| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
(4.) சதுக்கனித்³தே³ஸவண்ணனா
(4.) Catukkaniddesavaṇṇanā
793. சதுப்³பி³தே⁴ன ஞாணவத்து²னித்³தே³ஸே அத்தி² தி³ன்னந்திஆதீ³ஸு தி³ன்னபச்சயா ப²லங் அத்தீ²தி இமினா உபாயேன அத்தோ² வேதி³தப்³போ³. இத³ங் வுச்சதீதி யங் ஞாணங் ‘இத³ங் கம்மங் ஸகங், இத³ங் நோ ஸக’ந்தி ஜானாதி – இத³ங் கம்மஸ்ஸகதஞாணங் நாம வுச்சதீதி அத்தோ². தத்த² திவித⁴ங் காயது³ச்சரிதங், சதுப்³பி³த⁴ங் வசீது³ச்சரிதங், திவித⁴ங் மனோது³ச்சரிதந்தி இத³ங் ந ஸககம்மங் நாம. தீஸு த்³வாரேஸு த³ஸவித⁴ம்பி ஸுசரிதங் ஸககம்மங் நாம. அத்தனோ வாபி ஹோது பரஸ்ஸ வா ஸப்³ப³ம்பி அகுஸலங் ந ஸககம்மங் நாம. கஸ்மா? அத்த²ப⁴ஞ்ஜனதோ அனத்த²ஜனநதோ ச. அத்தனோ வா ஹோது பரஸ்ஸ வா ஸப்³ப³ம்பி குஸலங் ஸககம்மங் நாம. கஸ்மா? அனத்த²ப⁴ஞ்ஜனதோ அத்த²ஜனநதோ ச. ஏவங் ஜானநஸமத்தே² இமஸ்மிங் கம்மஸ்ஸகதஞாணே ட²த்வா ப³ஹுங் தா³னங் த³த்வா ஸீலங் பூரெத்வா உபோஸத²ங் ஸமாதி³யித்வா ஸுகே²ன ஸுக²ங் ஸம்பத்தியா ஸம்பத்திங் அனுப⁴வித்வா நிப்³பா³னங் பத்தானங் க³ணனபரிச்சே²தோ³ நத்தி². யதா² ஹி ஸத⁴னோ புரிஸோ பஞ்சஸு ஸகடஸதேஸு ஸப்பிமது⁴பா²ணிதாதீ³னி சேவ லோணதிலதண்டு³லாதீ³னி ச ஆரோபெத்வா கந்தாரமக்³க³ங் படிபன்னோ கேனசிதே³வ கரணீயேன அத்தே² உப்பன்னே ஸப்³பே³ஸங் உபகரணானங் க³ஹிதத்தா ந சிந்தேதி, ந பரிதஸ்ஸதி, ஸுகே²னேவ கே²மந்தங் பாபுணாதி; ஏவமேவ இமஸ்மிம்பி கம்மஸ்ஸகதஞாணே ட²த்வா ப³ஹுங் தா³னங் த³த்வா…பே॰… நிப்³பா³னங் பத்தானங் க³ணனபதோ² நத்தி². ட²பெத்வா ஸச்சானுலோமிகங் ஞாணந்தி மக்³க³ஸச்சஸ்ஸ பரமத்த²ஸச்சஸ்ஸ ச அனுலோமனதோ ஸச்சானுலோமிகந்தி லத்³த⁴னாமங் விபஸ்ஸனாஞாணங் ட²பெத்வா அவஸேஸா ஸப்³பா³பி ஸாஸவா குஸலா பஞ்ஞா கம்மஸ்ஸகதஞாணமேவாதி அத்தோ².
793. Catubbidhena ñāṇavatthuniddese atthi dinnantiādīsu dinnapaccayā phalaṃ atthīti iminā upāyena attho veditabbo. Idaṃ vuccatīti yaṃ ñāṇaṃ ‘idaṃ kammaṃ sakaṃ, idaṃ no saka’nti jānāti – idaṃ kammassakatañāṇaṃ nāma vuccatīti attho. Tattha tividhaṃ kāyaduccaritaṃ, catubbidhaṃ vacīduccaritaṃ, tividhaṃ manoduccaritanti idaṃ na sakakammaṃ nāma. Tīsu dvāresu dasavidhampi sucaritaṃ sakakammaṃ nāma. Attano vāpi hotu parassa vā sabbampi akusalaṃ na sakakammaṃ nāma. Kasmā? Atthabhañjanato anatthajananato ca. Attano vā hotu parassa vā sabbampi kusalaṃ sakakammaṃ nāma. Kasmā? Anatthabhañjanato atthajananato ca. Evaṃ jānanasamatthe imasmiṃ kammassakatañāṇe ṭhatvā bahuṃ dānaṃ datvā sīlaṃ pūretvā uposathaṃ samādiyitvā sukhena sukhaṃ sampattiyā sampattiṃ anubhavitvā nibbānaṃ pattānaṃ gaṇanaparicchedo natthi. Yathā hi sadhano puriso pañcasu sakaṭasatesu sappimadhuphāṇitādīni ceva loṇatilataṇḍulādīni ca āropetvā kantāramaggaṃ paṭipanno kenacideva karaṇīyena atthe uppanne sabbesaṃ upakaraṇānaṃ gahitattā na cinteti, na paritassati, sukheneva khemantaṃ pāpuṇāti; evameva imasmimpi kammassakatañāṇe ṭhatvā bahuṃ dānaṃ datvā…pe… nibbānaṃ pattānaṃ gaṇanapatho natthi. Ṭhapetvā saccānulomikaṃ ñāṇanti maggasaccassa paramatthasaccassa ca anulomanato saccānulomikanti laddhanāmaṃ vipassanāñāṇaṃ ṭhapetvā avasesā sabbāpi sāsavā kusalā paññā kammassakatañāṇamevāti attho.
