| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
(4.) சதுக்கனித்³தே³ஸவண்ணனா
(4.) Catukkaniddesavaṇṇanā
939. சதுக்கனித்³தே³ஸே தண்ஹுப்பாதே³ஸு சீவரஹேதூதி ‘கத்த² மனாபங் சீவரங் லபி⁴ஸ்ஸாமீ’தி சீவரகாரணா உப்பஜ்ஜதி. இதிப⁴வாப⁴வஹேதூதி எத்த² இதீதி நித³ஸ்ஸனத்தே² நிபாதோ; யதா² சீவராதி³ஹேது ஏவங் ப⁴வாப⁴வஹேதூதிபி அத்தோ². ப⁴வாப⁴வோதி செத்த² பணீதபணீததரானி தேலமது⁴பா²ணிதாதீ³னி அதி⁴ப்பேதானி. இமேஸங் பன சதுன்னங் தண்ஹுப்பாதா³னங் பஹானத்தா²ய படிபாடியாவ சத்தாரோ அரியவங்ஸா தே³ஸிதாதி வேதி³தப்³பா³.
939. Catukkaniddese taṇhuppādesu cīvarahetūti ‘kattha manāpaṃ cīvaraṃ labhissāmī’ti cīvarakāraṇā uppajjati. Itibhavābhavahetūti ettha itīti nidassanatthe nipāto; yathā cīvarādihetu evaṃ bhavābhavahetūtipi attho. Bhavābhavoti cettha paṇītapaṇītatarāni telamadhuphāṇitādīni adhippetāni. Imesaṃ pana catunnaṃ taṇhuppādānaṃ pahānatthāya paṭipāṭiyāva cattāro ariyavaṃsā desitāti veditabbā.
அக³திக³மனேஸு ச²ந்தா³க³திங் க³ச்ச²தீதி ச²ந்தே³ன பேமேன அக³திங் க³ச்ச²தி, அகத்தப்³ப³ங் கரோதி. பரபதே³ஸுபி ஏஸேவ நயோ. தத்த² யோ ‘அயங் மே மித்தோ வா ஸந்தி³ட்டோ² வா ஸம்ப⁴த்தோ வா ஞாதகோ வா லஞ்ஜங் வா பன மே தே³தீ’தி ச²ந்த³வஸேன அஸ்ஸாமிகங் ஸாமிகங் கரோதி – அயங் ச²ந்தா³க³திங் க³ச்ச²தி நாம. யோ ‘அயங் மே வேரீ’தி பகதிவேரவஸேன வா தங்க²ணுப்பன்னகோத⁴வஸேன வா ஸாமிகங் அஸ்ஸாமிகங் கரோதி – அயங் தோ³ஸாக³திங் க³ச்ச²தி நாம. யோ பன மந்த³த்தா மோமூஹத்தா யங் வா தங் வா வத்வா அஸ்ஸாமிகங் ஸாமிகங் கரோதி – அயங் மோஹாக³திங் க³ச்ச²தி நாம. யோ பன ‘அயங் ராஜவல்லபோ⁴ வா விஸமனிஸ்ஸிதோ வா அனத்த²ம்பி மே கரெய்யா’தி பீ⁴தோ அஸ்ஸாமிகங் ஸாமிகங் கரோதி – அயங் ப⁴யாக³திங் க³ச்ச²தி நாம. யோ வா பன பா⁴ஜியட்டா²னே கிஞ்சி பா⁴ஜெந்தோ ‘அயங் மே மித்தோ வா ஸந்தி³ட்டோ² வா ஸம்ப⁴த்தோ வா’தி பேமவஸேன அதிரேகங் தே³தி, ‘அயங் மே வேரீ’தி தோ³ஸவஸேன ஊனகங் தே³தி, மோமூஹத்தா தி³ன்னாதி³ன்னங் அஜானமானோ கஸ்ஸசி ஊனகங் கஸ்ஸசி அதி⁴கங் தே³தி, ‘அயங் இமஸ்மிங் அதீ³யமானே மய்ஹங் அனத்த²ம்பி கரெய்யா’தி பீ⁴தோ கஸ்ஸசி அதிரேகங் தே³தி, ஸோ சதுப்³பி³தோ⁴பி யதா²னுக்கமேன ச²ந்தா³க³திஆதீ³னி க³ச்ச²தி நாம. அரியா ஏதாய ந க³ச்ச²ந்தீதி அக³தி, அனரியா இமினா அக³திங் க³ச்ச²ந்தீதி அக³திக³மனங். இமங் த்³வயங் சதுன்னம்பி ஸாதா⁴ரணவஸேன வுத்தங். ச²ந்தே³ன க³மனங் ச²ந்த³க³மனங். இத³ங் தோ³ஸாதீ³னங் அஸாதா⁴ரணவஸேன வுத்தங். ஸகபக்க²ராக³ஞ்ச பரபக்க²தோ³ஸஞ்ச புரக்க²த்வா அஸமக்³க³பா⁴வேன க³மனங் வக்³க³க³மனங். இத³ங் ச²ந்த³தோ³ஸஸாதா⁴ரணவஸேன வுத்தங். வாரினோ விய யதா²னின்னங் க³மனந்தி வாரிக³மனங். இத³ங் சதுன்னம்பி ஸாதா⁴ரணவஸேன வுத்தங்.
