| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
৪. চতুক্কনিদ্দেসৰণ্ণনা
4. Catukkaniddesavaṇṇanā
১৩৩. পরেন কতং দুস্সীল্যং আণত্তিযা অত্তনা চ পযোগেন কতন্তি আণত্তিযা পাপস্স দাযাদো ‘‘ততো উপড্ঢস্স দাযাদো’’তি ৰুত্তো।
133. Parena kataṃ dussīlyaṃ āṇattiyā attanā ca payogena katanti āṇattiyā pāpassa dāyādo ‘‘tato upaḍḍhassa dāyādo’’ti vutto.
১৪৫. অযন্তি ‘‘তেসু পঠমো’’তিআদিকং নযং ৰদতি।
145. Ayanti ‘‘tesu paṭhamo’’tiādikaṃ nayaṃ vadati.
১৪৮. দেসনায ধম্মানং ঞাণস্স আপাথভাৰসম্পাদনং ঞাণুগ্ঘাটনং। সহ উদাহটৰেলাযাতি উদাহটৰেলায সদ্ধিং তস্মিং কালে অনতিক্কন্তে এৰাতি অত্থো।
148. Desanāya dhammānaṃ ñāṇassa āpāthabhāvasampādanaṃ ñāṇugghāṭanaṃ. Saha udāhaṭavelāyāti udāhaṭavelāya saddhiṃ tasmiṃ kāle anatikkante evāti attho.
১৫২. তন্তি অনন্তরৰচনং ৰদতি। ‘‘কতমো লোকো’’তি ৰুত্তে ‘‘পঞ্চুপাদানক্খন্ধা’’তি মহন্তং অত্থং সঙ্গহিত্ৰা ঠিতৰচনং অত্থযুত্তং। লুজ্জতীতি লোকোতি কারণযুত্তং।
152. Tanti anantaravacanaṃ vadati. ‘‘Katamo loko’’ti vutte ‘‘pañcupādānakkhandhā’’ti mahantaṃ atthaṃ saṅgahitvā ṭhitavacanaṃ atthayuttaṃ. Lujjatīti lokoti kāraṇayuttaṃ.
১৫৬. সহিতাসহিতস্সাতি সহিতাসহিতেতি অত্থো, সহিতাসহিতস্স পরিচ্ছিন্দনেতি ৰা । দ্ৰেযেৰাতি দুতিযচতুত্থাযেৰ। দেসকসাৰকসম্পত্তিযা বোধেতুং সমত্থতায সভাৰধম্মকথিকা, সচ্চধম্মকথিকাতি অত্থো।
156. Sahitāsahitassāti sahitāsahiteti attho, sahitāsahitassa paricchindaneti vā . Dveyevāti dutiyacatutthāyeva. Desakasāvakasampattiyā bodhetuṃ samatthatāya sabhāvadhammakathikā, saccadhammakathikāti attho.
১৫৭. কুসলধম্মেহি চিত্তস্স ৰাসনাভাৰনা ৰাসধুরং। অযং পাপপুগ্গলোতি চতুত্থো ৰুত্তো, ন পঠমো। পঠমো হি অৰিসংৰাদেতুকামো ৰেরঞ্জব্রাহ্মণসদিসো অধিপ্পেতোতি।
157. Kusaladhammehi cittassa vāsanābhāvanā vāsadhuraṃ. Ayaṃ pāpapuggaloti catuttho vutto, na paṭhamo. Paṭhamo hi avisaṃvādetukāmo verañjabrāhmaṇasadiso adhippetoti.
১৫৯. পুগ্গলেপি অরিযানং অভিক্কমনাদিসদিসতাতি পুগ্গলে অভিক্কমনাদীনং অরিযানং অভিক্কমনাদিসদিসতাতি অত্থো, অরিযানং অভিক্কমনাদিনা পুগ্গলস্স সদিসতাতি ৰা সদিসাভিক্কমনাদিতাতি অত্থো।
159. Puggalepi ariyānaṃ abhikkamanādisadisatāti puggale abhikkamanādīnaṃ ariyānaṃ abhikkamanādisadisatāti attho, ariyānaṃ abhikkamanādinā puggalassa sadisatāti vā sadisābhikkamanāditāti attho.
