| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
சதுக்கவாரவண்ணனா
Catukkavāravaṇṇanā
324. சதுக்கேஸு ஸகவாசாய ஆபஜ்ஜதி பரவாசாய வுட்டா²தீதி வசீத்³வாரிகங் பத³ஸோத⁴ம்மாதி³பே⁴த³ங் ஆபத்திங் ஆபஜ்ஜித்வா திணவத்தா²ரகஸமத²ட்டா²னங் க³தோ பரஸ்ஸ கம்மவாசாய வுட்டா²தி . பரவாசாய ஆபஜ்ஜதி ஸகவாசாய வுட்டா²தீதி பாபிகாய தி³ட்டி²யா அப்படினிஸ்ஸக்³கே³ பரஸ்ஸ கம்மவாசாய ஆபஜ்ஜதி, புக்³க³லஸ்ஸ ஸந்திகே தே³ஸெந்தோ ஸகவாசாய வுட்டா²தி. ஸகவாசாய ஆபஜ்ஜதி ஸகவாசாய வுட்டா²தீதி வசீத்³வாரிகங் பத³ஸோத⁴ம்மாதி³பே⁴த³ங் ஆபத்திங் ஸகவாசாய ஆபஜ்ஜதி, தே³ஸெத்வா வுட்ட²ஹந்தோபி ஸகவாசாய வுட்டா²தி. பரவாசாய ஆபஜ்ஜதி பரவாசாய வுட்டா²தீதி யாவததியகங் ஸங்கா⁴தி³ஸேஸங் பரஸ்ஸ கம்மவாசாய ஆபஜ்ஜதி, வுட்ட²ஹந்தோபி பரஸ்ஸ பரிவாஸகம்மவாசாதீ³ஹி வுட்டா²தி. ததோ பரேஸு காயத்³வாரிகங் காயேன ஆபஜ்ஜதி, தே³ஸெந்தோ வாசாய வுட்டா²தி. வசீத்³வாரிகங் வாசாய ஆபஜ்ஜதி, திணவத்தா²ரகே காயேன வுட்டா²தி. காயத்³வாரிகங் காயேனஆபஜ்ஜதி, தமேவ திணவத்தா²ரகே காயேன வுட்டா²தி. வசீத்³வாரிகங் வாசாய ஆபஜ்ஜதி, தமேவ தே³ஸெந்தோ வாசாய வுட்டா²தி. ஸங்கி⁴கமஞ்சஸ்ஸ அத்தனோ பச்சத்த²ரணேன அனத்த²ரதோ காயஸம்பு²ஸனே லோமக³ணனாய ஆபஜ்ஜிதப்³பா³பத்திங் ஸஹகா³ரஸெய்யாபத்திஞ்ச பஸுத்தோ ஆபஜ்ஜதி, பபு³ஜ்ஜி²த்வா பன ஆபன்னபா⁴வங் ஞத்வா தே³ஸெந்தோ படிபு³த்³தோ⁴ வுட்டா²தி. ஜக்³க³ந்தோ ஆபஜ்ஜித்வா பன திணவத்தா²ரகஸமத²ட்டா²னே ஸயந்தோ படிபு³த்³தோ⁴ ஆபஜ்ஜதி பஸுத்தோ வுட்டா²தி நாம. பச்சி²மபத³த்³வயம்பி வுத்தானுஸாரேனேவ வேதி³தப்³ப³ங்.
