| Library / Tipiṭaka / திபிடக • Tipiṭaka / நெத்திப்பகரண-டீகா • Nettippakaraṇa-ṭīkā |
6. சதுப்³யூஹஹாரவிப⁴ங்க³வண்ணனா
6. Catubyūhahāravibhaṅgavaṇṇanā
25. ஹாரானந்தி நித்³தா⁴ரணே ஸாமிவசனங். ஹாரேஸு இமஸ்ஸ சதுப்³யூஹஹாரஸ்ஸ விஸேஸதோ ஸுத்தஸ்ஸ ப்³யஞ்ஜனவிசயபா⁴வதோதி யோஜனா. தேன வுத்தங் ‘‘ப்³யஞ்ஜன…பே॰… த³ஸ்ஸேதீ’’தி. யாயாதி நிருத்தியா.
25.Hārānanti niddhāraṇe sāmivacanaṃ. Hāresu imassa catubyūhahārassa visesato suttassa byañjanavicayabhāvatoti yojanā. Tena vuttaṃ ‘‘byañjana…pe… dassetī’’ti. Yāyāti niruttiyā.
யதா²ரஹந்தி ஸங்வண்ணியமானே ஸுத்தே யங் யங் அரஹதி நிப்³ப³சனங் வத்துங், தங்தங்லோகஸமஞ்ஞானுரோதே⁴னேவ. புப்³ப³பா⁴க³படிபதா³ ஸம்பாதெ³த்வா பச்சா² ஸச்சாபி⁴ஸமயங் பாபுணாதீதி ஆஹ ‘‘ஸம்முதி…பே॰… ஹோதீ’’தி, தங்தங்பஞ்ஞத்திக்³க³ஹணமுகே²ன பரமத்த²க்³க³ஹணங் ஹோதீதி ஏவங் வா இமினா ஸம்ப³ந்தோ⁴.
Yathārahanti saṃvaṇṇiyamāne sutte yaṃ yaṃ arahati nibbacanaṃ vattuṃ, taṃtaṃlokasamaññānurodheneva. Pubbabhāgapaṭipadā sampādetvā pacchā saccābhisamayaṃ pāpuṇātīti āha ‘‘sammuti…pe… hotī’’ti, taṃtaṃpaññattiggahaṇamukhena paramatthaggahaṇaṃ hotīti evaṃ vā iminā sambandho.
யமித³ங் அனிந்த்³ரியப³த்³த⁴ரூபஸந்தானங் ஸந்தா⁴ய ‘‘உப⁴யமந்தரேனா’’தி இத⁴ வுத்தங். ஓதரணஹாரே (நெத்தி॰ அட்ட²॰ 42 ஆத³யோ) பனஸ்ஸ த்³வாரப்பவத்தப²ஸ்ஸாதி³த⁴ம்மே ஸந்தா⁴ய வுத்தபா⁴வங் த³ஸ்ஸேதுங் ‘‘உப⁴யமந்தரேனாதி ப²ஸ்ஸஸமுதி³தேஸு த⁴ம்மேஸூ’’தி அத்தோ² வுத்தோ. அட்ட²கதா²சரியா பனாஹு ‘‘அந்தரேனாதி வசனங் பன விகப்பந்தரதீ³பன’’ந்தி. தஸ்மா அயமெத்த² அத்தோ² – ந இமங் லோகங், ந ஹுரங் லோகங், அத² கோ² உப⁴யமந்தரேனாதி. அபரோ விகப்போ – உப⁴யமந்தரேனாதி வா வசனங் விகப்பந்தராபா⁴வதீ³பனங். தஸ்ஸத்தோ² – ந இமங் லோகங், ந ஹுரங் லோகங் நிஸ்ஸாய ஜா²யதி ஜா²யீ, உப⁴யமந்தரேன பன அஞ்ஞங் டா²னங் அத்தீ²தி.
