| Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā |
6. சதுப்³யூஹஹாரவிப⁴ங்க³வண்ணனா
6. Catubyūhahāravibhaṅgavaṇṇanā
25. தத்த² கதமோ சதுப்³யூஹோ ஹாரோதி சதுப்³யூஹஹாரவிப⁴ங்கோ³. தத்த² ப்³யஞ்ஜனேன ஸுத்தஸ்ஸ நேருத்தஞ்ச அதி⁴ப்பாயோ ச நிதா³னஞ்ச புப்³பா³பரஸந்தி⁴ ச க³வேஸிதப்³போ³தி ஸங்கே²பேன தாவ சதுப்³யூஹங் த³ஸ்ஸேதி. ‘‘ப்³யஞ்ஜனேனா’’தி இமினா ஹாரானங் ஸுத்தஸ்ஸ ப்³யஞ்ஜனவிசயபா⁴வதோ ப்³யஞ்ஜனமுகே²னேவ ஏதே சதுப்³யூஹஹாரபத³த்தா² நித்³தா⁴ரேதப்³பா³தி த³ஸ்ஸேதி. நேருத்தந்தி நிருத்தங் நிப்³ப³சனந்தி அத்தோ². நிருத்தமேவ நேருத்தங். தேனேவாஹ – ‘‘யா நிருத்திபத³ஸங்ஹிதா’’தி. தஸ்ஸத்தோ² – யா நிருத்தி, இத³ங் நேருத்தங். கா பன ஸா நிருத்தி? பத³ஸங்ஹிதாதி பதே³ஸு ஸங்ஹிதா யுத்தா, லிங்க³வசனகாலஸாத⁴னபுரிஸாதி³விஸேஸயோகே³ன யோ யோ அத்தோ² யதா² யதா² வத்தப்³போ³, ததா² ததா² பவத்தஸபா⁴வனிருத்தீதி அத்தோ². ததா² ஹி வுத்தங் ‘‘யங் த⁴ம்மானங் நாமஸோ ஞாண’’ந்தி.
25.Tattha katamo catubyūho hāroti catubyūhahāravibhaṅgo. Tattha byañjanena suttassa neruttañca adhippāyo ca nidānañca pubbāparasandhi ca gavesitabboti saṅkhepena tāva catubyūhaṃ dasseti. ‘‘Byañjanenā’’ti iminā hārānaṃ suttassa byañjanavicayabhāvato byañjanamukheneva ete catubyūhahārapadatthā niddhāretabbāti dasseti. Neruttanti niruttaṃ nibbacananti attho. Niruttameva neruttaṃ. Tenevāha – ‘‘yā niruttipadasaṃhitā’’ti. Tassattho – yā nirutti, idaṃ neruttaṃ. Kā pana sā nirutti? Padasaṃhitāti padesu saṃhitā yuttā, liṅgavacanakālasādhanapurisādivisesayogena yo yo attho yathā yathā vattabbo, tathā tathā pavattasabhāvaniruttīti attho. Tathā hi vuttaṃ ‘‘yaṃ dhammānaṃ nāmaso ñāṇa’’nti.
தத்த² யந்தி ஹேதுஅத்தே² நிபாதோ, யாய காரணபூ⁴தாயாதி அத்தோ². த⁴ம்மானந்தி ஞெய்யத⁴ம்மானங். நாமஸோதி பத²வீ ப²ஸ்ஸோ க²ந்தா⁴ தா⁴து திஸ்ஸோ பு²ஸ்ஸோதி ஏவமாதி³னாமவிஸேஸேன ஞாணங் பவத்ததி, அயங் ஸபா⁴வனிருத்தி நாம. பத²வீதி ஹி ஏவமாதி³கங் ஸத்³த³ங் க³ஹெத்வா ததோ பரங் ஸங்கேதத்³வாரேன தத³த்த²படிபத்தி தங்தங்அனியதனாமபஞ்ஞத்திக்³க³ஹணவஸேனேவ ஹோதீதி. அத² வா பத³ஸங்ஹிதாதி பதே³ன ஸங்ஹிதா . பத³தோ ஹி பத³த்தா²வபோ³தோ⁴. ஸோ பனஸ்ஸ அத்தே² பவத்தினிமித்தபூ⁴தாய பஞ்ஞத்தியா க³ஹிதாய ஏவ ஹோதீதி ஸா பன பஞ்ஞத்தி நிருத்திஸங்கா²தபதே³ன ஸங்ஹிதா பத³த்த²ங் போ³தே⁴தீதி பத³ஸங்ஹிதாதி வுத்தா. ‘‘யதா³ ஹி பி⁴க்கூ²’’திஆதி³னா ‘‘த⁴ம்மானங் நாமஸோ ஞாண’’ந்தி பத³ஸ்ஸ அத்த²ங் விவரதி.
