| Library / Tipiṭaka / তিপিটক • Tipiṭaka / সম্মোহৰিনোদনী-অট্ঠকথা • Sammohavinodanī-aṭṭhakathā |
(৪.) চতুক্কনিদ্দেসৰণ্ণনা
(4.) Catukkaniddesavaṇṇanā
৯৩৯. চতুক্কনিদ্দেসে তণ্হুপ্পাদেসু চীৰরহেতূতি ‘কত্থ মনাপং চীৰরং লভিস্সামী’তি চীৰরকারণা উপ্পজ্জতি। ইতিভৰাভৰহেতূতি এত্থ ইতীতি নিদস্সনত্থে নিপাতো; যথা চীৰরাদিহেতু এৰং ভৰাভৰহেতূতিপি অত্থো। ভৰাভৰোতি চেত্থ পণীতপণীততরানি তেলমধুফাণিতাদীনি অধিপ্পেতানি। ইমেসং পন চতুন্নং তণ্হুপ্পাদানং পহানত্থায পটিপাটিযাৰ চত্তারো অরিযৰংসা দেসিতাতি ৰেদিতব্বা।
939. Catukkaniddese taṇhuppādesu cīvarahetūti ‘kattha manāpaṃ cīvaraṃ labhissāmī’ti cīvarakāraṇā uppajjati. Itibhavābhavahetūti ettha itīti nidassanatthe nipāto; yathā cīvarādihetu evaṃ bhavābhavahetūtipi attho. Bhavābhavoti cettha paṇītapaṇītatarāni telamadhuphāṇitādīni adhippetāni. Imesaṃ pana catunnaṃ taṇhuppādānaṃ pahānatthāya paṭipāṭiyāva cattāro ariyavaṃsā desitāti veditabbā.
অগতিগমনেসু ছন্দাগতিং গচ্ছতীতি ছন্দেন পেমেন অগতিং গচ্ছতি, অকত্তব্বং করোতি। পরপদেসুপি এসেৰ নযো। তত্থ যো ‘অযং মে মিত্তো ৰা সন্দিট্ঠো ৰা সম্ভত্তো ৰা ঞাতকো ৰা লঞ্জং ৰা পন মে দেতী’তি ছন্দৰসেন অস্সামিকং সামিকং করোতি – অযং ছন্দাগতিং গচ্ছতি নাম। যো ‘অযং মে ৰেরী’তি পকতিৰেরৰসেন ৰা তঙ্খণুপ্পন্নকোধৰসেন ৰা সামিকং অস্সামিকং করোতি – অযং দোসাগতিং গচ্ছতি নাম। যো পন মন্দত্তা মোমূহত্তা যং ৰা তং ৰা ৰত্ৰা অস্সামিকং সামিকং করোতি – অযং মোহাগতিং গচ্ছতি নাম। যো পন ‘অযং রাজৰল্লভো ৰা ৰিসমনিস্সিতো ৰা অনত্থম্পি মে করেয্যা’তি ভীতো অস্সামিকং সামিকং করোতি – অযং ভযাগতিং গচ্ছতি নাম। যো ৰা পন ভাজিযট্ঠানে কিঞ্চি ভাজেন্তো ‘অযং মে মিত্তো ৰা সন্দিট্ঠো ৰা সম্ভত্তো ৰা’তি পেমৰসেন অতিরেকং দেতি, ‘অযং মে ৰেরী’তি দোসৰসেন ঊনকং দেতি, মোমূহত্তা দিন্নাদিন্নং অজানমানো কস্সচি ঊনকং কস্সচি অধিকং দেতি, ‘অযং ইমস্মিং অদীযমানে ময্হং অনত্থম্পি করেয্যা’তি ভীতো কস্সচি অতিরেকং দেতি, সো চতুব্বিধোপি যথানুক্কমেন ছন্দাগতিআদীনি গচ্ছতি নাম। অরিযা এতায ন গচ্ছন্তীতি অগতি, অনরিযা ইমিনা অগতিং গচ্ছন্তীতি অগতিগমনং। ইমং দ্ৰযং চতুন্নম্পি সাধারণৰসেন ৰুত্তং। ছন্দেন গমনং ছন্দগমনং। ইদং দোসাদীনং অসাধারণৰসেন ৰুত্তং। সকপক্খরাগঞ্চ পরপক্খদোসঞ্চ পুরক্খত্ৰা অসমগ্গভাৰেন গমনং ৰগ্গগমনং। ইদং ছন্দদোসসাধারণৰসেন ৰুত্তং। ৰারিনো ৰিয যথানিন্নং গমনন্তি ৰারিগমনং। ইদং চতুন্নম্পি সাধারণৰসেন ৰুত্তং।
