| Library / Tipiṭaka / ತಿಪಿಟಕ • Tipiṭaka / ನೇತ್ತಿಪ್ಪಕರಣ-ಅಟ್ಠಕಥಾ • Nettippakaraṇa-aṭṭhakathā |
೬. ಚತುಬ್ಯೂಹಹಾರವಿಭಙ್ಗವಣ್ಣನಾ
6. Catubyūhahāravibhaṅgavaṇṇanā
೨೫. ತತ್ಥ ಕತಮೋ ಚತುಬ್ಯೂಹೋ ಹಾರೋತಿ ಚತುಬ್ಯೂಹಹಾರವಿಭಙ್ಗೋ। ತತ್ಥ ಬ್ಯಞ್ಜನೇನ ಸುತ್ತಸ್ಸ ನೇರುತ್ತಞ್ಚ ಅಧಿಪ್ಪಾಯೋ ಚ ನಿದಾನಞ್ಚ ಪುಬ್ಬಾಪರಸನ್ಧಿ ಚ ಗವೇಸಿತಬ್ಬೋತಿ ಸಙ್ಖೇಪೇನ ತಾವ ಚತುಬ್ಯೂಹಂ ದಸ್ಸೇತಿ। ‘‘ಬ್ಯಞ್ಜನೇನಾ’’ತಿ ಇಮಿನಾ ಹಾರಾನಂ ಸುತ್ತಸ್ಸ ಬ್ಯಞ್ಜನವಿಚಯಭಾವತೋ ಬ್ಯಞ್ಜನಮುಖೇನೇವ ಏತೇ ಚತುಬ್ಯೂಹಹಾರಪದತ್ಥಾ ನಿದ್ಧಾರೇತಬ್ಬಾತಿ ದಸ್ಸೇತಿ। ನೇರುತ್ತನ್ತಿ ನಿರುತ್ತಂ ನಿಬ್ಬಚನನ್ತಿ ಅತ್ಥೋ। ನಿರುತ್ತಮೇವ ನೇರುತ್ತಂ। ತೇನೇವಾಹ – ‘‘ಯಾ ನಿರುತ್ತಿಪದಸಂಹಿತಾ’’ತಿ। ತಸ್ಸತ್ಥೋ – ಯಾ ನಿರುತ್ತಿ, ಇದಂ ನೇರುತ್ತಂ। ಕಾ ಪನ ಸಾ ನಿರುತ್ತಿ? ಪದಸಂಹಿತಾತಿ ಪದೇಸು ಸಂಹಿತಾ ಯುತ್ತಾ, ಲಿಙ್ಗವಚನಕಾಲಸಾಧನಪುರಿಸಾದಿವಿಸೇಸಯೋಗೇನ ಯೋ ಯೋ ಅತ್ಥೋ ಯಥಾ ಯಥಾ ವತ್ತಬ್ಬೋ, ತಥಾ ತಥಾ ಪವತ್ತಸಭಾವನಿರುತ್ತೀತಿ ಅತ್ಥೋ। ತಥಾ ಹಿ ವುತ್ತಂ ‘‘ಯಂ ಧಮ್ಮಾನಂ ನಾಮಸೋ ಞಾಣ’’ನ್ತಿ।
25.Tattha katamo catubyūho hāroti catubyūhahāravibhaṅgo. Tattha byañjanena suttassa neruttañca adhippāyo ca nidānañca pubbāparasandhi ca gavesitabboti saṅkhepena tāva catubyūhaṃ dasseti. ‘‘Byañjanenā’’ti iminā hārānaṃ suttassa byañjanavicayabhāvato byañjanamukheneva ete catubyūhahārapadatthā niddhāretabbāti dasseti. Neruttanti niruttaṃ nibbacananti attho. Niruttameva neruttaṃ. Tenevāha – ‘‘yā niruttipadasaṃhitā’’ti. Tassattho – yā nirutti, idaṃ neruttaṃ. Kā pana sā nirutti? Padasaṃhitāti padesu saṃhitā yuttā, liṅgavacanakālasādhanapurisādivisesayogena yo yo attho yathā yathā vattabbo, tathā tathā pavattasabhāvaniruttīti attho. Tathā hi vuttaṃ ‘‘yaṃ dhammānaṃ nāmaso ñāṇa’’nti.
ತತ್ಥ ಯನ್ತಿ ಹೇತುಅತ್ಥೇ ನಿಪಾತೋ, ಯಾಯ ಕಾರಣಭೂತಾಯಾತಿ ಅತ್ಥೋ। ಧಮ್ಮಾನನ್ತಿ ಞೇಯ್ಯಧಮ್ಮಾನಂ। ನಾಮಸೋತಿ ಪಥವೀ ಫಸ್ಸೋ ಖನ್ಧಾ ಧಾತು ತಿಸ್ಸೋ ಫುಸ್ಸೋತಿ ಏವಮಾದಿನಾಮವಿಸೇಸೇನ ಞಾಣಂ ಪವತ್ತತಿ, ಅಯಂ ಸಭಾವನಿರುತ್ತಿ ನಾಮ। ಪಥವೀತಿ ಹಿ ಏವಮಾದಿಕಂ ಸದ್ದಂ ಗಹೇತ್ವಾ ತತೋ ಪರಂ ಸಙ್ಕೇತದ್ವಾರೇನ ತದತ್ಥಪಟಿಪತ್ತಿ ತಂತಂಅನಿಯತನಾಮಪಞ್ಞತ್ತಿಗ್ಗಹಣವಸೇನೇವ ಹೋತೀತಿ। ಅಥ ವಾ ಪದಸಂಹಿತಾತಿ ಪದೇನ ಸಂಹಿತಾ । ಪದತೋ ಹಿ ಪದತ್ಥಾವಬೋಧೋ। ಸೋ ಪನಸ್ಸ ಅತ್ಥೇ ಪವತ್ತಿನಿಮಿತ್ತಭೂತಾಯ ಪಞ್ಞತ್ತಿಯಾ ಗಹಿತಾಯ ಏವ ಹೋತೀತಿ ಸಾ ಪನ ಪಞ್ಞತ್ತಿ ನಿರುತ್ತಿಸಙ್ಖಾತಪದೇನ ಸಂಹಿತಾ ಪದತ್ಥಂ ಬೋಧೇತೀತಿ ಪದಸಂಹಿತಾತಿ ವುತ್ತಾ। ‘‘ಯದಾ ಹಿ ಭಿಕ್ಖೂ’’ತಿಆದಿನಾ ‘‘ಧಮ್ಮಾನಂ ನಾಮಸೋ ಞಾಣ’’ನ್ತಿ ಪದಸ್ಸ ಅತ್ಥಂ ವಿವರತಿ।
Tattha yanti hetuatthe nipāto, yāya kāraṇabhūtāyāti attho. Dhammānanti ñeyyadhammānaṃ. Nāmasoti pathavī phasso khandhā dhātu tisso phussoti evamādināmavisesena ñāṇaṃ pavattati, ayaṃ sabhāvanirutti nāma. Pathavīti hi evamādikaṃ saddaṃ gahetvā tato paraṃ saṅketadvārena tadatthapaṭipatti taṃtaṃaniyatanāmapaññattiggahaṇavaseneva hotīti. Atha vā padasaṃhitāti padena saṃhitā . Padato hi padatthāvabodho. So panassa atthe pavattinimittabhūtāya paññattiyā gahitāya eva hotīti sā pana paññatti niruttisaṅkhātapadena saṃhitā padatthaṃ bodhetīti padasaṃhitāti vuttā. ‘‘Yadā hi bhikkhū’’tiādinā ‘‘dhammānaṃ nāmaso ñāṇa’’nti padassa atthaṃ vivarati.