Tattha yanti hetuatthe nipāto, yāya kāraṇabhūtāyāti attho. Dhammānanti ñeyyadhammānaṃ. Nāmasoti pathavī phasso khandhā dhātu tisso phussoti evamādināmavisesena ñāṇaṃ pavattati, ayaṃ sabhāvanirutti nāma. Pathavīti hi evamādikaṃ saddaṃ gahetvā tato paraṃ saṅketadvārena tadatthapaṭipatti taṃtaṃaniyatanāmapaññattiggahaṇavaseneva hotīti. Atha vā padasaṃhitāti padena saṃhitā . Padato hi padatthāvabodho. So panassa atthe pavattinimittabhūtāya paññattiyā gahitāya eva hotīti sā pana paññatti niruttisaṅkhātapadena saṃhitā padatthaṃ bodhetīti padasaṃhitāti vuttā. ‘‘Yadā hi bhikkhū’’tiādinā ‘‘dhammānaṃ nāmaso ñāṇa’’nti padassa atthaṃ vivarati.
தத்த² அத்த²ஸ்ஸாதி ஸத்³தா³பி⁴தெ⁴ய்யஸ்ஸ அத்த²ஸ்ஸ. நாமங் ஜானாதீதி நாமபஞ்ஞத்திவஸேன அயங் நாமாதி நாமங் ஜானாதி. த⁴ம்மஸ்ஸாதி ஸபா⁴வத⁴ம்மஸ்ஸ. ததா² ததா² நங் அபி⁴னிரோபேதீதி யோ யோ அத்தோ² த⁴ம்மோ ச யதா² யதா² ச வோஹரிதப்³போ³, ததா² ததா² நங் நாமங் வோஹாரங் அபி⁴னிரோபேதி தே³ஸேதீதி அத்தோ². எத்தாவதா ச அயங் பி⁴க்கு² அத்த²குஸலோ யாவ அனேகாதி⁴வசனகுஸலோதி வுச்சதீதி ஸம்ப³ந்தி⁴தப்³ப³ங்.
Tattha atthassāti saddābhidheyyassa atthassa. Nāmaṃ jānātīti nāmapaññattivasena ayaṃ nāmāti nāmaṃ jānāti. Dhammassāti sabhāvadhammassa. Tathātathā naṃ abhiniropetīti yo yo attho dhammo ca yathā yathā ca voharitabbo, tathā tathā naṃ nāmaṃ vohāraṃ abhiniropeti desetīti attho. Ettāvatā ca ayaṃ bhikkhu atthakusalo yāva anekādhivacanakusaloti vuccatīti sambandhitabbaṃ.
தத்த² அத்த²குஸலோதி பாளிஅத்தே² குஸலோ. த⁴ம்மகுஸலோதி பாளியங் குஸலோ. ப்³யஞ்ஜனகுஸலோதி அக்க²ரேஸு ச வாக்யேஸு ச குஸலோ. நிருத்திகுஸலோதி நிப்³ப³சனே குஸலோ. புப்³பா³பரகுஸலோதி தே³ஸனாய புப்³பா³பரகுஸலோ. தே³ஸனாகுஸலோதி த⁴ம்மஸ்ஸ தே³ஸனாய குஸலோ. அதீதாதி⁴வசனகுஸலோதி அதீதபஞ்ஞத்திகுஸலோ. ஏஸ நயோ ஸேஸேஸுபி. ஏவங் ஸப்³பா³னி காதப்³பா³னி, ஜனபத³னிருத்தானீதி யத்தகானி ஸத்தவோஹாரபதா³னி, தானி ஸப்³பா³னி யதா²ஸம்ப⁴வங் ஸுத்தே நிப்³ப³சனவஸேன காதப்³பா³னி வத்தப்³பா³னீதி அத்தோ². ஸப்³பா³ ச ஜனபத³னிருத்தியோதி ஸப்³பா³ ச லோகஸமஞ்ஞாயோ யதா²ரஹங் காதப்³பா³. ‘‘ஸமஞ்ஞங் நாதிதா⁴வெய்யா’’தி ஹி வுத்தங். ததா² ஹி ஸம்முதிஸச்சமுகே²னேவ பரமத்த²ஸச்சாதி⁴க³மோ ஹோதீதி.
Tattha atthakusaloti pāḷiatthe kusalo. Dhammakusaloti pāḷiyaṃ kusalo. Byañjanakusaloti akkharesu ca vākyesu ca kusalo. Niruttikusaloti nibbacane kusalo. Pubbāparakusaloti desanāya pubbāparakusalo. Desanākusaloti dhammassa desanāya kusalo. Atītādhivacanakusaloti atītapaññattikusalo. Esa nayo sesesupi. Evaṃ sabbāni kātabbāni, janapadaniruttānīti yattakāni sattavohārapadāni, tāni sabbāni yathāsambhavaṃ sutte nibbacanavasena kātabbāni vattabbānīti attho. Sabbā ca janapadaniruttiyoti sabbā ca lokasamaññāyo yathārahaṃ kātabbā. ‘‘Samaññaṃ nātidhāveyyā’’ti hi vuttaṃ. Tathā hi sammutisaccamukheneva paramatthasaccādhigamo hotīti.