Yamidaṃ anindriyabaddharūpasantānaṃ sandhāya ‘‘ubhayamantarenā’’ti idha vuttaṃ. Otaraṇahāre (netti. aṭṭha. 42 ādayo) panassa dvārappavattaphassādidhamme sandhāya vuttabhāvaṃ dassetuṃ ‘‘ubhayamantarenāti phassasamuditesu dhammesū’’ti attho vutto. Aṭṭhakathācariyā panāhu ‘‘antarenāti vacanaṃ pana vikappantaradīpana’’nti. Tasmā ayamettha attho – na imaṃ lokaṃ, na huraṃ lokaṃ, atha kho ubhayamantarenāti. Aparo vikappo – ubhayamantarenāti vā vacanaṃ vikappantarābhāvadīpanaṃ. Tassattho – na imaṃ lokaṃ, na huraṃ lokaṃ nissāya jhāyati jhāyī, ubhayamantarena pana aññaṃ ṭhānaṃ atthīti.
யேபி ச ‘‘அந்தராபரினிப்³பா³யீ, ஸம்ப⁴வேஸீ’’தி ச இமேஸங் ஸுத்தபதா³னங் அத்த²ங் மிச்சா² க³ஹெத்வா அத்தி² ஏவ அந்தராப⁴வோதி வத³ந்தி, தேபி யஸ்மா அவிஹாதீ³ஸு தத்த² தத்த² ஆயுவேமஜ்ஜ²ங் அனதிக்கமித்வா அந்தரா அக்³க³மக்³கா³தி⁴க³மேன அனவஸேஸகிலேஸபரினிப்³பா³னேன பரினிப்³பா³யந்தீதி அந்தராபரினிப்³பா³யீ, ந அந்தராப⁴வபூ⁴தோதி புரிமஸ்ஸ ஸுத்தபத³ஸ்ஸ அத்தோ². பச்சி²மஸ்ஸ ச யே பூ⁴தா ஏவ, ந புன ப⁴விஸ்ஸந்தி, தே ஹி (கதா²॰ அனுடீ॰ 507) கீ²ணாஸவா, புரிமபதே³ஹி ‘‘பூ⁴தா’’தி வுத்தா. தப்³பி³பரீததாய ஸம்ப⁴வங் ஏஸந்தீதி ஸம்ப⁴வேஸினோ. அப்பஹீனப⁴வஸங்யோஜனத்தா ஸெக்கா², புது²ஜ்ஜனா ச. சதூஸு வா யோனீஸு அண்ட³ஜஜலாபு³ஜஸத்தா யாவ அண்ட³கோஸங், வத்தி²கோஸஞ்ச ந பி⁴ந்த³ந்தி, தாவ ஸம்ப⁴வேஸீ நாம. அண்ட³கோஸதோ, வத்தி²கோஸதோ ச ப³ஹி நிக்க²ந்தா பூ⁴தா நாம. ஸங்ஸேத³ஜஓபபாதிகா ச பட²மசித்தக்க²ணே ஸம்ப⁴வேஸீ நாம, து³தியசித்தக்க²ணதோ பட்டா²ய பூ⁴தா நாம. யேன வா இரியாபதே²ன ஜாயந்தி, யாவ ததோ அஞ்ஞங் ந பாபுணந்தி, தாவ ஸம்ப⁴வேஸீ, ததோ பரங் பூ⁴தாதி அத்தோ², தஸ்மா நத்தீ²தி படிக்கி²பிதப்³ப³ங். ஸதி ஹி உஜுகே பாளிஅனுக³தே அத்தே² கிங் அனித்³தா⁴ரிதஸாமத்தி²யேன அந்தராப⁴வேன அத்தபா⁴வபரிகப்பிதேன பயோஜனந்தி.