Agatigamanesu chandāgatiṃ gacchatīti chandena pemena agatiṃ gacchati, akattabbaṃ karoti. Parapadesupi eseva nayo. Tattha yo ‘ayaṃ me mitto vā sandiṭṭho vā sambhatto vā ñātako vā lañjaṃ vā pana me detī’ti chandavasena assāmikaṃ sāmikaṃ karoti – ayaṃ chandāgatiṃ gacchati nāma. Yo ‘ayaṃ me verī’ti pakativeravasena vā taṅkhaṇuppannakodhavasena vā sāmikaṃ assāmikaṃ karoti – ayaṃ dosāgatiṃ gacchati nāma. Yo pana mandattā momūhattā yaṃ vā taṃ vā vatvā assāmikaṃ sāmikaṃ karoti – ayaṃ mohāgatiṃ gacchati nāma. Yo pana ‘ayaṃ rājavallabho vā visamanissito vā anatthampi me kareyyā’ti bhīto assāmikaṃ sāmikaṃ karoti – ayaṃ bhayāgatiṃ gacchati nāma. Yo vā pana bhājiyaṭṭhāne kiñci bhājento ‘ayaṃ me mitto vā sandiṭṭho vā sambhatto vā’ti pemavasena atirekaṃ deti, ‘ayaṃ me verī’ti dosavasena ūnakaṃ deti, momūhattā dinnādinnaṃ ajānamāno kassaci ūnakaṃ kassaci adhikaṃ deti, ‘ayaṃ imasmiṃ adīyamāne mayhaṃ anatthampi kareyyā’ti bhīto kassaci atirekaṃ deti, so catubbidhopi yathānukkamena chandāgatiādīni gacchati nāma. Ariyā etāya na gacchantīti agati, anariyā iminā agatiṃ gacchantīti agatigamanaṃ. Imaṃ dvayaṃ catunnampi sādhāraṇavasena vuttaṃ. Chandena gamanaṃ chandagamanaṃ. Idaṃ dosādīnaṃ asādhāraṇavasena vuttaṃ. Sakapakkharāgañca parapakkhadosañca purakkhatvā asamaggabhāvena gamanaṃ vaggagamanaṃ. Idaṃ chandadosasādhāraṇavasena vuttaṃ. Vārino viya yathāninnaṃ gamananti vārigamanaṃ. Idaṃ catunnampi sādhāraṇavasena vuttaṃ.
விபரியாஸேஸு அனிச்சாதீ³னி வத்தூ²னி நிச்சந்திஆதி³னா நயேன விபரீததோ ஏஸந்தீதி விபரியாஸா, ஸஞ்ஞாய விபரியாஸோ ஸஞ்ஞாவிபரியாஸோ. இதரேஸுபி த்³வீஸு ஏஸேவ நயோ. ஏவமேதே சதுன்னங் வத்தூ²னங் வஸேன சத்தாரோ, யேஸு வத்தூ²ஸு ஸஞ்ஞாதீ³னங் வஸேன த்³வாத³ஸ ஹொந்தி. தேஸு அட்ட² ஸோதாபத்திமக்³கே³ன பஹீயந்தி. அஸுபே⁴ ஸுப⁴ந்தி ஸஞ்ஞாசித்தவிபல்லாஸா ஸகதா³கா³மிமக்³கே³ன தனுகா ஹொந்தி, அனாகா³மிமக்³கே³ன பஹீயந்தி. து³க்கே² ஸுக²ந்தி ஸஞ்ஞாசித்தவிபல்லாஸா அரஹத்தமக்³கே³ன பஹீயந்தீதி வேதி³தப்³பா³.
Vipariyāsesu aniccādīni vatthūni niccantiādinā nayena viparītato esantīti vipariyāsā, saññāya vipariyāso saññāvipariyāso. Itaresupi dvīsu eseva nayo. Evamete catunnaṃ vatthūnaṃ vasena cattāro, yesu vatthūsu saññādīnaṃ vasena dvādasa honti. Tesu aṭṭha sotāpattimaggena pahīyanti. Asubhe subhanti saññācittavipallāsā sakadāgāmimaggena tanukā honti, anāgāmimaggena pahīyanti. Dukkhe sukhanti saññācittavipallāsā arahattamaggena pahīyantīti veditabbā.