794. மக்³க³ஸமங்கி³ஸ்ஸ ஞாணங் து³க்கே²பேதங் ஞாணந்தி எத்த² ஏகமேவ மக்³க³ஞாணங் சதூஸு ஸச்சேஸு ஏகபடிவேத⁴வஸேன சதூஸு டா²னேஸு ஸங்க³ஹிதங்.
794. Maggasamaṅgissañāṇaṃ dukkhepetaṃ ñāṇanti ettha ekameva maggañāṇaṃ catūsu saccesu ekapaṭivedhavasena catūsu ṭhānesu saṅgahitaṃ.
796. த⁴ம்மே ஞாணந்தி எத்த² மக்³க³பஞ்ஞா தாவ சதுன்னங் ஸச்சானங் ஏகபடிவேத⁴வஸேன த⁴ம்மே ஞாணங் நாம ஹோது; ப²லபஞ்ஞா கத²ங் த⁴ம்மே ஞாணங் நாமாதி? நிரோத⁴ஸச்சவஸேன. து³விதா⁴பி ஹேஸா பஞ்ஞா அபரப்பச்சயே அத்த²பச்சக்கே² அரியஸச்சத⁴ம்மே கிச்சதோ ச ஆரம்மணதோ ச பவத்தத்தா த⁴ம்மே ஞாணந்தி வேதி³தப்³பா³. ஸோ இமினா த⁴ம்மேனாதி எத்த² மக்³க³ஞாணங் த⁴ம்மகோ³சரத்தா கோ³சரவோஹாரேன த⁴ம்மோதி வுத்தங், உபயோக³த்தே² வா கரணவசனங்; இமங் த⁴ம்மங் ஞாதேனாதி அத்தோ²; சதுஸச்சத⁴ம்மங் ஜானித்வா டி²தேன மக்³க³ஞாணேனாதி வுத்தங் ஹோதி. தி³ட்டே²னாதி த³ஸ்ஸனேன; த⁴ம்மங் பஸ்ஸித்வா டி²தேனாதி அத்தோ². பத்தேனாதி சத்தாரி அரியஸச்சானி பத்வா டி²தத்தா த⁴ம்மங் பத்தேன. விதி³தேனாதி மக்³க³ஞாணேன சத்தாரி அரியஸச்சானி விதி³தானி பாகடானி கதானி. தஸ்மா தங் த⁴ம்மங் விதி³தங் நாம ஹோதி. தேன விதி³தத⁴ம்மேன. பரியோகா³ள்ஹேனாதி சதுஸச்சத⁴ம்மங் பரியோகா³ஹெத்வா டி²தேன. நயங் நேதீதி அதீதே ச அனாக³தே ச நயங் நேதி ஹரதி பேஸேதி. இத³ங் பன ந மக்³க³ஞாணஸ்ஸ கிச்சங், பச்சவெக்க²ணஞாணஸ்ஸ கிச்சங். ஸத்தா²ரா பன மக்³க³ஞாணங் அதீதானாக³தே நயங் நயனஸதி³ஸங் கதங். கஸ்மா? மக்³க³மூலகத்தா. பா⁴விதமக்³க³ஸ்ஸ ஹி பச்சவெக்க²ணா நாம ஹோதி. தஸ்மா ஸத்தா² மக்³க³ஞாணமேவ நயங் நயனஸதி³ஸங் அகாஸி. அபிச ஏவமெத்த² அத்தோ² த³ட்ட²ப்³போ³ – யதே³தங் இமினா சதுஸச்சகோ³சரங் மக்³க³ஞாணங் அதி⁴க³தங், தேன ஞாணேன காரணபூ⁴தேன அதீதானாக³தே பச்சவெக்க²ணஞாணஸங்கா²தங் நயங் நேதி.
