| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
৬. চতুব্যূহহারৰিভঙ্গো
6. Catubyūhahāravibhaṅgo
২৫. তত্থ কতমো চতুব্যূহো হারো? ‘‘নেরুত্তমধিপ্পাযো’’তি অযং। ব্যঞ্জনেন সুত্তস্স নেরুত্তঞ্চ অধিপ্পাযো চ নিদানঞ্চ পুব্বাপরসন্ধি চ গৰেসিতব্বো । তত্থ কতমং নেরুত্তং, যা নিরুত্তিপদসংহিতা, যং ধম্মানং নামসো ঞাণং। যদা হি ভিক্খু অত্থস্স চ নামং জানাতি, ধম্মস্স চ নামং জানাতি, তথা তথা নং অভিনিরোপেতি। অযঞ্চ ৰুচ্চতি অত্থকুসলো ধম্মকুসলো ব্যঞ্জনকুসলো নিরুত্তিকুসলো পুব্বাপরকুসলো দেসনাকুসলো অতীতাধিৰচনকুসলো অনাগতাধিৰচনকুসলো পচ্চুপ্পন্নাধিৰচনকুসলো ইত্থাধিৰচনকুসলো পুরিসাধিৰচনকুসলো নপুংসকাধিৰচনকুসলো একাধিৰচনকুসলো অনেকাধিৰচনকুসলো, এৰং সব্বানি কাতব্বানি জনপদনিরুত্তানি সব্বা চ জনপদনিরুত্তিযো। অযং নিরুত্তিপদসংহিতা।
25. Tattha katamo catubyūho hāro? ‘‘Neruttamadhippāyo’’ti ayaṃ. Byañjanena suttassa neruttañca adhippāyo ca nidānañca pubbāparasandhi ca gavesitabbo . Tattha katamaṃ neruttaṃ, yā niruttipadasaṃhitā, yaṃ dhammānaṃ nāmaso ñāṇaṃ. Yadā hi bhikkhu atthassa ca nāmaṃ jānāti, dhammassa ca nāmaṃ jānāti, tathā tathā naṃ abhiniropeti. Ayañca vuccati atthakusalo dhammakusalo byañjanakusalo niruttikusalo pubbāparakusalo desanākusalo atītādhivacanakusalo anāgatādhivacanakusalo paccuppannādhivacanakusalo itthādhivacanakusalo purisādhivacanakusalo napuṃsakādhivacanakusalo ekādhivacanakusalo anekādhivacanakusalo, evaṃ sabbāni kātabbāni janapadaniruttāni sabbā ca janapadaniruttiyo. Ayaṃ niruttipadasaṃhitā.
২৬. তত্থ কতমো অধিপ্পাযো?
26. Tattha katamo adhippāyo?
‘‘ধম্মো হৰে রক্খতি ধম্মচারিং, ছত্তং মহন্তং যথ ৰস্সকালে 1।
‘‘Dhammo have rakkhati dhammacāriṃ, chattaṃ mahantaṃ yatha vassakāle 2;
এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী’’তি॥
Esānisaṃso dhamme suciṇṇe, na duggatiṃ gacchati dhammacārī’’ti.
ইধ ভগৰতো কো অধিপ্পাযো? যে অপাযেহি পরিমুচ্চিতুকামা ভৰিস্সন্তি, তে ধম্মচারিনো ভৰিস্সন্তীতি অযং এত্থ ভগৰতো অধিপ্পাযো।
Idha bhagavato ko adhippāyo? Ye apāyehi parimuccitukāmā bhavissanti, te dhammacārino bhavissantīti ayaṃ ettha bhagavato adhippāyo.
‘‘চোরো যথা সন্ধিমুখে গহীতো, সকম্মুনা হঞ্ঞতি 3 বজ্ঝতে চ।
‘‘Coro yathā sandhimukhe gahīto, sakammunā haññati 4 bajjhate ca;
এৰং অযং পেচ্চ পজা পরত্থ, সকম্মুনা হঞ্ঞতি 5 বজ্ঝতে চা’’তি॥
Evaṃ ayaṃ pecca pajā parattha, sakammunā haññati 6 bajjhate cā’’ti.
ইধ ভগৰতো কো অধিপ্পাযো? সঞ্চেতনিকানং কতানং কম্মানং উপচিতানং দুক্খৰেদনীযানং অনিট্ঠং অসাতং ৰিপাকং পচ্চনুভৰিস্সতীতি অযং এত্থ ভগৰতো অধিপ্পাযো।
Idha bhagavato ko adhippāyo? Sañcetanikānaṃ katānaṃ kammānaṃ upacitānaṃ dukkhavedanīyānaṃ aniṭṭhaṃ asātaṃ vipākaṃ paccanubhavissatīti ayaṃ ettha bhagavato adhippāyo.