அனரியவோஹாரேஸு அனரியவோஹாராதி அனரியானங் லாமகானங் வோஹாரா. தி³ட்ட²வாதி³தாதி ‘தி³ட்ட²ங் மயா’தி ஏவங் வாதி³தா. எத்த² ச தங் தங் ஸமுட்டா²பிகசேதனாவஸேன அத்தோ² வேதி³தப்³போ³. ஸஹ ஸத்³தே³ன சேதனா கதி²தாதிபி வுத்தமேவ. து³தியசதுக்கேபி ஏஸேவ நயோ. அரியோ ஹி அதி³ஸ்வா வா ‘தி³ட்ட²ங் மயா’தி தி³ஸ்வா வா ‘ந தி³ட்ட²ங் மயா’தி வத்தா நாம நத்தி²; அனரியோவ ஏவங் வத³தி. தஸ்மா ஏவங் வத³ந்தஸ்ஸ ஏதா ஸஹ ஸத்³தே³ன அட்ட² சேதனா அனரியவோஹாராதி வேதி³தப்³பா³.
Anariyavohāresu anariyavohārāti anariyānaṃ lāmakānaṃ vohārā. Diṭṭhavāditāti ‘diṭṭhaṃ mayā’ti evaṃ vāditā. Ettha ca taṃ taṃ samuṭṭhāpikacetanāvasena attho veditabbo. Saha saddena cetanā kathitātipi vuttameva. Dutiyacatukkepi eseva nayo. Ariyo hi adisvā vā ‘diṭṭhaṃ mayā’ti disvā vā ‘na diṭṭhaṃ mayā’ti vattā nāma natthi; anariyova evaṃ vadati. Tasmā evaṃ vadantassa etā saha saddena aṭṭha cetanā anariyavohārāti veditabbā.
து³ச்சரிதேஸு பட²மசதுக்கங் வேரசேதனாவஸேன வுத்தங், து³தியங் வசீது³ச்சரிதவஸேன.
Duccaritesu paṭhamacatukkaṃ veracetanāvasena vuttaṃ, dutiyaṃ vacīduccaritavasena.
ப⁴யேஸு பட²மசதுக்கே ஜாதிங் படிச்ச உப்பன்னங் ப⁴யங் ஜாதிப⁴யங். ஸேஸேஸுபி ஏஸேவ நயோ. து³தியசதுக்கே ராஜதோ உப்பன்னங் ப⁴யங் ராஜப⁴யங். ஸேஸேஸுபி ஏஸேவ நயோ.
Bhayesu paṭhamacatukke jātiṃ paṭicca uppannaṃ bhayaṃ jātibhayaṃ. Sesesupi eseva nayo. Dutiyacatukke rājato uppannaṃ bhayaṃ rājabhayaṃ. Sesesupi eseva nayo.
ததியசதுக்கே சத்தாரி ப⁴யானீதி மஹாஸமுத்³தே³ உத³கங் ஓரோஹந்தஸ்ஸ வுத்தப⁴யானி. மஹாஸமுத்³தே³ கிர மஹிந்த³வீசி நாம ஸட்டி² யோஜனானி உக்³க³ச்ச²தி. க³ங்கா³வீசி நாம பண்ணாஸ. ரோஹணவீசி நாம சத்தாலீஸ யோஜனானி உக்³க³ச்ச²தி. ஏவரூபா ஊமியோ படிச்ச உப்பன்னங் ப⁴யங் ஊமிப⁴யங் நாம. கும்பீ⁴லதோ உப்பன்னங் ப⁴யங் கும்பீ⁴லப⁴யங். உத³காவட்டதோ ப⁴யங் ஆவட்டப⁴யங். ஸுஸுகா வுச்சதி சண்ட³மச்சோ²; ததோ ப⁴யங் ஸுஸுகாப⁴யங்.
Tatiyacatukke cattāri bhayānīti mahāsamudde udakaṃ orohantassa vuttabhayāni. Mahāsamudde kira mahindavīci nāma saṭṭhi yojanāni uggacchati. Gaṅgāvīci nāma paṇṇāsa. Rohaṇavīci nāma cattālīsa yojanāni uggacchati. Evarūpā ūmiyo paṭicca uppannaṃ bhayaṃ ūmibhayaṃ nāma. Kumbhīlato uppannaṃ bhayaṃ kumbhīlabhayaṃ. Udakāvaṭṭato bhayaṃ āvaṭṭabhayaṃ. Susukā vuccati caṇḍamaccho; tato bhayaṃ susukābhayaṃ.