১৬৬. দুস্সীলং ‘‘দুস্সীলো’’তি ৰদন্তো ভূতং ভাসতি নাম। পাণাতিপাতেন দুস্সীলং অদিন্নাদানেন দুস্সীলোতি অৰত্ৰা পাণাতিপাতেনেৰাতি ৰদন্তো তচ্ছং ভাসতি নাম। যমিদং ‘‘কালেনা’’তি ৰুত্তং, তত্র তস্মিং ৰচনে, যো ‘‘কালেন ভণতী’’তি ৰুত্তো, সো কীদিসোতি দস্সনত্থং ‘‘কালঞ্ঞূ হোতী’’তিআদি ৰুত্তন্তি দস্সেন্তো ‘‘যমিদং কালেনাতি ৰুত্তং, তত্র যো পুগ্গলো’’তিআদিমাহ।
166. Dussīlaṃ ‘‘dussīlo’’ti vadanto bhūtaṃ bhāsati nāma. Pāṇātipātena dussīlaṃ adinnādānena dussīloti avatvā pāṇātipātenevāti vadanto tacchaṃ bhāsati nāma. Yamidaṃ ‘‘kālenā’’ti vuttaṃ, tatra tasmiṃ vacane, yo ‘‘kālena bhaṇatī’’ti vutto, so kīdisoti dassanatthaṃ ‘‘kālaññū hotī’’tiādi vuttanti dassento ‘‘yamidaṃ kālenāti vuttaṃ, tatra yo puggalo’’tiādimāha.
১৬৮. আগমনৰিপত্তি নাম কম্মং, পুব্বুপ্পন্নপচ্চযৰিপত্তি সুক্কসোণিতং। পৰত্তে, পৰত্তস্স ৰা পচ্চযা পৰত্তপচ্চযা, আহারাদযো। জোতেতীতি জোতি, আলোকো। কুলসম্পত্তিযাদীহি জোতমানো চ জোতি ৰিযাতি জোতি।
168. Āgamanavipatti nāma kammaṃ, pubbuppannapaccayavipatti sukkasoṇitaṃ. Pavatte, pavattassa vā paccayā pavattapaccayā, āhārādayo. Jotetīti joti, āloko. Kulasampattiyādīhi jotamāno ca joti viyāti joti.
১৭৩. পহীনাৰসিট্ঠকিলেসপচ্চৰেক্খণাপি যেহি কিলেসেহি ৰিমুত্তো অৰিমুত্তো চ, তেসং দস্সনৰসেন ৰিমুত্তিদস্সনমেৰ হোতীতি আহ ‘‘ৰিমুত্তিঞাণদস্সনং একূনৰীসতিৰিধং পচ্চৰেক্খণঞাণ’’ন্তি।
173. Pahīnāvasiṭṭhakilesapaccavekkhaṇāpi yehi kilesehi vimutto avimutto ca, tesaṃ dassanavasena vimuttidassanameva hotīti āha ‘‘vimuttiñāṇadassanaṃ ekūnavīsatividhaṃ paccavekkhaṇañāṇa’’nti.
১৭৪. যানি কানিচি তন্তাৰুতানন্তি তন্তাৰুতানং ৰত্থানং যানি কানিচি ৰত্থানীতি ৰুত্তং হোতি। সাযং ততিযং অস্সাতি সাযততিযো। অনুযুঞ্জনং অনুযোগো। তং অনুযুত্তোতি উপযোগৰচনং দট্ঠব্বং, ভাৰনপুংসকং ৰা।
174. Yāni kānici tantāvutānanti tantāvutānaṃ vatthānaṃ yāni kānici vatthānīti vuttaṃ hoti. Sāyaṃ tatiyaṃ assāti sāyatatiyo. Anuyuñjanaṃ anuyogo. Taṃ anuyuttoti upayogavacanaṃ daṭṭhabbaṃ, bhāvanapuṃsakaṃ vā.