796. Dhamme ñāṇanti ettha maggapaññā tāva catunnaṃ saccānaṃ ekapaṭivedhavasena dhamme ñāṇaṃ nāma hotu; phalapaññā kathaṃ dhamme ñāṇaṃ nāmāti? Nirodhasaccavasena. Duvidhāpi hesā paññā aparappaccaye atthapaccakkhe ariyasaccadhamme kiccato ca ārammaṇato ca pavattattā dhamme ñāṇanti veditabbā. So iminā dhammenāti ettha maggañāṇaṃ dhammagocarattā gocaravohārena dhammoti vuttaṃ, upayogatthe vā karaṇavacanaṃ; imaṃ dhammaṃ ñātenāti attho; catusaccadhammaṃ jānitvā ṭhitena maggañāṇenāti vuttaṃ hoti. Diṭṭhenāti dassanena; dhammaṃ passitvā ṭhitenāti attho. Pattenāti cattāri ariyasaccāni patvā ṭhitattā dhammaṃ pattena. Viditenāti maggañāṇena cattāri ariyasaccāni viditāni pākaṭāni katāni. Tasmā taṃ dhammaṃ viditaṃ nāma hoti. Tena viditadhammena. Pariyogāḷhenāti catusaccadhammaṃ pariyogāhetvā ṭhitena. Nayaṃ netīti atīte ca anāgate ca nayaṃ neti harati peseti. Idaṃ pana na maggañāṇassa kiccaṃ, paccavekkhaṇañāṇassa kiccaṃ. Satthārā pana maggañāṇaṃ atītānāgate nayaṃ nayanasadisaṃ kataṃ. Kasmā? Maggamūlakattā. Bhāvitamaggassa hi paccavekkhaṇā nāma hoti. Tasmā satthā maggañāṇameva nayaṃ nayanasadisaṃ akāsi. Apica evamettha attho daṭṭhabbo – yadetaṃ iminā catusaccagocaraṃ maggañāṇaṃ adhigataṃ, tena ñāṇena kāraṇabhūtena atītānāgate paccavekkhaṇañāṇasaṅkhātaṃ nayaṃ neti.
இதா³னி யதா² தேன நயங் நேதி, தங் ஆகாரங் த³ஸ்ஸேதுங் யே ஹி கேசி அதீதமத்³தா⁴னந்திஆதி³மாஹ. தத்த² அப்³ப⁴ஞ்ஞங்ஸூதி ஜானிங்ஸு படிவிஜ்ஜி²ங்ஸு. இமஞ்ஞேவாதி யங் து³க்க²ங் அதீதே அப்³ப⁴ஞ்ஞங்ஸு, யஞ்ச அனாக³தே அபி⁴ஜானிஸ்ஸந்தி, ந தஞ்ஞேவ இமங்; ஸரிக்க²ட்டே²ன பன ஏவங் வுத்தங். அதீதேபி ஹி ட²பெத்வா தண்ஹங் தேபூ⁴மகக்க²ந்தே⁴யேவ து³க்க²ஸச்சந்தி படிவிஜ்ஜி²ங்ஸு, தண்ஹங்யேவ ஸமுத³யஸச்சந்தி நிப்³பா³னமேவ நிரோத⁴ஸச்சந்தி அரியமக்³க³மேவ மக்³க³ஸச்சந்தி படிவிஜ்ஜி²ங்ஸு, அனாக³தேபி ஏவமேவ படிவிஜ்ஜி²ஸ்ஸந்தி, ஏதரஹிபி ஏவமேவ படிவிஜ்ஜ²ந்தீதி ஸரிக்க²ட்டே²ன ‘‘இமஞ்ஞேவா’’தி வுத்தங். இத³ங் வுச்சதி அன்வயே ஞாணந்தி இத³ங் அனுக³மனஞாணங் நயனஞாணங் காரணஞாணந்தி வுச்சதி.
Idāni yathā tena nayaṃ neti, taṃ ākāraṃ dassetuṃ ye hi keci atītamaddhānantiādimāha. Tattha abbhaññaṃsūti jāniṃsu paṭivijjhiṃsu. Imaññevāti yaṃ dukkhaṃ atīte abbhaññaṃsu, yañca anāgate abhijānissanti, na taññeva imaṃ; sarikkhaṭṭhena pana evaṃ vuttaṃ. Atītepi hi ṭhapetvā taṇhaṃ tebhūmakakkhandheyeva dukkhasaccanti paṭivijjhiṃsu, taṇhaṃyeva samudayasaccanti nibbānameva nirodhasaccanti ariyamaggameva maggasaccanti paṭivijjhiṃsu, anāgatepi evameva paṭivijjhissanti, etarahipi evameva paṭivijjhantīti sarikkhaṭṭhena ‘‘imaññevā’’ti vuttaṃ. Idaṃ vuccati anvaye ñāṇanti idaṃ anugamanañāṇaṃ nayanañāṇaṃ kāraṇañāṇanti vuccati.
