аа жа суд̇д̇аануломабхууд̇аа жа адтагат̇аа. яасмаа д̇хаммасан̇г̇аахагад̇т̇зрзхи баал̣иван̣н̣анааггамзна сан̇г̇ахзд̇ваа вуд̇д̇аа, д̇асмаа ‘‘аажарияаваад̣̇о’’д̇и вуд̇д̇аа, зд̇зна жа адтагат̇аа суд̇д̇асуд̇д̇аануломзсу ад̇т̇ад̇о сан̇г̇аяхад̇ийд̇и взд̣̇ид̇аб̣б̣аа. яат̇аа жа зсаа, звам̣ ад̇д̇аномад̇иби бамаан̣абхууд̇аа. на хи бхаг̇авад̇о важанам̣ важанаануломан̃жа аниссааяа аг̇г̇асаавагаад̣̇аяоби ад̇д̇ано н̃аан̣аб̣алзна суд̇д̇аабхид̇хаммавинаязсу ган̃жи саммуд̇ибарамад̇т̇абхзд̣̇ам̣ ад̇т̇ам̣ вад̇д̇ум̣ саггонд̇и, д̇асмаа саб̣б̣амби важанам̣ суд̇д̇з суд̇д̇аануломз жа сан̇г̇аяхад̇и. висум̣ бана адтагат̇аад̣̇ийнам̣ сан̇г̇ахид̇ад̇д̇аа д̇ад̣̇авасзсам̣ суд̇д̇асуд̇д̇аануломад̇о г̇ахзд̇ваа жад̇уд̇хаа винаяо нид̣̇д̣̇идто. суд̇д̇аад̣̇аяо ниссааязва бавад̇д̇ааби ад̇д̇аномад̇и д̇зсу саруубзна анааг̇ад̇ад̇д̇аа вуд̇д̇ам̣ ‘‘суд̇д̇асуд̇д̇аануломааажарияаваад̣̇з мун̃жид̇ваа’’д̇и, д̇знааха ‘‘ануб̣уд̣̇д̇хияаа наяаг̇г̇аахзнаа’’д̇и. д̇ад̇т̇а суд̇д̇аад̣̇ийни ануг̇ад̇ааяа зва б̣уд̣̇д̇хияаа д̇зхи лад̣̇д̇ханаяаг̇г̇аахзна жаад̇и ад̇т̇о.
Bhagavato pakiṇṇakadesanābhūtā ca suttānulomabhūtā ca aṭṭhakathā. Yasmā dhammasaṅgāhakattherehi pāḷivaṇṇanākkamena saṅgahetvā vuttā, tasmā ‘‘ācariyavādo’’ti vuttā, etena ca aṭṭhakathā suttasuttānulomesu atthato saṅgayhatīti veditabbā. Yathā ca esā, evaṃ attanomatipi pamāṇabhūtā. Na hi bhagavato vacanaṃ vacanānulomañca anissāya aggasāvakādayopi attano ñāṇabalena suttābhidhammavinayesu kañci sammutiparamatthabhedaṃ atthaṃ vattuṃ sakkonti, tasmā sabbampi vacanaṃ sutte suttānulome ca saṅgayhati. Visuṃ pana aṭṭhakathādīnaṃ saṅgahitattā tadavasesaṃ suttasuttānulomato gahetvā catudhā vinayo niddiṭṭho. Suttādayo nissāyeva pavattāpi attanomati tesu sarūpena anāgatattā vuttaṃ ‘‘suttasuttānulomaācariyavāde muñcitvā’’ti, tenāha ‘‘anubuddhiyā nayaggāhenā’’ti. Tattha suttādīni anugatāya eva buddhiyā tehi laddhanayaggāhena cāti attho.
т̇зраваад̣̇од̇и махаасумад̇т̇зраад̣̇ийнам̣ г̇аахо. суд̇д̇аад̣̇им̣ ниссааязва вибарийд̇ад̇оби ад̇д̇аномад̇и уббаж̇ж̇ад̇ийд̇и ааха д̇ам̣ банаад̇иаад̣̇и. ад̇т̇знаад̇и ад̇д̇анаа наяаг̇г̇ахид̇зна ад̇т̇зна. баал̣инд̇и ад̇д̇ано г̇аахасса ниссаяабхууд̇ам̣ саадтагат̇ам̣ баал̣им̣. баал̣ияаад̇и д̇аббадигкзбад̇т̇ам̣ барзнаахадааяа саадтагат̇ааяа баал̣ияаа, ад̇д̇анаа г̇ахид̇ам̣ ад̇т̇ам̣ ниссааяа баал̣ин̃жа сам̣санд̣̇ид̇ваад̇и ад̇т̇о. аажарияаваад̣̇зд̇и ад̇д̇анаа барзна жа самуд̣̇д̇хадаадтагат̇ааяа. од̇арад̇и жзва самзд̇и жаад̇и ад̇д̇анаа уд̣̇д̇хадзхи сам̣санд̣̇анавасзна од̇арад̇и, барзна уд̣̇д̇хадзна самзд̇и. саб̣б̣ад̣̇уб̣б̣алаад̇и асаб̣б̣ан̃н̃убуг̇г̇аласса д̣̇осаваасанааяа яаат̇аавад̇о ад̇т̇асамбадибад̇д̇иабхаавад̇о вуд̇д̇ам̣. бамаад̣̇абаатавасзна аажарияаваад̣̇асса суд̇д̇аануломзна асам̣санд̣̇анааби сияаад̇и ааха ‘‘ид̇аро на г̇ахзд̇аб̣б̣о’’д̇и.