324. Catukkesu sakavācāya āpajjati paravācāya vuṭṭhātīti vacīdvārikaṃ padasodhammādibhedaṃ āpattiṃ āpajjitvā tiṇavatthārakasamathaṭṭhānaṃ gato parassa kammavācāya vuṭṭhāti . Paravācāya āpajjati sakavācāya vuṭṭhātīti pāpikāya diṭṭhiyā appaṭinissagge parassa kammavācāya āpajjati, puggalassa santike desento sakavācāya vuṭṭhāti. Sakavācāya āpajjati sakavācāya vuṭṭhātīti vacīdvārikaṃ padasodhammādibhedaṃ āpattiṃ sakavācāya āpajjati, desetvā vuṭṭhahantopi sakavācāya vuṭṭhāti. Paravācāya āpajjati paravācāya vuṭṭhātīti yāvatatiyakaṃ saṅghādisesaṃ parassa kammavācāya āpajjati, vuṭṭhahantopi parassa parivāsakammavācādīhi vuṭṭhāti. Tato paresu kāyadvārikaṃ kāyena āpajjati, desento vācāya vuṭṭhāti. Vacīdvārikaṃ vācāya āpajjati, tiṇavatthārake kāyena vuṭṭhāti. Kāyadvārikaṃ kāyenaāpajjati, tameva tiṇavatthārake kāyena vuṭṭhāti. Vacīdvārikaṃ vācāya āpajjati, tameva desento vācāya vuṭṭhāti. Saṅghikamañcassa attano paccattharaṇena anattharato kāyasamphusane lomagaṇanāya āpajjitabbāpattiṃ sahagāraseyyāpattiñca pasutto āpajjati, pabujjhitvā pana āpannabhāvaṃ ñatvā desento paṭibuddho vuṭṭhāti. Jagganto āpajjitvā pana tiṇavatthārakasamathaṭṭhāne sayanto paṭibuddho āpajjati pasutto vuṭṭhāti nāma. Pacchimapadadvayampi vuttānusāreneva veditabbaṃ.
அசித்தகாபத்திங் அசித்தகோ ஆபஜ்ஜதி நாம. பச்சா² தே³ஸெந்தோ ஸசித்தகோ வுட்டா²தி. ஸசித்தகாபத்திங் ஸசித்தகோ ஆபஜ்ஜதி நாம. திணவத்தா²ரகட்டா²னே ஸயந்தோ அசித்தகோ வுட்டா²தி. ஸேஸபத³த்³வயம்பி வுத்தானுஸாரேனேவ வேதி³தப்³ப³ங். யோ ஸபா⁴க³ங் ஆபத்திங் தே³ஸேதி, அயங் தே³ஸனாபச்சயா து³க்கடங் ஆபஜ்ஜந்தோ பாசித்தியாதீ³ஸு அஞ்ஞதரங் தே³ஸேதி, தஞ்ச தே³ஸெந்தோ து³க்கடங் ஆபஜ்ஜதி. தங் பன து³க்கடங் ஆபஜ்ஜந்தோ பாசித்தியாதி³தோ வுட்டா²தி. பாசித்தியாதி³தோ ச வுட்ட²ஹந்தோ தங் ஆபஜ்ஜதி. இதி ஏகஸ்ஸ புக்³க³லஸ்ஸ ஏகமேவ பயோக³ங் ஸந்தா⁴ய ‘‘ஆபத்திங் ஆபஜ்ஜந்தோ தே³ஸேதீ’’தி இத³ங் சதுக்கங் வுத்தந்தி வேதி³தப்³ப³ங்.
Acittakāpattiṃ acittako āpajjati nāma. Pacchā desento sacittako vuṭṭhāti. Sacittakāpattiṃ sacittako āpajjati nāma. Tiṇavatthārakaṭṭhāne sayanto acittako vuṭṭhāti. Sesapadadvayampi vuttānusāreneva veditabbaṃ. Yo sabhāgaṃ āpattiṃ deseti, ayaṃ desanāpaccayā dukkaṭaṃ āpajjanto pācittiyādīsu aññataraṃ deseti, tañca desento dukkaṭaṃ āpajjati. Taṃ pana dukkaṭaṃ āpajjanto pācittiyādito vuṭṭhāti. Pācittiyādito ca vuṭṭhahanto taṃ āpajjati. Iti ekassa puggalassa ekameva payogaṃ sandhāya ‘‘āpattiṃ āpajjanto desetī’’ti idaṃ catukkaṃ vuttanti veditabbaṃ.
கம்மசதுக்கே பாபிகாய தி³ட்டி²யா அப்படினிஸ்ஸக்³கா³பத்திங் கம்மேன ஆபஜ்ஜதி, தே³ஸெந்தோ அகம்மேன வுட்டா²தி. விஸ்ஸட்டி²ஆதி³கங் அகம்மேன ஆபஜ்ஜதி, பரிவாஸாதி³னா கம்மேன வுட்டா²தி. ஸமனுபா⁴ஸனங் கம்மேனேவ ஆபஜ்ஜதி, கம்மேன வுட்டா²தி. ஸேஸங் அகம்மேன ஆபஜ்ஜதி, அகம்மேன வுட்டா²தி.