சதுத்த²சதுக்கே அத்தானுவாத³ப⁴யந்தி பாபகம்மினோ அத்தானங் அனுவத³ந்தஸ்ஸ உப்பஜ்ஜனகப⁴யங். பரானுவாத³ப⁴யந்தி பரஸ்ஸ அனுவாத³தோ உப்பஜ்ஜனகப⁴யங். த³ண்ட³ப⁴யந்தி அகா³ரிகஸ்ஸ ரஞ்ஞா பவத்திதத³ண்ட³ங், அனகா³ரிகஸ்ஸ வினயத³ண்ட³ங் படிச்ச உப்பஜ்ஜனகப⁴யங். து³க்³க³திப⁴யந்தி சத்தாரோ அபாயே படிச்ச உப்பஜ்ஜனகப⁴யங். இதி இமேஹி சதூஹி சதுக்கேஹி ஸோளஸ மஹாப⁴யானி நாம கதி²தானி.
Catutthacatukke attānuvādabhayanti pāpakammino attānaṃ anuvadantassa uppajjanakabhayaṃ. Parānuvādabhayanti parassa anuvādato uppajjanakabhayaṃ. Daṇḍabhayanti agārikassa raññā pavattitadaṇḍaṃ, anagārikassa vinayadaṇḍaṃ paṭicca uppajjanakabhayaṃ. Duggatibhayanti cattāro apāye paṭicca uppajjanakabhayaṃ. Iti imehi catūhi catukkehi soḷasa mahābhayāni nāma kathitāni.
தி³ட்டி²சதுக்கே திம்ப³ருகதி³ட்டி² (ஸங்॰ நி॰ 2.18) நாம கதி²தா. தத்த² ஸயங்கதங் ஸுக²து³க்க²ந்தி வேத³னங் அத்ததோ ஸமனுபஸ்ஸதோ வேத³னாய ஏவ வேத³னா கதாதி உப்பன்னா தி³ட்டி². ஏவஞ்ச ஸதி தஸ்ஸா வேத³னாய புப்³பே³பி அத்தி²தா ஆபஜ்ஜதீதி அயங் ஸஸ்ஸததி³ட்டி² நாம ஹோதி. ஸச்சதோ தே²ததோதி ஸச்சதோ தி²ரதோ. பரங்கதந்தி பச்சுப்பன்னவேத³னதோ அஞ்ஞங் வேத³னாகாரணங் வேத³னத்தானங் ஸமனுபஸ்ஸதோ ‘அஞ்ஞாய வேத³னாய அயங் வேத³னா கதா’தி உப்பன்னா தி³ட்டி². ஏவங் ஸதி புரிமாய காரணவேத³னாய உச்சே²தோ³ ஆபஜ்ஜதீதி அயங் உச்சே²த³தி³ட்டி² நாம ஹோதி. ஸயங்கதஞ்ச பரங்கதஞ்சாதி யதா²வுத்தேனேவ அத்தே²ன ‘உபட்³ட⁴ங் ஸயங்கதங், உபட்³ட⁴ங் பரேன கத’ந்தி க³ண்ஹதோ உப்பன்னா தி³ட்டி² – அயங் ஸஸ்ஸதுச்சே²த³தி³ட்டி² நாம. சதுத்தா² அகாரணா ஏவ ஸுக²து³க்க²ங் ஹோதீதி க³ண்ஹதோ உப்பன்னா தி³ட்டி². ஏவங் ஸதி அயங் அஹேதுகதி³ட்டி² நாம. ஸேஸமெத்த² ஹெட்டா² வுத்தனயத்தா உத்தானத்த²மேவாதி.
Diṭṭhicatukke timbarukadiṭṭhi (saṃ. ni. 2.18) nāma kathitā. Tattha sayaṃkataṃ sukhadukkhanti vedanaṃ attato samanupassato vedanāya eva vedanā katāti uppannā diṭṭhi. Evañca sati tassā vedanāya pubbepi atthitā āpajjatīti ayaṃ sassatadiṭṭhi nāma hoti. Saccato thetatoti saccato thirato. Paraṃkatanti paccuppannavedanato aññaṃ vedanākāraṇaṃ vedanattānaṃ samanupassato ‘aññāya vedanāya ayaṃ vedanā katā’ti uppannā diṭṭhi. Evaṃ sati purimāya kāraṇavedanāya ucchedo āpajjatīti ayaṃ ucchedadiṭṭhi nāma hoti. Sayaṃkatañca paraṃkatañcāti yathāvutteneva atthena ‘upaḍḍhaṃ sayaṃkataṃ, upaḍḍhaṃ parena kata’nti gaṇhato uppannā diṭṭhi – ayaṃ sassatucchedadiṭṭhi nāma. Catutthā akāraṇā eva sukhadukkhaṃ hotīti gaṇhato uppannā diṭṭhi. Evaṃ sati ayaṃ ahetukadiṭṭhi nāma. Sesamettha heṭṭhā vuttanayattā uttānatthamevāti.
சதுக்கனித்³தே³ஸவண்ணனா நிட்டி²தா.
Catukkaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
