| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. சதுசக்கஸுத்தவண்ணனா
9. Catucakkasuttavaṇṇanā
29. நவமே சதுசக்கந்தி சதுஇரியாபத²ங். இரியாபதோ² ஹி இத⁴ சக்கந்தி அதி⁴ப்பேதோ. நவத்³வாரந்தி நவஹி வணமுகே²ஹி நவத்³வாரங். புண்ணந்தி அஸுசிபூரங். லோபே⁴ன ஸங்யுதந்தி தண்ஹாய ஸங்யுத்தங். கத²ங் யாத்ரா ப⁴விஸ்ஸதீதி ஏதஸ்ஸ ஏவரூபஸ்ஸ ஸரீரஸ்ஸ கத²ங் நிக்³க³மனங் ப⁴விஸ்ஸதி, கத²ங் முத்தி பரிமுத்தி ஸமதிக்கமோ ப⁴விஸ்ஸதீதி புச்ச²தி. நத்³தி⁴ந்தி உபனாஹங், புப்³ப³காலே கோதோ⁴, அபரகாலே உபனாஹோதி ஏவங் பவத்தங் ப³லவகோத⁴ந்தி அத்தோ². வரத்தந்தி ‘‘செ²த்வா நத்³தி⁴ வரத்தஞ்ச, ஸந்தா³னங் ஸஹனுக்கம’’ந்தி கா³தா²ய (த⁴॰ ப॰ 398; ஸு॰ நி॰ 627) தண்ஹா வரத்தா, தி³ட்டி² ஸந்தா³னங் நாம ஜாதங். இத⁴ பன பாளினித்³தி³ட்டே² கிலேஸே ட²பெத்வா அவஸேஸா ‘‘வரத்தா’’தி வேதி³தப்³பா³, இதி கிலேஸவரத்தஞ்ச செ²த்வாதி அத்தோ². இச்சா² லோப⁴ந்தி ஏகோயேவ த⁴ம்மோ இச்ச²னட்டே²ன இச்சா², லுப்³ப⁴னட்டே²ன லோபோ⁴தி வுத்தோ. பட²முப்பத்திகா வா து³ப்³ப³லா இச்சா², அபராபருப்பத்திகோ ப³லவா லோபோ⁴. அலத்³த⁴பத்த²னா வா இச்சா², படிலத்³த⁴வத்து²ம்ஹி லோபோ⁴. ஸமூலங் தண்ஹந்தி அவிஜ்ஜாமூலேன ஸமூலகங் தண்ஹங். அப்³பு³ய்ஹாதி அக்³க³மக்³கே³ன உப்பாடெத்வா. ஸேஸங் உத்தானமேவாதி. நவமங்.
29. Navame catucakkanti catuiriyāpathaṃ. Iriyāpatho hi idha cakkanti adhippeto. Navadvāranti navahi vaṇamukhehi navadvāraṃ. Puṇṇanti asucipūraṃ. Lobhena saṃyutanti taṇhāya saṃyuttaṃ. Kathaṃ yātrā bhavissatīti etassa evarūpassa sarīrassa kathaṃ niggamanaṃ bhavissati, kathaṃ mutti parimutti samatikkamo bhavissatīti pucchati. Naddhinti upanāhaṃ, pubbakāle kodho, aparakāle upanāhoti evaṃ pavattaṃ balavakodhanti attho. Varattanti ‘‘chetvā naddhi varattañca, sandānaṃ sahanukkama’’nti gāthāya (dha. pa. 398; su. ni. 627) taṇhā varattā, diṭṭhi sandānaṃ nāma jātaṃ. Idha pana pāḷiniddiṭṭhe kilese ṭhapetvā avasesā ‘‘varattā’’ti veditabbā, iti kilesavarattañca chetvāti attho. Icchā lobhanti ekoyeva dhammo icchanaṭṭhena icchā, lubbhanaṭṭhena lobhoti vutto. Paṭhamuppattikā vā dubbalā icchā, aparāparuppattiko balavā lobho. Aladdhapatthanā vā icchā, paṭiladdhavatthumhi lobho. Samūlaṃ taṇhanti avijjāmūlena samūlakaṃ taṇhaṃ. Abbuyhāti aggamaggena uppāṭetvā. Sesaṃ uttānamevāti. Navamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. சதுசக்கஸுத்தங் • 9. Catucakkasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. சதுசக்கஸுத்தவண்ணனா • 9. Catucakkasuttavaṇṇanā