Kammacatukke pāpikāya diṭṭhiyā appaṭinissaggāpattiṃ kammena āpajjati, desento akammena vuṭṭhāti. Vissaṭṭhiādikaṃ akammena āpajjati, parivāsādinā kammena vuṭṭhāti. Samanubhāsanaṃ kammeneva āpajjati, kammena vuṭṭhāti. Sesaṃ akammena āpajjati,akammenavuṭṭhāti.
பரிக்கா²ரசதுக்கே பட²மோ ஸகபரிக்கா²ரோ, து³தியோ ஸங்கி⁴கோவ ததியோ சேதியஸந்தகோ, சதுத்தோ² கி³ஹிபரிக்கா²ரோ. ஸசே பன ஸோ பத்தசீவரனவகம்மபே⁴ஸஜ்ஜானங் அத்தா²ய ஆஹடோ ஹோதி, அவாபுரணங் தா³துங் அந்தோ ட²பாபேதுஞ்ச வட்டதி.
Parikkhāracatukke paṭhamo sakaparikkhāro, dutiyo saṅghikova tatiyo cetiyasantako, catuttho gihiparikkhāro. Sace pana so pattacīvaranavakammabhesajjānaṃ atthāya āhaṭo hoti, avāpuraṇaṃ dātuṃ anto ṭhapāpetuñca vaṭṭati.
ஸம்முகா²சதுக்கே பாபிகாய தி³ட்டி²யா அப்படினிஸ்ஸக்³கா³பத்திங் ஸங்க⁴ஸ்ஸ ஸம்முகா² ஆபஜ்ஜதி, வுட்டா²னகாலே பன ஸங்கே⁴ன கிச்சங் நத்தீ²தி பரம்முகா² வுட்டா²தி. விஸ்ஸட்டி²ஆதி³கங் பரம்முகா² ஆபஜ்ஜதி, ஸங்க⁴ஸ்ஸ ஸம்முகா² வுட்டா²தி. ஸமனுபா⁴ஸனங் ஸங்க⁴ஸ்ஸ ஸம்முகா² ஏவ ஆபஜ்ஜதி, ஸம்முகா² வுட்டா²தி. ஸேஸங் ஸம்பஜானமுஸாவாதா³தி³பே⁴த³ங் பரம்முகா²வ ஆபஜ்ஜதி, பரம்முகா²வ வுட்டா²தி. அஜானந்தசதுக்கங் அசித்தகசதுக்கஸதி³ஸங்.
Sammukhācatukke pāpikāya diṭṭhiyā appaṭinissaggāpattiṃ saṅghassa sammukhā āpajjati, vuṭṭhānakāle pana saṅghena kiccaṃ natthīti parammukhā vuṭṭhāti. Vissaṭṭhiādikaṃ parammukhā āpajjati, saṅghassa sammukhā vuṭṭhāti. Samanubhāsanaṃ saṅghassa sammukhā eva āpajjati, sammukhā vuṭṭhāti. Sesaṃ sampajānamusāvādādibhedaṃ parammukhāva āpajjati, parammukhāva vuṭṭhāti. Ajānantacatukkaṃ acittakacatukkasadisaṃ.