ತತ್ಥ ಅತ್ಥಸ್ಸಾತಿ ಸದ್ದಾಭಿಧೇಯ್ಯಸ್ಸ ಅತ್ಥಸ್ಸ। ನಾಮಂ ಜಾನಾತೀತಿ ನಾಮಪಞ್ಞತ್ತಿವಸೇನ ಅಯಂ ನಾಮಾತಿ ನಾಮಂ ಜಾನಾತಿ। ಧಮ್ಮಸ್ಸಾತಿ ಸಭಾವಧಮ್ಮಸ್ಸ। ತಥಾ ತಥಾ ನಂ ಅಭಿನಿರೋಪೇತೀತಿ ಯೋ ಯೋ ಅತ್ಥೋ ಧಮ್ಮೋ ಚ ಯಥಾ ಯಥಾ ಚ ವೋಹರಿತಬ್ಬೋ, ತಥಾ ತಥಾ ನಂ ನಾಮಂ ವೋಹಾರಂ ಅಭಿನಿರೋಪೇತಿ ದೇಸೇತೀತಿ ಅತ್ಥೋ। ಏತ್ತಾವತಾ ಚ ಅಯಂ ಭಿಕ್ಖು ಅತ್ಥಕುಸಲೋ ಯಾವ ಅನೇಕಾಧಿವಚನಕುಸಲೋತಿ ವುಚ್ಚತೀತಿ ಸಮ್ಬನ್ಧಿತಬ್ಬಂ।
Tattha atthassāti saddābhidheyyassa atthassa. Nāmaṃ jānātīti nāmapaññattivasena ayaṃ nāmāti nāmaṃ jānāti. Dhammassāti sabhāvadhammassa. Tathātathā naṃ abhiniropetīti yo yo attho dhammo ca yathā yathā ca voharitabbo, tathā tathā naṃ nāmaṃ vohāraṃ abhiniropeti desetīti attho. Ettāvatā ca ayaṃ bhikkhu atthakusalo yāva anekādhivacanakusaloti vuccatīti sambandhitabbaṃ.
ತತ್ಥ ಅತ್ಥಕುಸಲೋತಿ ಪಾಳಿಅತ್ಥೇ ಕುಸಲೋ। ಧಮ್ಮಕುಸಲೋತಿ ಪಾಳಿಯಂ ಕುಸಲೋ। ಬ್ಯಞ್ಜನಕುಸಲೋತಿ ಅಕ್ಖರೇಸು ಚ ವಾಕ್ಯೇಸು ಚ ಕುಸಲೋ। ನಿರುತ್ತಿಕುಸಲೋತಿ ನಿಬ್ಬಚನೇ ಕುಸಲೋ। ಪುಬ್ಬಾಪರಕುಸಲೋತಿ ದೇಸನಾಯ ಪುಬ್ಬಾಪರಕುಸಲೋ। ದೇಸನಾಕುಸಲೋತಿ ಧಮ್ಮಸ್ಸ ದೇಸನಾಯ ಕುಸಲೋ। ಅತೀತಾಧಿವಚನಕುಸಲೋತಿ ಅತೀತಪಞ್ಞತ್ತಿಕುಸಲೋ। ಏಸ ನಯೋ ಸೇಸೇಸುಪಿ। ಏವಂ ಸಬ್ಬಾನಿ ಕಾತಬ್ಬಾನಿ, ಜನಪದನಿರುತ್ತಾನೀತಿ ಯತ್ತಕಾನಿ ಸತ್ತವೋಹಾರಪದಾನಿ, ತಾನಿ ಸಬ್ಬಾನಿ ಯಥಾಸಮ್ಭವಂ ಸುತ್ತೇ ನಿಬ್ಬಚನವಸೇನ ಕಾತಬ್ಬಾನಿ ವತ್ತಬ್ಬಾನೀತಿ ಅತ್ಥೋ। ಸಬ್ಬಾ ಚ ಜನಪದನಿರುತ್ತಿಯೋತಿ ಸಬ್ಬಾ ಚ ಲೋಕಸಮಞ್ಞಾಯೋ ಯಥಾರಹಂ ಕಾತಬ್ಬಾ। ‘‘ಸಮಞ್ಞಂ ನಾತಿಧಾವೇಯ್ಯಾ’’ತಿ ಹಿ ವುತ್ತಂ। ತಥಾ ಹಿ ಸಮ್ಮುತಿಸಚ್ಚಮುಖೇನೇವ ಪರಮತ್ಥಸಚ್ಚಾಧಿಗಮೋ ಹೋತೀತಿ।
Tattha atthakusaloti pāḷiatthe kusalo. Dhammakusaloti pāḷiyaṃ kusalo. Byañjanakusaloti akkharesu ca vākyesu ca kusalo. Niruttikusaloti nibbacane kusalo. Pubbāparakusaloti desanāya pubbāparakusalo. Desanākusaloti dhammassa desanāya kusalo. Atītādhivacanakusaloti atītapaññattikusalo. Esa nayo sesesupi. Evaṃ sabbāni kātabbāni, janapadaniruttānīti yattakāni sattavohārapadāni, tāni sabbāni yathāsambhavaṃ sutte nibbacanavasena kātabbāni vattabbānīti attho. Sabbā ca janapadaniruttiyoti sabbā ca lokasamaññāyo yathārahaṃ kātabbā. ‘‘Samaññaṃ nātidhāveyyā’’ti hi vuttaṃ. Tathā hi sammutisaccamukheneva paramatthasaccādhigamo hotīti.