Yepi ca ‘‘antarāparinibbāyī, sambhavesī’’ti ca imesaṃ suttapadānaṃ atthaṃ micchā gahetvā atthi eva antarābhavoti vadanti, tepi yasmā avihādīsu tattha tattha āyuvemajjhaṃ anatikkamitvā antarā aggamaggādhigamena anavasesakilesaparinibbānena parinibbāyantīti antarāparinibbāyī, na antarābhavabhūtoti purimassa suttapadassa attho. Pacchimassa ca ye bhūtā eva, na puna bhavissanti, te hi (kathā. anuṭī. 507) khīṇāsavā, purimapadehi ‘‘bhūtā’’ti vuttā. Tabbiparītatāya sambhavaṃ esantīti sambhavesino. Appahīnabhavasaṃyojanattā sekkhā, puthujjanā ca. Catūsu vā yonīsu aṇḍajajalābujasattā yāva aṇḍakosaṃ, vatthikosañca na bhindanti, tāva sambhavesī nāma. Aṇḍakosato, vatthikosato ca bahi nikkhantā bhūtā nāma. Saṃsedajaopapātikā ca paṭhamacittakkhaṇe sambhavesī nāma, dutiyacittakkhaṇato paṭṭhāya bhūtā nāma. Yena vā iriyāpathena jāyanti, yāva tato aññaṃ na pāpuṇanti, tāva sambhavesī, tato paraṃ bhūtāti attho, tasmā natthīti paṭikkhipitabbaṃ. Sati hi ujuke pāḷianugate atthe kiṃ aniddhāritasāmatthiyena antarābhavena attabhāvaparikappitena payojananti.
யங் பன யே ‘‘ஸந்தானவஸேன பவத்தமானானங் த⁴ம்மானங் அவிச்சே²தே³ன தே³ஸந்தரேஸு பாதுபா⁴வோ தி³ட்டோ². யதா² தங் வீஹிஆதி³அவிஞ்ஞாணகஸந்தானே, ஏவங் ஸவிஞ்ஞாணகஸந்தானேபி அவிச்சே²தே³ன தே³ஸந்தரேஸு பாதுபா⁴வேன ப⁴விதப்³ப³ங். அயஞ்ச நயோ ஸதி அந்தராப⁴வே யுஜ்ஜதி, நாஞ்ஞதா²’’தி யுத்திங் வத³ந்தி. தேஹி இத்³தி⁴மதோ சேதோவஸிப்பத்தஸ்ஸ சித்தானுக³திகங் காயங் அதி⁴ட்ட²ஹந்தஸ்ஸ க²ணேன ப்³ரஹ்மலோகதோ இதூ⁴பஸங்கமனே, இதோ வா ப்³ரஹ்மலோகக³மனே யுத்தி வத்தப்³பா³. யதி³ ஸப்³ப³த்தே²வ விச்சி²ன்னதே³ஸே த⁴ம்மானங் பவத்தி ந இச்சி²தா, யதி³பி ஸியா ‘‘இத்³தி⁴விஸயோ அசிந்தெய்யோ’’தி, தங் இதா⁴பி ஸமானங் ‘‘கம்மவிபாகோ அசிந்தெய்யோ’’தி வசனதோ, தஸ்மா தங் தேஸங் மதிமத்தமேவ. அசிந்தெய்யஸபா⁴வா ஹி ஸபா⁴வத⁴ம்மா, தே கத்த²சி பச்சயவிஸேஸேன விச்சி²ன்னதே³ஸே பாதுப⁴வந்தி, கத்த²சி அவிச்சி²ன்னதே³ஸே ச. ததா² ஹி முக²கோ⁴ஸாதீ³ஹி அஞ்ஞஸ்மிங் தே³ஸே ஆதா³ஸபப்³ப³தப்பதே³ஸாதி³கே படிபி³ம்ப³படிகோ⁴ஸாதி³கங் பச்சயுப்பன்னங் நிப்³ப³த்தமானங் தி³ஸ்ஸதி, தஸ்மா ந ஸப்³ப³ங் ஸப்³ப³த்த² உபனேதப்³ப³ந்தி அயமெத்த² ஸங்கே²போ. வித்தா²ரதோ பன படிபி³ம்ப³ஸ்ஸ உதா³ஹரணபா⁴வஸாத⁴னாதி³கோ அந்தராப⁴வவிசாரோ கதா²வத்து²ப்பகரணஸ்ஸடீகாயங் (கதா²॰ அனுடீ॰ 507) க³ஹேதப்³போ³.
Yaṃ pana ye ‘‘santānavasena pavattamānānaṃ dhammānaṃ avicchedena desantaresu pātubhāvo diṭṭho. Yathā taṃ vīhiādiaviññāṇakasantāne, evaṃ saviññāṇakasantānepi avicchedena desantaresu pātubhāvena bhavitabbaṃ. Ayañca nayo sati antarābhave yujjati, nāññathā’’ti yuttiṃ vadanti. Tehi iddhimato cetovasippattassa cittānugatikaṃ kāyaṃ adhiṭṭhahantassa khaṇena brahmalokato idhūpasaṅkamane, ito vā brahmalokagamane yutti vattabbā. Yadi sabbattheva vicchinnadese dhammānaṃ pavatti na icchitā, yadipi siyā ‘‘iddhivisayo acinteyyo’’ti, taṃ idhāpi samānaṃ ‘‘kammavipāko acinteyyo’’ti vacanato, tasmā taṃ tesaṃ matimattameva. Acinteyyasabhāvā hi sabhāvadhammā, te katthaci paccayavisesena vicchinnadese pātubhavanti, katthaci avicchinnadese ca. Tathā hi mukhaghosādīhi aññasmiṃ dese ādāsapabbatappadesādike paṭibimbapaṭighosādikaṃ paccayuppannaṃ nibbattamānaṃ dissati, tasmā na sabbaṃ sabbattha upanetabbanti ayamettha saṅkhepo. Vitthārato pana paṭibimbassa udāharaṇabhāvasādhanādiko antarābhavavicāro kathāvatthuppakaraṇassaṭīkāyaṃ (kathā. anuṭī. 507) gahetabbo.
அபரே பன ‘‘இதா⁴தி காமப⁴வோ, ஹுரந்தி அரூபப⁴வோ, உப⁴யமந்தரேனாதி ரூபப⁴வோ வுத்தோ’’தி வத³ந்தி, ‘‘இதா⁴தி பச்சயத⁴ம்மா, ஹுரந்தி பச்சயுப்பன்னத⁴ம்மா, உப⁴யமந்தரேனாதி பண்ணத்தித⁴ம்மா வுத்தா’’தி ச வத³ந்தி, தங் ஸப்³ப³அட்ட²கதா²ஸு நத்தி², தஸ்மா வுத்தனயேனேவ அத்தோ² வேதி³தப்³போ³. அவஸிட்ட²ங் ரூபந்தி ஆபோதா⁴துஆகாஸதா⁴தூஹி ஸத்³தி⁴ங் லக்க²ணரூபானி, ஓஜஞ்ச ஸந்தா⁴யாஹ அனிந்த்³ரியப³த்³த⁴ரூபஸ்ஸ அதி⁴ப்பேதத்தா. தஸ்ஸ கீ²ணாஸவஸ்ஸ தங் நிப்³பா³னாரம்மணங் சித்தங் ந ஜானந்தி ந ஞாயந்தி ‘‘ஜா²யமானா’’தி வுத்தத்தா. ஸேஸங் ஸுவிஞ்ஞெய்யமேவ.
Apare pana ‘‘idhāti kāmabhavo, huranti arūpabhavo, ubhayamantarenāti rūpabhavo vutto’’ti vadanti, ‘‘idhāti paccayadhammā, huranti paccayuppannadhammā, ubhayamantarenāti paṇṇattidhammā vuttā’’ti ca vadanti, taṃ sabbaaṭṭhakathāsu natthi, tasmā vuttanayeneva attho veditabbo. Avasiṭṭhaṃ rūpanti āpodhātuākāsadhātūhi saddhiṃ lakkhaṇarūpāni, ojañca sandhāyāha anindriyabaddharūpassa adhippetattā. Tassa khīṇāsavassa taṃ nibbānārammaṇaṃ cittaṃ na jānanti na ñāyanti ‘‘jhāyamānā’’ti vuttattā. Sesaṃ suviññeyyameva.
சதுப்³யூஹஹாரவிப⁴ங்க³வண்ணனா நிட்டி²தா.
Catubyūhahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 6. சதுப்³யூஹஹாரவிப⁴ங்கோ³ • 6. Catubyūhahāravibhaṅgo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 6. சதுப்³யூஹஹாரவிப⁴ங்க³வண்ணனா • 6. Catubyūhahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 6. சதுப்³யூஹஹாரவிப⁴ங்க³விபா⁴வனா • 6. Catubyūhahāravibhaṅgavibhāvanā