26.
26.
அதி⁴ப்பாயகண்டே³ அனுத்தானங் நாம நத்தி².
Adhippāyakaṇḍe anuttānaṃ nāma natthi.
27. நிதா³னகண்டே³ இமினா வத்து²னாதி இமினா புத்தக³வாதி³கித்தனஸங்கா²தேன காரணேன. காரணஞ்ஹெத்த² வத்து² நிதா³னந்தி ச வுத்தங். இமினா நயேன ஸப்³ப³த்த² நிதா³னநித்³தா⁴ரணங் வேதி³தப்³ப³ங்.
27. Nidānakaṇḍe iminā vatthunāti iminā puttagavādikittanasaṅkhātena kāraṇena. Kāraṇañhettha vatthu nidānanti ca vuttaṃ. Iminā nayena sabbattha nidānaniddhāraṇaṃ veditabbaṃ.
காமந்தா⁴தி கிலேஸகாமேன அந்தா⁴. ஜாலஸஞ்ச²ன்னாதி தண்ஹாஜாலபலிகு³ண்டி²தா. தண்ஹாச²த³னசா²தி³தாதி தண்ஹாஸங்கா²தேன அந்த⁴காரேன பிஹிதா. ப³ந்த⁴னாப³த்³தா⁴தி காமகு³ணஸங்கா²தேன ப³ந்த⁴னேன ப³த்³தா⁴. ‘‘பமத்தப³ந்த⁴னா’’திபி பாடோ², பமாதே³னாதி அத்தோ². புப்³பா³பரேனாதி புப்³பே³ன வா அபரேன வா தே³ஸனந்தரேனாதி அதி⁴ப்பாயோ. யுஜ்ஜதீதி யோக³ங் உபேதி, ஸமேதீதி அத்தோ². இமேஹி பதே³ஹி பரியுட்டா²னேஹீதி இமேஹி யதா²வுத்தேஹி கா³தா²பதே³ஹி தண்ஹாபரியுட்டா²னதீ³பகேஹி. ஸாயேவ தண்ஹாதி யா புரிமகா³தா²ய வுத்தா, ஸாயேவ தண்ஹா. ‘‘யஞ்சாஹா’’திஆதி³னா த்³வின்னம்பி கா³தா²னங் அத்த²ஸங்ஸந்த³னேன புப்³பா³பரங் விபா⁴வேதி. பயோகே³னாதி ஸமுதா³சாரேன. தஸ்மாதி யத்த² ஸயங் உப்பன்னா, தங் ஸந்தானங் நிஸ்ஸரிதுங் அதெ³ந்தீ நானாரம்மணேஹி பலோப⁴யமானா கிலேஸேஹி சித்தங் பரியாதா³ய திட்ட²தி. தஸ்மா கிலேஸவஸேன ச பரியுட்டா²னவஸேன ச தண்ஹாப³ந்த⁴னங் வுத்தா.
Kāmandhāti kilesakāmena andhā. Jālasañchannāti taṇhājālapaliguṇṭhitā. Taṇhāchadanachāditāti taṇhāsaṅkhātena andhakārena pihitā. Bandhanābaddhāti kāmaguṇasaṅkhātena bandhanena baddhā. ‘‘Pamattabandhanā’’tipi pāṭho, pamādenāti attho. Pubbāparenāti pubbena vā aparena vā desanantarenāti adhippāyo. Yujjatīti yogaṃ upeti, sametīti attho. Imehi padehipariyuṭṭhānehīti imehi yathāvuttehi gāthāpadehi taṇhāpariyuṭṭhānadīpakehi. Sāyeva taṇhāti yā purimagāthāya vuttā, sāyeva taṇhā. ‘‘Yañcāhā’’tiādinā dvinnampi gāthānaṃ atthasaṃsandanena pubbāparaṃ vibhāveti. Payogenāti samudācārena. Tasmāti yattha sayaṃ uppannā, taṃ santānaṃ nissarituṃ adentī nānārammaṇehi palobhayamānā kilesehi cittaṃ pariyādāya tiṭṭhati. Tasmā kilesavasena ca pariyuṭṭhānavasena ca taṇhābandhanaṃ vuttā.
