| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā |
೪. ಚತುಕ್ಕನಿದ್ದೇಸವಣ್ಣನಾ
4. Catukkaniddesavaṇṇanā
೧೩೩. ಪರೇನಾತಿ ಅಞ್ಞೇನ, ಆಣತ್ತೇನಾತಿ ಅತ್ಥೋ। ಆಣತ್ತಿಯಾ ಅತ್ತನಾ ಚಾತಿ ಆಣಾಪಕಸ್ಸ ಆಣತ್ತಿಯಾ, ಅತ್ತನಾ ಚ ಆಣತ್ತೇನ ಕತಂ ತಞ್ಚ ತಸ್ಸ ಆಣಾಪಕಸ್ಸ ಯಂ ವಚೀಪಯೋಗೇನ ಕತನ್ತಿ ಯೋಜನಾ। ಆಣತ್ತಿಯಾ ಪಾಪಸ್ಸಾತಿ ಆಣಾಪನವಸೇನ ಪಸುತಪಾಪಸ್ಸ।
133. Parenāti aññena, āṇattenāti attho. Āṇattiyā attanā cāti āṇāpakassa āṇattiyā, attanā ca āṇattena kataṃ tañca tassa āṇāpakassa yaṃ vacīpayogena katanti yojanā. Āṇattiyā pāpassāti āṇāpanavasena pasutapāpassa.
೧೪೮. ದೇಸನಾಯ ಕರಣಭೂತಾಯ। ಧಮ್ಮಾನನ್ತಿ ದೇಸನಾಯ ಯಥಾಬೋಧೇತಬ್ಬಾನಂ ಸೀಲಾದಿಧಮ್ಮಾನಂ।
148. Desanāya karaṇabhūtāya. Dhammānanti desanāya yathābodhetabbānaṃ sīlādidhammānaṃ.
೧೫೨. ಅನನ್ತರನ್ತಿ ಞಾಣಸ್ಸ ಉಪಟ್ಠಿತನ್ತಿ ಅನನ್ತರಂ ವುತ್ತಂ। ಕಿಂ ಪನ ತನ್ತಿ ಆಹ ‘‘ವಚನ’’ನ್ತಿ। ಲುಜ್ಜತೀತಿ ಇದಂ ಯೇನ ಕಾರಣೇನ ಲೋಕ-ಸದ್ದೋ ತದತ್ಥೇ ಪವತ್ತೋ, ತಂ ದಸ್ಸೇತೀತಿ ಆಹ ‘‘ಕಾರಣಯುತ್ತ’’ನ್ತಿ।
152. Anantaranti ñāṇassa upaṭṭhitanti anantaraṃ vuttaṃ. Kiṃ pana tanti āha ‘‘vacana’’nti. Lujjatīti idaṃ yena kāraṇena loka-saddo tadatthe pavatto, taṃ dassetīti āha ‘‘kāraṇayutta’’nti.
೧೫೬. ಸಹಿತಾಸಹಿತಸ್ಸಾತಿ ಕುಸಲಸದ್ದಯೋಗೇನ ಸಾಮಿವಚನಂ ಭುಮ್ಮತ್ಥೇತಿ ದಸ್ಸೇನ್ತೋ ಆಹ ‘‘ಸಹಿತಾಸಹಿತೇತಿ ಅತ್ಥೋ’’ತಿ। ಸಹಿತಭಾಸನೇನ ದೇಸಕಸಮ್ಪತ್ತಿ, ಸಹಿತಾಸಹಿತಕೋಸಲ್ಲೇನ ಸಾವಕಸಮ್ಪತ್ತಿ ವೇದಿತಬ್ಬಾ। ಪರಿಸಸಮ್ಪತ್ತಿಪಿ ಞಾಣಸಮ್ಪನ್ನಸ್ಸ ಧಮ್ಮಕಥಿಕಸ್ಸ ಪಟಿಭಾನಸಮ್ಪದಾಯ ಕಾರಣಂ ಹೋತೀತಿ ಆಹ ‘‘ಸಾವಕಸಮ್ಪತ್ತಿಯಾ ಬೋಧೇತುಂ ಸಮತ್ಥತಾಯಾ’’ತಿ।
156. Sahitāsahitassāti kusalasaddayogena sāmivacanaṃ bhummattheti dassento āha ‘‘sahitāsahiteti attho’’ti. Sahitabhāsanena desakasampatti, sahitāsahitakosallena sāvakasampatti veditabbā. Parisasampattipi ñāṇasampannassa dhammakathikassa paṭibhānasampadāya kāraṇaṃ hotīti āha ‘‘sāvakasampattiyā bodhetuṃ samatthatāyā’’ti.