অত্তনো সুখমেসানো, পেচ্চ সো ন লভতে সুখ’’ন্তি॥
Attano sukhamesāno, pecca so na labhate sukha’’nti.
ইধ ভগৰতো কো অধিপ্পাযো? যে সুখেন অত্থিকা ভৰিস্সন্তি, তে পাপকম্মং 9 ন করিস্সন্তীতি অযং এত্থ ভগৰতো অধিপ্পাযো।
Idha bhagavato ko adhippāyo? Ye sukhena atthikā bhavissanti, te pāpakammaṃ 10 na karissantīti ayaṃ ettha bhagavato adhippāyo.
‘‘মিদ্ধী 11 যদা হোতি মহগ্ঘসো চ, নিদ্দাযিতা সম্পরিৰত্তসাযী।
‘‘Middhī 12 yadā hoti mahagghaso ca, niddāyitā samparivattasāyī;
মহাৰরাহোৰ নিৰাপপুট্ঠো, পুনপ্পুনং গব্ভমুপেতি মন্দো’’তি॥
Mahāvarāhova nivāpapuṭṭho, punappunaṃ gabbhamupeti mando’’ti.
ইধ ভগৰতো কো অধিপ্পাযো? যে জরামরণেন অট্টিযিতুকামা ভৰিস্সন্তি, তে ভৰিস্সন্তি ভোজনে মত্তঞ্ঞুনো ইন্দ্রিযেসু গুত্তদ্ৰারা পুব্বরত্তাপররত্তং জাগরিযানুযোগমনুযুত্তা ৰিপস্সকা কুসলেসু ধম্মেসু সগারৰা চ সব্রহ্মচারীসু থেরেসু নৰেসু মজ্ঝিমেসূতি অযং এত্থ ভগৰতো অধিপ্পাযো।
Idha bhagavato ko adhippāyo? Ye jarāmaraṇena aṭṭiyitukāmā bhavissanti, te bhavissanti bhojane mattaññuno indriyesu guttadvārā pubbarattāpararattaṃ jāgariyānuyogamanuyuttā vipassakā kusalesu dhammesu sagāravā ca sabrahmacārīsu theresu navesu majjhimesūti ayaṃ ettha bhagavato adhippāyo.
অপ্পমত্তা ন মীযন্তি, যে পমত্তা যথা মতা’’তি॥
Appamattā na mīyanti, ye pamattā yathā matā’’ti.
ইধ ভগৰতো কো অধিপ্পাযো? যে অমতপরিযেসনং পরিযেসিতুকামা ভৰিস্সন্তি, তে অপ্পমত্তা ৰিহরিস্সন্তীতি অযং এত্থ ভগৰতো অধিপ্পাযো। অযং অধিপ্পাযো।
Idha bhagavato ko adhippāyo? Ye amatapariyesanaṃ pariyesitukāmā bhavissanti, te appamattā viharissantīti ayaṃ ettha bhagavato adhippāyo. Ayaṃ adhippāyo.
২৭. তত্থ কতমং নিদানং? যথা সো ধনিযো গোপালকো ভগৰন্তং আহ –
27. Tattha katamaṃ nidānaṃ? Yathā so dhaniyo gopālako bhagavantaṃ āha –
‘‘নন্দতি পুত্তেহি পুত্তিমা, গোমা 15 গোহি তথেৰ নন্দতি।
‘‘Nandati puttehi puttimā, gomā 16 gohi tatheva nandati;
উপধী হি নরস্স নন্দনা, ন হি সো নন্দতি যো নিরূপধী’’তি॥
Upadhī hi narassa nandanā, na hi so nandati yo nirūpadhī’’ti.
ভগৰা আহ –
Bhagavā āha –
‘‘সোচতি পুত্তেহি পুত্তিমা, গোপিকো 17 গোহি তথেৰ সোচতি।
‘‘Socati puttehi puttimā, gopiko 18 gohi tatheva socati;
উপধী হি নরস্স সোচনা, ন হি সো সোচতি যো নিরূপধী’’তি॥
Upadhī hi narassa socanā, na hi so socati yo nirūpadhī’’ti.
