| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
৪. চতুক্কনিদ্দেসৰণ্ণনা
4. Catukkaniddesavaṇṇanā
১৩৩. পরেনাতি অঞ্ঞেন, আণত্তেনাতি অত্থো। আণত্তিযা অত্তনা চাতি আণাপকস্স আণত্তিযা, অত্তনা চ আণত্তেন কতং তঞ্চ তস্স আণাপকস্স যং ৰচীপযোগেন কতন্তি যোজনা। আণত্তিযা পাপস্সাতি আণাপনৰসেন পসুতপাপস্স।
133. Parenāti aññena, āṇattenāti attho. Āṇattiyā attanā cāti āṇāpakassa āṇattiyā, attanā ca āṇattena kataṃ tañca tassa āṇāpakassa yaṃ vacīpayogena katanti yojanā. Āṇattiyā pāpassāti āṇāpanavasena pasutapāpassa.
১৪৮. দেসনায করণভূতায। ধম্মানন্তি দেসনায যথাবোধেতব্বানং সীলাদিধম্মানং।
148. Desanāya karaṇabhūtāya. Dhammānanti desanāya yathābodhetabbānaṃ sīlādidhammānaṃ.
১৫২. অনন্তরন্তি ঞাণস্স উপট্ঠিতন্তি অনন্তরং ৰুত্তং। কিং পন তন্তি আহ ‘‘ৰচন’’ন্তি। লুজ্জতীতি ইদং যেন কারণেন লোক-সদ্দো তদত্থে পৰত্তো, তং দস্সেতীতি আহ ‘‘কারণযুত্ত’’ন্তি।
152. Anantaranti ñāṇassa upaṭṭhitanti anantaraṃ vuttaṃ. Kiṃ pana tanti āha ‘‘vacana’’nti. Lujjatīti idaṃ yena kāraṇena loka-saddo tadatthe pavatto, taṃ dassetīti āha ‘‘kāraṇayutta’’nti.
১৫৬. সহিতাসহিতস্সাতি কুসলসদ্দযোগেন সামিৰচনং ভুম্মত্থেতি দস্সেন্তো আহ ‘‘সহিতাসহিতেতি অত্থো’’তি। সহিতভাসনেন দেসকসম্পত্তি, সহিতাসহিতকোসল্লেন সাৰকসম্পত্তি ৰেদিতব্বা। পরিসসম্পত্তিপি ঞাণসম্পন্নস্স ধম্মকথিকস্স পটিভানসম্পদায কারণং হোতীতি আহ ‘‘সাৰকসম্পত্তিযা বোধেতুং সমত্থতাযা’’তি।
156. Sahitāsahitassāti kusalasaddayogena sāmivacanaṃ bhummattheti dassento āha ‘‘sahitāsahiteti attho’’ti. Sahitabhāsanena desakasampatti, sahitāsahitakosallena sāvakasampatti veditabbā. Parisasampattipi ñāṇasampannassa dhammakathikassa paṭibhānasampadāya kāraṇaṃ hotīti āha ‘‘sāvakasampattiyā bodhetuṃ samatthatāyā’’ti.
১৫৭. কুসলধম্মেহীতি সমথৰিপস্সনাধম্মেহি। চতুত্থো ৰুত্তো, যো নেৰ সঙ্ঘং নিমন্তেতি, ন দানং দেতি।