பபஞ்செந்தி ஸங்ஸாரே சிரங் ட²பெந்தீதி பபஞ்சா. திட்ட²ந்தி ஏதாஹீதி டி²தீ. ப³ந்த⁴னட்டே²ன ஸந்தா³னங் வியாதி ஸந்தா³னங். நிப்³பா³னநக³ரப்பவேஸஸ்ஸ படிஸேத⁴னதோ பலிக⁴ங் வியாதி பலிக⁴ங். அனவஸேஸதண்ஹாபஹானேன நித்தண்ஹோ. அத்தஹிதபரஹிதானங் இத⁴லோகபரலோகானஞ்ச முனநதோ முனீதி ஏவங் கா³தா²ய பத³த்தோ² வேதி³தப்³போ³. பபஞ்சாதி³அத்தா² பன பாளியங் விப⁴த்தா ஏவாதி. தத்த² யஸ்ஸேதே பபஞ்சாத³யோ அப்³ப⁴த்த²ங் க³தா, தஸ்ஸ தண்ஹாய லேஸோபி ந ப⁴வதி. தேன வுத்தங் – ‘‘யோ ஏதங் ஸப்³ப³ங் ஸமதிக்கந்தோ, அயங் வுச்சதி நித்தண்ஹோ’’தி.
Papañcenti saṃsāre ciraṃ ṭhapentīti papañcā. Tiṭṭhanti etāhīti ṭhitī. Bandhanaṭṭhena sandānaṃ viyāti sandānaṃ. Nibbānanagarappavesassa paṭisedhanato palighaṃ viyāti palighaṃ. Anavasesataṇhāpahānena nittaṇho. Attahitaparahitānaṃ idhalokaparalokānañca munanato munīti evaṃ gāthāya padattho veditabbo. Papañcādiatthā pana pāḷiyaṃ vibhattā evāti. Tattha yassete papañcādayo abbhatthaṃ gatā, tassa taṇhāya lesopi na bhavati. Tena vuttaṃ – ‘‘yo etaṃ sabbaṃ samatikkanto, ayaṃ vuccati nittaṇho’’ti.
28. பரியுட்டா²னந்தி ‘‘தண்ஹாய பரியுட்டா²ன’’ந்தி வுத்தானி தண்ஹாவிசரிதானி. ஸங்கா²ராதி ‘‘தத³பி⁴ஸங்க²தா ஸங்கா²ரா’’தி வுத்தா தண்ஹாதி³ட்டி²மானஹேதுகா ஸங்கா²ரா. தே பன யஸ்மா ஸத்தஸு ஜவனசேதனாஸு பட²மசேதனா ஸதி பச்சயஸமவாயே இமஸ்மிங்யேவ அத்தபா⁴வே ப²லங் தே³தி. பச்சி²மசேதனா அனந்தரே அத்தபா⁴வே. உபி⁴ன்னங் வேமஜ்ஜ²சேதனா யத்த² கத்த²சி ப²லங் தே³தி, தஸ்மா விபச்சனோகாஸவஸேன விப⁴ஜித்வா த³ஸ்ஸேதுங் ‘‘தி³ட்ட²த⁴ம்மவேத³னீயா வா’’திஆதி³ வுத்தங். யஸ்மா பன தங்தங்சேதனாஸம்பயுத்தா தண்ஹாபி சேதனா விய தி³ட்ட²த⁴ம்மவேத³னீயாதி³வஸேன திதா⁴ ஹோதி, தஸ்மா வுத்தங் – ‘‘ஏவங் தண்ஹா திவித⁴ங் ப²லங் தே³தீ’’தி. புப்³பா³பரேன யுஜ்ஜதீதி யங் புப்³ப³ங் புரிமங் ஸங்கா²ரானங் தி³ட்ட²த⁴ம்மவேத³னீயதாதி³வசனங் வுத்தங், தங் இமினா அபரேன கம்மஸ்ஸ தி³ட்ட²த⁴ம்மவேத³னீயதாதி³வசனேன யுஜ்ஜதி க³ங்கோ³த³கங் விய யமுனோத³கேன ஸங்ஸந்த³தி ஸமேதீதி அத்தோ².
28.Pariyuṭṭhānanti ‘‘taṇhāya pariyuṭṭhāna’’nti vuttāni taṇhāvicaritāni. Saṅkhārāti ‘‘tadabhisaṅkhatā saṅkhārā’’ti vuttā taṇhādiṭṭhimānahetukā saṅkhārā. Te pana yasmā sattasu javanacetanāsu paṭhamacetanā sati paccayasamavāye imasmiṃyeva attabhāve phalaṃ deti. Pacchimacetanā anantare attabhāve. Ubhinnaṃ vemajjhacetanā yattha katthaci phalaṃ deti, tasmā vipaccanokāsavasena vibhajitvā dassetuṃ ‘‘diṭṭhadhammavedanīyā vā’’tiādi vuttaṃ. Yasmā pana taṃtaṃcetanāsampayuttā taṇhāpi cetanā viya diṭṭhadhammavedanīyādivasena tidhā hoti, tasmā vuttaṃ – ‘‘evaṃ taṇhā tividhaṃ phalaṃ detī’’ti. Pubbāparena yujjatīti yaṃ pubbaṃ purimaṃ saṅkhārānaṃ diṭṭhadhammavedanīyatādivacanaṃ vuttaṃ, taṃ iminā aparena kammassa diṭṭhadhammavedanīyatādivacanena yujjati gaṅgodakaṃ viya yamunodakena saṃsandati sametīti attho.