லிங்க³பாதுபா⁴வேனாதி ஸயிதஸ்ஸேவ பி⁴க்கு²ஸ்ஸ வா பி⁴க்கு²னியா வா லிங்க³பரிவத்தே ஜாதே ஸஹகா³ரஸெய்யாபத்தி ஹோதி இத³மேவ தங் படிச்ச வுத்தங். உபி⁴ன்னம்பி பன அஸாதா⁴ரணாபத்தி லிங்க³பாதுபா⁴வேன வுட்டா²தி. ஸஹபடிலாப⁴சதுக்கே யஸ்ஸ பி⁴க்கு²னோ லிங்க³ங் பரிவத்ததி, ஸோ ஸஹ லிங்க³படிலாபே⁴ன பட²மங் உப்பன்னவஸேன ஸெட்ட²பா⁴வேன ச புரிமங் புரிஸலிங்க³ங் ஜஹதி, பச்சி²மே இத்தி²லிங்கே³ பதிட்டா²தி, புரிஸகுத்தபுரிஸாகாராதி³வஸேன பவத்தா காயவசீவிஞ்ஞத்தியோ படிப்பஸ்ஸம்ப⁴ந்தி, பி⁴க்கூ²தி வா புரிஸோதி வா ஏவங் பவத்தா பண்ணத்தியோ நிருஜ்ஜ²ந்தி, யானி பி⁴க்கு²னீஹி அஸாதா⁴ரணானி ச²சத்தாலீஸ ஸிக்கா²பதா³னி தேஹி அனாபத்தியேவ ஹோதி. து³தியசதுக்கே பன யஸ்ஸா பி⁴க்கு²னியா லிங்க³ங் பரிவத்ததி, ஸா பச்சா²ஸமுப்பத்தியா வா ஹீனபா⁴வேன வா பச்சி²மந்தி ஸங்க்²யங் க³தங் இத்தி²லிங்க³ங் ஜஹதி, வுத்தப்பகாரேன புரிமந்தி ஸங்க்²யங் க³தே புரிஸலிங்கே³ பதிட்டா²தி. வுத்தவிபரீதா விஞ்ஞத்தியோ படிப்பஸ்ஸம்ப⁴ந்தி, பி⁴க்கு²னீதி வா இத்தீ²தி வா ஏவங் பவத்தா பண்ணத்தியோபி நிருஜ்ஜ²ந்தி, யானி பி⁴க்கூ²ஹி அஸாதா⁴ரணானி ஸதங் திங்ஸஞ்ச ஸிக்கா²பதா³னி, தேஹி அனாபத்தியேவ ஹோதி.
Liṅgapātubhāvenāti sayitasseva bhikkhussa vā bhikkhuniyā vā liṅgaparivatte jāte sahagāraseyyāpatti hoti idameva taṃ paṭicca vuttaṃ. Ubhinnampi pana asādhāraṇāpatti liṅgapātubhāvena vuṭṭhāti. Sahapaṭilābhacatukke yassa bhikkhuno liṅgaṃ parivattati, so saha liṅgapaṭilābhena paṭhamaṃ uppannavasena seṭṭhabhāvena ca purimaṃ purisaliṅgaṃ jahati, pacchime itthiliṅge patiṭṭhāti, purisakuttapurisākārādivasena pavattā kāyavacīviññattiyo paṭippassambhanti, bhikkhūti vā purisoti vā evaṃ pavattā paṇṇattiyo nirujjhanti, yāni bhikkhunīhi asādhāraṇāni chacattālīsa sikkhāpadāni tehi anāpattiyeva hoti. Dutiyacatukke pana yassā bhikkhuniyā liṅgaṃ parivattati, sā pacchāsamuppattiyā vā hīnabhāvena vā pacchimanti saṅkhyaṃ gataṃ itthiliṅgaṃ jahati, vuttappakārena purimanti saṅkhyaṃ gate purisaliṅge patiṭṭhāti. Vuttaviparītā viññattiyo paṭippassambhanti, bhikkhunīti vā itthīti vā evaṃ pavattā paṇṇattiyopi nirujjhanti, yāni bhikkhūhi asādhāraṇāni sataṃ tiṃsañca sikkhāpadāni, tehi anāpattiyeva hoti.
சத்தாரோ ஸாமுக்கங்ஸாதி சத்தாரோ மஹாபதே³ஸா, தே ஹி ப⁴க³வதா அனுப்பன்னே வத்து²ம்ஹி ஸயங் உக்கங்ஸித்வா உக்கி²பித்வா ட²பிதத்தா ‘‘ஸாமுக்கங்ஸா’’தி வுச்சந்தி. பரிபோ⁴கா³தி அஜ்ஜோ²ஹரணீயபரிபோ⁴கா³ , உத³கங் பன அகாலிகத்தா அப்படிக்³க³ஹிதகங் வட்டதி. யாவகாலிகாதீ³னி அப்படிக்³க³ஹிதகானி அஜ்ஜோ²ஹரிதுங் ந வட்டந்தி. சத்தாரி மஹாவிகடானி காலோதி³ஸ்ஸத்தா யதா²வுத்தே காலே வட்டந்தி. உபாஸகோ ஸீலவாதி பஞ்ச வா த³ஸ வா ஸீலானி கோ³பயமானோ.