Agatigamanesu chandāgatiṃ gacchatīti chandena pemena agatiṃ gacchati, akattabbaṃ karoti. Parapadesupi eseva nayo. Tattha yo ‘ayaṃ me mitto vā sandiṭṭho vā sambhatto vā ñātako vā lañjaṃ vā pana me detī’ti chandavasena assāmikaṃ sāmikaṃ karoti – ayaṃ chandāgatiṃ gacchati nāma. Yo ‘ayaṃ me verī’ti pakativeravasena vā taṅkhaṇuppannakodhavasena vā sāmikaṃ assāmikaṃ karoti – ayaṃ dosāgatiṃ gacchati nāma. Yo pana mandattā momūhattā yaṃ vā taṃ vā vatvā assāmikaṃ sāmikaṃ karoti – ayaṃ mohāgatiṃ gacchati nāma. Yo pana ‘ayaṃ rājavallabho vā visamanissito vā anatthampi me kareyyā’ti bhīto assāmikaṃ sāmikaṃ karoti – ayaṃ bhayāgatiṃ gacchati nāma. Yo vā pana bhājiyaṭṭhāne kiñci bhājento ‘ayaṃ me mitto vā sandiṭṭho vā sambhatto vā’ti pemavasena atirekaṃ deti, ‘ayaṃ me verī’ti dosavasena ūnakaṃ deti, momūhattā dinnādinnaṃ ajānamāno kassaci ūnakaṃ kassaci adhikaṃ deti, ‘ayaṃ imasmiṃ adīyamāne mayhaṃ anatthampi kareyyā’ti bhīto kassaci atirekaṃ deti, so catubbidhopi yathānukkamena chandāgatiādīni gacchati nāma. Ariyā etāya na gacchantīti agati, anariyā iminā agatiṃ gacchantīti agatigamanaṃ. Imaṃ dvayaṃ catunnampi sādhāraṇavasena vuttaṃ. Chandena gamanaṃ chandagamanaṃ. Idaṃ dosādīnaṃ asādhāraṇavasena vuttaṃ. Sakapakkharāgañca parapakkhadosañca purakkhatvā asamaggabhāvena gamanaṃ vaggagamanaṃ. Idaṃ chandadosasādhāraṇavasena vuttaṃ. Vārino viya yathāninnaṃ gamananti vārigamanaṃ. Idaṃ catunnampi sādhāraṇavasena vuttaṃ.
ৰিপরিযাসেসু অনিচ্চাদীনি ৰত্থূনি নিচ্চন্তিআদিনা নযেন ৰিপরীততো এসন্তীতি ৰিপরিযাসা, সঞ্ঞায ৰিপরিযাসো সঞ্ঞাৰিপরিযাসো। ইতরেসুপি দ্ৰীসু এসেৰ নযো। এৰমেতে চতুন্নং ৰত্থূনং ৰসেন চত্তারো, যেসু ৰত্থূসু সঞ্ঞাদীনং ৰসেন দ্ৰাদস হোন্তি। তেসু অট্ঠ সোতাপত্তিমগ্গেন পহীযন্তি। অসুভে সুভন্তি সঞ্ঞাচিত্তৰিপল্লাসা সকদাগামিমগ্গেন তনুকা হোন্তি, অনাগামিমগ্গেন পহীযন্তি। দুক্খে সুখন্তি সঞ্ঞাচিত্তৰিপল্লাসা অরহত্তমগ্গেন পহীযন্তীতি ৰেদিতব্বা।
Vipariyāsesu aniccādīni vatthūni niccantiādinā nayena viparītato esantīti vipariyāsā, saññāya vipariyāso saññāvipariyāso. Itaresupi dvīsu eseva nayo. Evamete catunnaṃ vatthūnaṃ vasena cattāro, yesu vatthūsu saññādīnaṃ vasena dvādasa honti. Tesu aṭṭha sotāpattimaggena pahīyanti. Asubhe subhanti saññācittavipallāsā sakadāgāmimaggena tanukā honti, anāgāmimaggena pahīyanti. Dukkhe sukhanti saññācittavipallāsā arahattamaggena pahīyantīti veditabbā.