೧೫೭. ಕುಸಲಧಮ್ಮೇಹೀತಿ ಸಮಥವಿಪಸ್ಸನಾಧಮ್ಮೇಹಿ। ಚತುತ್ಥೋ ವುತ್ತೋ, ಯೋ ನೇವ ಸಙ್ಘಂ ನಿಮನ್ತೇತಿ, ನ ದಾನಂ ದೇತಿ।
157. Kusaladhammehīti samathavipassanādhammehi. Catuttho vutto, yo neva saṅghaṃ nimanteti, na dānaṃ deti.
೧೬೬. ಯಮಿದಂ ‘‘ಕಾಲೇನಾ’’ತಿ ವುತ್ತನ್ತಿ ‘‘ಯೋ ತತ್ಥ ಅವಣ್ಣೋ, ತಮ್ಪಿ ಭಣತಿ ಕಾಲೇನ। ಯೋಪಿ ತತ್ಥ ವಣ್ಣೋ, ತಮ್ಪಿ ಭಣತಿ ಕಾಲೇನಾ’’ತಿ ಯಂ ಇದಂ ಪಾಳಿಯಂ ವುತ್ತಂ, ತತ್ರ ತಸ್ಮಿಂ ವಚನೇ ವಾಕ್ಯೇ ಯೋ ಪುಗ್ಗಲೋ ‘‘ಕಾಲೇನ ಭಣತೀ’’ತಿ ವುತ್ತೋ, ಸೋ ಕೀದಿಸೋತಿ ವಿಚಾರಣಾಯ ತಸ್ಸ ದಸ್ಸನತ್ಥಂ ‘‘ಕಾಲಞ್ಞೂ ಹೋತೀ’’ತಿಆದಿ ಪಾಳಿಯಂ ವುತ್ತನ್ತಿ ದಸ್ಸೇನ್ತೋ ಸಙ್ಗಹೇ ಆಹಾತಿ ಯೋಜನಾ।
166. Yamidaṃ ‘‘kālenā’’ti vuttanti ‘‘yo tattha avaṇṇo, tampi bhaṇati kālena. Yopi tattha vaṇṇo, tampi bhaṇati kālenā’’ti yaṃ idaṃ pāḷiyaṃ vuttaṃ, tatra tasmiṃ vacane vākye yo puggalo ‘‘kālena bhaṇatī’’ti vutto, so kīdisoti vicāraṇāya tassa dassanatthaṃ ‘‘kālaññū hotī’’tiādi pāḷiyaṃ vuttanti dassento saṅgahe āhāti yojanā.
೧೬೮. ಪುಬ್ಬುಪ್ಪನ್ನಪಚ್ಚಯವಿಪತ್ತೀತಿ ತಸ್ಮಿಂ ಅತ್ತಭಾವೇ ಪಠಮುಪ್ಪನ್ನಪಚ್ಚಯವಿಪತ್ತಿ। ತೇಸಂ ವಿಪತ್ತಿ ಪವತ್ತಪ್ಪಚ್ಚಯವಿಪತ್ತೀತಿ ಯೋಜನಾ।
168. Pubbuppannapaccayavipattīti tasmiṃ attabhāve paṭhamuppannapaccayavipatti. Tesaṃ vipatti pavattappaccayavipattīti yojanā.