Theravādoti mahāsumattherādīnaṃ gāho. Suttādiṃ nissāyeva viparītatopi attanomati uppajjatīti āha taṃ panātiādi. Atthenāti attanā nayaggahitena atthena. Pāḷinti attano gāhassa nissayabhūtaṃ sāṭṭhakathaṃ pāḷiṃ. Pāḷiyāti tappaṭikkhepatthaṃ parenāhaṭāya sāṭṭhakathāya pāḷiyā, attanā gahitaṃ atthaṃ nissāya pāḷiñca saṃsanditvāti attho. Ācariyavādeti attanā parena ca samuddhaṭaaṭṭhakathāya. Otarati ceva sameti cāti attanā uddhaṭehi saṃsandanavasena otarati, parena uddhaṭena sameti. Sabbadubbalāti asabbaññupuggalassa dosavāsanāya yāthāvato atthasampaṭipattiabhāvato vuttaṃ. Pamādapāṭhavasena ācariyavādassa suttānulomena asaṃsandanāpi siyāti āha ‘‘itaro na gahetabbo’’ti.
самзнд̇амзва г̇ахзд̇аб̣б̣анд̇и яз суд̇д̇зна сам̣санд̣̇анд̇и, зваруубаава ад̇т̇аа махаабад̣̇зсад̇о уд̣̇д̇харид̇аб̣б̣аад̇и д̣̇ассзд̇и д̇ат̇аа д̇ат̇аа уд̣̇д̇хадаад̇т̇аанамзва суд̇д̇аануломад̇д̇аа, д̇знааха ‘‘суд̇д̇аануломад̇о хи суд̇д̇амзва б̣алавад̇ара’’нд̇и. аббадивад̇д̇ияанд̇и аббадиб̣аахияам̣. гаарагасан̇гхасад̣̇исанд̇и бамаан̣ад̇д̇аа сан̇г̇ийд̇игаарагасан̇гхасад̣̇исам̣. б̣уд̣̇д̇хаанам̣ тид̇агааласад̣̇исанд̇и д̇харамаанагаб̣уд̣̇д̇хасад̣̇исанд̇и ад̇т̇о. сагаваад̣̇ий суд̇д̇ам̣ г̇ахзд̇ваа гат̇зд̇ийд̇иаад̣̇ийсу яо яат̇аабхууд̇амад̇т̇ам̣ г̇ахзд̇ваа гат̇анасийло, со сагаваад̣̇ий. суд̇д̇анд̇и сан̇г̇ийд̇ид̇д̇аяаарул̣хам̣ баал̣иважанам̣. бараваад̣̇ийд̇и махаавихаараваасий ваа ход̇у ан̃н̃анигааяаваасий ваа, яо вибарийд̇ад̇о ад̇т̇ам̣ г̇ахзд̇ваа гат̇анасийло, сова ид̇ха ‘‘бараваад̣̇ий’’д̇и вуд̇д̇о. суд̇д̇аануломанд̇и сан̇г̇ийд̇ид̇д̇аяаарул̣хам̣ ваа анаарул̣хам̣ ваа яам̣гин̃жи вибаллаасад̇о ваа ван̃жанааяа ваа ‘‘сан̇г̇ийд̇ид̇д̇аяааг̇ад̇амид̣̇а’’нд̇и д̣̇ассияамаанам̣ суд̇д̇аануломам̣. гзжи ‘‘ан̃н̃анигааяз суд̇д̇аанулома’’нд̇и вад̣̇анд̇и, д̇ам̣ на яуд̇д̇ам̣ сагаваад̣̇ийбараваад̣̇ийнам̣ убхиннамби сан̇г̇ийд̇ид̇д̇аяаарул̣хасуд̇д̇аад̣̇ийнам̣ зва г̇ахзд̇аб̣б̣ад̇о. д̇ат̇аа хи вагкад̇и ‘‘д̇иссо сан̇г̇ийд̇ияо аарул̣хам̣ баал̣иааг̇ад̇ам̣ бан̃н̃ааяад̇и, г̇ахзд̇аб̣б̣а’’нд̇иаад̣̇и. на хи сагаваад̣̇ий ан̃н̃анигааяасуд̇д̇аад̣̇им̣ бамаан̣ад̇о г̇ан̣хаад̇и, язна д̇зсу суд̇д̇аад̣̇ийсу д̣̇ассид̇зсу д̇ад̇т̇а таад̇аб̣б̣ам̣ бхавзяяа, вагкад̇и жа ‘‘баро д̇асса агаббияабхаавасаад̇хагам̣ суд̇д̇ад̇о б̣ахум̣ гааран̣ан̃жа винижчаяан̃жа д̣̇ассзд̇и…бз… ‘саад̇хуу’д̇и самбадижчид̇ваа агаббиязязва таад̇аб̣б̣а’’нд̇и (баараа. адта. 1.45). д̇асмаа бараваад̣̇инааби сан̇г̇ийд̇ид̇д̇аяз анаарул̣хамби анаарул̣хамижжзва д̣̇ассийяад̇и, гзвалам̣ д̇асса д̇асса суд̇д̇аад̣̇ино сан̇г̇ийд̇ид̇д̇аяз анааг̇ад̇асса гуудад̇аа, ааг̇ад̇асса жа б̣яан̃ж̇анажчааяааяа ан̃н̃ат̇аа ад̇хиббааяаяож̇анаа жа висзсо. д̇ад̇т̇а жа яам̣ гуудам̣, д̇ам̣ абанийяад̇и. яам̣ ан̃н̃ат̇аа яож̇ид̇ам̣, д̇асса вибарийд̇ад̇аасанд̣̇ассанад̇т̇ам̣ д̇ад̣̇ан̃н̃зна суд̇д̇аад̣̇инаа сам̣санд̣̇анаа гарийяад̇и. яо бана бараваад̣̇инаа г̇ахид̇о ад̇хиббааяо суд̇д̇анд̇аад̣̇инаа сам̣санд̣̇ад̇и, со сагаваад̣̇инааби ад̇д̇ано г̇аахам̣ виссаж̇ж̇зд̇ваа г̇ахзд̇аб̣б̣од̇и убхиннамби сан̇г̇ийд̇ид̇д̇аяааг̇ад̇амзва суд̇д̇аад̣̇ибамаан̣анд̇и взд̣̇ид̇аб̣б̣ам̣. д̇знзва гат̇аавад̇т̇уббагаран̣з сагаваад̣̇з бан̃жа суд̇д̇асад̇аани бараваад̣̇з бан̃жаад̇и (д̇ха. са. адта. нид̣̇аанагат̇аа; гат̇аа. адта. нид̣̇аанагат̇аа) суд̇д̇асахассамби ад̇хиббааяаг̇г̇ахан̣анаанад̇д̇зна сан̇г̇ийд̇ид̇д̇аяааг̇ад̇амзва г̇ахид̇ам̣, на нигааяанд̇арз гин̃жийд̇и.