157. Kusaladhammehīti samathavipassanādhammehi. Catuttho vutto, yo neva saṅghaṃ nimanteti, na dānaṃ deti.
১৬৬. যমিদং ‘‘কালেনা’’তি ৰুত্তন্তি ‘‘যো তত্থ অৰণ্ণো, তম্পি ভণতি কালেন। যোপি তত্থ ৰণ্ণো, তম্পি ভণতি কালেনা’’তি যং ইদং পাল়িযং ৰুত্তং, তত্র তস্মিং ৰচনে ৰাক্যে যো পুগ্গলো ‘‘কালেন ভণতী’’তি ৰুত্তো, সো কীদিসোতি ৰিচারণায তস্স দস্সনত্থং ‘‘কালঞ্ঞূ হোতী’’তিআদি পাল়িযং ৰুত্তন্তি দস্সেন্তো সঙ্গহে আহাতি যোজনা।
166. Yamidaṃ ‘‘kālenā’’ti vuttanti ‘‘yo tattha avaṇṇo, tampi bhaṇati kālena. Yopi tattha vaṇṇo, tampi bhaṇati kālenā’’ti yaṃ idaṃ pāḷiyaṃ vuttaṃ, tatra tasmiṃ vacane vākye yo puggalo ‘‘kālena bhaṇatī’’ti vutto, so kīdisoti vicāraṇāya tassa dassanatthaṃ ‘‘kālaññū hotī’’tiādi pāḷiyaṃ vuttanti dassento saṅgahe āhāti yojanā.
১৬৮. পুব্বুপ্পন্নপচ্চযৰিপত্তীতি তস্মিং অত্তভাৰে পঠমুপ্পন্নপচ্চযৰিপত্তি। তেসং ৰিপত্তি পৰত্তপ্পচ্চযৰিপত্তীতি যোজনা।
168. Pubbuppannapaccayavipattīti tasmiṃ attabhāve paṭhamuppannapaccayavipatti. Tesaṃ vipatti pavattappaccayavipattīti yojanā.
১৭৩. তেসন্তি পহীনাৰসিট্ঠকিলেসানং। ৰিমুত্তিদস্সনমেৰ হোতি ৰিমুত্তিঅত্থত্তা তংদস্সনস্স।
173. Tesanti pahīnāvasiṭṭhakilesānaṃ. Vimuttidassanameva hoti vimuttiatthattā taṃdassanassa.
১৭৪. তন্তাৰুতানং ৰত্থানন্তি নিদ্ধারণে সামিৰচনং।
174. Tantāvutānaṃ vatthānanti niddhāraṇe sāmivacanaṃ.
১৭৮. নামকাযোতি নামসমূহো। ইদমেৰ চ দ্ৰযন্তি সীলসংৰরপূরণং, সাজীৰাৰীতিক্কমনঞ্চাতি ইদমেৰ দ্ৰযং। ততোতি সাজীৰাৰীতিক্কমনতো। কথায হলিদ্দরাগাদিসদিসতাতি যোজনা। তেনাহ ‘‘ন পুগ্গলস্সা’’তি।
178. Nāmakāyoti nāmasamūho. Idameva ca dvayanti sīlasaṃvarapūraṇaṃ, sājīvāvītikkamanañcāti idameva dvayaṃ. Tatoti sājīvāvītikkamanato. Kathāya haliddarāgādisadisatāti yojanā. Tenāha ‘‘na puggalassā’’ti.
১৭৯. ইতি-সদ্দেনাতি ‘‘দারুমাসকো’’তি এত্থ ৰুত্তইতি-সদ্দেন। এৰংপকারেতি ইমিনাপি সলাকাদিকে সঙ্গণ্হাতি।
179. Iti-saddenāti ‘‘dārumāsako’’ti ettha vuttaiti-saddena. Evaṃpakāreti imināpi salākādike saṅgaṇhāti.
১৮১. অৰিসটসুখন্তি অৰিক্খেপসুখং।
181. Avisaṭasukhanti avikkhepasukhaṃ.
১৮৭. খন্ধধম্মেসূতি সঙ্খতধম্মেসু। তদলাভেনাতি মগ্গফলালাভেন। অত্থেনাতি সীলাদিঅত্থেন।
187. Khandhadhammesūti saṅkhatadhammesu. Tadalābhenāti maggaphalālābhena. Atthenāti sīlādiatthena.
চতুক্কনিদ্দেসৰণ্ণনা নিট্ঠিতা।
Catukkaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পুগ্গলপঞ্ঞত্তিপাল়ি • Puggalapaññattipāḷi / ৪. চতুক্কপুগ্গলপঞ্ঞত্তি • 4. Catukkapuggalapaññatti
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৪. চতুক্কনিদ্দেসৰণ্ণনা • 4. Catukkaniddesavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৪. চতুক্কনিদ্দেসৰণ্ণনা • 4. Catukkaniddesavaṇṇanā