೨೬.
26.
ಅಧಿಪ್ಪಾಯಕಣ್ಡೇ ಅನುತ್ತಾನಂ ನಾಮ ನತ್ಥಿ।
Adhippāyakaṇḍe anuttānaṃ nāma natthi.
೨೭. ನಿದಾನಕಣ್ಡೇ ಇಮಿನಾ ವತ್ಥುನಾತಿ ಇಮಿನಾ ಪುತ್ತಗವಾದಿಕಿತ್ತನಸಙ್ಖಾತೇನ ಕಾರಣೇನ। ಕಾರಣಞ್ಹೇತ್ಥ ವತ್ಥು ನಿದಾನನ್ತಿ ಚ ವುತ್ತಂ। ಇಮಿನಾ ನಯೇನ ಸಬ್ಬತ್ಥ ನಿದಾನನಿದ್ಧಾರಣಂ ವೇದಿತಬ್ಬಂ।
27. Nidānakaṇḍe iminā vatthunāti iminā puttagavādikittanasaṅkhātena kāraṇena. Kāraṇañhettha vatthu nidānanti ca vuttaṃ. Iminā nayena sabbattha nidānaniddhāraṇaṃ veditabbaṃ.
ಕಾಮನ್ಧಾತಿ ಕಿಲೇಸಕಾಮೇನ ಅನ್ಧಾ। ಜಾಲಸಞ್ಛನ್ನಾತಿ ತಣ್ಹಾಜಾಲಪಲಿಗುಣ್ಠಿತಾ। ತಣ್ಹಾಛದನಛಾದಿತಾತಿ ತಣ್ಹಾಸಙ್ಖಾತೇನ ಅನ್ಧಕಾರೇನ ಪಿಹಿತಾ। ಬನ್ಧನಾಬದ್ಧಾತಿ ಕಾಮಗುಣಸಙ್ಖಾತೇನ ಬನ್ಧನೇನ ಬದ್ಧಾ। ‘‘ಪಮತ್ತಬನ್ಧನಾ’’ತಿಪಿ ಪಾಠೋ, ಪಮಾದೇನಾತಿ ಅತ್ಥೋ। ಪುಬ್ಬಾಪರೇನಾತಿ ಪುಬ್ಬೇನ ವಾ ಅಪರೇನ ವಾ ದೇಸನನ್ತರೇನಾತಿ ಅಧಿಪ್ಪಾಯೋ। ಯುಜ್ಜತೀತಿ ಯೋಗಂ ಉಪೇತಿ, ಸಮೇತೀತಿ ಅತ್ಥೋ। ಇಮೇಹಿ ಪದೇಹಿ ಪರಿಯುಟ್ಠಾನೇಹೀತಿ ಇಮೇಹಿ ಯಥಾವುತ್ತೇಹಿ ಗಾಥಾಪದೇಹಿ ತಣ್ಹಾಪರಿಯುಟ್ಠಾನದೀಪಕೇಹಿ। ಸಾಯೇವ ತಣ್ಹಾತಿ ಯಾ ಪುರಿಮಗಾಥಾಯ ವುತ್ತಾ, ಸಾಯೇವ ತಣ್ಹಾ। ‘‘ಯಞ್ಚಾಹಾ’’ತಿಆದಿನಾ ದ್ವಿನ್ನಮ್ಪಿ ಗಾಥಾನಂ ಅತ್ಥಸಂಸನ್ದನೇನ ಪುಬ್ಬಾಪರಂ ವಿಭಾವೇತಿ। ಪಯೋಗೇನಾತಿ ಸಮುದಾಚಾರೇನ। ತಸ್ಮಾತಿ ಯತ್ಥ ಸಯಂ ಉಪ್ಪನ್ನಾ, ತಂ ಸನ್ತಾನಂ ನಿಸ್ಸರಿತುಂ ಅದೇನ್ತೀ ನಾನಾರಮ್ಮಣೇಹಿ ಪಲೋಭಯಮಾನಾ ಕಿಲೇಸೇಹಿ ಚಿತ್ತಂ ಪರಿಯಾದಾಯ ತಿಟ್ಠತಿ। ತಸ್ಮಾ ಕಿಲೇಸವಸೇನ ಚ ಪರಿಯುಟ್ಠಾನವಸೇನ ಚ ತಣ್ಹಾಬನ್ಧನಂ ವುತ್ತಾ।
Kāmandhāti kilesakāmena andhā. Jālasañchannāti taṇhājālapaliguṇṭhitā. Taṇhāchadanachāditāti taṇhāsaṅkhātena andhakārena pihitā. Bandhanābaddhāti kāmaguṇasaṅkhātena bandhanena baddhā. ‘‘Pamattabandhanā’’tipi pāṭho, pamādenāti attho. Pubbāparenāti pubbena vā aparena vā desanantarenāti adhippāyo. Yujjatīti yogaṃ upeti, sametīti attho. Imehi padehipariyuṭṭhānehīti imehi yathāvuttehi gāthāpadehi taṇhāpariyuṭṭhānadīpakehi. Sāyeva taṇhāti yā purimagāthāya vuttā, sāyeva taṇhā. ‘‘Yañcāhā’’tiādinā dvinnampi gāthānaṃ atthasaṃsandanena pubbāparaṃ vibhāveti. Payogenāti samudācārena. Tasmāti yattha sayaṃ uppannā, taṃ santānaṃ nissarituṃ adentī nānārammaṇehi palobhayamānā kilesehi cittaṃ pariyādāya tiṭṭhati. Tasmā kilesavasena ca pariyuṭṭhānavasena ca taṇhābandhanaṃ vuttā.