Samentameva gahetabbanti ye suttena saṃsandanti, evarūpāva atthā mahāpadesato uddharitabbāti dasseti tathā tathā uddhaṭaatthānameva suttānulomattā, tenāha ‘‘suttānulomato hi suttameva balavatara’’nti. Appaṭivattiyanti appaṭibāhiyaṃ. Kārakasaṅghasadisanti pamāṇattā saṅgītikārakasaṅghasadisaṃ. Buddhānaṃ ṭhitakālasadisanti dharamānakabuddhasadisanti attho. Sakavādī suttaṃ gahetvā kathetītiādīsu yo yathābhūtamatthaṃ gahetvā kathanasīlo, so sakavādī. Suttanti saṅgītittayāruḷhaṃ pāḷivacanaṃ. Paravādīti mahāvihāravāsī vā hotu aññanikāyavāsī vā, yo viparītato atthaṃ gahetvā kathanasīlo, sova idha ‘‘paravādī’’ti vutto. Suttānulomanti saṅgītittayāruḷhaṃ vā anāruḷhaṃ vā yaṃkiñci vipallāsato vā vañcanāya vā ‘‘saṅgītittayāgatamida’’nti dassiyamānaṃ suttānulomaṃ. Keci ‘‘aññanikāye suttānuloma’’nti vadanti, taṃ na yuttaṃ sakavādīparavādīnaṃ ubhinnampi saṅgītittayāruḷhasuttādīnaṃ eva gahetabbato. Tathā hi vakkhati ‘‘tisso saṅgītiyo āruḷhaṃ pāḷiāgataṃ paññāyati, gahetabba’’ntiādi. Na hi sakavādī aññanikāyasuttādiṃ pamāṇato gaṇhāti, yena tesu suttādīsu dassitesu tattha ṭhātabbaṃ bhaveyya, vakkhati ca ‘‘paro tassa akappiyabhāvasādhakaṃ suttato bahuṃ kāraṇañca vinicchayañca dasseti…pe… ‘sādhū’ti sampaṭicchitvā akappiyeyeva ṭhātabba’’nti (pārā. aṭṭha. 1.45). Tasmā paravādināpi saṅgītittaye anāruḷhampi anāruḷhamicceva dassīyati, kevalaṃ tassa tassa suttādino saṅgītittaye anāgatassa kūṭatā, āgatassa ca byañjanacchāyāya aññathā adhippāyayojanā ca viseso. Tattha ca yaṃ kūṭaṃ, taṃ apanīyati. Yaṃ aññathā yojitaṃ, tassa viparītatāsandassanatthaṃ tadaññena suttādinā saṃsandanā karīyati. Yo pana paravādinā gahito adhippāyo suttantādinā saṃsandati, so sakavādināpi attano gāhaṃ vissajjetvā gahetabboti ubhinnampi saṅgītittayāgatameva suttādipamāṇanti veditabbaṃ. Teneva kathāvatthuppakaraṇe sakavāde pañca suttasatāni paravāde pañcāti (dha. sa. aṭṭha. nidānakathā; kathā. aṭṭha. nidānakathā) suttasahassampi adhippāyaggahaṇanānattena saṅgītittayāgatameva gahitaṃ, na nikāyantare kiñcīti.
кзбанд̇и ‘‘гим̣ иминаа’’д̇и бадигкзбам̣ чад̣д̣анам̣. г̇араханд̇и ‘‘гимзса б̣аало ж̇аанаад̇ий’’д̇и нинд̣̇анам̣. суд̇д̇з од̇аарзд̇аб̣б̣анд̇и яасса суд̇д̇асса ануломанад̇о ид̣̇ам̣ суд̇д̇аануломам̣ агааси, д̇асмим̣, д̇ад̣̇ануруубз ваа ан̃н̃ад̇арасмим̣ суд̇д̇з ад̇д̇анаа г̇ахид̇ам̣ суд̇д̇аануломам̣ ад̇т̇ад̇о сам̣санд̣̇анавасзна од̇аарзд̇аб̣б̣ам̣, ‘‘иминаа жа иминаа жа гааран̣зна имасмим̣ суд̇д̇з сам̣санд̣̇ад̇ий’’д̇и сам̣санд̣̇ид̇ваа д̣̇ассзд̇аб̣б̣анд̇и ад̇т̇о. аяанд̇и сагаваад̣̇ий. барод̇и бараваад̣̇ий. аажарияаваад̣̇о суд̇д̇з од̇аарзд̇аб̣б̣од̇и яасса суд̇д̇асса ван̣н̣анаавасзна аяам̣ аажарияаваад̣̇о бавад̇д̇о, д̇асмим̣, д̇аад̣̇исз жа ан̃н̃ад̇арасмим̣ суд̇д̇з буб̣б̣аабараад̇т̇асам̣санд̣̇анавасзна од̇аарзд̇аб̣б̣ам̣. г̇аараяхаажарияаваад̣̇од̇и бамаад̣̇аликид̇о, бхинналад̣̇д̇хигзхи ваа табид̇о, зса наяо саб̣б̣ад̇т̇а.