ஸங்கா²ரா த³ஸ்ஸனப³லேனாதி சதூஸு தி³ட்டி²க³தஸம்பயுத்தேஸு விசிகிச்சா²ஸம்பயுத்தே சாதி பஞ்சஸு சித்துப்பாதே³ஸு ஸங்கா²ரா பட²மமக்³க³பஞ்ஞாப³லேன. ச²த்திங்ஸ தண்ஹாவிசரிதானி பா⁴வனாப³லேனாதி பட²மமக்³கே³ன பஹீனாவஸேஸவஸேன வுத்தங், ந ஸப்³பே³ஸங் வஸேன.
Saṅkhārā dassanabalenāti catūsu diṭṭhigatasampayuttesu vicikicchāsampayutte cāti pañcasu cittuppādesu saṅkhārā paṭhamamaggapaññābalena. Chattiṃsa taṇhāvicaritāni bhāvanābalenāti paṭhamamaggena pahīnāvasesavasena vuttaṃ, na sabbesaṃ vasena.
அனுப³ந்தோ⁴தி தண்ஹாதீ³னங் அனுப்பப³ந்தே⁴ன பவத்தி. யோ சாபி பபஞ்சோதிஆதி³னா ‘‘பபஞ்சேதீ’’திஆதி³னா வுத்தங் ராத⁴ஸுத்தஞ்சஸங்ஸந்த³தி. தேனேவாஹ – ‘‘இத³ங் ஏகத்த²’’ந்தி. யதி³பி அத்த²தோ ஏகங், தே³ஸனாய பன விஸேஸோ விஜ்ஜதீதி த³ஸ்ஸேதுங் ‘‘அபி சா’’திஆதி³ வுத்தங். ஏவந்தி இமினா வுத்தப்பகாரேன. ஸுத்தேனாதி ஸங்வண்ணியமானேன ஸுத்தேன. ஸுத்தந்தி ஸுத்தந்தரங். ஸங்ஸந்த³யித்வாதி விமிஸ்ஸித்வா அத்த²தோ அபி⁴ன்னங் கத்வா. புப்³பா³பரேன ஸத்³தி⁴ங் யோஜயித்வாதி புப்³பே³ன வா அபரேன வா ஸுத்தேன ஸத்³தி⁴ங் அத்த²தோ ஸம்ப³ந்த⁴ங் யோஜெத்வா. வுத்தமேவத்த²ங் பாகடங் கரோதி தேன ஸுத்தஸ்ஸ அத்தோ² நித்³தி³ட்டோ² ஹோதி வித்தா²ரிதோ ஸுத்தந்தரத³ஸ்ஸனேன.
Anubandhoti taṇhādīnaṃ anuppabandhena pavatti. Yo cāpi papañcotiādinā ‘‘papañcetī’’tiādinā vuttaṃ rādhasuttañcasaṃsandati. Tenevāha – ‘‘idaṃ ekattha’’nti. Yadipi atthato ekaṃ, desanāya pana viseso vijjatīti dassetuṃ ‘‘api cā’’tiādi vuttaṃ. Evanti iminā vuttappakārena. Suttenāti saṃvaṇṇiyamānena suttena. Suttanti suttantaraṃ. Saṃsandayitvāti vimissitvā atthato abhinnaṃ katvā. Pubbāparena saddhiṃ yojayitvāti pubbena vā aparena vā suttena saddhiṃ atthato sambandhaṃ yojetvā. Vuttamevatthaṃ pākaṭaṃ karoti tena suttassa attho niddiṭṭho hoti vitthārito suttantaradassanena.
ந கேவலங் ஸுத்தந்தரஸங்ஸந்த³னமேவ புப்³பா³பரஸந்தி⁴, அத² கோ² அஞ்ஞோபி அத்தீ²தி த³ஸ்ஸேதுங் ‘‘ஸோ சாய’’ந்திஆதி³ வுத்தங். தத்த² அத்த²ஸந்தீ⁴தி கிரியாகாரகாதி³வஸேன அத்த²ஸ்ஸ ஸம்ப³ந்தோ⁴. ஸோ பன யஸ்மா ஸங்காஸனாதீ³னங் ச²ன்னங் அத்த²பதா³னங்யேவ ஹோதி, ஸப்³ப³ஸ்ஸாபி பத³த்த²ஸ்ஸ தத³வரோத⁴தோ.
Na kevalaṃ suttantarasaṃsandanameva pubbāparasandhi, atha kho aññopi atthīti dassetuṃ ‘‘so cāya’’ntiādi vuttaṃ. Tattha atthasandhīti kiriyākārakādivasena atthassa sambandho. So pana yasmā saṅkāsanādīnaṃ channaṃ atthapadānaṃyeva hoti, sabbassāpi padatthassa tadavarodhato.
ஸம்ப³ந்தோ⁴ ச நாம ந கோசி அத்தோ². தஸ்மா ‘‘அத்த²ஸந்தி⁴ ச²ப்பதா³னீ’’திஆதி³ வுத்தங். ப்³யஞ்ஜனஸந்தீ⁴தி பத³ஸ்ஸ பத³ந்தரேன ஸம்ப³ந்தோ⁴. யஸ்மா பன ஸப்³ப³ம்பி நாமாதி³பத³ங் ச²ஹி ப்³யஞ்ஜனபதே³ஹி அஸங்க³ஹிதங் நாம நத்தி², தஸ்மா ‘‘ப்³யஞ்ஜனஸந்தி⁴ ச²ப்பதா³னீ’’திஆதி³ வுத்தங்.
Sambandho ca nāma na koci attho. Tasmā ‘‘atthasandhi chappadānī’’tiādi vuttaṃ. Byañjanasandhīti padassa padantarena sambandho. Yasmā pana sabbampi nāmādipadaṃ chahi byañjanapadehi asaṅgahitaṃ nāma natthi, tasmā ‘‘byañjanasandhi chappadānī’’tiādi vuttaṃ.
தே³ஸனாஸந்தீ⁴தி யதா²வுத்ததே³ஸனந்தரேன தே³ஸனாய ஸங்ஸந்த³னங். ந ச பத²விங் நிஸ்ஸாயாதி பத²விங் விஸயஸங்கா²தங் நிஸ்ஸயங் கத்வா, பத²விங் ஆலம்பி³த்வாதி அத்தோ². ஜா²யீதி ப²லஸமாபத்திஜா²னேன ஜா²யீ. ஸோ ஹி ஸப்³ப³ஸங்கா²ரனிஸ்ஸடங் நிப்³பா³னங் ஆலம்பி³த்வா ஸமாபஜ்ஜனவஸேன ஜா²யதி, ந பத²விங் நிஸ்ஸாய ஜா²யதீதி வுத்தோ. ஸேஸபதே³ஸுபி ஏஸேவ நயோ. எத்த² ச சதூஹி மஹாபூ⁴தேஹி ரூபப்படிப³த்³த⁴வுத்திதாய ஸப்³போ³ காமப⁴வோ ரூபப⁴வோ ச க³ஹிதா. அரூபப⁴வோ பன ஸரூபேனேவ க³ஹிதோதி ஸப்³ப³ங் லோகங் பரியாதி³யித்வா புன அஞ்ஞேனபி பரியாயேன தங் த³ஸ்ஸேதுங் ‘‘ந ச இமங் லோக’’ந்திஆதி³மாஹ. ஸப்³போ³ ஹி லோகோ இத⁴லோகோ பரலோகோ சாதி த்³வேவ கொட்டா²ஸா ஹொந்தி. யஸ்மா பன ‘‘இத⁴லோகோ’’தி விஸேஸதோ தி³ட்ட²த⁴ம்மபூ⁴தோ ஸத்தஸந்தானோ வுச்சதி. ‘‘பரலோகோ’’தி ப⁴வந்தரஸங்கே²பக³தோ ஸத்தஸந்தானோ தது³ப⁴யவினிமுத்தோ அனிந்த்³ரியப³த்³தோ⁴ ரூபஸந்தானோ. தஸ்மா தங் ஸந்தா⁴ய ‘‘யமித³ங் உப⁴யமந்தரேனா’’திஆதி³ வுத்தங்.
Desanāsandhīti yathāvuttadesanantarena desanāya saṃsandanaṃ. Na ca pathaviṃ nissāyāti pathaviṃ visayasaṅkhātaṃ nissayaṃ katvā, pathaviṃ ālambitvāti attho. Jhāyīti phalasamāpattijhānena jhāyī. So hi sabbasaṅkhāranissaṭaṃ nibbānaṃ ālambitvā samāpajjanavasena jhāyati, na pathaviṃ nissāya jhāyatīti vutto. Sesapadesupi eseva nayo. Ettha ca catūhi mahābhūtehi rūpappaṭibaddhavuttitāya sabbo kāmabhavo rūpabhavo ca gahitā. Arūpabhavo pana sarūpeneva gahitoti sabbaṃ lokaṃ pariyādiyitvā puna aññenapi pariyāyena taṃ dassetuṃ ‘‘na ca imaṃ loka’’ntiādimāha. Sabbo hi loko idhaloko paraloko cāti dveva koṭṭhāsā honti. Yasmā pana ‘‘idhaloko’’ti visesato diṭṭhadhammabhūto sattasantāno vuccati. ‘‘Paraloko’’ti bhavantarasaṅkhepagato sattasantāno tadubhayavinimutto anindriyabaddho rūpasantāno. Tasmā taṃ sandhāya ‘‘yamidaṃ ubhayamantarenā’’tiādi vuttaṃ.