ಪಪಞ್ಚೇನ್ತಿ ಸಂಸಾರೇ ಚಿರಂ ಠಪೇನ್ತೀತಿ ಪಪಞ್ಚಾ। ತಿಟ್ಠನ್ತಿ ಏತಾಹೀತಿ ಠಿತೀ। ಬನ್ಧನಟ್ಠೇನ ಸನ್ದಾನಂ ವಿಯಾತಿ ಸನ್ದಾನಂ। ನಿಬ್ಬಾನನಗರಪ್ಪವೇಸಸ್ಸ ಪಟಿಸೇಧನತೋ ಪಲಿಘಂ ವಿಯಾತಿ ಪಲಿಘಂ। ಅನವಸೇಸತಣ್ಹಾಪಹಾನೇನ ನಿತ್ತಣ್ಹೋ। ಅತ್ತಹಿತಪರಹಿತಾನಂ ಇಧಲೋಕಪರಲೋಕಾನಞ್ಚ ಮುನನತೋ ಮುನೀತಿ ಏವಂ ಗಾಥಾಯ ಪದತ್ಥೋ ವೇದಿತಬ್ಬೋ। ಪಪಞ್ಚಾದಿಅತ್ಥಾ ಪನ ಪಾಳಿಯಂ ವಿಭತ್ತಾ ಏವಾತಿ। ತತ್ಥ ಯಸ್ಸೇತೇ ಪಪಞ್ಚಾದಯೋ ಅಬ್ಭತ್ಥಂ ಗತಾ, ತಸ್ಸ ತಣ್ಹಾಯ ಲೇಸೋಪಿ ನ ಭವತಿ। ತೇನ ವುತ್ತಂ – ‘‘ಯೋ ಏತಂ ಸಬ್ಬಂ ಸಮತಿಕ್ಕನ್ತೋ, ಅಯಂ ವುಚ್ಚತಿ ನಿತ್ತಣ್ಹೋ’’ತಿ।
Papañcenti saṃsāre ciraṃ ṭhapentīti papañcā. Tiṭṭhanti etāhīti ṭhitī. Bandhanaṭṭhena sandānaṃ viyāti sandānaṃ. Nibbānanagarappavesassa paṭisedhanato palighaṃ viyāti palighaṃ. Anavasesataṇhāpahānena nittaṇho. Attahitaparahitānaṃ idhalokaparalokānañca munanato munīti evaṃ gāthāya padattho veditabbo. Papañcādiatthā pana pāḷiyaṃ vibhattā evāti. Tattha yassete papañcādayo abbhatthaṃ gatā, tassa taṇhāya lesopi na bhavati. Tena vuttaṃ – ‘‘yo etaṃ sabbaṃ samatikkanto, ayaṃ vuccati nittaṇho’’ti.
೨೮. ಪರಿಯುಟ್ಠಾನನ್ತಿ ‘‘ತಣ್ಹಾಯ ಪರಿಯುಟ್ಠಾನ’’ನ್ತಿ ವುತ್ತಾನಿ ತಣ್ಹಾವಿಚರಿತಾನಿ। ಸಙ್ಖಾರಾತಿ ‘‘ತದಭಿಸಙ್ಖತಾ ಸಙ್ಖಾರಾ’’ತಿ ವುತ್ತಾ ತಣ್ಹಾದಿಟ್ಠಿಮಾನಹೇತುಕಾ ಸಙ್ಖಾರಾ। ತೇ ಪನ ಯಸ್ಮಾ ಸತ್ತಸು ಜವನಚೇತನಾಸು ಪಠಮಚೇತನಾ ಸತಿ ಪಚ್ಚಯಸಮವಾಯೇ ಇಮಸ್ಮಿಂಯೇವ ಅತ್ತಭಾವೇ ಫಲಂ ದೇತಿ। ಪಚ್ಛಿಮಚೇತನಾ ಅನನ್ತರೇ ಅತ್ತಭಾವೇ। ಉಭಿನ್ನಂ ವೇಮಜ್ಝಚೇತನಾ ಯತ್ಥ ಕತ್ಥಚಿ ಫಲಂ ದೇತಿ, ತಸ್ಮಾ ವಿಪಚ್ಚನೋಕಾಸವಸೇನ ವಿಭಜಿತ್ವಾ ದಸ್ಸೇತುಂ ‘‘ದಿಟ್ಠಧಮ್ಮವೇದನೀಯಾ ವಾ’’ತಿಆದಿ ವುತ್ತಂ। ಯಸ್ಮಾ ಪನ ತಂತಂಚೇತನಾಸಮ್ಪಯುತ್ತಾ ತಣ್ಹಾಪಿ ಚೇತನಾ ವಿಯ ದಿಟ್ಠಧಮ್ಮವೇದನೀಯಾದಿವಸೇನ ತಿಧಾ ಹೋತಿ, ತಸ್ಮಾ ವುತ್ತಂ – ‘‘ಏವಂ ತಣ್ಹಾ ತಿವಿಧಂ ಫಲಂ ದೇತೀ’’ತಿ। ಪುಬ್ಬಾಪರೇನ ಯುಜ್ಜತೀತಿ ಯಂ ಪುಬ್ಬಂ ಪುರಿಮಂ ಸಙ್ಖಾರಾನಂ ದಿಟ್ಠಧಮ್ಮವೇದನೀಯತಾದಿವಚನಂ ವುತ್ತಂ, ತಂ ಇಮಿನಾ ಅಪರೇನ ಕಮ್ಮಸ್ಸ ದಿಟ್ಠಧಮ್ಮವೇದನೀಯತಾದಿವಚನೇನ ಯುಜ್ಜತಿ ಗಙ್ಗೋದಕಂ ವಿಯ ಯಮುನೋದಕೇನ ಸಂಸನ್ದತಿ ಸಮೇತೀತಿ ಅತ್ಥೋ।
28.Pariyuṭṭhānanti ‘‘taṇhāya pariyuṭṭhāna’’nti vuttāni taṇhāvicaritāni. Saṅkhārāti ‘‘tadabhisaṅkhatā saṅkhārā’’ti vuttā taṇhādiṭṭhimānahetukā saṅkhārā. Te pana yasmā sattasu javanacetanāsu paṭhamacetanā sati paccayasamavāye imasmiṃyeva attabhāve phalaṃ deti. Pacchimacetanā anantare attabhāve. Ubhinnaṃ vemajjhacetanā yattha katthaci phalaṃ deti, tasmā vipaccanokāsavasena vibhajitvā dassetuṃ ‘‘diṭṭhadhammavedanīyā vā’’tiādi vuttaṃ. Yasmā pana taṃtaṃcetanāsampayuttā taṇhāpi cetanā viya diṭṭhadhammavedanīyādivasena tidhā hoti, tasmā vuttaṃ – ‘‘evaṃ taṇhā tividhaṃ phalaṃ detī’’ti. Pubbāparena yujjatīti yaṃ pubbaṃ purimaṃ saṅkhārānaṃ diṭṭhadhammavedanīyatādivacanaṃ vuttaṃ, taṃ iminā aparena kammassa diṭṭhadhammavedanīyatādivacanena yujjati gaṅgodakaṃ viya yamunodakena saṃsandati sametīti attho.