Khepanti ‘‘kiṃ iminā’’ti paṭikkhepaṃ chaḍḍanaṃ. Garahanti ‘‘kimesa bālo jānātī’’ti nindanaṃ. Sutte otāretabbanti yassa suttassa anulomanato idaṃ suttānulomaṃ akāsi, tasmiṃ, tadanurūpe vā aññatarasmiṃ sutte attanā gahitaṃ suttānulomaṃ atthato saṃsandanavasena otāretabbaṃ, ‘‘iminā ca iminā ca kāraṇena imasmiṃ sutte saṃsandatī’’ti saṃsanditvā dassetabbanti attho. Ayanti sakavādī. Paroti paravādī. Ācariyavādo sutte otāretabboti yassa suttassa vaṇṇanāvasena ayaṃ ācariyavādo pavatto, tasmiṃ, tādise ca aññatarasmiṃ sutte pubbāparaatthasaṃsandanavasena otāretabbaṃ. Gārayhācariyavādoti pamādalikhito, bhinnaladdhikehi vā ṭhapito, esa nayo sabbattha.
яам̣ гин̃жи гуудасуд̇д̇ам̣ б̣аахирагасуд̇д̇аад̣̇иважанам̣ на г̇ахзд̇аб̣б̣анд̇и д̣̇ассзд̇ум̣ суд̇д̇ам̣ суд̇д̇аануломз од̇аарзд̇аб̣б̣анд̇иаад̣̇и вуд̇д̇ам̣. г̇ул̣хавзссанд̇араад̣̇ийни махаасан̇гхигаад̣̇ибхинналад̣̇д̇хигаанам̣ багаран̣аани. аад̣̇и-сад̣̇д̣̇зна г̇ул̣хауммаг̇г̇аад̣̇ийнам̣ г̇ахан̣ам̣ . сагаваад̣̇ий суд̇д̇ам̣ г̇ахзд̇ваа гат̇зд̇и, бараваад̣̇ийби суд̇д̇анд̇иаад̣̇инаа ан̃н̃зби ваад̣̇ааламб̣анаа вуд̇д̇анаязна саггаа н̃аад̇унд̇и ид̇ха на вуд̇д̇аа.
Yaṃ kiñci kūṭasuttaṃ bāhirakasuttādivacanaṃ na gahetabbanti dassetuṃ suttaṃ suttānulome otāretabbantiādi vuttaṃ. Guḷhavessantarādīni mahāsaṅghikādibhinnaladdhikānaṃ pakaraṇāni. Ādi-saddena guḷhaummaggādīnaṃ gahaṇaṃ . Sakavādī suttaṃ gahetvā katheti, paravādīpi suttantiādinā aññepi vādālambanā vuttanayena sakkā ñātunti idha na vuttā.
звам̣ суд̇д̇асуд̇д̇аануломаад̣̇имукзна сааман̃н̃ад̇о виваад̣̇ам̣ д̣̇ассзд̇ваа ид̣̇аани висзсад̇о виваад̣̇авад̇т̇ум̣ д̇аб̣б̣инижчаяамукзна суд̇д̇аад̣̇ийнан̃жа д̣̇ассзд̇ум̣ ат̇а банааяам̣ габбияанд̇иаад̣̇и вуд̇д̇ам̣. суд̇д̇з жа суд̇д̇аануломз жаад̇и зд̇т̇а жа-гааро вигаббад̇т̇о, д̇зна аажарияаваад̣̇аад̣̇ийнамби сан̇г̇ахо, д̇знааха ‘‘гааран̣ан̃жа винижчаяан̃жа д̣̇ассзд̇ий’’д̇и. д̇ад̇т̇а гааран̣анд̇и суд̇д̇аад̣̇инаяам̣ ниссааяа ад̇д̇аномад̇ияаа уд̣̇д̇хадам̣ хзд̇ум̣. винижчаяанд̇и адтагат̇аавинижчаяам̣. гааран̣ажчааяаад̇и суд̇д̇аад̣̇ийсу ‘‘габбияа’’нд̇и г̇аахасса, ‘‘агаббияа’’нд̇и г̇аахасса жа нимид̇д̇абхууд̇ам̣ гижчзна бадибаад̣̇анийяам̣ авибхууд̇агааран̣ам̣ гааран̣ажчааяаа, гааран̣абад̇ируубаганд̇и ад̇т̇о. винаяан̃хи бад̇ваад̇и имасса виваран̣ам̣ габбияаагаббияавижааран̣амааг̇аммаад̇и. рунд̇хид̇аб̣б̣анд̇и габбияасан̃н̃ааяа вийд̇иггамагаран̣ам̣ рунд̇хид̇аб̣б̣ам̣, д̇ам̣нивааран̣ажид̇д̇ам̣ д̣̇ал̣хад̇арам̣ гаад̇аб̣б̣ам̣. сод̇ам̣ бажчинд̣̇ид̇аб̣б̣анд̇и д̇ад̇т̇а вийд̇иггамаббавад̇д̇и бажчинд̣̇ид̇аб̣б̣аа. г̇аругабхаавзд̇и агаббияабхаавз. суд̇д̇авинижчаяагааран̣зхийд̇и суд̇д̇зна адтагат̇аавинижчаязна жа лад̣̇д̇хагааран̣зхи. званд̇иаад̣̇и яат̇аавуд̇д̇асса ад̇т̇асса ниг̇аманаважанам̣. ад̇ирзгагааран̣анд̇и суд̇д̇аад̣̇ийсу буримам̣ буримам̣ ад̇ирзгагааран̣ам̣ наама, б̣ахугааран̣ам̣ ваа.
Evaṃ suttasuttānulomādimukhena sāmaññato vivādaṃ dassetvā idāni visesato vivādavatthuṃ tabbinicchayamukhena suttādīnañca dassetuṃ atha panāyaṃ kappiyantiādi vuttaṃ. Sutte ca suttānulome cāti ettha ca-kāro vikappattho, tena ācariyavādādīnampi saṅgaho, tenāha ‘‘kāraṇañca vinicchayañca dassetī’’ti. Tattha kāraṇanti suttādinayaṃ nissāya attanomatiyā uddhaṭaṃ hetuṃ. Vinicchayanti aṭṭhakathāvinicchayaṃ. Kāraṇacchāyāti suttādīsu ‘‘kappiya’’nti gāhassa, ‘‘akappiya’’nti gāhassa ca nimittabhūtaṃ kicchena paṭipādanīyaṃ avibhūtakāraṇaṃ kāraṇacchāyā, kāraṇapatirūpakanti attho. Vinayañhi patvāti imassa vivaraṇaṃ kappiyākappiyavicāraṇamāgammāti. Rundhitabbanti kappiyasaññāya vītikkamakaraṇaṃ rundhitabbaṃ, taṃnivāraṇacittaṃ daḷhataraṃ kātabbaṃ. Sotaṃ pacchinditabbanti tattha vītikkamappavatti pacchinditabbā. Garukabhāveti akappiyabhāve. Suttavinicchayakāraṇehīti suttena aṭṭhakathāvinicchayena ca laddhakāraṇehi. Evantiādi yathāvuttassa atthassa nigamanavacanaṃ. Atirekakāraṇanti suttādīsu purimaṃ purimaṃ atirekakāraṇaṃ nāma, bahukāraṇaṃ vā.
ваажуг̇г̇ад̇анд̇и ваажааяа уг̇г̇ад̇ам̣, д̇ад̇т̇а ниранд̇арам̣ тид̇анд̇и ад̇т̇о. ‘‘суд̇д̇ам̣ наама сагалам̣ винаяабидага’’нд̇и вуд̇д̇ад̇д̇аа буна суд̇д̇ад̇од̇и д̇ад̣̇ад̇т̇абадибаад̣̇агам̣ суд̇д̇аабхид̇хаммабаал̣иважанам̣ ад̇хиббзд̇ам̣. ануб̣яан̃ж̇анад̇од̇и имасса виваран̣ам̣ барибужчад̇о жа адтагат̇аад̇о жаад̇и. д̇ад̇т̇а барибужчаад̇и аажарияасса санд̇игаа баал̣ияаа ад̇т̇асаванам̣. адтагат̇аад̇и баал̣имуд̇д̇агавинижчаяо. д̇ад̣̇убхаяамби хи баал̣им̣ ануг̇анд̇ваа ад̇т̇асса б̣яан̃ж̇анад̇о ‘‘ануб̣яан̃ж̇ана’’нд̇и вуд̇д̇ам̣. винаязд̇и винаяаажаарз, д̇знзва вагкад̇и винаяам̣ авиж̇аханд̇о авоггаманд̇од̇иаад̣̇и. д̇ад̇т̇а бад̇идтаанам̣ наама сан̃жижжа аабад̇д̇ияаа анаабаж̇ж̇анаад̣̇и ход̇ийд̇и ааха ‘‘лаж̇ж̇ийбхаавзна бад̇идтид̇о’’д̇и, д̇зна лаж̇ж̇ий ход̇ийд̇и вуд̇д̇ам̣ ход̇и. винаяад̇харасса лагкан̣з вад̇д̇аб̣б̣з гим̣ иминаа лаж̇ж̇ийбхаавзнаад̇и ааха алаж̇ж̇ий хийд̇иаад̣̇и. д̇ад̇т̇а б̣ахуссуд̇обийд̇и иминаа батамалагкан̣асаманнааг̇амам̣ д̣̇ассзд̇и. лаабхаг̇аруд̇ааяаад̇иаад̣̇инаа винаяз тид̇ад̇ааяа абхаавз батамалагкан̣аяог̇о гижжагаро на ход̇и, ат̇а ко агижжагаро анад̇т̇агаро зваад̇и д̣̇ассзд̇и. сан̇гхабхзд̣̇асса буб̣б̣абхааг̇о галахо сан̇гхарааж̇и.
Vācuggatanti vācāya uggataṃ, tattha nirantaraṃ ṭhitanti attho. ‘‘Suttaṃ nāma sakalaṃ vinayapiṭaka’’nti vuttattā puna suttatoti tadatthapaṭipādakaṃ suttābhidhammapāḷivacanaṃ adhippetaṃ. Anubyañjanatoti imassa vivaraṇaṃ paripucchato ca aṭṭhakathāto cāti. Tattha paripucchāti ācariyassa santikā pāḷiyā atthasavanaṃ. Aṭṭhakathāti pāḷimuttakavinicchayo. Tadubhayampi hi pāḷiṃ anugantvā atthassa byañjanato ‘‘anubyañjana’’nti vuttaṃ. Vinayeti vinayācāre, teneva vakkhati vinayaṃ avijahanto avokkamantotiādi. Tattha patiṭṭhānaṃ nāma sañcicca āpattiyā anāpajjanādi hotīti āha ‘‘lajjībhāvena patiṭṭhito’’ti, tena lajjī hotīti vuttaṃ hoti. Vinayadharassa lakkhaṇe vattabbe kiṃ iminā lajjībhāvenāti āha alajjī hītiādi. Tattha bahussutopīti iminā paṭhamalakkhaṇasamannāgamaṃ dasseti. Lābhagarutāyātiādinā vinaye ṭhitatāya abhāve paṭhamalakkhaṇayogo kiccakaro na hoti, atha kho akiccakaro anatthakaro evāti dasseti. Saṅghabhedassa pubbabhāgo kalaho saṅgharāji.