১৭৮. তত্থ সিক্খনভাৰেনাতি সিক্খায সাজীৰে চ সিক্খনভাৰেন। সিক্খং পরিপূরেন্তোতি সীলসংৰরং পরিপূরেন্তো। সাজীৰঞ্চ অৰীতিক্কমন্তোতি ‘‘নামকাযো পদকাযো নিরুত্তিকাযো ব্যঞ্জনকাযো’’তি ৰুত্তং সিক্খাপদং ভগৰতো ৰচনং অৰীতিক্কমন্তো হুত্ৰাতি অত্থো। ইদমেৰ চ দ্ৰযং ‘‘সিক্খন’’ন্তি ৰুত্তং। তত্থ সাজীৰানতিক্কমো সিক্খাপারিপূরিযা পচ্চযো। ততো হি যাৰ মগ্গা সংৰরপারিপূরী হোতীতি। ৰিনাসনভাৰতোতি হিংসনভাৰতো। হলিদ্দিরাগো ৰিয ন থিরকথো হোতীতি এত্থ কথায অট্ঠিতভাৰেন হলিদ্দিরাগসদিসতা ৰেদিতব্বা, ন পুগ্গলস্স।
178. Tatthasikkhanabhāvenāti sikkhāya sājīve ca sikkhanabhāvena. Sikkhaṃ paripūrentoti sīlasaṃvaraṃ paripūrento. Sājīvañca avītikkamantoti ‘‘nāmakāyo padakāyo niruttikāyo byañjanakāyo’’ti vuttaṃ sikkhāpadaṃ bhagavato vacanaṃ avītikkamanto hutvāti attho. Idameva ca dvayaṃ ‘‘sikkhana’’nti vuttaṃ. Tattha sājīvānatikkamo sikkhāpāripūriyā paccayo. Tato hi yāva maggā saṃvarapāripūrī hotīti. Vināsanabhāvatoti hiṃsanabhāvato. Haliddirāgo viya na thirakatho hotīti ettha kathāya aṭṭhitabhāvena haliddirāgasadisatā veditabbā, na puggalassa.
১৭৯. দারুমাসকোতি যে ৰোহারং গচ্ছন্তীতি ইতি-সদ্দেন এৰংপকারে দস্সেতি। অঞ্ঞং দস্সেত্ৰা অঞ্ঞস্স পরিৰত্তনন্তি দসগ্ঘনকং ৰত্থযুগং দস্সেত্ৰা তস্স অজানন্তস্স পঞ্চগ্ঘনকস্স দানং।
179. Dārumāsakoti ye vohāraṃ gacchantīti iti-saddena evaṃpakāre dasseti. Aññaṃ dassetvā aññassa parivattananti dasagghanakaṃ vatthayugaṃ dassetvā tassa ajānantassa pañcagghanakassa dānaṃ.
১৮১. অৰিকিণ্ণসুখন্তি রূপাদীসু সুভাদিপরিকপ্পনৰসেন অৰিসটসুখং।
181. Avikiṇṇasukhanti rūpādīsu subhādiparikappanavasena avisaṭasukhaṃ.
১৮৭. খন্ধধম্মেসু অনিচ্চাদিৰসেন পৰত্তা ৰিপস্সনা মগ্গফললাভেন পটিলদ্ধা নাম হোতি তদলাভেন অনৰট্ঠানতোতি মগ্গফললাভী এৰ ‘‘অধিপঞ্ঞাধম্মৰিপস্সনালাভী’’তি ৰুত্তো, মগ্গফলঞাণমেৰ চ অধিকপঞ্ঞাভাৰতো চতুসচ্চধম্মে সব্বধম্মস্স ৰরে নিব্বানে এৰ ৰা ৰিসিট্ঠদস্সনভাৰতো চ অধিপঞ্ঞাধম্মৰিপস্সনাতি দট্ঠব্বা।
187. Khandhadhammesu aniccādivasena pavattā vipassanā maggaphalalābhena paṭiladdhā nāma hoti tadalābhena anavaṭṭhānatoti maggaphalalābhī eva ‘‘adhipaññādhammavipassanālābhī’’ti vutto, maggaphalañāṇameva ca adhikapaññābhāvato catusaccadhamme sabbadhammassa vare nibbāne eva vā visiṭṭhadassanabhāvato ca adhipaññādhammavipassanāti daṭṭhabbā.
১৮৯. সুতেন অনুপপন্নোতি যথাসুতেন ৰা অত্থেন ৰা ন সমন্নাগতোতি অত্থো।
189. Sutena anupapannoti yathāsutena vā atthena vā na samannāgatoti attho.
চতুক্কনিদ্দেসৰণ্ণনা নিট্ঠিতা।
Catukkaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পুগ্গলপঞ্ঞত্তিপাল়ি • Puggalapaññattipāḷi / ৪. চতুক্কপুগ্গলপঞ্ঞত্তি • 4. Catukkapuggalapaññatti
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৪. চতুক্কনিদ্দেসৰণ্ণনা • 4. Catukkaniddesavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৪. চতুক্কনিদ্দেসৰণ্ণনা • 4. Catukkaniddesavaṇṇanā