யே பன ‘‘உப⁴யமந்தரேனா’’தி வசனங் க³ஹெத்வா அந்தராப⁴வங் இச்ச²ந்தி, தேஸங் தங் மிச்சா². அந்தராப⁴வோ ஹி அபி⁴த⁴ம்மே படிக்கி²த்தோதி. தி³ட்ட²ந்தி ரூபாயதனங் . ஸுதந்தி ஸத்³தா³யதனங். முதந்தி பத்வா க³ஹேதப்³ப³தோ க³ந்தா⁴யதனங் ரஸாயதனங் பொ²ட்ட²ப்³பா³யதனஞ்ச. விஞ்ஞாதந்தி அவஸிட்ட²ங் த⁴ம்மாரம்மணபரியாபன்னரூபங். பத்தந்தி பரியேஸித்வா வா அபரியேஸித்வா வா பத்தங். பரியேஸிதந்தி பத்தங் வா அப்பத்தங் வா பரியேஸிதங். விதக்கிதங் விசாரிதந்தி விதக்கனவஸேன அனுமஜ்ஜனவஸேன ச ஆலம்பி³தங். மனஸானுசிந்திதந்தி சித்தேன அனு அனு சிந்திதங். அயங் ஸதே³வகே…பே॰… அனிஸ்ஸிதேன சித்தேன ந ஞாயதி ஜா²யந்தோதி அயங் கீ²ணாஸவோ ப²லஸமாபத்திஜா²னேன ஜா²யந்தோ புப்³பே³வ தண்ஹாதி³ட்டி²னிஸ்ஸயானங் ஸுட்டு² பஹீனத்தா ஸதே³வகே லோகே…பே॰… மனுஸ்ஸாய யத்த² கத்த²சிபி அனிஸ்ஸிதேன சித்தேன ஜா²யதி நாம. ததோ ஏவ லோகே கேனசிபி ந ஞாயதி ‘‘அயங் இத³ங் நாம நிஸ்ஸாய ஜா²யதீ’’தி. வுத்தஞ்ஹேதங் –
Ye pana ‘‘ubhayamantarenā’’ti vacanaṃ gahetvā antarābhavaṃ icchanti, tesaṃ taṃ micchā. Antarābhavo hi abhidhamme paṭikkhittoti. Diṭṭhanti rūpāyatanaṃ . Sutanti saddāyatanaṃ. Mutanti patvā gahetabbato gandhāyatanaṃ rasāyatanaṃ phoṭṭhabbāyatanañca. Viññātanti avasiṭṭhaṃ dhammārammaṇapariyāpannarūpaṃ. Pattanti pariyesitvā vā apariyesitvā vā pattaṃ. Pariyesitanti pattaṃ vā appattaṃ vā pariyesitaṃ. Vitakkitaṃ vicāritanti vitakkanavasena anumajjanavasena ca ālambitaṃ. Manasānucintitanti cittena anu anu cintitaṃ. Ayaṃ sadevake…pe… anissitena cittena na ñāyati jhāyantoti ayaṃ khīṇāsavo phalasamāpattijhānena jhāyanto pubbeva taṇhādiṭṭhinissayānaṃ suṭṭhu pahīnattā sadevake loke…pe… manussāya yattha katthacipi anissitena cittena jhāyati nāma. Tato eva loke kenacipi na ñāyati ‘‘ayaṃ idaṃ nāma nissāya jhāyatī’’ti. Vuttañhetaṃ –
‘‘நமோ தே புரிஸாஜஞ்ஞ, நமோ தே புரிஸுத்தம;
‘‘Namo te purisājañña, namo te purisuttama;
யஸ்ஸ தே நாபி⁴ஜானாம, கிங் த்வங் நிஸ்ஸாய ஜா²யஸீ’’தி. (நெத்தி॰ 104);
Yassa te nābhijānāma, kiṃ tvaṃ nissāya jhāyasī’’ti. (netti. 104);
இதா³னி கீ²ணாஸவசித்தஸ்ஸ கத்த²சிபி அனிஸ்ஸிதபா⁴வங் கோ³தி⁴கஸுத்தேன (ஸங்॰ நி॰ 1.159) வக்கலிஸுத்தேன (ஸங்॰ நி॰ 3.87) ச விபா⁴வேதுங் ‘‘யதா² மாரோ’’திஆதி³ வுத்தங். விஞ்ஞாணங் ஸமன்வேஸந்தோதி பரினிப்³பா³னதோ உத்³த⁴ங் விஞ்ஞாணங் பரியேஸந்தோ. ‘‘பபஞ்சாதீதோ’’திஆதி³னா அத³ஸ்ஸனஸ்ஸ காரணமாஹ. அனிஸ்ஸிதசித்தா ந ஞாயந்தி ஜா²யமானாதி ந கேவலங் அனுபாதி³ஸேஸாய நிப்³பா³னதா⁴துயா கீ²ணாஸவஸ்ஸ சித்தக³திங் மாராத³யோ ந ஜானந்தி, அபி ச கோ² ஸஉபாதி³ஸேஸாயபி நிப்³பா³னதா⁴துயா தஸ்ஸ தங் ந ஜானந்தீதி அத்தோ². அயங் தே³ஸனாஸந்தீ⁴தி கோ³தி⁴கஸுத்தவக்கலிஸுத்தானங் விய ஸுத்தந்தானங் அஞ்ஞமஞ்ஞஅத்த²ஸங்ஸந்த³னா தே³ஸனாஸந்தி⁴ நாம.