ಸಙ್ಖಾರಾ ದಸ್ಸನಬಲೇನಾತಿ ಚತೂಸು ದಿಟ್ಠಿಗತಸಮ್ಪಯುತ್ತೇಸು ವಿಚಿಕಿಚ್ಛಾಸಮ್ಪಯುತ್ತೇ ಚಾತಿ ಪಞ್ಚಸು ಚಿತ್ತುಪ್ಪಾದೇಸು ಸಙ್ಖಾರಾ ಪಠಮಮಗ್ಗಪಞ್ಞಾಬಲೇನ। ಛತ್ತಿಂಸ ತಣ್ಹಾವಿಚರಿತಾನಿ ಭಾವನಾಬಲೇನಾತಿ ಪಠಮಮಗ್ಗೇನ ಪಹೀನಾವಸೇಸವಸೇನ ವುತ್ತಂ, ನ ಸಬ್ಬೇಸಂ ವಸೇನ।
Saṅkhārā dassanabalenāti catūsu diṭṭhigatasampayuttesu vicikicchāsampayutte cāti pañcasu cittuppādesu saṅkhārā paṭhamamaggapaññābalena. Chattiṃsa taṇhāvicaritāni bhāvanābalenāti paṭhamamaggena pahīnāvasesavasena vuttaṃ, na sabbesaṃ vasena.
ಅನುಬನ್ಧೋತಿ ತಣ್ಹಾದೀನಂ ಅನುಪ್ಪಬನ್ಧೇನ ಪವತ್ತಿ। ಯೋ ಚಾಪಿ ಪಪಞ್ಚೋತಿಆದಿನಾ ‘‘ಪಪಞ್ಚೇತೀ’’ತಿಆದಿನಾ ವುತ್ತಂ ರಾಧಸುತ್ತಞ್ಚಸಂಸನ್ದತಿ। ತೇನೇವಾಹ – ‘‘ಇದಂ ಏಕತ್ಥ’’ನ್ತಿ। ಯದಿಪಿ ಅತ್ಥತೋ ಏಕಂ, ದೇಸನಾಯ ಪನ ವಿಸೇಸೋ ವಿಜ್ಜತೀತಿ ದಸ್ಸೇತುಂ ‘‘ಅಪಿ ಚಾ’’ತಿಆದಿ ವುತ್ತಂ। ಏವನ್ತಿ ಇಮಿನಾ ವುತ್ತಪ್ಪಕಾರೇನ। ಸುತ್ತೇನಾತಿ ಸಂವಣ್ಣಿಯಮಾನೇನ ಸುತ್ತೇನ। ಸುತ್ತನ್ತಿ ಸುತ್ತನ್ತರಂ। ಸಂಸನ್ದಯಿತ್ವಾತಿ ವಿಮಿಸ್ಸಿತ್ವಾ ಅತ್ಥತೋ ಅಭಿನ್ನಂ ಕತ್ವಾ। ಪುಬ್ಬಾಪರೇನ ಸದ್ಧಿಂ ಯೋಜಯಿತ್ವಾತಿ ಪುಬ್ಬೇನ ವಾ ಅಪರೇನ ವಾ ಸುತ್ತೇನ ಸದ್ಧಿಂ ಅತ್ಥತೋ ಸಮ್ಬನ್ಧಂ ಯೋಜೇತ್ವಾ। ವುತ್ತಮೇವತ್ಥಂ ಪಾಕಟಂ ಕರೋತಿ ತೇನ ಸುತ್ತಸ್ಸ ಅತ್ಥೋ ನಿದ್ದಿಟ್ಠೋ ಹೋತಿ ವಿತ್ಥಾರಿತೋ ಸುತ್ತನ್ತರದಸ್ಸನೇನ।
Anubandhoti taṇhādīnaṃ anuppabandhena pavatti. Yo cāpi papañcotiādinā ‘‘papañcetī’’tiādinā vuttaṃ rādhasuttañcasaṃsandati. Tenevāha – ‘‘idaṃ ekattha’’nti. Yadipi atthato ekaṃ, desanāya pana viseso vijjatīti dassetuṃ ‘‘api cā’’tiādi vuttaṃ. Evanti iminā vuttappakārena. Suttenāti saṃvaṇṇiyamānena suttena. Suttanti suttantaraṃ. Saṃsandayitvāti vimissitvā atthato abhinnaṃ katvā. Pubbāparena saddhiṃ yojayitvāti pubbena vā aparena vā suttena saddhiṃ atthato sambandhaṃ yojetvā. Vuttamevatthaṃ pākaṭaṃ karoti tena suttassa attho niddiṭṭho hoti vitthārito suttantaradassanena.
ನ ಕೇವಲಂ ಸುತ್ತನ್ತರಸಂಸನ್ದನಮೇವ ಪುಬ್ಬಾಪರಸನ್ಧಿ, ಅಥ ಖೋ ಅಞ್ಞೋಪಿ ಅತ್ಥೀತಿ ದಸ್ಸೇತುಂ ‘‘ಸೋ ಚಾಯ’’ನ್ತಿಆದಿ ವುತ್ತಂ। ತತ್ಥ ಅತ್ಥಸನ್ಧೀತಿ ಕಿರಿಯಾಕಾರಕಾದಿವಸೇನ ಅತ್ಥಸ್ಸ ಸಮ್ಬನ್ಧೋ। ಸೋ ಪನ ಯಸ್ಮಾ ಸಙ್ಕಾಸನಾದೀನಂ ಛನ್ನಂ ಅತ್ಥಪದಾನಂಯೇವ ಹೋತಿ, ಸಬ್ಬಸ್ಸಾಪಿ ಪದತ್ಥಸ್ಸ ತದವರೋಧತೋ।
Na kevalaṃ suttantarasaṃsandanameva pubbāparasandhi, atha kho aññopi atthīti dassetuṃ ‘‘so cāya’’ntiādi vuttaṃ. Tattha atthasandhīti kiriyākārakādivasena atthassa sambandho. So pana yasmā saṅkāsanādīnaṃ channaṃ atthapadānaṃyeva hoti, sabbassāpi padatthassa tadavarodhato.