অনরিযৰোহারেসু অনরিযৰোহারাতি অনরিযানং লামকানং ৰোহারা। দিট্ঠৰাদিতাতি ‘দিট্ঠং মযা’তি এৰং ৰাদিতা। এত্থ চ তং তং সমুট্ঠাপিকচেতনাৰসেন অত্থো ৰেদিতব্বো। সহ সদ্দেন চেতনা কথিতাতিপি ৰুত্তমেৰ। দুতিযচতুক্কেপি এসেৰ নযো। অরিযো হি অদিস্ৰা ৰা ‘দিট্ঠং মযা’তি দিস্ৰা ৰা ‘ন দিট্ঠং মযা’তি ৰত্তা নাম নত্থি; অনরিযোৰ এৰং ৰদতি। তস্মা এৰং ৰদন্তস্স এতা সহ সদ্দেন অট্ঠ চেতনা অনরিযৰোহারাতি ৰেদিতব্বা।
Anariyavohāresu anariyavohārāti anariyānaṃ lāmakānaṃ vohārā. Diṭṭhavāditāti ‘diṭṭhaṃ mayā’ti evaṃ vāditā. Ettha ca taṃ taṃ samuṭṭhāpikacetanāvasena attho veditabbo. Saha saddena cetanā kathitātipi vuttameva. Dutiyacatukkepi eseva nayo. Ariyo hi adisvā vā ‘diṭṭhaṃ mayā’ti disvā vā ‘na diṭṭhaṃ mayā’ti vattā nāma natthi; anariyova evaṃ vadati. Tasmā evaṃ vadantassa etā saha saddena aṭṭha cetanā anariyavohārāti veditabbā.
দুচ্চরিতেসু পঠমচতুক্কং ৰেরচেতনাৰসেন ৰুত্তং, দুতিযং ৰচীদুচ্চরিতৰসেন।
Duccaritesu paṭhamacatukkaṃ veracetanāvasena vuttaṃ, dutiyaṃ vacīduccaritavasena.
ভযেসু পঠমচতুক্কে জাতিং পটিচ্চ উপ্পন্নং ভযং জাতিভযং। সেসেসুপি এসেৰ নযো। দুতিযচতুক্কে রাজতো উপ্পন্নং ভযং রাজভযং। সেসেসুপি এসেৰ নযো।
Bhayesu paṭhamacatukke jātiṃ paṭicca uppannaṃ bhayaṃ jātibhayaṃ. Sesesupi eseva nayo. Dutiyacatukke rājato uppannaṃ bhayaṃ rājabhayaṃ. Sesesupi eseva nayo.
ততিযচতুক্কে চত্তারি ভযানীতি মহাসমুদ্দে উদকং ওরোহন্তস্স ৰুত্তভযানি। মহাসমুদ্দে কির মহিন্দৰীচি নাম সট্ঠি যোজনানি উগ্গচ্ছতি। গঙ্গাৰীচি নাম পণ্ণাস। রোহণৰীচি নাম চত্তালীস যোজনানি উগ্গচ্ছতি। এৰরূপা ঊমিযো পটিচ্চ উপ্পন্নং ভযং ঊমিভযং নাম। কুম্ভীলতো উপ্পন্নং ভযং কুম্ভীলভযং। উদকাৰট্টতো ভযং আৰট্টভযং। সুসুকা ৰুচ্চতি চণ্ডমচ্ছো; ততো ভযং সুসুকাভযং।
Tatiyacatukke cattāri bhayānīti mahāsamudde udakaṃ orohantassa vuttabhayāni. Mahāsamudde kira mahindavīci nāma saṭṭhi yojanāni uggacchati. Gaṅgāvīci nāma paṇṇāsa. Rohaṇavīci nāma cattālīsa yojanāni uggacchati. Evarūpā ūmiyo paṭicca uppannaṃ bhayaṃ ūmibhayaṃ nāma. Kumbhīlato uppannaṃ bhayaṃ kumbhīlabhayaṃ. Udakāvaṭṭato bhayaṃ āvaṭṭabhayaṃ. Susukā vuccati caṇḍamaccho; tato bhayaṃ susukābhayaṃ.