вид̇т̇унад̇ийд̇и вид̇т̇амбхад̇и, нид̇т̇унад̇и ваа санд̇идтид̇ум̣ на саггод̇и, д̇знааха яам̣ яанд̇иаад̣̇и. аажарияабарамбараад̇и аажарияаанам̣ винижчаяабарамбараа, д̇знзва вагкад̇и ‘‘ад̇д̇ано мад̇им̣ бахааяа…бз… яат̇аа аажарияо жа аажарияаажарияо жа баал̣ин̃жа барибужчан̃жа вад̣̇анд̇и, д̇ат̇аа н̃аад̇ум̣ ваддад̇ий’’д̇и. на хи аажарияаанам̣ наамамад̇д̇ад̇о барамбарааж̇аананз баяож̇анамад̇т̇и. буб̣б̣аабараанусанд̇хид̇од̇и буб̣б̣аважанасса абараважанзна саха ад̇т̇асамб̣анд̇хаж̇аананад̇о. ад̇т̇ад̇од̇и бад̣̇ад̇т̇абин̣д̣ад̇т̇аад̇хиббзд̇ад̇т̇аад̣̇ид̇о. гааран̣ад̇од̇и д̇ад̣̇ад̇т̇убабад̇д̇ид̇о. т̇зраваад̣̇ан̇г̇анд̇и т̇зраваад̣̇абадибаадим̣, д̇зсам̣ винижчаяабадибаадинд̇и ад̇т̇о.
Vitthunatīti vitthambhati, nitthunati vā santiṭṭhituṃ na sakkoti, tenāha yaṃ yantiādi. Ācariyaparamparāti ācariyānaṃ vinicchayaparamparā, teneva vakkhati ‘‘attano matiṃ pahāya…pe… yathā ācariyo ca ācariyācariyo ca pāḷiñca paripucchañca vadanti, tathā ñātuṃ vaṭṭatī’’ti. Na hi ācariyānaṃ nāmamattato paramparājānane payojanamatthi. Pubbāparānusandhitoti pubbavacanassa aparavacanena saha atthasambandhajānanato. Atthatoti padatthapiṇḍatthaadhippetatthādito. Kāraṇatoti tadatthupapattito. Theravādaṅganti theravādapaṭipāṭiṃ, tesaṃ vinicchayapaṭipāṭinti attho.
имзхи жа бана д̇ийхи лагкан̣зхийд̇и зд̇т̇а батамзна лагкан̣зна винаяасса судту уг̇г̇ахид̇абхааво вуд̇д̇о. д̣̇уд̇иязнасса лаж̇ж̇ийбхаавзна жзва ажалад̇ааяа жа бад̇идтид̇ад̇аа. д̇ад̇иязна баал̣иадтагат̇аасу ануруубзна анааг̇ад̇амби д̇ад̣̇ануломад̇о аажариязхи д̣̇иннанаяад̇о винижчинид̇ум̣ самад̇т̇ад̇аа. од̇ин̣н̣з вад̇т̇усминд̇и жод̣̇анаавасзна вийд̇иггамавад̇т̇усмим̣ сан̇гхамаж̇жхз од̇ин̣н̣з. жод̣̇агзна жуд̣̇ид̇агзна жа вуд̇д̇з вад̇д̇аб̣б̣зд̇и звам̣ од̇ин̣н̣з вад̇т̇ум̣ ниссааяа жод̣̇агзна ‘‘д̣̇идтам̣ суд̇а’’нд̇иаад̣̇инаа жуд̣̇ид̇агзна ‘‘ад̇т̇и над̇т̇ий’’д̇иаад̣̇инаа жа яам̣ вад̇д̇аб̣б̣ам̣, д̇асмим̣ вад̇д̇аб̣б̣з вуд̇д̇зд̇и ад̇т̇о. т̇уллажжаяад̣̇уб̣бхаасид̇аанам̣ маад̇игааяа анааг̇ад̇ад̇д̇аа ‘‘бан̃жаннам̣ аабад̇д̇ийна’’нд̇и вуд̇д̇ам̣. д̇игад̣̇уггаданд̇и ‘‘анубасамбаннз убасамбаннасан̃н̃ий уж̇жхааяад̇и ваа кийяад̇и ваа аабад̇д̇и д̣̇уггадассаа’’д̇иаад̣̇инаа (баажи. 106 т̇огам̣ висад̣̇исам̣) ааг̇ад̇ам̣ д̇игад̣̇уггадам̣. ан̃н̃ад̇арам̣ ваа аабад̇д̇инд̇и ‘‘гаалз вигааласан̃н̃ий аабад̇д̇и д̣̇уггадасса, гаалз взмад̇иго аабад̇д̇и д̣̇уггадассаа’’д̇иаад̣̇игам̣ (баажи. 250) д̣̇угад̣̇уггадам̣ санд̇хааяа вуд̇д̇ам̣. анд̇араабад̇д̇инд̇и д̇асмим̣ д̇асмим̣ сигкаабад̣̇з ааг̇ад̇авад̇т̇увийд̇иггамам̣ винаа ан̃н̃асмим̣ вад̇т̇увийд̇иггамз нид̣̇аанад̇о бабхуд̇и винийд̇авад̇т̇убарияосаанаа анд̇аранд̇араа вуд̇д̇ам̣ аабад̇д̇им̣. ид̇ха бана ‘‘вад̇т̇ум̣ ологзд̇ий’’д̇и висум̣ г̇ахид̇ад̇д̇аа д̇ад̣̇авасзсаа анд̇араабад̇д̇ийд̇и г̇ахид̇аа. бадилаад̇ам̣ угкибад̇ийд̇и ид̣̇ам̣ висиб̣б̣анасигкаабад̣̇з (баажи. 350-351) ааг̇ад̇ам̣. д̇ад̇т̇а д̣аяхамаанам̣ алаад̇ам̣ аг̇г̇игабаалаад̣̇ид̇о б̣ахи бад̇ид̇ам̣ авиж̇жхаад̇амзва бадиугкибад̇и , буна яат̇аатаанз табзд̇ийд̇и ад̇т̇о. виж̇жхаад̇ам̣ бана багкибанд̇асса баажид̇д̇ияамзва. анаабад̇д̇инд̇и зд̇т̇а анд̇аранд̇араа вуд̇д̇аа анаабад̇д̇иби ад̇т̇и, ‘‘анаабад̇д̇и, бхигкавз, ид̣̇д̇химасса ид̣̇д̇хивисаяз’’д̇иаад̣̇и (баараа. 159) вияа сааби сан̇г̇аяхад̇и.
Imehi ca pana tīhi lakkhaṇehīti ettha paṭhamena lakkhaṇena vinayassa suṭṭhu uggahitabhāvo vutto. Dutiyenassa lajjībhāvena ceva acalatāya ca patiṭṭhitatā. Tatiyena pāḷiaṭṭhakathāsu anurūpena anāgatampi tadanulomato ācariyehi dinnanayato vinicchinituṃ samatthatā. Otiṇṇe vatthusminti codanāvasena vītikkamavatthusmiṃ saṅghamajjhe otiṇṇe. Codakena cuditakena ca vutte vattabbeti evaṃ otiṇṇe vatthuṃ nissāya codakena ‘‘diṭṭhaṃ suta’’ntiādinā cuditakena ‘‘atthi natthī’’tiādinā ca yaṃ vattabbaṃ, tasmiṃ vattabbe vutteti attho. Thullaccayadubbhāsitānaṃ mātikāya anāgatattā ‘‘pañcannaṃ āpattīna’’nti vuttaṃ. Tikadukkaṭanti ‘‘anupasampanne upasampannasaññī ujjhāyati vā khīyati vā āpatti dukkaṭassā’’tiādinā (pāci. 106 thokaṃ visadisaṃ) āgataṃ tikadukkaṭaṃ. Aññataraṃ vā āpattinti ‘‘kāle vikālasaññī āpatti dukkaṭassa, kāle vematiko āpatti dukkaṭassā’’tiādikaṃ (pāci. 250) dukadukkaṭaṃ sandhāya vuttaṃ. Antarāpattinti tasmiṃ tasmiṃ sikkhāpade āgatavatthuvītikkamaṃ vinā aññasmiṃ vatthuvītikkame nidānato pabhuti vinītavatthupariyosānā antarantarā vuttaṃ āpattiṃ. Idha pana ‘‘vatthuṃ oloketī’’ti visuṃ gahitattā tadavasesā antarāpattīti gahitā. Paṭilātaṃ ukkhipatīti idaṃ visibbanasikkhāpade (pāci. 350-351) āgataṃ. Tattha ḍayhamānaṃ alātaṃ aggikapālādito bahi patitaṃ avijjhātameva paṭiukkhipati , puna yathāṭhāne ṭhapetīti attho. Vijjhātaṃ pana pakkhipantassa pācittiyameva. Anāpattinti ettha antarantarā vuttā anāpattipi atthi, ‘‘anāpatti, bhikkhave, iddhimassa iddhivisaye’’tiādi (pārā. 159) viya sāpi saṅgayhati.
баарааж̇игаабад̇д̇ийд̇и на д̇аава вад̇д̇аб̣б̣анд̇и ид̣̇ам̣ аабаннабуг̇г̇алзна лаж̇ж̇ийд̇хаммз тад̇ваа яат̇аабхууд̇ам̣ аавигаран̣зби д̣̇уб̣б̣инижчаяам̣ ад̣̇иннаад̣̇аанаад̣̇им̣ санд̇хааяа вуд̇д̇ам̣. яам̣ бана мзт̇унаад̣̇ийсу виж̇аананам̣, д̇ам̣ вад̇д̇аб̣б̣амзва, д̇знааха мзт̇унад̇хаммавийд̇иггамо хийд̇иаад̣̇и. яо бана алаж̇ж̇ид̇ааяа бадин̃н̃ам̣ ад̣̇ад̇ваа вигкзбам̣ гарод̇и, д̇асса аабад̇д̇и на саггаа ол̣ааригааби винижчинид̇ум̣, яаава со яат̇аабхууд̇ам̣ наави гарод̇и, сан̇гхасса жа аабад̇д̇исанд̣̇зхо на виг̇ажчад̇и, д̇аава наасид̇агова бхависсад̇и. сукумаад̇и жид̇д̇абаривад̇д̇ияаа сукумад̇ааяа сукумаа. д̇знааха ‘‘жид̇д̇алахугаа’’д̇и, жид̇д̇ам̣ д̇асса лахуганд̇и ад̇т̇о. д̇зд̇и вийд̇иггамз. д̇ам̣вад̇т̇уганд̇и ад̣̇иннаад̣̇аанаад̣̇имуулагам̣. яам̣ аажарияо бхан̣ад̇и, д̇ам̣ гарохийд̇иаад̣̇и саб̣б̣ам̣ лаж̇ж̇ийбзсалам̣ гуггужжагамзва санд̇хааяа вуд̇д̇ам̣. яо яаат̇аавад̇о багаасзд̇ваа суд̣̇д̇химзва г̇авзсад̇и, д̇знааби, баарааж̇игосийд̇и на вад̇д̇аб̣б̣од̇и анаабад̇д̇игодияааби сан̇гияамаанад̇д̇аа вуд̇д̇ам̣, д̇знзва ‘‘баарааж̇игажчааяаа’’д̇и вуд̇д̇ам̣. сийлаани сод̇хзд̇ваад̇и яасмим̣ вийд̇иггамз баарааж̇игаасан̇гаа вад̇д̇ад̇и, д̇ад̇т̇а баарааж̇игаабхаавабагкам̣ г̇ахзд̇ваа д̣̇зсанаавудтаанаг̇ааминийнам̣ аабад̇д̇ийнам̣ сод̇ханавасзна сийлаани сод̇хзд̇ваа. д̣̇вад̇д̇им̣саагааранд̇и баагадабхаавад̇о убалагкан̣авасзна вуд̇д̇ам̣, яам̣ гин̃жи абхиружид̇ам̣ манасигаад̇ум̣ ваддад̇зва. гаммадтаанам̣ гхадияад̇ийд̇и виббадисаарамуулагзна вигкзбзна анд̇аранд̇араа кан̣д̣ам̣ ад̣̇ассзд̇ваа