ಸಮ್ಬನ್ಧೋ ಚ ನಾಮ ನ ಕೋಚಿ ಅತ್ಥೋ। ತಸ್ಮಾ ‘‘ಅತ್ಥಸನ್ಧಿ ಛಪ್ಪದಾನೀ’’ತಿಆದಿ ವುತ್ತಂ। ಬ್ಯಞ್ಜನಸನ್ಧೀತಿ ಪದಸ್ಸ ಪದನ್ತರೇನ ಸಮ್ಬನ್ಧೋ। ಯಸ್ಮಾ ಪನ ಸಬ್ಬಮ್ಪಿ ನಾಮಾದಿಪದಂ ಛಹಿ ಬ್ಯಞ್ಜನಪದೇಹಿ ಅಸಙ್ಗಹಿತಂ ನಾಮ ನತ್ಥಿ, ತಸ್ಮಾ ‘‘ಬ್ಯಞ್ಜನಸನ್ಧಿ ಛಪ್ಪದಾನೀ’’ತಿಆದಿ ವುತ್ತಂ।
Sambandho ca nāma na koci attho. Tasmā ‘‘atthasandhi chappadānī’’tiādi vuttaṃ. Byañjanasandhīti padassa padantarena sambandho. Yasmā pana sabbampi nāmādipadaṃ chahi byañjanapadehi asaṅgahitaṃ nāma natthi, tasmā ‘‘byañjanasandhi chappadānī’’tiādi vuttaṃ.
ದೇಸನಾಸನ್ಧೀತಿ ಯಥಾವುತ್ತದೇಸನನ್ತರೇನ ದೇಸನಾಯ ಸಂಸನ್ದನಂ। ನ ಚ ಪಥವಿಂ ನಿಸ್ಸಾಯಾತಿ ಪಥವಿಂ ವಿಸಯಸಙ್ಖಾತಂ ನಿಸ್ಸಯಂ ಕತ್ವಾ, ಪಥವಿಂ ಆಲಮ್ಬಿತ್ವಾತಿ ಅತ್ಥೋ। ಝಾಯೀತಿ ಫಲಸಮಾಪತ್ತಿಝಾನೇನ ಝಾಯೀ। ಸೋ ಹಿ ಸಬ್ಬಸಙ್ಖಾರನಿಸ್ಸಟಂ ನಿಬ್ಬಾನಂ ಆಲಮ್ಬಿತ್ವಾ ಸಮಾಪಜ್ಜನವಸೇನ ಝಾಯತಿ, ನ ಪಥವಿಂ ನಿಸ್ಸಾಯ ಝಾಯತೀತಿ ವುತ್ತೋ। ಸೇಸಪದೇಸುಪಿ ಏಸೇವ ನಯೋ। ಏತ್ಥ ಚ ಚತೂಹಿ ಮಹಾಭೂತೇಹಿ ರೂಪಪ್ಪಟಿಬದ್ಧವುತ್ತಿತಾಯ ಸಬ್ಬೋ ಕಾಮಭವೋ ರೂಪಭವೋ ಚ ಗಹಿತಾ। ಅರೂಪಭವೋ ಪನ ಸರೂಪೇನೇವ ಗಹಿತೋತಿ ಸಬ್ಬಂ ಲೋಕಂ ಪರಿಯಾದಿಯಿತ್ವಾ ಪುನ ಅಞ್ಞೇನಪಿ ಪರಿಯಾಯೇನ ತಂ ದಸ್ಸೇತುಂ ‘‘ನ ಚ ಇಮಂ ಲೋಕ’’ನ್ತಿಆದಿಮಾಹ। ಸಬ್ಬೋ ಹಿ ಲೋಕೋ ಇಧಲೋಕೋ ಪರಲೋಕೋ ಚಾತಿ ದ್ವೇವ ಕೋಟ್ಠಾಸಾ ಹೋನ್ತಿ। ಯಸ್ಮಾ ಪನ ‘‘ಇಧಲೋಕೋ’’ತಿ ವಿಸೇಸತೋ ದಿಟ್ಠಧಮ್ಮಭೂತೋ ಸತ್ತಸನ್ತಾನೋ ವುಚ್ಚತಿ। ‘‘ಪರಲೋಕೋ’’ತಿ ಭವನ್ತರಸಙ್ಖೇಪಗತೋ ಸತ್ತಸನ್ತಾನೋ ತದುಭಯವಿನಿಮುತ್ತೋ ಅನಿನ್ದ್ರಿಯಬದ್ಧೋ ರೂಪಸನ್ತಾನೋ। ತಸ್ಮಾ ತಂ ಸನ್ಧಾಯ ‘‘ಯಮಿದಂ ಉಭಯಮನ್ತರೇನಾ’’ತಿಆದಿ ವುತ್ತಂ।
Desanāsandhīti yathāvuttadesanantarena desanāya saṃsandanaṃ. Na ca pathaviṃ nissāyāti pathaviṃ visayasaṅkhātaṃ nissayaṃ katvā, pathaviṃ ālambitvāti attho. Jhāyīti phalasamāpattijhānena jhāyī. So hi sabbasaṅkhāranissaṭaṃ nibbānaṃ ālambitvā samāpajjanavasena jhāyati, na pathaviṃ nissāya jhāyatīti vutto. Sesapadesupi eseva nayo. Ettha ca catūhi mahābhūtehi rūpappaṭibaddhavuttitāya sabbo kāmabhavo rūpabhavo ca gahitā. Arūpabhavo pana sarūpeneva gahitoti sabbaṃ lokaṃ pariyādiyitvā puna aññenapi pariyāyena taṃ dassetuṃ ‘‘na ca imaṃ loka’’ntiādimāha. Sabbo hi loko idhaloko paraloko cāti dveva koṭṭhāsā honti. Yasmā pana ‘‘idhaloko’’ti visesato diṭṭhadhammabhūto sattasantāno vuccati. ‘‘Paraloko’’ti bhavantarasaṅkhepagato sattasantāno tadubhayavinimutto anindriyabaddho rūpasantāno. Tasmā taṃ sandhāya ‘‘yamidaṃ ubhayamantarenā’’tiādi vuttaṃ.