ইমিনা ৰত্থুনা ইমিনা নিদানেন এৰং ঞাযতি ‘‘ইধ ভগৰা বাহিরং পরিগ্গহং উপধি আহা’’তি। যথা চ মারো পাপিমা গিজ্ঝকূটা পব্বতা পুথুসিলং পাতেসি, ভগৰা আহ –
Iminā vatthunā iminā nidānena evaṃ ñāyati ‘‘idha bhagavā bāhiraṃ pariggahaṃ upadhi āhā’’ti. Yathā ca māro pāpimā gijjhakūṭā pabbatā puthusilaṃ pātesi, bhagavā āha –
নেৰ সম্মাৰিমুত্তানং, বুদ্ধানং অত্থি ইঞ্জিতং॥
Neva sammāvimuttānaṃ, buddhānaṃ atthi iñjitaṃ.
নভং ফলেয্যপ্পথৰী চলেয্য, সব্বেৰ পাণা উদ সন্তসেয্যুং।
Nabhaṃ phaleyyappathavī caleyya, sabbeva pāṇā uda santaseyyuṃ;
সল্লম্পি চে উরসি কম্পযেয্যুং 21, উপধীসু তাণং ন করোন্তি বুদ্ধা’’তি॥
Sallampi ce urasi kampayeyyuṃ 22, upadhīsu tāṇaṃ na karonti buddhā’’ti.
ইমিনা ৰত্থুনা ইমিনা নিদানেন এৰং ঞাযতি ‘‘ইধ ভগৰা কাযং উপধিং আহা’’তি। যথা চাহ –
Iminā vatthunā iminā nidānena evaṃ ñāyati ‘‘idha bhagavā kāyaṃ upadhiṃ āhā’’ti. Yathā cāha –
‘‘ন তং দল়্হং বন্ধনমাহু ধীরা, যদাযসং দারুজপব্বজঞ্চ 23।
‘‘Na taṃ daḷhaṃ bandhanamāhu dhīrā, yadāyasaṃ dārujapabbajañca 24;
সারত্তরত্তা মণিকুণ্ডলেসু, পুত্তেসু দারেসু চ যা অপেক্খা’’তি॥
Sārattarattā maṇikuṇḍalesu, puttesu dāresu ca yā apekkhā’’ti.
ইমিনা ৰত্থুনা ইমিনা নিদানেন এৰং ঞাযতি ‘‘ইধ ভগৰা বাহিরেসু ৰত্থূসু তণ্হং আহা’’তি। যথা চাহ –
Iminā vatthunā iminā nidānena evaṃ ñāyati ‘‘idha bhagavā bāhiresu vatthūsu taṇhaṃ āhā’’ti. Yathā cāha –
‘‘এতং দল়্হং বন্ধনমাহু ধীরা, ওহারিনং সিথিলং দুপ্পমুঞ্চং।
‘‘Etaṃ daḷhaṃ bandhanamāhu dhīrā, ohārinaṃ sithilaṃ duppamuñcaṃ;
এতম্পি ছেত্ৰান পরিব্বজন্তি, অনপেক্খিনো কামসুখং পহাযা’’তি॥
Etampi chetvāna paribbajanti, anapekkhino kāmasukhaṃ pahāyā’’ti.
ইমিনা ৰত্থুনা ইমিনা নিদানেন এৰং ঞাযতি ‘‘ইধ ভগৰা বাহিরৰত্থুকায তণ্হায পহানং আহা’’তি। যথা চাহ –
Iminā vatthunā iminā nidānena evaṃ ñāyati ‘‘idha bhagavā bāhiravatthukāya taṇhāya pahānaṃ āhā’’ti. Yathā cāha –
‘‘আতুরং অসুচিং পূতিং, দুগ্গন্ধং দেহনিস্সিতং।
‘‘Āturaṃ asuciṃ pūtiṃ, duggandhaṃ dehanissitaṃ;
পগ্ঘরন্তং দিৰা রত্তিং, বালানং অভিনন্দিত’’ন্তি॥
Paggharantaṃ divā rattiṃ, bālānaṃ abhinandita’’nti.
ইমিনা ৰত্থুনা ইমিনা নিদানেন এৰং ঞাযতি ‘‘ইধ ভগৰা অজ্ঝত্তিকৰত্থুকায তণ্হায পহানং আহা’’তি। যথা চাহ –
Iminā vatthunā iminā nidānena evaṃ ñāyati ‘‘idha bhagavā ajjhattikavatthukāya taṇhāya pahānaṃ āhā’’ti. Yathā cāha –
‘‘উচ্ছিন্দ 25 সিনেহমত্তনো, কুমুদং সারদিকংৰ পাণিনা।
‘‘Ucchinda 26 sinehamattano, kumudaṃ sāradikaṃva pāṇinā;
সন্তিমগ্গমেৰ ব্রূহয, নিব্বানং সুগতেন দেসিত’’ন্তি॥
Santimaggameva brūhaya, nibbānaṃ sugatena desita’’nti.
ইমিনা ৰত্থুনা ইমিনা নিদানেন এৰং ঞাযতি ‘‘ইধ ভগৰা অজ্ঝত্তিকৰত্থুকায তণ্হায পহানং আহা’’তি। ইদং নিদানং।
Iminā vatthunā iminā nidānena evaṃ ñāyati ‘‘idha bhagavā ajjhattikavatthukāya taṇhāya pahānaṃ āhā’’ti. Idaṃ nidānaṃ.
তত্থ কতমো পুব্বাপরসন্ধি। যথাহ –
Tattha katamo pubbāparasandhi. Yathāha –
‘‘কামন্ধা জালসঞ্ছন্না, তণ্হাছদনছাদিতা।
‘‘Kāmandhā jālasañchannā, taṇhāchadanachāditā;
জরামরণমন্ৰেন্তি, ৰচ্ছো খীরপকোৰ মাতর’’ন্তি॥
Jarāmaraṇamanventi, vaccho khīrapakova mātara’’nti.
অযং কামতণ্হা ৰুত্তা। সা কতমেন পুব্বাপরেন যুজ্জতি? যথাহ –
Ayaṃ kāmataṇhā vuttā. Sā katamena pubbāparena yujjati? Yathāha –
‘‘রত্তো অত্থং ন জানাতি, রত্তো ধম্মং ন পস্সতি।
‘‘Ratto atthaṃ na jānāti, ratto dhammaṃ na passati;
অন্ধন্তমং তদা হোতি, যং রাগো সহতে নর’’ন্তি॥
Andhantamaṃ tadā hoti, yaṃ rāgo sahate nara’’nti.
ইতি অন্ধতায চ সঞ্ছন্নতায চ সাযেৰ তণ্হা অভিলপিতা। যঞ্চাহ কামন্ধা জালসঞ্ছন্না, তণ্হাছদনছাদিতাতি। যঞ্চাহ রত্তো অত্থং ন জানাতি, রত্তো ধম্মং ন পস্সতীতি, ইমেহি পদেহি পরিযুট্ঠানেহি সাযেৰ তণ্হা অভিলপিতা। যং অন্ধকারং, অযং দুক্খসমুদযো, যা চ তণ্হা পোনোভৰিকা, যঞ্চাহ কামাতি ইমে কিলেসকামা। যঞ্চাহ জালসঞ্ছন্নাতি তেসং যেৰ কামানং পযোগেন পরিযুট্ঠানং দস্সেতি, তস্মা কিলেসৰসেন চ পরিযুট্ঠানৰসেন চ তণ্হাবন্ধনং ৰুত্তং। যে এদিসিকা, তে জরামরণং অন্ৰেন্তি, অযং ভগৰতা যথানিক্খিত্তগাথাবলেন দস্সিতা জরামরণমন্ৰেন্তীতি।
Iti andhatāya ca sañchannatāya ca sāyeva taṇhā abhilapitā. Yañcāha kāmandhā jālasañchannā, taṇhāchadanachāditāti. Yañcāha ratto atthaṃ na jānāti, ratto dhammaṃ na passatīti, imehi padehi pariyuṭṭhānehi sāyeva taṇhā abhilapitā. Yaṃ andhakāraṃ, ayaṃ dukkhasamudayo, yā ca taṇhā ponobhavikā, yañcāha kāmāti ime kilesakāmā. Yañcāha jālasañchannāti tesaṃ yeva kāmānaṃ payogena pariyuṭṭhānaṃ dasseti, tasmā kilesavasena ca pariyuṭṭhānavasena ca taṇhābandhanaṃ vuttaṃ. Ye edisikā, te jarāmaraṇaṃ anventi, ayaṃ bhagavatā yathānikkhittagāthābalena dassitā jarāmaraṇamanventīti.
‘‘যস্স পপঞ্চা ঠিতী চ নত্থি, সন্দানং পলিঘঞ্চ 31 ৰীতিৰত্তো।
‘‘Yassa papañcā ṭhitī ca natthi, sandānaṃ palighañca 32 vītivatto;
তং নিত্তণ্হং মুনিং চরন্তং, ন ৰিজানাতি সদেৰকোপি লোকো’’তি॥
Taṃ nittaṇhaṃ muniṃ carantaṃ, na vijānāti sadevakopi loko’’ti.
পপঞ্চা নাম তণ্হাদিট্ঠিমানা, তদভিসঙ্খতা চ সঙ্খারা। ঠিতি নাম অনুসযা। সন্দানং নাম তণ্হায পরিযুট্ঠানং, যানি ছত্তিংসতণ্হায জালিনিযা ৰিচরিতানি। পলিঘো নাম মোহো। যে চ পপঞ্চা সঙ্খারা যা চ ঠিতি যং সন্দানঞ্চ যং পলিঘঞ্চ যো এতং সব্বং সমতিক্কন্তো, অযং ৰুচ্চতি নিত্তণ্হো ইতি।
Papañcā nāma taṇhādiṭṭhimānā, tadabhisaṅkhatā ca saṅkhārā. Ṭhiti nāma anusayā. Sandānaṃ nāma taṇhāya pariyuṭṭhānaṃ, yāni chattiṃsataṇhāya jāliniyā vicaritāni. Paligho nāma moho. Ye ca papañcā saṅkhārā yā ca ṭhiti yaṃ sandānañca yaṃ palighañca yo etaṃ sabbaṃ samatikkanto, ayaṃ vuccati nittaṇho iti.
২৮. তত্থ পরিযুট্ঠানসঙ্খারা দিট্ঠধম্মৰেদনীযা ৰা উপপজ্জৰেদনীযা ৰা অপরাপরিযৰেদনীযা ৰা, এৰং তণ্হা তিৰিধং ফলং দেতি দিট্ঠে ৰা ধম্মে উপপজ্জে ৰা অপরে ৰা পরিযাযে। এৰং ভগৰা আহ ‘‘যং লোভপকতং কম্মং করোতি কাযেন ৰা ৰাচায ৰা মনসা ৰা, তস্স ৰিপাকং অনুভোতি দিট্ঠে ৰা ধম্মে উপপজ্জে ৰা অপরে ৰা পরিযাযে’’তি। ইদং ভগৰতো পুব্বাপরেন যুজ্জতি। তত্থ পরিযুট্ঠানং দিট্ঠধম্মৰেদনীযং ৰা কম্মং উপপজ্জৰেদনীযং ৰা কম্মং অপরাপরিযাযৰেদনীযং 33 ৰা কম্মং, এৰং কম্মং তিধা ৰিপচ্চতি দিট্ঠে ৰা ধম্মে উপপজ্জে ৰা অপরে ৰা পরিযাযে। যথাহ –
28. Tattha pariyuṭṭhānasaṅkhārā diṭṭhadhammavedanīyā vā upapajjavedanīyā vā aparāpariyavedanīyā vā, evaṃ taṇhā tividhaṃ phalaṃ deti diṭṭhe vā dhamme upapajje vā apare vā pariyāye. Evaṃ bhagavā āha ‘‘yaṃ lobhapakataṃ kammaṃ karoti kāyena vā vācāya vā manasā vā, tassa vipākaṃ anubhoti diṭṭhe vā dhamme upapajje vā apare vā pariyāye’’ti. Idaṃ bhagavato pubbāparena yujjati. Tattha pariyuṭṭhānaṃ diṭṭhadhammavedanīyaṃ vā kammaṃ upapajjavedanīyaṃ vā kammaṃ aparāpariyāyavedanīyaṃ 34 vā kammaṃ, evaṃ kammaṃ tidhā vipaccati diṭṭhe vā dhamme upapajje vā apare vā pariyāye. Yathāha –
‘‘যঞ্চে বালো ইধ পাণাতিপাতী হোতি…পে॰… মিচ্ছাদিট্ঠি হোতি, তস্স দিট্ঠে ৰা ধম্মে ৰিপাকং পটিসংৰেদেতি উপপজ্জে ৰা অপরে ৰা পরিযাযে’’তি। ইদং ভগৰতো পুব্বাপরেন যুজ্জতি। তত্থ পরিযুট্ঠানং পটিসঙ্খানবলেন পহাতব্বং, সঙ্খারা দস্সনবলেন, ছত্তিংস তণ্হাৰিচরিতানি ভাৰনাবলেন পহাতব্বানীতি এৰং তণ্হাপি তিধা পহীযতি। যা নিত্তণ্হাতা অযং সউপাদিসেসা নিব্বানধাতু। ভেদা কাযস্স অযং অনুপাদিসেসা নিব্বানধাতু।
‘‘Yañce bālo idha pāṇātipātī hoti…pe… micchādiṭṭhi hoti, tassa diṭṭhe vā dhamme vipākaṃ paṭisaṃvedeti upapajje vā apare vā pariyāye’’ti. Idaṃ bhagavato pubbāparena yujjati. Tattha pariyuṭṭhānaṃ paṭisaṅkhānabalena pahātabbaṃ, saṅkhārā dassanabalena, chattiṃsa taṇhāvicaritāni bhāvanābalena pahātabbānīti evaṃ taṇhāpi tidhā pahīyati. Yā nittaṇhātā ayaṃ saupādisesā nibbānadhātu. Bhedā kāyassa ayaṃ anupādisesā nibbānadhātu.
পপঞ্চো নাম ৰুচ্চতি অনুবন্ধো। যঞ্চাহ ভগৰা ‘‘পপঞ্চেতি অতীতানাগতপচ্চুপ্পন্নং চক্খুৰিঞ্ঞেয্যং রূপং আরব্ভা’’তি। যঞ্চাহ ভগৰা – ‘‘অতীতে, রাধ, রূপে অনপেক্খো হোহি, অনাগতং রূপং মা অভিনন্দি, পচ্চুপ্পন্নস্স রূপস্স নিব্বিদায ৰিরাগায নিরোধায পটিনিস্সগ্গায পটিপজ্জা’’তি। ইদং ভগৰতো পুব্বাপরেন যুজ্জতি। যো চাপি পপঞ্চো যে চ সঙ্খারা যা চ অতীতানাগতপচ্চুপ্পন্নস্স অভিনন্দনা, ইদং একত্থং। অপি চ অঞ্ঞমঞ্ঞেহি পদেহি অঞ্ঞমঞ্ঞেহি অক্খরেহি অঞ্ঞমঞ্ঞেহি ব্যঞ্জনেহি অপরিমাণা ধম্মদেসনা ৰুত্তা ভগৰতা। এৰং সুত্তেন সুত্তং সংসন্দযিত্ৰা পুব্বাপরেন সদ্ধিং যোজযিত্ৰা সুত্তং নিদ্দিট্ঠং ভৰতি।
Papañco nāma vuccati anubandho. Yañcāha bhagavā ‘‘papañceti atītānāgatapaccuppannaṃ cakkhuviññeyyaṃ rūpaṃ ārabbhā’’ti. Yañcāha bhagavā – ‘‘atīte, rādha, rūpe anapekkho hohi, anāgataṃ rūpaṃ mā abhinandi, paccuppannassa rūpassa nibbidāya virāgāya nirodhāya paṭinissaggāya paṭipajjā’’ti. Idaṃ bhagavato pubbāparena yujjati. Yo cāpi papañco ye ca saṅkhārā yā ca atītānāgatapaccuppannassa abhinandanā, idaṃ ekatthaṃ. Api ca aññamaññehi padehi aññamaññehi akkharehi aññamaññehi byañjanehi aparimāṇā dhammadesanā vuttā bhagavatā. Evaṃ suttena suttaṃ saṃsandayitvā pubbāparena saddhiṃ yojayitvā suttaṃ niddiṭṭhaṃ bhavati.
সো চাযং 35 পুব্বাপরো সন্ধি চতুব্বিধো অত্থসন্ধি ব্যঞ্জনসন্ধি দেসনাসন্ধি নিদ্দেসসন্ধীতি।
So cāyaṃ 36 pubbāparo sandhi catubbidho atthasandhi byañjanasandhi desanāsandhi niddesasandhīti.
তত্থ অত্থসন্ধি ছপ্পদানি সঙ্কাসনা পকাসনা ৰিৰরণা ৰিভজনা উত্তানীকম্মতা পঞ্ঞত্তীতি।
Tattha atthasandhi chappadāni saṅkāsanā pakāsanā vivaraṇā vibhajanā uttānīkammatā paññattīti.
ব্যঞ্জনসন্ধি ছপ্পদানি অক্খরং পদং ব্যঞ্জনং আকারো নিরুত্তি নিদ্দেসোতি।
Byañjanasandhi chappadāni akkharaṃ padaṃ byañjanaṃ ākāro nirutti niddesoti.
দেসনাসন্ধি ন চ পথৰিং নিস্সায ঝাযতি ঝাযী ঝাযতি চ। ন চ আপং নিস্সায ঝাযতি ঝাযী ঝাযতি চ, ন চ তেজং নিস্সায ঝাযতি ঝাযী ঝাযতি চ, ন চ ৰাযুং নিস্সায ঝাযতি ঝাযী ঝাযতি চ। ন চ আকাসানঞ্চাযতনং নিস্সায…পে॰… ন চ ৰিঞ্ঞাণঞ্চাযতনং নিস্সায…পে॰… ন চ আকিঞ্চঞ্ঞাযতনং নিস্সায…পে॰… ন চ নেৰসঞ্ঞানাসঞ্ঞাযতনং নিস্সায…পে॰… ন চ ইমং লোকং নিস্সায…পে॰… ন চ পরলোকং নিস্সায ঝাযতি ঝাযী ঝাযতি চ। যমিদং উভযমন্তরেন দিট্ঠং সুতং মুতং ৰিঞ্ঞাতং পত্তং পরিযেসিতং ৰিতক্কিতং ৰিচারিতং মনসানুচিন্তিতং, তম্পি নিস্সায ন ঝাযতি ঝাযী ঝাযতি চ। অযং সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায অনিস্সিতেন চিত্তেন ন ঞাযতি ঝাযন্তো।
Desanāsandhi na ca pathaviṃ nissāya jhāyati jhāyī jhāyati ca. Na ca āpaṃ nissāya jhāyati jhāyī jhāyati ca, na ca tejaṃ nissāya jhāyati jhāyī jhāyati ca, na ca vāyuṃ nissāya jhāyati jhāyī jhāyati ca. Na ca ākāsānañcāyatanaṃ nissāya…pe… na ca viññāṇañcāyatanaṃ nissāya…pe… na ca ākiñcaññāyatanaṃ nissāya…pe… na ca nevasaññānāsaññāyatanaṃ nissāya…pe… na ca imaṃ lokaṃ nissāya…pe… na ca paralokaṃ nissāya jhāyati jhāyī jhāyati ca. Yamidaṃ ubhayamantarena diṭṭhaṃ sutaṃ mutaṃ viññātaṃ pattaṃ pariyesitaṃ vitakkitaṃ vicāritaṃ manasānucintitaṃ, tampi nissāya na jhāyati jhāyī jhāyati ca. Ayaṃ sadevake loke samārake sabrahmake sassamaṇabrāhmaṇiyā pajāya sadevamanussāya anissitena cittena na ñāyati jhāyanto.
যথা মারো পাপিমা গোধিকস্স কুলপুত্তস্স 37 ৰিঞ্ঞাণং সমন্ৰেসন্তো ন জানাতি ন পস্সতি। সো হি পপঞ্চাতীতো তণ্হাপহানেন দিট্ঠিনিস্সযোপিস্স নত্থি। যথা চ গোধিকস্স, এৰং ৰক্কলিস্স সদেৰকেন লোকেন সমারকেন সব্রহ্মকেন সস্সমণব্রাহ্মণিযা পজায সদেৰমনুস্সায অনিস্সিতচিত্তা ন ঞাযন্তি ঝাযমানা। অযং দেসনাসন্ধি।
Yathā māro pāpimā godhikassa kulaputtassa 38 viññāṇaṃ samanvesanto na jānāti na passati. So hi papañcātīto taṇhāpahānena diṭṭhinissayopissa natthi. Yathā ca godhikassa, evaṃ vakkalissa sadevakena lokena samārakena sabrahmakena sassamaṇabrāhmaṇiyā pajāya sadevamanussāya anissitacittā na ñāyanti jhāyamānā. Ayaṃ desanāsandhi.
তত্থ কতমা নিদ্দেসসন্ধি? নিস্সিতচিত্তা অকুসলপক্খেন নিদ্দিসিতব্বা, অনিস্সিতচিত্তা কুসলপক্খেন নিদ্দিসিতব্বা। নিস্সিতচিত্তা কিলেসেন নিদ্দিসিতব্বা, অনিস্সিতচিত্তা ৰোদানেন নিদ্দিসিতব্বা। নিস্সিতচিত্তা সংসারপ্পৰত্তিযা নিদ্দিসিতব্বা, অনিস্সিতচিত্তা সংসারনিৰত্তিযা নিদ্দিসিতব্বা। নিস্সিতচিত্তা তণ্হায চ অৰিজ্জায চ নিদ্দিসিতব্বা, অনিস্সিতচিত্তা সমথেন চ ৰিপস্সনায চ নিদ্দিসিতব্বা। নিস্সিতচিত্তা অহিরিকেন চ অনোত্তপ্পেন চ নিদ্দিসিতব্বা, অনিস্সিতচিত্তা হিরিযা চ ওত্তপ্পেন চ নিদ্দিসিতব্বা। নিস্সিতচিত্তা অসতিযা চ অসম্পজঞ্ঞেন চ নিদ্দিসিতব্বা, অনিস্সিতচিত্তা সতিযা চ সম্পজঞ্ঞেন চ নিদ্দিসিতব্বা। নিস্সিতচিত্তা অযোনিযা চ অযোনিসোমনসিকারেন চ নিদ্দিসিতব্বা, অনিস্সিতচিত্তা যোনিযা চ যোনিসোমনসিকারেন চ নিদ্দিসিতব্বা। নিস্সিতচিত্তা কোসজ্জেন চ দোৰচস্সেন চ নিদ্দিসিতব্বা, অনিস্সিতচিত্তা ৰীরিযারম্ভেন চ সোৰচস্সেন চ নিদ্দিসিতব্বা। নিস্সিতচিত্তা অস্সদ্ধিযেন চ পমাদেন চ নিদ্দিসিতব্বা, অনিস্সিতচিত্তা সদ্ধায চ অপ্পমাদেন চ নিদ্দিসিতব্বা। নিস্সিতচিত্তা অসদ্ধম্মস্সৰনেন চ অসংৰরণেন চ নিদ্দিসিতব্বা, অনিস্সিতচিত্তা সদ্ধম্মস্সৰনেন চ সংৰরেন চ নিদ্দিসিতব্বা। নিস্সিতচিত্তা অভিজ্ঝায চ ব্যাপাদেন চ নিদ্দিসিতব্বা, অনিস্সিতচিত্তা অনভিজ্ঝায চ অব্যাপাদেন চ নিদ্দিসিতব্বা। নিস্সিতচিত্তা নীৰরণেহি চ সংযোজনিযেহি চ নিদ্দিসিতব্বা, অনিস্সিতচিত্তা রাগৰিরাগায চ চেতোৰিমুত্তিযা অৰিজ্জাৰিরাগায চ পঞ্ঞাৰিমুত্তিযা নিদ্দিসিতব্বা। নিস্সিতচিত্তা উচ্ছেদদিট্ঠিযা চ সস্সতদিট্ঠিযা চ নিদ্দিসিতব্বা, অনিস্সিতচিত্তা সউপাদিসেসায চ অনুপাদিসেসায চ নিব্বানধাতুযা নিদ্দিসিতব্বা। অযং নিদ্দেসসন্ধি। তেনাহ আযস্মা মহাকচ্চাযনো ‘‘নেরুত্তমধিপ্পাযো’’তি।
Tattha katamā niddesasandhi? Nissitacittā akusalapakkhena niddisitabbā, anissitacittā kusalapakkhena niddisitabbā. Nissitacittā kilesena niddisitabbā, anissitacittā vodānena niddisitabbā. Nissitacittā saṃsārappavattiyā niddisitabbā, anissitacittā saṃsāranivattiyā niddisitabbā. Nissitacittā taṇhāya ca avijjāya ca niddisitabbā, anissitacittā samathena ca vipassanāya ca niddisitabbā. Nissitacittā ahirikena ca anottappena ca niddisitabbā, anissitacittā hiriyā ca ottappena ca niddisitabbā. Nissitacittā asatiyā ca asampajaññena ca niddisitabbā, anissitacittā satiyā ca sampajaññena ca niddisitabbā. Nissitacittā ayoniyā ca ayonisomanasikārena ca niddisitabbā, anissitacittā yoniyā ca yonisomanasikārena ca niddisitabbā. Nissitacittā kosajjena ca dovacassena ca niddisitabbā, anissitacittā vīriyārambhena ca sovacassena ca niddisitabbā. Nissitacittā assaddhiyena ca pamādena ca niddisitabbā, anissitacittā saddhāya ca appamādena ca niddisitabbā. Nissitacittā asaddhammassavanena ca asaṃvaraṇena ca niddisitabbā, anissitacittā saddhammassavanena ca saṃvarena ca niddisitabbā. Nissitacittā abhijjhāya ca byāpādena ca niddisitabbā, anissitacittā anabhijjhāya ca abyāpādena ca niddisitabbā. Nissitacittā nīvaraṇehi ca saṃyojaniyehi ca niddisitabbā, anissitacittā rāgavirāgāya ca cetovimuttiyā avijjāvirāgāya ca paññāvimuttiyā niddisitabbā. Nissitacittā ucchedadiṭṭhiyā ca sassatadiṭṭhiyā ca niddisitabbā, anissitacittā saupādisesāya ca anupādisesāya ca nibbānadhātuyā niddisitabbā. Ayaṃ niddesasandhi. Tenāha āyasmā mahākaccāyano ‘‘neruttamadhippāyo’’ti.
নিযুত্তো চতুব্যূহো হারো।
Niyutto catubyūho hāro.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ৬. চতুব্যূহহারৰিভঙ্গৰণ্ণনা • 6. Catubyūhahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ৬. চতুব্যূহহারৰিভঙ্গৰণ্ণনা • 6. Catubyūhahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ৬. চতুব্যূহহারৰিভঙ্গৰিভাৰনা • 6. Catubyūhahāravibhaṅgavibhāvanā