চতুত্থচতুক্কে অত্তানুৰাদভযন্তি পাপকম্মিনো অত্তানং অনুৰদন্তস্স উপ্পজ্জনকভযং। পরানুৰাদভযন্তি পরস্স অনুৰাদতো উপ্পজ্জনকভযং। দণ্ডভযন্তি অগারিকস্স রঞ্ঞা পৰত্তিতদণ্ডং, অনগারিকস্স ৰিনযদণ্ডং পটিচ্চ উপ্পজ্জনকভযং। দুগ্গতিভযন্তি চত্তারো অপাযে পটিচ্চ উপ্পজ্জনকভযং। ইতি ইমেহি চতূহি চতুক্কেহি সোল়স মহাভযানি নাম কথিতানি।
Catutthacatukke attānuvādabhayanti pāpakammino attānaṃ anuvadantassa uppajjanakabhayaṃ. Parānuvādabhayanti parassa anuvādato uppajjanakabhayaṃ. Daṇḍabhayanti agārikassa raññā pavattitadaṇḍaṃ, anagārikassa vinayadaṇḍaṃ paṭicca uppajjanakabhayaṃ. Duggatibhayanti cattāro apāye paṭicca uppajjanakabhayaṃ. Iti imehi catūhi catukkehi soḷasa mahābhayāni nāma kathitāni.
দিট্ঠিচতুক্কে তিম্বরুকদিট্ঠি (সং॰ নি॰ ২.১৮) নাম কথিতা। তত্থ সযংকতং সুখদুক্খন্তি ৰেদনং অত্ততো সমনুপস্সতো ৰেদনায এৰ ৰেদনা কতাতি উপ্পন্না দিট্ঠি। এৰঞ্চ সতি তস্সা ৰেদনায পুব্বেপি অত্থিতা আপজ্জতীতি অযং সস্সতদিট্ঠি নাম হোতি। সচ্চতো থেততোতি সচ্চতো থিরতো। পরংকতন্তি পচ্চুপ্পন্নৰেদনতো অঞ্ঞং ৰেদনাকারণং ৰেদনত্তানং সমনুপস্সতো ‘অঞ্ঞায ৰেদনায অযং ৰেদনা কতা’তি উপ্পন্না দিট্ঠি। এৰং সতি পুরিমায কারণৰেদনায উচ্ছেদো আপজ্জতীতি অযং উচ্ছেদদিট্ঠি নাম হোতি। সযংকতঞ্চ পরংকতঞ্চাতি যথাৰুত্তেনেৰ অত্থেন ‘উপড্ঢং সযংকতং, উপড্ঢং পরেন কত’ন্তি গণ্হতো উপ্পন্না দিট্ঠি – অযং সস্সতুচ্ছেদদিট্ঠি নাম। চতুত্থা অকারণা এৰ সুখদুক্খং হোতীতি গণ্হতো উপ্পন্না দিট্ঠি। এৰং সতি অযং অহেতুকদিট্ঠি নাম। সেসমেত্থ হেট্ঠা ৰুত্তনযত্তা উত্তানত্থমেৰাতি।
Diṭṭhicatukke timbarukadiṭṭhi (saṃ. ni. 2.18) nāma kathitā. Tattha sayaṃkataṃ sukhadukkhanti vedanaṃ attato samanupassato vedanāya eva vedanā katāti uppannā diṭṭhi. Evañca sati tassā vedanāya pubbepi atthitā āpajjatīti ayaṃ sassatadiṭṭhi nāma hoti. Saccato thetatoti saccato thirato. Paraṃkatanti paccuppannavedanato aññaṃ vedanākāraṇaṃ vedanattānaṃ samanupassato ‘aññāya vedanāya ayaṃ vedanā katā’ti uppannā diṭṭhi. Evaṃ sati purimāya kāraṇavedanāya ucchedo āpajjatīti ayaṃ ucchedadiṭṭhi nāma hoti. Sayaṃkatañca paraṃkatañcāti yathāvutteneva atthena ‘upaḍḍhaṃ sayaṃkataṃ, upaḍḍhaṃ parena kata’nti gaṇhato uppannā diṭṭhi – ayaṃ sassatucchedadiṭṭhi nāma. Catutthā akāraṇā eva sukhadukkhaṃ hotīti gaṇhato uppannā diṭṭhi. Evaṃ sati ayaṃ ahetukadiṭṭhi nāma. Sesamettha heṭṭhā vuttanayattā uttānatthamevāti.
চতুক্কনিদ্দেসৰণ্ণনা নিট্ঠিতা।
Catukkaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo
