| Library / Tipiṭaka / তিপিটক • Tipiṭaka / নেত্তিৰিভাৰিনী • Nettivibhāvinī |
৬. চতুব্যূহহারসম্পাতৰিভাৰনা
6. Catubyūhahārasampātavibhāvanā
৬৮. যেন যেন লক্খণহারসম্পাতেন সুত্তপ্পদেসত্থা সমানলক্খণেন গহিতা, সো লক্খণহারসম্পাতো পরিপুণ্ণো, ‘‘কতমো চতুব্যূহহারসম্পাতো’’তি পুচ্ছিতব্বত্তা ‘‘তত্থ কতমো চতুব্যূহো হারসম্পাতো’’তিআদি ৰুত্তং। তত্থ তেসু দেসনাহারসম্পাতাদীসু সোল়সসু হারসম্পাতেসু কতমো সংৰণ্ণনাৰিসেসো চতুব্যূহহারসম্পাতো নামাতি পুচ্ছতি।
68. Yena yena lakkhaṇahārasampātena suttappadesatthā samānalakkhaṇena gahitā, so lakkhaṇahārasampāto paripuṇṇo, ‘‘katamo catubyūhahārasampāto’’ti pucchitabbattā ‘‘tattha katamo catubyūho hārasampāto’’tiādi vuttaṃ. Tattha tesu desanāhārasampātādīsu soḷasasu hārasampātesu katamo saṃvaṇṇanāviseso catubyūhahārasampāto nāmāti pucchati.
‘‘কতমস্মিং সুত্তে কতমে নিরুত্যাধিপ্পাযনিদানপুব্বাপরানুসন্ধযো নিদ্ধারিতা’’তি পুচ্ছিতব্বত্তা ‘‘তস্মা’’তিআদি ৰুত্তং। ‘‘তস্মা রক্খিতচিত্তস্সা’’তি সুত্তপ্পদেসে ‘‘রক্খীযতে রক্খিত’’ন্তি নিরুত্তিং ‘‘পরিপালীযতী’’তি ইমিনা পরিযাযেন দস্সেতি, ইতিসদ্দস্স আদ্যত্থত্তা ‘‘চিন্তেতীতি চিত্তং, অত্তনো সন্তানং চিনোতীতি চিত্তং, পচ্চযেহি চিতন্তি চিত্তং, চিত্তৰিচিত্তট্ঠেন চিত্তং, চিত্তকরণট্ঠেন চিত্তং, রক্খিতং চিত্তং যস্সাতি রক্খিতচিত্তো। সম্মা সঙ্কপ্পেতীতি সম্মাসঙ্কপ্পো, গাৰো চরন্তি এত্থাতি গোচরো, গোচরো ৰিযাতি গোচরো, সম্মাসঙ্কপ্পো গোচরো অস্সাতি সম্মাসঙ্কপ্পগোচরো। সম্মা পস্সতীতি সম্মাদিট্ঠি, সম্মাদিট্ঠি পুরেক্খারো অস্সাতি সম্মাদিট্ঠিপুরেক্খারো। জানাতীতি ঞত্ৰান। উদযো চ ৰযো চ উদযব্বযং। থিনঞ্চ মিদ্ধঞ্চ থিনমিদ্ধং, অভিভৰতীতি অভিভূ, থিনমিদ্ধং অভিভূতি থিনমিদ্ধাভিভূ। ভিক্খতীতি ভিক্খূ’’তি নিরুত্তিপি নীহরিতা। তেনাহ – ‘‘ইতি-সদ্দো আদ্যত্থো’’তি (নেত্তি॰ অট্ঠ॰ ৬৮)। এসা ৰুত্তপ্পকারা পঞ্ঞত্তি নিরুত্তি নামাতি নীহরিতা।
‘‘Katamasmiṃ sutte katame nirutyādhippāyanidānapubbāparānusandhayo niddhāritā’’ti pucchitabbattā ‘‘tasmā’’tiādi vuttaṃ. ‘‘Tasmā rakkhitacittassā’’ti suttappadese ‘‘rakkhīyate rakkhita’’nti niruttiṃ ‘‘paripālīyatī’’ti iminā pariyāyena dasseti, itisaddassa ādyatthattā ‘‘cintetīti cittaṃ, attano santānaṃ cinotīti cittaṃ, paccayehi citanti cittaṃ, cittavicittaṭṭhena cittaṃ, cittakaraṇaṭṭhena cittaṃ, rakkhitaṃ cittaṃ yassāti rakkhitacitto. Sammā saṅkappetīti sammāsaṅkappo, gāvo caranti etthāti gocaro, gocaro viyāti gocaro, sammāsaṅkappo gocaro assāti sammāsaṅkappagocaro. Sammā passatīti sammādiṭṭhi, sammādiṭṭhi purekkhāro assāti sammādiṭṭhipurekkhāro. Jānātīti ñatvāna. Udayo ca vayo ca udayabbayaṃ. Thinañca middhañca thinamiddhaṃ, abhibhavatīti abhibhū, thinamiddhaṃ abhibhūti thinamiddhābhibhū. Bhikkhatīti bhikkhū’’ti niruttipi nīharitā. Tenāha – ‘‘iti-saddo ādyattho’’ti (netti. aṭṭha. 68). Esā vuttappakārā paññatti nirutti nāmāti nīharitā.
ইধ সুত্তপ্পদেসে ভগৰতো কো অধিপ্পাযোতি চে পুচ্ছেয্য, যে সপ্পুরিসা সব্বাহি দুগ্গতীহি পরিমুচ্চিতুকামা ভৰিস্সন্তি, তে সপ্পুরিসা ধম্মচারিনো রক্খিতচিত্তা ভৰিস্সন্তীতি অযং অধিপ্পাযো। এত্থ ‘‘তস্মা রক্খিতচিত্তস্সা’’তিআদিসুত্তপ্পদেসে ভগৰতো অধিপ্পাযোতি নীহরিতব্বো।
Idha suttappadese bhagavato ko adhippāyoti ce puccheyya, ye sappurisā sabbāhi duggatīhi parimuccitukāmā bhavissanti, te sappurisā dhammacārino rakkhitacittā bhavissantīti ayaṃ adhippāyo. Ettha ‘‘tasmā rakkhitacittassā’’tiādisuttappadese bhagavato adhippāyoti nīharitabbo.
‘‘কতমং নিদান’’ন্তি চে পুচ্ছেয্য, কোকালিকো সারিপুত্তমোগ্গল্লানেসু থেরেসু চিত্তং অরক্খিত্ৰা পদোসযিত্ৰা মহাপদুমনিরযে যস্মা উপপন্নো, যস্মা ভগৰা চ সতিআরক্খেন সমন্নাগতো সব্বা দুগ্গতিযো জহতি, তস্মা চ সব্বা দুগ্গতিযো জহিতুকামো ভিক্খু সপ্পুরিসো রক্খিতচিত্তো অস্স ভৰেয্যাতি নিদানং নীহরিতব্বং।
‘‘Katamaṃ nidāna’’nti ce puccheyya, kokāliko sāriputtamoggallānesu theresu cittaṃ arakkhitvā padosayitvā mahāpadumaniraye yasmā upapanno, yasmā bhagavā ca satiārakkhena samannāgato sabbā duggatiyo jahati, tasmā ca sabbā duggatiyo jahitukāmo bhikkhu sappuriso rakkhitacitto assa bhaveyyāti nidānaṃ nīharitabbaṃ.
‘‘কতমো পুব্বাপরসন্ধী’’তি চে পুচ্ছেয্য, সুত্তম্হি ‘‘সতিযা চিত্তং রক্খিতব্ব’’ন্তি যং ৰচনং ৰুত্তং, তেন পুব্বৰচনেন অযং ‘‘তস্মা রক্খিতচিত্তস্স…পে॰… সব্বা দুগ্গতিযো জহে’’তি সুত্তপ্পদেসো অনুসন্ধি সংসন্দতি সমেতীতি পুব্বপরানুসন্ধি নিদ্ধারিতব্বোতি।
‘‘Katamo pubbāparasandhī’’ti ce puccheyya, suttamhi ‘‘satiyā cittaṃ rakkhitabba’’nti yaṃ vacanaṃ vuttaṃ, tena pubbavacanena ayaṃ ‘‘tasmā rakkhitacittassa…pe… sabbā duggatiyo jahe’’ti suttappadeso anusandhi saṃsandati sametīti pubbaparānusandhi niddhāritabboti.
‘‘এত্তকোৰ চতুব্যূহহারসম্পাতো পরিপুণ্ণো’’তি ৰত্তব্বত্তা ‘‘নিযুত্তো চতুব্যূহো হারসম্পাতো’’তি ৰুত্তং। যেন যেন সংৰণ্ণনাৰিসেসভূতেন চতুব্যূহহারসম্পাতেন নিরুত্যাধিপ্পাযনিদানপুব্বাপরানুসন্ধি নিদ্ধারিতব্বো, সো সো সংৰণ্ণনাৰিসেসভূতো চতুব্যূহহারসম্পাতো নিযুত্তো যথারহং নিদ্ধারেত্ৰা যুজ্জিতব্বোতি অত্থো গহেতব্বোতি।
‘‘Ettakova catubyūhahārasampāto paripuṇṇo’’ti vattabbattā ‘‘niyutto catubyūho hārasampāto’’ti vuttaṃ. Yena yena saṃvaṇṇanāvisesabhūtena catubyūhahārasampātena nirutyādhippāyanidānapubbāparānusandhi niddhāritabbo, so so saṃvaṇṇanāvisesabhūto catubyūhahārasampāto niyutto yathārahaṃ niddhāretvā yujjitabboti attho gahetabboti.
ইতি চতুব্যূহহারসম্পাতে সত্তিবলানুরূপা রচিতা
Iti catubyūhahārasampāte sattibalānurūpā racitā
ৰিভাৰনা নিট্ঠিতা।
Vibhāvanā niṭṭhitā.
পণ্ডিতেহি পন…পে॰… গহেতব্বোতি।
Paṇḍitehi pana…pe… gahetabboti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ৬. চতুব্যূহহারসম্পাতো • 6. Catubyūhahārasampāto
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ৬. চতুব্যূহহারসম্পাতৰণ্ণনা • 6. Catubyūhahārasampātavaṇṇanā