ಯೇ ಪನ ‘‘ಉಭಯಮನ್ತರೇನಾ’’ತಿ ವಚನಂ ಗಹೇತ್ವಾ ಅನ್ತರಾಭವಂ ಇಚ್ಛನ್ತಿ, ತೇಸಂ ತಂ ಮಿಚ್ಛಾ। ಅನ್ತರಾಭವೋ ಹಿ ಅಭಿಧಮ್ಮೇ ಪಟಿಕ್ಖಿತ್ತೋತಿ। ದಿಟ್ಠನ್ತಿ ರೂಪಾಯತನಂ । ಸುತನ್ತಿ ಸದ್ದಾಯತನಂ। ಮುತನ್ತಿ ಪತ್ವಾ ಗಹೇತಬ್ಬತೋ ಗನ್ಧಾಯತನಂ ರಸಾಯತನಂ ಫೋಟ್ಠಬ್ಬಾಯತನಞ್ಚ। ವಿಞ್ಞಾತನ್ತಿ ಅವಸಿಟ್ಠಂ ಧಮ್ಮಾರಮ್ಮಣಪರಿಯಾಪನ್ನರೂಪಂ। ಪತ್ತನ್ತಿ ಪರಿಯೇಸಿತ್ವಾ ವಾ ಅಪರಿಯೇಸಿತ್ವಾ ವಾ ಪತ್ತಂ। ಪರಿಯೇಸಿತನ್ತಿ ಪತ್ತಂ ವಾ ಅಪ್ಪತ್ತಂ ವಾ ಪರಿಯೇಸಿತಂ। ವಿತಕ್ಕಿತಂ ವಿಚಾರಿತನ್ತಿ ವಿತಕ್ಕನವಸೇನ ಅನುಮಜ್ಜನವಸೇನ ಚ ಆಲಮ್ಬಿತಂ। ಮನಸಾನುಚಿನ್ತಿತನ್ತಿ ಚಿತ್ತೇನ ಅನು ಅನು ಚಿನ್ತಿತಂ। ಅಯಂ ಸದೇವಕೇ…ಪೇ॰… ಅನಿಸ್ಸಿತೇನ ಚಿತ್ತೇನ ನ ಞಾಯತಿ ಝಾಯನ್ತೋತಿ ಅಯಂ ಖೀಣಾಸವೋ ಫಲಸಮಾಪತ್ತಿಝಾನೇನ ಝಾಯನ್ತೋ ಪುಬ್ಬೇವ ತಣ್ಹಾದಿಟ್ಠಿನಿಸ್ಸಯಾನಂ ಸುಟ್ಠು ಪಹೀನತ್ತಾ ಸದೇವಕೇ ಲೋಕೇ…ಪೇ॰… ಮನುಸ್ಸಾಯ ಯತ್ಥ ಕತ್ಥಚಿಪಿ ಅನಿಸ್ಸಿತೇನ ಚಿತ್ತೇನ ಝಾಯತಿ ನಾಮ। ತತೋ ಏವ ಲೋಕೇ ಕೇನಚಿಪಿ ನ ಞಾಯತಿ ‘‘ಅಯಂ ಇದಂ ನಾಮ ನಿಸ್ಸಾಯ ಝಾಯತೀ’’ತಿ। ವುತ್ತಞ್ಹೇತಂ –
Ye pana ‘‘ubhayamantarenā’’ti vacanaṃ gahetvā antarābhavaṃ icchanti, tesaṃ taṃ micchā. Antarābhavo hi abhidhamme paṭikkhittoti. Diṭṭhanti rūpāyatanaṃ . Sutanti saddāyatanaṃ. Mutanti patvā gahetabbato gandhāyatanaṃ rasāyatanaṃ phoṭṭhabbāyatanañca. Viññātanti avasiṭṭhaṃ dhammārammaṇapariyāpannarūpaṃ. Pattanti pariyesitvā vā apariyesitvā vā pattaṃ. Pariyesitanti pattaṃ vā appattaṃ vā pariyesitaṃ. Vitakkitaṃ vicāritanti vitakkanavasena anumajjanavasena ca ālambitaṃ. Manasānucintitanti cittena anu anu cintitaṃ. Ayaṃ sadevake…pe… anissitena cittena na ñāyati jhāyantoti ayaṃ khīṇāsavo phalasamāpattijhānena jhāyanto pubbeva taṇhādiṭṭhinissayānaṃ suṭṭhu pahīnattā sadevake loke…pe… manussāya yattha katthacipi anissitena cittena jhāyati nāma. Tato eva loke kenacipi na ñāyati ‘‘ayaṃ idaṃ nāma nissāya jhāyatī’’ti. Vuttañhetaṃ –
‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ।
‘‘Namo te purisājañña, namo te purisuttama;
ಯಸ್ಸ ತೇ ನಾಭಿಜಾನಾಮ, ಕಿಂ ತ್ವಂ ನಿಸ್ಸಾಯ ಝಾಯಸೀ’’ತಿ॥ (ನೇತ್ತಿ॰ ೧೦೪)।
Yassa te nābhijānāma, kiṃ tvaṃ nissāya jhāyasī’’ti. (netti. 104);
ಇದಾನಿ ಖೀಣಾಸವಚಿತ್ತಸ್ಸ ಕತ್ಥಚಿಪಿ ಅನಿಸ್ಸಿತಭಾವಂ ಗೋಧಿಕಸುತ್ತೇನ (ಸಂ॰ ನಿ॰ ೧.೧೫೯) ವಕ್ಕಲಿಸುತ್ತೇನ (ಸಂ॰ ನಿ॰ ೩.೮೭) ಚ ವಿಭಾವೇತುಂ ‘‘ಯಥಾ ಮಾರೋ’’ತಿಆದಿ ವುತ್ತಂ। ವಿಞ್ಞಾಣಂ ಸಮನ್ವೇಸನ್ತೋತಿ ಪರಿನಿಬ್ಬಾನತೋ ಉದ್ಧಂ ವಿಞ್ಞಾಣಂ ಪರಿಯೇಸನ್ತೋ। ‘‘ಪಪಞ್ಚಾತೀತೋ’’ತಿಆದಿನಾ ಅದಸ್ಸನಸ್ಸ ಕಾರಣಮಾಹ। ಅನಿಸ್ಸಿತಚಿತ್ತಾ ನ ಞಾಯನ್ತಿ ಝಾಯಮಾನಾತಿ ನ ಕೇವಲಂ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಖೀಣಾಸವಸ್ಸ ಚಿತ್ತಗತಿಂ ಮಾರಾದಯೋ ನ ಜಾನನ್ತಿ, ಅಪಿ ಚ ಖೋ ಸಉಪಾದಿಸೇಸಾಯಪಿ ನಿಬ್ಬಾನಧಾತುಯಾ ತಸ್ಸ ತಂ ನ ಜಾನನ್ತೀತಿ ಅತ್ಥೋ। ಅಯಂ ದೇಸನಾಸನ್ಧೀತಿ ಗೋಧಿಕಸುತ್ತವಕ್ಕಲಿಸುತ್ತಾನಂ ವಿಯ ಸುತ್ತನ್ತಾನಂ ಅಞ್ಞಮಞ್ಞಅತ್ಥಸಂಸನ್ದನಾ ದೇಸನಾಸನ್ಧಿ ನಾಮ।
Idāni khīṇāsavacittassa katthacipi anissitabhāvaṃ godhikasuttena (saṃ. ni. 1.159) vakkalisuttena (saṃ. ni. 3.87) ca vibhāvetuṃ ‘‘yathā māro’’tiādi vuttaṃ. Viññāṇaṃ samanvesantoti parinibbānato uddhaṃ viññāṇaṃ pariyesanto. ‘‘Papañcātīto’’tiādinā adassanassa kāraṇamāha. Anissitacittā na ñāyanti jhāyamānāti na kevalaṃ anupādisesāya nibbānadhātuyā khīṇāsavassa cittagatiṃ mārādayo na jānanti, api ca kho saupādisesāyapi nibbānadhātuyā tassa taṃ na jānantīti attho. Ayaṃ desanāsandhīti godhikasuttavakkalisuttānaṃ viya suttantānaṃ aññamaññaatthasaṃsandanā desanāsandhi nāma.