பரியே ஞாணந்தி சித்தபரிச்சே²த³ஞாணங். பரஸத்தானந்தி ட²பெத்வா அத்தானங் ஸேஸஸத்தானங். இதரங் தஸ்ஸேவ வேவசனங். சேதஸா சேதோ பரிச்ச பஜானாதீதி அத்தனோ சித்தேன தேஸங் சித்தங் ஸராகா³தி³வஸேன பரிச்சி²ந்தி³த்வா நானப்பகாரதோ ஜானாதி. ஸராக³ங் வாதிஆதீ³ஸு யங் வத்தப்³ப³ங், தங் ஹெட்டா² ஸதிபட்டா²னவிப⁴ங்கே³ வுத்தமேவ. அயங் பன விஸேஸோ – இத⁴ அனுத்தரங் வா சித்தங் விமுத்தங் வா சித்தந்தி எத்த² லோகுத்தரம்பி லப்³ப⁴தி. அவிபஸ்ஸனூபக³ம்பி ஹி பரசித்தஞாணஸ்ஸ விஸயோ ஹோதியேவ.
Pariyeñāṇanti cittaparicchedañāṇaṃ. Parasattānanti ṭhapetvā attānaṃ sesasattānaṃ. Itaraṃ tasseva vevacanaṃ. Cetasā ceto paricca pajānātīti attano cittena tesaṃ cittaṃ sarāgādivasena paricchinditvā nānappakārato jānāti. Sarāgaṃ vātiādīsu yaṃ vattabbaṃ, taṃ heṭṭhā satipaṭṭhānavibhaṅge vuttameva. Ayaṃ pana viseso – idha anuttaraṃ vā cittaṃ vimuttaṃ vā cittanti ettha lokuttarampi labbhati. Avipassanūpagampi hi paracittañāṇassa visayo hotiyeva.
அவஸேஸா பஞ்ஞாதி த⁴ம்மே ஞாணாதி³கா திஸ்ஸோ பஞ்ஞா ட²பெத்வா ஸேஸா ஸப்³பா³பி பஞ்ஞா ஞாணந்தி ஸம்மதத்தா ஸம்முதிஞாணங் நாம ஹோதி. வசனத்தோ² பனெத்த² ஸம்முதிம்ஹி ஞாணந்தி ஸம்முதிஞாணங்.
Avasesā paññāti dhamme ñāṇādikā tisso paññā ṭhapetvā sesā sabbāpi paññā ñāṇanti sammatattā sammutiñāṇaṃ nāma hoti. Vacanattho panettha sammutimhi ñāṇanti sammutiñāṇaṃ.
797. காமாவசரகுஸலே பஞ்ஞாதி அயஞ்ஹி ஏகந்தேன வட்டஸ்மிங் சுதிபடிஸந்தி⁴ங் ஆசினதேவ, தஸ்மா ‘‘ஆசயாய நோ அபசயாயா’’தி வுத்தா. லோகுத்தரமக்³க³பஞ்ஞா பன யஸ்மா சுதிபடிஸந்தி⁴ங் அபசினதேவ, தஸ்மா ‘‘அபசயாய நோ ஆசயாயா’’தி வுத்தா. ரூபாவசராரூபாவசரபஞ்ஞா சுதிபடிஸந்தி⁴ம்பி ஆசினதி, விக்க²ம்ப⁴னவஸேன கிலேஸே சேவ கிலேஸமூலகே ச த⁴ம்மே அபசினதி, தஸ்மா ‘‘ஆசயாய சேவ அபசயாய சா’’தி வுத்தா. ஸேஸா நேவ சுதிபடிஸந்தி⁴ங் ஆசினதி ந அபசினதி, தஸ்மா ‘‘நேவ ஆசயாய நோ அபசயாயா’’தி வுத்தா.
797. Kāmāvacarakusale paññāti ayañhi ekantena vaṭṭasmiṃ cutipaṭisandhiṃ ācinateva, tasmā ‘‘ācayāya no apacayāyā’’ti vuttā. Lokuttaramaggapaññā pana yasmā cutipaṭisandhiṃ apacinateva, tasmā ‘‘apacayāya no ācayāyā’’ti vuttā. Rūpāvacarārūpāvacarapaññā cutipaṭisandhimpi ācinati, vikkhambhanavasena kilese ceva kilesamūlake ca dhamme apacinati, tasmā ‘‘ācayāya ceva apacayāya cā’’ti vuttā. Sesā neva cutipaṭisandhiṃ ācinati na apacinati, tasmā ‘‘neva ācayāya no apacayāyā’’ti vuttā.