೧೭೩. ತೇಸನ್ತಿ ಪಹೀನಾವಸಿಟ್ಠಕಿಲೇಸಾನಂ। ವಿಮುತ್ತಿದಸ್ಸನಮೇವ ಹೋತಿ ವಿಮುತ್ತಿಅತ್ಥತ್ತಾ ತಂದಸ್ಸನಸ್ಸ।
173. Tesanti pahīnāvasiṭṭhakilesānaṃ. Vimuttidassanameva hoti vimuttiatthattā taṃdassanassa.
೧೭೪. ತನ್ತಾವುತಾನಂ ವತ್ಥಾನನ್ತಿ ನಿದ್ಧಾರಣೇ ಸಾಮಿವಚನಂ।
174. Tantāvutānaṃ vatthānanti niddhāraṇe sāmivacanaṃ.
೧೭೮. ನಾಮಕಾಯೋತಿ ನಾಮಸಮೂಹೋ। ಇದಮೇವ ಚ ದ್ವಯನ್ತಿ ಸೀಲಸಂವರಪೂರಣಂ, ಸಾಜೀವಾವೀತಿಕ್ಕಮನಞ್ಚಾತಿ ಇದಮೇವ ದ್ವಯಂ। ತತೋತಿ ಸಾಜೀವಾವೀತಿಕ್ಕಮನತೋ। ಕಥಾಯ ಹಲಿದ್ದರಾಗಾದಿಸದಿಸತಾತಿ ಯೋಜನಾ। ತೇನಾಹ ‘‘ನ ಪುಗ್ಗಲಸ್ಸಾ’’ತಿ।
178. Nāmakāyoti nāmasamūho. Idameva ca dvayanti sīlasaṃvarapūraṇaṃ, sājīvāvītikkamanañcāti idameva dvayaṃ. Tatoti sājīvāvītikkamanato. Kathāya haliddarāgādisadisatāti yojanā. Tenāha ‘‘na puggalassā’’ti.
೧೭೯. ಇತಿ-ಸದ್ದೇನಾತಿ ‘‘ದಾರುಮಾಸಕೋ’’ತಿ ಏತ್ಥ ವುತ್ತಇತಿ-ಸದ್ದೇನ। ಏವಂಪಕಾರೇತಿ ಇಮಿನಾಪಿ ಸಲಾಕಾದಿಕೇ ಸಙ್ಗಣ್ಹಾತಿ।
179. Iti-saddenāti ‘‘dārumāsako’’ti ettha vuttaiti-saddena. Evaṃpakāreti imināpi salākādike saṅgaṇhāti.
೧೮೧. ಅವಿಸಟಸುಖನ್ತಿ ಅವಿಕ್ಖೇಪಸುಖಂ।
181. Avisaṭasukhanti avikkhepasukhaṃ.
೧೮೭. ಖನ್ಧಧಮ್ಮೇಸೂತಿ ಸಙ್ಖತಧಮ್ಮೇಸು। ತದಲಾಭೇನಾತಿ ಮಗ್ಗಫಲಾಲಾಭೇನ। ಅತ್ಥೇನಾತಿ ಸೀಲಾದಿಅತ್ಥೇನ।
187. Khandhadhammesūti saṅkhatadhammesu. Tadalābhenāti maggaphalālābhena. Atthenāti sīlādiatthena.
ಚತುಕ್ಕನಿದ್ದೇಸವಣ್ಣನಾ ನಿಟ್ಠಿತಾ।
Catukkaniddesavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಪುಗ್ಗಲಪಞ್ಞತ್ತಿಪಾಳಿ • Puggalapaññattipāḷi / ೪. ಚತುಕ್ಕಪುಗ್ಗಲಪಞ್ಞತ್ತಿ • 4. Catukkapuggalapaññatti
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೪. ಚತುಕ್ಕನಿದ್ದೇಸವಣ್ಣನಾ • 4. Catukkaniddesavaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೪. ಚತುಕ್ಕನಿದ್ದೇಸವಣ್ಣನಾ • 4. Catukkaniddesavaṇṇanā