ನಿದ್ದೇಸಸನ್ಧೀತಿ ನಿದ್ದೇಸಸ್ಸ ಸನ್ಧಿ ನಿದ್ದೇಸಸನ್ಧಿ, ನಿದ್ದೇಸೇನ ವಾ ಸನ್ಧಿ ನಿದ್ದೇಸಸನ್ಧಿ। ಪುರಿಮೇನ ಸುತ್ತಸ್ಸ ನಿದ್ದೇಸೇನ ತಸ್ಸೇವ ಪಚ್ಛಿಮಸ್ಸ ನಿದ್ದೇಸಸ್ಸ, ಪಚ್ಛಿಮೇನ ವಾ ಪುರಿಮಸ್ಸ ಸಮ್ಬನ್ಧನನ್ತಿ ಅತ್ಥೋ। ತಂ ದಸ್ಸೇತುಂ ಯಸ್ಮಾ ಭಗವಾ ಯೇಭುಯ್ಯೇನ ಪಠಮಂ ವಟ್ಟಂ ದಸ್ಸೇತ್ವಾ ಪಚ್ಛಾ ವಿವಟ್ಟಂ ದಸ್ಸೇತಿ, ತಸ್ಮಾ ‘‘ನಿಸ್ಸಿತಚಿತ್ತಾ’’ತಿಆದಿ ವುತ್ತಂ। ತತ್ಥ ನಿಸ್ಸಿತಂ ಚಿತ್ತಂ ಏತೇಸನ್ತಿ ನಿಸ್ಸಿತಚಿತ್ತಾ, ಪುಗ್ಗಲಾ, ನಿದ್ದಿಸಿತಬ್ಬಾ ಪುಗ್ಗಲಾಧಿಟ್ಠಾನಾಯ ದೇಸನಾಯಾತಿ ಅಧಿಪ್ಪಾಯೋ। ಧಮ್ಮಾಧಿಟ್ಠಾನಾಯ ಪನ ನಿಸ್ಸಿತಂ ಚಿತ್ತಂ ಏತ್ಥಾತಿ ನಿಸ್ಸಿತಚಿತ್ತಾ, ನಿಸ್ಸಿತಚಿತ್ತವನ್ತೋ ತಣ್ಹಾದಿಟ್ಠಿನಿಸ್ಸಯವಸೇನ ಪವತ್ತಾ ಸುತ್ತಪದೇಸಾ। ಸೇಸಮೇತ್ಥ ಸಬ್ಬಂ ಪಾಕಟಮೇವ।
Niddesasandhīti niddesassa sandhi niddesasandhi, niddesena vā sandhi niddesasandhi. Purimena suttassa niddesena tasseva pacchimassa niddesassa, pacchimena vā purimassa sambandhananti attho. Taṃ dassetuṃ yasmā bhagavā yebhuyyena paṭhamaṃ vaṭṭaṃ dassetvā pacchā vivaṭṭaṃ dasseti, tasmā ‘‘nissitacittā’’tiādi vuttaṃ. Tattha nissitaṃ cittaṃ etesanti nissitacittā, puggalā, niddisitabbā puggalādhiṭṭhānāya desanāyāti adhippāyo. Dhammādhiṭṭhānāya pana nissitaṃ cittaṃ etthāti nissitacittā, nissitacittavanto taṇhādiṭṭhinissayavasena pavattā suttapadesā. Sesamettha sabbaṃ pākaṭameva.
ಚತುಬ್ಯೂಹಹಾರವಿಭಙ್ಗವಣ್ಣನಾ ನಿಟ್ಠಿತಾ।
Catubyūhahāravibhaṅgavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ನೇತ್ತಿಪ್ಪಕರಣಪಾಳಿ • Nettippakaraṇapāḷi / ೬. ಚತುಬ್ಯೂಹಹಾರವಿಭಙ್ಗೋ • 6. Catubyūhahāravibhaṅgo
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಖುದ್ದಕನಿಕಾಯ (ಟೀಕಾ) • Khuddakanikāya (ṭīkā) / ನೇತ್ತಿಪ್ಪಕರಣ-ಟೀಕಾ • Nettippakaraṇa-ṭīkā / ೬. ಚತುಬ್ಯೂಹಹಾರವಿಭಙ್ಗವಣ್ಣನಾ • 6. Catubyūhahāravibhaṅgavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಖುದ್ದಕನಿಕಾಯ (ಟೀಕಾ) • Khuddakanikāya (ṭīkā) / ನೇತ್ತಿವಿಭಾವಿನೀ • Nettivibhāvinī / ೬. ಚತುಬ್ಯೂಹಹಾರವಿಭಙ್ಗವಿಭಾವನಾ • 6. Catubyūhahāravibhaṅgavibhāvanā