798. ந ச அபி⁴ஞ்ஞாயோ படிவிஜ்ஜ²தீதி இத³ங் பட²மஜ்ஜா²னபஞ்ஞங் ஸந்தா⁴ய வுத்தங். ஸா ஹிஸ்ஸ காமவிவேகேன பத்தப்³ப³த்தா கிலேஸனிப்³பி³தா³ய ஸங்வத்ததி. தாய சேஸ காமேஸு வீதராகோ³ ஹோதி, அபி⁴ஞ்ஞாபாத³கபா⁴வங் பன அப்பத்ததாய நேவ பஞ்ச அபி⁴ஞ்ஞாயோ படிவிஜ்ஜ²தி, நிமித்தாரம்மணத்தா ந ஸச்சானி படிவிஜ்ஜ²தி. ஏவமயங் பஞ்ஞா நிப்³பி³தா³ய ஹோதி நோ படிவேதா⁴ய. ஸ்வேவாதி பட²மஜ்ஜா²னங் பத்வா டி²தோ. காமேஸு வீதராகோ³ ஸமானோதி ததா² விக்க²ம்பி⁴தானங்யேவ காமானங் வஸேன வீதராகோ³. அபி⁴ஞ்ஞாயோ படிவிஜ்ஜ²தீதி பஞ்ச அபி⁴ஞ்ஞாயோ படிவிஜ்ஜ²தி. இத³ங் சதுத்த²ஜ்ஜா²னபஞ்ஞங் ஸந்தா⁴ய வுத்தங். சதுத்த²ஜ்ஜா²னபஞ்ஞா ஹி அபி⁴ஞ்ஞாபாத³கபா⁴வேனாபி பஞ்ச அபி⁴ஞ்ஞாயோ படிவிஜ்ஜ²தி, அபி⁴ஞ்ஞாபா⁴வப்பத்தியாபி படிவிஜ்ஜ²தி ஏவ. தஸ்மா ஸா படிவேதா⁴ய ஹோதி. பட²மஜ்ஜா²னபஞ்ஞாய ஏவ பன கிலேஸேஸுபி நிப்³பி³ந்த³த்தா நோ நிப்³பி³தா³ய. யா பனாயங் து³தியததியஜ்ஜா²னபஞ்ஞா, ஸா கதரகொட்டா²ஸங் ப⁴ஜதீதி? ஸோமனஸ்ஸவஸேன பட²மஜ்ஜா²னம்பி ப⁴ஜதி, அவிதக்கவஸேன சதுத்த²ஜ்ஜா²னம்பி. ஏவமேஸா பட²மஜ்ஜா²னஸன்னிஸ்ஸிதா வா சதுத்த²ஜ்ஜா²னஸன்னிஸ்ஸிதா வா காதப்³பா³. நிப்³பி³தா³ய சேவ படிவேதா⁴ய சாதி மக்³க³பஞ்ஞா ஸப்³ப³ஸ்மிம்பி வட்டே நிப்³பி³ந்த³னதோ நிப்³பி³தா³ய, ச²ட்ட²ங் அபி⁴ஞ்ஞங் படிவிஜ்ஜ²னதோ படிவேதா⁴ய ச ஹோதி.
798. Na ca abhiññāyo paṭivijjhatīti idaṃ paṭhamajjhānapaññaṃ sandhāya vuttaṃ. Sā hissa kāmavivekena pattabbattā kilesanibbidāya saṃvattati. Tāya cesa kāmesu vītarāgo hoti, abhiññāpādakabhāvaṃ pana appattatāya neva pañca abhiññāyo paṭivijjhati, nimittārammaṇattā na saccāni paṭivijjhati. Evamayaṃ paññā nibbidāya hoti no paṭivedhāya. Svevāti paṭhamajjhānaṃ patvā ṭhito. Kāmesu vītarāgo samānoti tathā vikkhambhitānaṃyeva kāmānaṃ vasena vītarāgo. Abhiññāyo paṭivijjhatīti pañca abhiññāyo paṭivijjhati. Idaṃ catutthajjhānapaññaṃ sandhāya vuttaṃ. Catutthajjhānapaññā hi abhiññāpādakabhāvenāpi pañca abhiññāyo paṭivijjhati, abhiññābhāvappattiyāpi paṭivijjhati eva. Tasmā sā paṭivedhāya hoti. Paṭhamajjhānapaññāya eva pana kilesesupi nibbindattā no nibbidāya. Yā panāyaṃ dutiyatatiyajjhānapaññā, sā katarakoṭṭhāsaṃ bhajatīti? Somanassavasena paṭhamajjhānampi bhajati, avitakkavasena catutthajjhānampi. Evamesā paṭhamajjhānasannissitā vā catutthajjhānasannissitā vā kātabbā. Nibbidāyaceva paṭivedhāya cāti maggapaññā sabbasmimpi vaṭṭe nibbindanato nibbidāya, chaṭṭhaṃ abhiññaṃ paṭivijjhanato paṭivedhāya ca hoti.