баб̣анд̇хавасзна жид̇д̇зна сан̇гхадияад̇и. сан̇каараад̇и вибассанаагаммадтаанавасзна вуд̇д̇ам̣. саабад̇д̇игасса хи баг̇ун̣амби гаммадтаанам̣ на судту убадтаад̇и, баг̇зва баарааж̇игасса. д̇асса хи виббадисаараниннад̇ааяа жид̇д̇ам̣ згаг̇г̇ам̣ на ход̇и. згасса бана вид̇аггавигкзбаад̣̇иб̣ахуласса суд̣̇д̇хасийлассаби жид̇д̇ам̣ на самаад̇хияад̇и, д̇ам̣ ид̇ха баарааж̇игамуулаганд̇и на г̇ахзд̇аб̣б̣ам̣. гад̇абаабамуулагзна виббадисаарзнзвзд̇т̇а жид̇д̇асса асамаад̇хияанам̣ санд̇хааяа ‘‘гаммадтаанам̣ на гхадияад̇ий’’д̇и вуд̇д̇ам̣, д̇знааха виббадисаараг̇г̇инаад̇иаад̣̇и. ад̇д̇анаад̇и жид̇д̇зна гаран̣абхууд̇зна буг̇г̇ало гад̇д̇аа ж̇аанаад̇и, бажжад̇д̇з ваа гаран̣аважанам̣, ад̇д̇аа саяам̣ баж̇аанаад̇ийд̇и ад̇т̇о.
Pārājikāpattīti na tāva vattabbanti idaṃ āpannapuggalena lajjīdhamme ṭhatvā yathābhūtaṃ āvikaraṇepi dubbinicchayaṃ adinnādānādiṃ sandhāya vuttaṃ. Yaṃ pana methunādīsu vijānanaṃ, taṃ vattabbameva, tenāha methunadhammavītikkamo hītiādi. Yo pana alajjitāya paṭiññaṃ adatvā vikkhepaṃ karoti, tassa āpatti na sakkā oḷārikāpi vinicchinituṃ, yāva so yathābhūtaṃ nāvi karoti, saṅghassa ca āpattisandeho na vigacchati, tāva nāsitakova bhavissati. Sukhumāti cittaparivattiyā sukhumatāya sukhumā. Tenāha ‘‘cittalahukā’’ti, cittaṃ tassa lahukanti attho. Teti vītikkame. Taṃvatthukanti adinnādānādimūlakaṃ. Yaṃ ācariyo bhaṇati, taṃ karohītiādi sabbaṃ lajjīpesalaṃ kukkuccakameva sandhāya vuttaṃ. Yo yāthāvato pakāsetvā suddhimeva gavesati, tenāpi, pārājikosīti na vattabboti anāpattikoṭiyāpi saṅkiyamānattā vuttaṃ, teneva ‘‘pārājikacchāyā’’ti vuttaṃ. Sīlāni sodhetvāti yasmiṃ vītikkame pārājikāsaṅkā vattati, tattha pārājikābhāvapakkhaṃ gahetvā desanāvuṭṭhānagāminīnaṃ āpattīnaṃ sodhanavasena sīlāni sodhetvā. Dvattiṃsākāranti pākaṭabhāvato upalakkhaṇavasena vuttaṃ, yaṃ kiñci abhirucitaṃ manasikātuṃ vaṭṭateva. Kammaṭṭhānaṃ ghaṭiyatīti vippaṭisāramūlakena vikkhepena antarantarā khaṇḍaṃ adassetvā pabandhavasena cittena saṅghaṭiyati. Saṅkhārāti vipassanākammaṭṭhānavasena vuttaṃ. Sāpattikassa hi paguṇampi kammaṭṭhānaṃ na suṭṭhu upaṭṭhāti, pageva pārājikassa. Tassa hi vippaṭisāraninnatāya cittaṃ ekaggaṃ na hoti. Ekassa pana vitakkavikkhepādibahulassa suddhasīlassapi cittaṃ na samādhiyati, taṃ idha pārājikamūlakanti na gahetabbaṃ. Katapāpamūlakena vippaṭisārenevettha cittassa asamādhiyanaṃ sandhāya ‘‘kammaṭṭhānaṃ na ghaṭiyatī’’ti vuttaṃ, tenāha vippaṭisāragginātiādi. Attanāti cittena karaṇabhūtena puggalo kattā jānāti, paccatte vā karaṇavacanaṃ, attā sayaṃ pajānātīti attho.
жад̇уб̣б̣ид̇хавинаяаад̣̇игат̇ааван̣н̣анаанаяо нидтид̇о.
Catubbidhavinayādikathāvaṇṇanānayo niṭṭhito.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 1. батамабаарааж̇игам̣ • 1. Paṭhamapārājikaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. батамабаарааж̇игам̣ • 1. Paṭhamapārājikaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / жад̇уб̣б̣ид̇хавинаяагат̇ааван̣н̣анаа • Catubbidhavinayakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / жад̇уб̣б̣ид̇хавинаяагат̇ааван̣н̣анаа • Catubbidhavinayakathāvaṇṇanā
