| Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎ-ཊཱིཀཱ • Nettippakaraṇa-ṭīkā |
༦. ཙཏུབྱཱུཧཧཱརཝིབྷངྒཝཎྞནཱ
6. Catubyūhahāravibhaṅgavaṇṇanā
༢༥. ཧཱརཱནནྟི ནིདྡྷཱརཎེ སཱམིཝཙནཾ། ཧཱརེསུ ཨིམསྶ ཙཏུབྱཱུཧཧཱརསྶ ཝིསེསཏོ སུཏྟསྶ བྱཉྫནཝིཙཡབྷཱཝཏོཏི ཡོཛནཱ། ཏེན ཝུཏྟཾ ‘‘བྱཉྫན…པེ॰… དསྶེཏཱི’’ཏི། ཡཱཡཱཏི ནིརུཏྟིཡཱ།
25.Hārānanti niddhāraṇe sāmivacanaṃ. Hāresu imassa catubyūhahārassa visesato suttassa byañjanavicayabhāvatoti yojanā. Tena vuttaṃ ‘‘byañjana…pe… dassetī’’ti. Yāyāti niruttiyā.
ཡཐཱརཧནྟི སཾཝཎྞིཡམཱནེ སུཏྟེ ཡཾ ཡཾ ཨརཧཏི ནིབྦཙནཾ ཝཏྟུཾ, ཏཾཏཾལོཀསམཉྙཱནུརོདྷེནེཝ། པུབྦབྷཱགཔཊིཔདཱ སམྤཱདེཏྭཱ པཙྪཱ སཙྩཱབྷིསམཡཾ པཱཔུཎཱཏཱིཏི ཨཱཧ ‘‘སམྨུཏི…པེ॰… ཧོཏཱི’’ཏི, ཏཾཏཾཔཉྙཏྟིགྒཧཎམུཁེན པརམཏྠགྒཧཎཾ ཧོཏཱིཏི ཨེཝཾ ཝཱ ཨིམིནཱ སམྦནྡྷོ།
Yathārahanti saṃvaṇṇiyamāne sutte yaṃ yaṃ arahati nibbacanaṃ vattuṃ, taṃtaṃlokasamaññānurodheneva. Pubbabhāgapaṭipadā sampādetvā pacchā saccābhisamayaṃ pāpuṇātīti āha ‘‘sammuti…pe… hotī’’ti, taṃtaṃpaññattiggahaṇamukhena paramatthaggahaṇaṃ hotīti evaṃ vā iminā sambandho.
ཡམིདཾ ཨནིནྡྲིཡབདྡྷརཱུཔསནྟཱནཾ སནྡྷཱཡ ‘‘ཨུབྷཡམནྟརེནཱ’’ཏི ཨིདྷ ཝུཏྟཾ། ཨོཏརཎཧཱརེ (ནེཏྟི॰ ཨཊྛ॰ ༤༢ ཨཱདཡོ) པནསྶ དྭཱརཔྤཝཏྟཕསྶཱདིདྷམྨེ སནྡྷཱཡ ཝུཏྟབྷཱཝཾ དསྶེཏུཾ ‘‘ཨུབྷཡམནྟརེནཱཏི ཕསྶསམུདིཏེསུ དྷམྨེསཱུ’’ཏི ཨཏྠོ ཝུཏྟོ། ཨཊྛཀཐཱཙརིཡཱ པནཱཧུ ‘‘ཨནྟརེནཱཏི ཝཙནཾ པན ཝིཀཔྤནྟརདཱིཔན’’ནྟི། ཏསྨཱ ཨཡམེཏྠ ཨཏྠོ – ན ཨིམཾ ལོཀཾ, ན ཧུརཾ ལོཀཾ, ཨཐ ཁོ ཨུབྷཡམནྟརེནཱཏི། ཨཔརོ ཝིཀཔྤོ – ཨུབྷཡམནྟརེནཱཏི ཝཱ ཝཙནཾ ཝིཀཔྤནྟརཱབྷཱཝདཱིཔནཾ། ཏསྶཏྠོ – ན ཨིམཾ ལོཀཾ, ན ཧུརཾ ལོཀཾ ནིསྶཱཡ ཛྷཱཡཏི ཛྷཱཡཱི, ཨུབྷཡམནྟརེན པན ཨཉྙཾ ཋཱནཾ ཨཏྠཱིཏི།
Yamidaṃ anindriyabaddharūpasantānaṃ sandhāya ‘‘ubhayamantarenā’’ti idha vuttaṃ. Otaraṇahāre (netti. aṭṭha. 42 ādayo) panassa dvārappavattaphassādidhamme sandhāya vuttabhāvaṃ dassetuṃ ‘‘ubhayamantarenāti phassasamuditesu dhammesū’’ti attho vutto. Aṭṭhakathācariyā panāhu ‘‘antarenāti vacanaṃ pana vikappantaradīpana’’nti. Tasmā ayamettha attho – na imaṃ lokaṃ, na huraṃ lokaṃ, atha kho ubhayamantarenāti. Aparo vikappo – ubhayamantarenāti vā vacanaṃ vikappantarābhāvadīpanaṃ. Tassattho – na imaṃ lokaṃ, na huraṃ lokaṃ nissāya jhāyati jhāyī, ubhayamantarena pana aññaṃ ṭhānaṃ atthīti.
ཡེཔི ཙ ‘‘ཨནྟརཱཔརིནིབྦཱཡཱི, སམྦྷཝེསཱི’’ཏི ཙ ཨིམེསཾ སུཏྟཔདཱནཾ ཨཏྠཾ མིཙྪཱ གཧེཏྭཱ ཨཏྠི ཨེཝ ཨནྟརཱབྷཝོཏི ཝདནྟི, ཏེཔི ཡསྨཱ ཨཝིཧཱདཱིསུ ཏཏྠ ཏཏྠ ཨཱཡུཝེམཛ྄ཛྷཾ ཨནཏིཀྐམིཏྭཱ ཨནྟརཱ ཨགྒམགྒཱདྷིགམེན ཨནཝསེསཀིལེསཔརིནིབྦཱནེན པརིནིབྦཱཡནྟཱིཏི ཨནྟརཱཔརིནིབྦཱཡཱི, ན ཨནྟརཱབྷཝབྷཱུཏོཏི པུརིམསྶ སུཏྟཔདསྶ ཨཏྠོ། པཙྪིམསྶ ཙ ཡེ བྷཱུཏཱ ཨེཝ, ན པུན བྷཝིསྶནྟི, ཏེ ཧི (ཀཐཱ॰ ཨནུཊཱི॰ ༥༠༧) ཁཱིཎཱསཝཱ, པུརིམཔདེཧི ‘‘བྷཱུཏཱ’’ཏི ཝུཏྟཱ། ཏབྦིཔརཱིཏཏཱཡ སམྦྷཝཾ ཨེསནྟཱིཏི སམྦྷཝེསིནོ། ཨཔྤཧཱིནབྷཝསཾཡོཛནཏྟཱ སེཀྑཱ, པུཐུཛྫནཱ ཙ། ཙཏཱུསུ ཝཱ ཡོནཱིསུ ཨཎྜཛཛལཱབུཛསཏྟཱ ཡཱཝ ཨཎྜཀོསཾ, ཝཏྠིཀོསཉྩ ན བྷིནྡནྟི, ཏཱཝ སམྦྷཝེསཱི ནཱམ། ཨཎྜཀོསཏོ, ཝཏྠིཀོསཏོ ཙ བཧི ནིཀྑནྟཱ བྷཱུཏཱ ནཱམ། སཾསེདཛཨོཔཔཱཏིཀཱ ཙ པཋམཙིཏྟཀྑཎེ སམྦྷཝེསཱི ནཱམ, དུཏིཡཙིཏྟཀྑཎཏོ པཊྛཱཡ བྷཱུཏཱ ནཱམ། ཡེན ཝཱ ཨིརིཡཱཔཐེན ཛཱཡནྟི, ཡཱཝ ཏཏོ ཨཉྙཾ ན པཱཔུཎནྟི, ཏཱཝ སམྦྷཝེསཱི, ཏཏོ པརཾ བྷཱུཏཱཏི ཨཏྠོ, ཏསྨཱ ནཏྠཱིཏི པཊིཀྑིཔིཏབྦཾ། སཏི ཧི ཨུཛུཀེ པཱལི༹ཨནུགཏེ ཨཏྠེ ཀིཾ ཨནིདྡྷཱརིཏསཱམཏྠིཡེན ཨནྟརཱབྷཝེན ཨཏྟབྷཱཝཔརིཀཔྤིཏེན པཡོཛནནྟི།
Yepi ca ‘‘antarāparinibbāyī, sambhavesī’’ti ca imesaṃ suttapadānaṃ atthaṃ micchā gahetvā atthi eva antarābhavoti vadanti, tepi yasmā avihādīsu tattha tattha āyuvemajjhaṃ anatikkamitvā antarā aggamaggādhigamena anavasesakilesaparinibbānena parinibbāyantīti antarāparinibbāyī, na antarābhavabhūtoti purimassa suttapadassa attho. Pacchimassa ca ye bhūtā eva, na puna bhavissanti, te hi (kathā. anuṭī. 507) khīṇāsavā, purimapadehi ‘‘bhūtā’’ti vuttā. Tabbiparītatāya sambhavaṃ esantīti sambhavesino. Appahīnabhavasaṃyojanattā sekkhā, puthujjanā ca. Catūsu vā yonīsu aṇḍajajalābujasattā yāva aṇḍakosaṃ, vatthikosañca na bhindanti, tāva sambhavesī nāma. Aṇḍakosato, vatthikosato ca bahi nikkhantā bhūtā nāma. Saṃsedajaopapātikā ca paṭhamacittakkhaṇe sambhavesī nāma, dutiyacittakkhaṇato paṭṭhāya bhūtā nāma. Yena vā iriyāpathena jāyanti, yāva tato aññaṃ na pāpuṇanti, tāva sambhavesī, tato paraṃ bhūtāti attho, tasmā natthīti paṭikkhipitabbaṃ. Sati hi ujuke pāḷianugate atthe kiṃ aniddhāritasāmatthiyena antarābhavena attabhāvaparikappitena payojananti.
ཡཾ པན ཡེ ‘‘སནྟཱནཝསེན པཝཏྟམཱནཱནཾ དྷམྨཱནཾ ཨཝིཙྪེདེན དེསནྟརེསུ པཱཏུབྷཱཝོ དིཊྛོ། ཡཐཱ ཏཾ ཝཱིཧིཨཱདིཨཝིཉྙཱཎཀསནྟཱནེ, ཨེཝཾ སཝིཉྙཱཎཀསནྟཱནེཔི ཨཝིཙྪེདེན དེསནྟརེསུ པཱཏུབྷཱཝེན བྷཝིཏབྦཾ། ཨཡཉྩ ནཡོ སཏི ཨནྟརཱབྷཝེ ཡུཛྫཏི, ནཱཉྙཐཱ’’ཏི ཡུཏྟིཾ ཝདནྟི། ཏེཧི ཨིདྡྷིམཏོ ཙེཏོཝསིཔྤཏྟསྶ ཙིཏྟཱནུགཏིཀཾ ཀཱཡཾ ཨདྷིཊྛཧནྟསྶ ཁཎེན བྲཧྨལོཀཏོ ཨིདྷཱུཔསངྐམནེ, ཨིཏོ ཝཱ བྲཧྨལོཀགམནེ ཡུཏྟི ཝཏྟབྦཱ། ཡདི སབྦཏྠེཝ ཝིཙྪིནྣདེསེ དྷམྨཱནཾ པཝཏྟི ན ཨིཙྪིཏཱ, ཡདིཔི སིཡཱ ‘‘ཨིདྡྷིཝིསཡོ ཨཙིནྟེཡྻོ’’ཏི, ཏཾ ཨིདྷཱཔི སམཱནཾ ‘‘ཀམྨཝིཔཱཀོ ཨཙིནྟེཡྻོ’’ཏི ཝཙནཏོ, ཏསྨཱ ཏཾ ཏེསཾ མཏིམཏྟམེཝ། ཨཙིནྟེཡྻསབྷཱཝཱ ཧི སབྷཱཝདྷམྨཱ, ཏེ ཀཏྠཙི པཙྩཡཝིསེསེན ཝིཙྪིནྣདེསེ པཱཏུབྷཝནྟི, ཀཏྠཙི ཨཝིཙྪིནྣདེསེ ཙ། ཏཐཱ ཧི མུཁགྷོསཱདཱིཧི ཨཉྙསྨིཾ དེསེ ཨཱདཱསཔབྦཏཔྤདེསཱདིཀེ པཊིབིམྦཔཊིགྷོསཱདིཀཾ པཙྩཡུཔྤནྣཾ ནིབྦཏྟམཱནཾ དིསྶཏི, ཏསྨཱ ན སབྦཾ སབྦཏྠ ཨུཔནེཏབྦནྟི ཨཡམེཏྠ སངྑེཔོ། ཝིཏྠཱརཏོ པན པཊིབིམྦསྶ ཨུདཱཧརཎབྷཱཝསཱདྷནཱདིཀོ ཨནྟརཱབྷཝཝིཙཱརོ ཀཐཱཝཏྠུཔྤཀརཎསྶཊཱིཀཱཡཾ (ཀཐཱ॰ ཨནུཊཱི॰ ༥༠༧) གཧེཏབྦོ།
Yaṃ pana ye ‘‘santānavasena pavattamānānaṃ dhammānaṃ avicchedena desantaresu pātubhāvo diṭṭho. Yathā taṃ vīhiādiaviññāṇakasantāne, evaṃ saviññāṇakasantānepi avicchedena desantaresu pātubhāvena bhavitabbaṃ. Ayañca nayo sati antarābhave yujjati, nāññathā’’ti yuttiṃ vadanti. Tehi iddhimato cetovasippattassa cittānugatikaṃ kāyaṃ adhiṭṭhahantassa khaṇena brahmalokato idhūpasaṅkamane, ito vā brahmalokagamane yutti vattabbā. Yadi sabbattheva vicchinnadese dhammānaṃ pavatti na icchitā, yadipi siyā ‘‘iddhivisayo acinteyyo’’ti, taṃ idhāpi samānaṃ ‘‘kammavipāko acinteyyo’’ti vacanato, tasmā taṃ tesaṃ matimattameva. Acinteyyasabhāvā hi sabhāvadhammā, te katthaci paccayavisesena vicchinnadese pātubhavanti, katthaci avicchinnadese ca. Tathā hi mukhaghosādīhi aññasmiṃ dese ādāsapabbatappadesādike paṭibimbapaṭighosādikaṃ paccayuppannaṃ nibbattamānaṃ dissati, tasmā na sabbaṃ sabbattha upanetabbanti ayamettha saṅkhepo. Vitthārato pana paṭibimbassa udāharaṇabhāvasādhanādiko antarābhavavicāro kathāvatthuppakaraṇassaṭīkāyaṃ (kathā. anuṭī. 507) gahetabbo.
ཨཔརེ པན ‘‘ཨིདྷཱཏི ཀཱམབྷཝོ, ཧུརནྟི ཨརཱུཔབྷཝོ, ཨུབྷཡམནྟརེནཱཏི རཱུཔབྷཝོ ཝུཏྟོ’’ཏི ཝདནྟི, ‘‘ཨིདྷཱཏི པཙྩཡདྷམྨཱ, ཧུརནྟི པཙྩཡུཔྤནྣདྷམྨཱ, ཨུབྷཡམནྟརེནཱཏི པཎྞཏྟིདྷམྨཱ ཝུཏྟཱ’’ཏི ཙ ཝདནྟི, ཏཾ སབྦཨཊྛཀཐཱསུ ནཏྠི, ཏསྨཱ ཝུཏྟནཡེནེཝ ཨཏྠོ ཝེདིཏབྦོ། ཨཝསིཊྛཾ རཱུཔནྟི ཨཱཔོདྷཱཏུཨཱཀཱསདྷཱཏཱུཧི སདྡྷིཾ ལཀྑཎརཱུཔཱནི, ཨོཛཉྩ སནྡྷཱཡཱཧ ཨནིནྡྲིཡབདྡྷརཱུཔསྶ ཨདྷིཔྤེཏཏྟཱ། ཏསྶ ཁཱིཎཱསཝསྶ ཏཾ ནིབྦཱནཱརམྨཎཾ ཙིཏྟཾ ན ཛཱནནྟི ན ཉཱཡནྟི ‘‘ཛྷཱཡམཱནཱ’’ཏི ཝུཏྟཏྟཱ། སེསཾ སུཝིཉྙེཡྻམེཝ།
Apare pana ‘‘idhāti kāmabhavo, huranti arūpabhavo, ubhayamantarenāti rūpabhavo vutto’’ti vadanti, ‘‘idhāti paccayadhammā, huranti paccayuppannadhammā, ubhayamantarenāti paṇṇattidhammā vuttā’’ti ca vadanti, taṃ sabbaaṭṭhakathāsu natthi, tasmā vuttanayeneva attho veditabbo. Avasiṭṭhaṃ rūpanti āpodhātuākāsadhātūhi saddhiṃ lakkhaṇarūpāni, ojañca sandhāyāha anindriyabaddharūpassa adhippetattā. Tassa khīṇāsavassa taṃ nibbānārammaṇaṃ cittaṃ na jānanti na ñāyanti ‘‘jhāyamānā’’ti vuttattā. Sesaṃ suviññeyyameva.
ཙཏུབྱཱུཧཧཱརཝིབྷངྒཝཎྞནཱ ནིཊྛིཏཱ།
Catubyūhahāravibhaṅgavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ནེཏྟིཔྤཀརཎཔཱལི༹ • Nettippakaraṇapāḷi / ༦. ཙཏུབྱཱུཧཧཱརཝིབྷངྒོ • 6. Catubyūhahāravibhaṅgo
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā / ༦. ཙཏུབྱཱུཧཧཱརཝིབྷངྒཝཎྞནཱ • 6. Catubyūhahāravibhaṅgavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ༦. ཙཏུབྱཱུཧཧཱརཝིབྷངྒཝིབྷཱཝནཱ • 6. Catubyūhahāravibhaṅgavibhāvanā