799. பட²மஸ்ஸ ஜா²னஸ்ஸ லாபீ⁴திஆதீ³ஸு ய்வாயங் அப்பகு³ணஸ்ஸ பட²மஜ்ஜா²னஸ்ஸ லாபீ⁴. தங் ததோ வுட்டி²தங் ஆரம்மணவஸேன காமஸஹக³தா ஹுத்வா ஸஞ்ஞாமனஸிகாரா ஸமுதா³சரந்தி துத³ந்தி சோதெ³ந்தி. தஸ்ஸ காமானுபக்க²ந்தா³னங் ஸஞ்ஞாமனஸிகாரானங் வஸேன ஸா பட²மஜ்ஜா²னபஞ்ஞா ஹாயதி பரிஹாயதி; தஸ்மா ஹானபா⁴கி³னீதி வுத்தா. தத³னுத⁴ம்மதாதி தத³னுரூபஸபா⁴வா. ஸதி ஸந்திட்ட²தீதி இத³ங் மிச்சா²ஸதிங் ஸந்தா⁴ய வுத்தங், ந ஸம்மாஸதிங். யஸ்ஸ ஹி பட²மஜ்ஜா²னானுரூபஸபா⁴வா பட²மஜ்ஜா²னங் ஸந்ததோ பணீததோ தி³ஸ்வா அஸ்ஸாத³யமானா அபி⁴னந்த³மானா நிகந்தி உப்பஜ்ஜதி, தஸ்ஸ நிகந்திவஸேன ஸா பட²மஜ்ஜா²னபஞ்ஞா நேவ ஹாயதி, ந வட்³ட⁴தி, டி²திகொட்டா²ஸிகா ஹோதி. தேன வுத்தங் டி²திபா⁴கி³னீ பஞ்ஞாதி. அவிதக்கஸஹக³தாதி அவிதக்கங் து³தியஜ்ஜா²னங் ஸந்ததோ பணீததோ மனஸிகரோதோ ஆரம்மணவஸேன அவிதக்கஸஹக³தா. ஸமுதா³சரந்தீதி பகு³ணதோ பட²மஜ்ஜா²னதோ வுட்டி²தங் து³தியஜ்ஜா²னாதி⁴க³மத்தா²ய துத³ந்தி சோதெ³ந்தி. தஸ்ஸ உபரி து³தியஜ்ஜா²னானுபக்க²ந்தா³னங் ஸஞ்ஞாமனஸிகாரானங் வஸேன ஸா பட²மஜ்ஜா²னபஞ்ஞா விஸேஸபூ⁴தஸ்ஸ து³தியஜ்ஜா²னஸ்ஸ உப்பத்திட்டா²னதாய விஸேஸபா⁴கி³னீதி வுத்தா. நிப்³பி³தா³ஸஹக³தாதி தமேவ பட²மஜ்ஜா²னதோ வுட்டி²தங் நிப்³பி³தா³ஸங்கா²தேன விபஸ்ஸனாஞாணேன ஸஹக³தா. விபஸ்ஸனாஞாணஞ்ஹி ஜா²னங்க³பே⁴தே³ வத்தந்தே நிப்³பி³ந்த³தி உக்கண்ட²தி, தஸ்மா நிப்³பி³தா³தி வுச்சதி. ஸமுதா³சரந்தீதி நிப்³பா³னஸச்சி²கிரியத்தா²ய துத³ந்தி சோதெ³ந்தி. விராகூ³பஸஞ்ஹிதாதி விராக³ஸங்கா²தேன நிப்³பா³னேன உபஸங்ஹிதா. விபஸ்ஸனாஞாணம்ஹி ஸக்கா இமினா மக்³கே³ன விராக³ங் நிப்³பா³னங் ஸச்சி²காதுந்தி பவத்திதோ ‘‘விராகூ³பஸஞ்ஹித’’ந்தி வுச்சதி. தங்ஸம்பயுத்தா ஸஞ்ஞாமனஸிகாராபி விராகூ³பஸஞ்ஹிதா ஏவ நாம. தஸ்ஸ தேஸங் ஸஞ்ஞாமனஸிகாரானங் வஸேன ஸா பட²மஜ்ஜா²னபஞ்ஞா அரியமக்³க³படிவேத⁴ஸ்ஸ பத³ட்டா²னதாய நிப்³பே³த⁴பா⁴கி³னீதி வுத்தா. ஏவங் சதூஸு டா²னேஸு பட²மஜ்ஜா²னபஞ்ஞாவ கதி²தா. து³தியஜ்ஜா²னபஞ்ஞாதீ³ஸுபி இமினாவ நயேன அத்தோ² வேதி³தப்³போ³.