Idāni khīṇāsavacittassa katthacipi anissitabhāvaṃ godhikasuttena (saṃ. ni. 1.159) vakkalisuttena (saṃ. ni. 3.87) ca vibhāvetuṃ ‘‘yathā māro’’tiādi vuttaṃ. Viññāṇaṃ samanvesantoti parinibbānato uddhaṃ viññāṇaṃ pariyesanto. ‘‘Papañcātīto’’tiādinā adassanassa kāraṇamāha. Anissitacittā na ñāyanti jhāyamānāti na kevalaṃ anupādisesāya nibbānadhātuyā khīṇāsavassa cittagatiṃ mārādayo na jānanti, api ca kho saupādisesāyapi nibbānadhātuyā tassa taṃ na jānantīti attho. Ayaṃ desanāsandhīti godhikasuttavakkalisuttānaṃ viya suttantānaṃ aññamaññaatthasaṃsandanā desanāsandhi nāma.
நித்³தே³ஸஸந்தீ⁴தி நித்³தே³ஸஸ்ஸ ஸந்தி⁴ நித்³தே³ஸஸந்தி⁴, நித்³தே³ஸேன வா ஸந்தி⁴ நித்³தே³ஸஸந்தி⁴. புரிமேன ஸுத்தஸ்ஸ நித்³தே³ஸேன தஸ்ஸேவ பச்சி²மஸ்ஸ நித்³தே³ஸஸ்ஸ, பச்சி²மேன வா புரிமஸ்ஸ ஸம்ப³ந்த⁴னந்தி அத்தோ². தங் த³ஸ்ஸேதுங் யஸ்மா ப⁴க³வா யேபு⁴ய்யேன பட²மங் வட்டங் த³ஸ்ஸெத்வா பச்சா² விவட்டங் த³ஸ்ஸேதி, தஸ்மா ‘‘நிஸ்ஸிதசித்தா’’திஆதி³ வுத்தங். தத்த² நிஸ்ஸிதங் சித்தங் ஏதேஸந்தி நிஸ்ஸிதசித்தா, புக்³க³லா, நித்³தி³ஸிதப்³பா³ புக்³க³லாதி⁴ட்டா²னாய தே³ஸனாயாதி அதி⁴ப்பாயோ. த⁴ம்மாதி⁴ட்டா²னாய பன நிஸ்ஸிதங் சித்தங் எத்தா²தி நிஸ்ஸிதசித்தா, நிஸ்ஸிதசித்தவந்தோ தண்ஹாதி³ட்டி²னிஸ்ஸயவஸேன பவத்தா ஸுத்தபதே³ஸா. ஸேஸமெத்த² ஸப்³ப³ங் பாகடமேவ.
Niddesasandhīti niddesassa sandhi niddesasandhi, niddesena vā sandhi niddesasandhi. Purimena suttassa niddesena tasseva pacchimassa niddesassa, pacchimena vā purimassa sambandhananti attho. Taṃ dassetuṃ yasmā bhagavā yebhuyyena paṭhamaṃ vaṭṭaṃ dassetvā pacchā vivaṭṭaṃ dasseti, tasmā ‘‘nissitacittā’’tiādi vuttaṃ. Tattha nissitaṃ cittaṃ etesanti nissitacittā, puggalā, niddisitabbā puggalādhiṭṭhānāya desanāyāti adhippāyo. Dhammādhiṭṭhānāya pana nissitaṃ cittaṃ etthāti nissitacittā, nissitacittavanto taṇhādiṭṭhinissayavasena pavattā suttapadesā. Sesamettha sabbaṃ pākaṭameva.
சதுப்³யூஹஹாரவிப⁴ங்க³வண்ணனா நிட்டி²தா.
Catubyūhahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 6. சதுப்³யூஹஹாரவிப⁴ங்கோ³ • 6. Catubyūhahāravibhaṅgo
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 6. சதுப்³யூஹஹாரவிப⁴ங்க³வண்ணனா • 6. Catubyūhahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 6. சதுப்³யூஹஹாரவிப⁴ங்க³விபா⁴வனா • 6. Catubyūhahāravibhaṅgavibhāvanā