799. Paṭhamassa jhānassa lābhītiādīsu yvāyaṃ appaguṇassa paṭhamajjhānassa lābhī. Taṃ tato vuṭṭhitaṃ ārammaṇavasena kāmasahagatā hutvā saññāmanasikārā samudācaranti tudanti codenti. Tassa kāmānupakkhandānaṃ saññāmanasikārānaṃ vasena sā paṭhamajjhānapaññā hāyati parihāyati; tasmā hānabhāginīti vuttā. Tadanudhammatāti tadanurūpasabhāvā. Sati santiṭṭhatīti idaṃ micchāsatiṃ sandhāya vuttaṃ, na sammāsatiṃ. Yassa hi paṭhamajjhānānurūpasabhāvā paṭhamajjhānaṃ santato paṇītato disvā assādayamānā abhinandamānā nikanti uppajjati, tassa nikantivasena sā paṭhamajjhānapaññā neva hāyati, na vaḍḍhati, ṭhitikoṭṭhāsikā hoti. Tena vuttaṃ ṭhitibhāginī paññāti. Avitakkasahagatāti avitakkaṃ dutiyajjhānaṃ santato paṇītato manasikaroto ārammaṇavasena avitakkasahagatā. Samudācarantīti paguṇato paṭhamajjhānato vuṭṭhitaṃ dutiyajjhānādhigamatthāya tudanti codenti. Tassa upari dutiyajjhānānupakkhandānaṃ saññāmanasikārānaṃ vasena sā paṭhamajjhānapaññā visesabhūtassa dutiyajjhānassa uppattiṭṭhānatāya visesabhāginīti vuttā. Nibbidāsahagatāti tameva paṭhamajjhānato vuṭṭhitaṃ nibbidāsaṅkhātena vipassanāñāṇena sahagatā. Vipassanāñāṇañhi jhānaṅgabhede vattante nibbindati ukkaṇṭhati, tasmā nibbidāti vuccati. Samudācarantīti nibbānasacchikiriyatthāya tudanti codenti. Virāgūpasañhitāti virāgasaṅkhātena nibbānena upasaṃhitā. Vipassanāñāṇamhi sakkā iminā maggena virāgaṃ nibbānaṃ sacchikātunti pavattito ‘‘virāgūpasañhita’’nti vuccati. Taṃsampayuttā saññāmanasikārāpi virāgūpasañhitā eva nāma. Tassa tesaṃ saññāmanasikārānaṃ vasena sā paṭhamajjhānapaññā ariyamaggapaṭivedhassa padaṭṭhānatāya nibbedhabhāginīti vuttā. Evaṃ catūsu ṭhānesu paṭhamajjhānapaññāva kathitā. Dutiyajjhānapaññādīsupi imināva nayena attho veditabbo.
801. கிச்சே²ன கஸிரேன ஸமாதி⁴ங் உப்பாதெ³ந்தஸ்ஸாதி லோகுத்தரஸமாதி⁴ங் உப்பாதெ³ந்தஸ்ஸ புப்³ப³பா⁴கே³ ஆக³மனகாலே கிச்சே²ன கஸிரேன து³க்கே²ன ஸஸங்கா²ரேன ஸப்பயோகே³ன கிலமந்தஸ்ஸ கிலேஸே விக்க²ம்பெ⁴த்வா ஆக³தஸ்ஸ. த³ந்த⁴ங் தண்டா²னங் அபி⁴ஜானந்தஸ்ஸாதி விக்க²ம்பி⁴தேஸு கிலேஸேஸு விபஸ்ஸனாபரிவாஸே சிரங் வஸித்வா தங் லோகுத்தரஸமாதி⁴ஸங்கா²தங் டா²னங் த³ந்த⁴ங் ஸணிகங் அபி⁴ஜானந்தஸ்ஸ படிவிஜ்ஜ²ந்தஸ்ஸ , பாபுணந்தஸ்ஸாதி அத்தோ². அயங் வுச்சதீதி யா ஏஸா ஏவங் உப்பஜ்ஜதி, அயங் கிலேஸவிக்க²ம்ப⁴னபடிபதா³ய து³க்க²த்தா, விபஸ்ஸனாபரிவாஸபஞ்ஞாய ச த³ந்த⁴த்தா மக்³க³காலே ஏகசித்தக்க²ணே உப்பன்னாபி பஞ்ஞா ஆக³மனவஸேன து³க்க²படிபதா³ த³ந்தா⁴பி⁴ஞ்ஞா நாமாதி வுச்சதி. உபரி தீஸு பதே³ஸுபி இமினாவ நயேன அத்தோ² வேதி³தப்³போ³.
801. Kicchena kasirena samādhiṃ uppādentassāti lokuttarasamādhiṃ uppādentassa pubbabhāge āgamanakāle kicchena kasirena dukkhena sasaṅkhārena sappayogena kilamantassa kilese vikkhambhetvā āgatassa. Dandhaṃ taṇṭhānaṃ abhijānantassāti vikkhambhitesu kilesesu vipassanāparivāse ciraṃ vasitvā taṃ lokuttarasamādhisaṅkhātaṃ ṭhānaṃ dandhaṃ saṇikaṃ abhijānantassa paṭivijjhantassa , pāpuṇantassāti attho. Ayaṃ vuccatīti yā esā evaṃ uppajjati, ayaṃ kilesavikkhambhanapaṭipadāya dukkhattā, vipassanāparivāsapaññāya ca dandhattā maggakāle ekacittakkhaṇe uppannāpi paññā āgamanavasena dukkhapaṭipadā dandhābhiññā nāmāti vuccati. Upari tīsu padesupi imināva nayena attho veditabbo.
802. ஸமாதி⁴ஸ்ஸ ந நிகாமலாபி⁴ஸ்ஸாதி யோ ஸமாதி⁴ஸ்ஸ ந நிகாமலாபீ⁴ ஹோதி, ஸோ தஸ்ஸ ந நிகாமலாபீ⁴ நாம. யஸ்ஸ ஸமாதி⁴ உபரூபரி ஸமாபஜ்ஜனத்தா²ய உஸ்ஸக்கிதுங் பச்சயோ ந ஹோதி, தஸ்ஸ அப்பகு³ணஜ்ஜா²னலாபி⁴ஸ்ஸாதி அத்தோ². ஆரம்மணங் தோ²கங் ப²ரந்தஸ்ஸாதி பரித்தே ஸுப்பமத்தே வா ஸராவமத்தே வா ஆரம்மணே பரிகம்மங் கத்வா தத்தே²வ அப்பனங் பத்வா தங் அவட்³டி⁴தங் தோ²கமேவ ஆரம்மணங் ப²ரந்தஸ்ஸாதி அத்தோ². ஸேஸபதே³ஸுபி ஏஸேவ நயோ. நனிகாமலாபீ⁴படிபக்க²தோ ஹி பகு³ணஜ்ஜா²னலாபீ⁴ எத்த² நிகாமலாபீ⁴தி வுத்தோ. அவட்³டி⁴தாரம்மணபடிபக்க²தோ ச வட்³டி⁴தாரம்மணங் விபுலந்தி வுத்தங். ஸேஸங் தாதி³ஸமேவ.
802. Samādhissa na nikāmalābhissāti yo samādhissa na nikāmalābhī hoti, so tassa na nikāmalābhī nāma. Yassa samādhi uparūpari samāpajjanatthāya ussakkituṃ paccayo na hoti, tassa appaguṇajjhānalābhissāti attho. Ārammaṇaṃ thokaṃ pharantassāti paritte suppamatte vā sarāvamatte vā ārammaṇe parikammaṃ katvā tattheva appanaṃ patvā taṃ avaḍḍhitaṃ thokameva ārammaṇaṃ pharantassāti attho. Sesapadesupi eseva nayo. Nanikāmalābhīpaṭipakkhato hi paguṇajjhānalābhī ettha nikāmalābhīti vutto. Avaḍḍhitārammaṇapaṭipakkhato ca vaḍḍhitārammaṇaṃ vipulanti vuttaṃ. Sesaṃ tādisameva.
ஜராமரணேபேதங் ஞாணந்தி நிப்³பா³னமேவ ஆரம்மணங் கத்வா சதுன்னங் ஸச்சானங் ஏகபடிவேத⁴வஸேன ஏதங் வுத்தங்.
Jarāmaraṇepetaṃñāṇanti nibbānameva ārammaṇaṃ katvā catunnaṃ saccānaṃ ekapaṭivedhavasena etaṃ vuttaṃ.
ஜராமரணங் ஆரப்³பா⁴திஆதீ³னி பன ஏகேகங் வத்து²ங் ஆரப்³ப⁴ பவத்திகாலே புப்³ப³பா⁴கே³ ஸச்சவவத்தா²பனவஸேன வுத்தானி. ஸேஸங் ஸப்³ப³த்த² உத்தானத்த²மேவாதி.
Jarāmaraṇaṃ ārabbhātiādīni pana ekekaṃ vatthuṃ ārabbha pavattikāle pubbabhāge saccavavatthāpanavasena vuttāni. Sesaṃ sabbattha uttānatthamevāti.
சதுக்கனித்³தே³ஸவண்ணனா.
Catukkaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 16. ஞாணவிப⁴ங்கோ³ • 16. Ñāṇavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 16. ஞாணவிப⁴ங்கோ³ • 16. Ñāṇavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 16. ஞாணவிப⁴ங்கோ³ • 16. Ñāṇavibhaṅgo