Cattāro sāmukkaṃsāti cattāro mahāpadesā, te hi bhagavatā anuppanne vatthumhi sayaṃ ukkaṃsitvā ukkhipitvā ṭhapitattā ‘‘sāmukkaṃsā’’ti vuccanti. Paribhogāti ajjhoharaṇīyaparibhogā , udakaṃ pana akālikattā appaṭiggahitakaṃ vaṭṭati. Yāvakālikādīni appaṭiggahitakāni ajjhoharituṃ na vaṭṭanti. Cattāri mahāvikaṭāni kālodissattā yathāvutte kāle vaṭṭanti. Upāsako sīlavāti pañca vā dasa vā sīlāni gopayamāno.
ஆக³ந்துகாதி³சதுக்கே ஸச²த்துபாஹனோ ஸஸீஸங் பாருதோ விஹாரங் பவிஸந்தோ தத்த² விசரந்தோ ச ஆக³ந்துகோவ ஆபஜ்ஜதி, நோ ஆவாஸிகோ. ஆவாஸிகவத்தங் அகரொந்தோ பன ஆவாஸிகோ ஆபஜ்ஜதி, நோ ஆக³ந்துகோ. ஸேஸங் காயவசீத்³வாரிகங் ஆபத்திங் உபோ⁴பி ஆபஜ்ஜந்தி, அஸாதா⁴ரணங் ஆபத்திங் நேவ ஆக³ந்துகோ ஆபஜ்ஜதி, நோ ஆவாஸிகோ. க³மியசதுக்கேபி க³மியவத்தங் அபூரெத்வா க³ச்ச²ந்தோ க³மிகோ ஆபஜ்ஜதி, நோ ஆவாஸிகோ. ஆவாஸிகவத்தங் அகரொந்தோ பன ஆவாஸிகோ ஆபஜ்ஜதி, நோ க³மிகோ. ஸேஸங் உபோ⁴பி ஆபஜ்ஜந்தி, அஸாதா⁴ரணங் உபோ⁴பி நாபஜ்ஜந்தி. வத்து²னானத்ததாதி³சதுக்கே சதுன்னங் பாராஜிகானங் அஞ்ஞமஞ்ஞங் வத்து²னானத்ததாவ ஹோதி,நஆபத்தினானத்ததா. ஸப்³பா³பி ஹி ஸா பாராஜிகாபத்தியேவ. ஸங்கா⁴தி³ஸேஸாதீ³ஸுபி ஏஸேவ நயோ. பி⁴க்கு²ஸ்ஸ ச பி⁴க்கு²னியா ச அஞ்ஞமஞ்ஞங் காயஸங்ஸக்³கே³ பி⁴க்கு²ஸ்ஸ ஸங்கா⁴தி³ஸேஸோ பி⁴க்கு²னியா பாராஜிகந்தி ஏவங் ஆபத்தினானத்ததாவ ஹோதி, ந வத்து²னானத்ததா, உபி⁴ன்னம்பி ஹி காயஸங்ஸக்³கோ³வ வத்து². ததா² ‘‘லஸுணக்கா²த³னே பி⁴க்கு²னியா பாசித்தியங், பி⁴க்கு²ஸ்ஸ து³க்கட’’ந்தி ஏவமாதி³னாபெத்த² நயேன யோஜனா வேதி³தப்³பா³. சதுன்னங் பாராஜிகானங் தேரஸஹி ஸங்கா⁴தி³ஸேஸேஹி ஸத்³தி⁴ங் வத்து²னானத்ததா சேவ ஆபத்தினானத்ததா ச. ஏவங் ஸங்கா⁴தி³ஸேஸாதீ³னங் அனியதாதீ³ஹி. ஆதி³தோ பட்டா²ய சத்தாரி பாராஜிகானி ஏகதோ ஆபஜ்ஜந்தானங் பி⁴க்கு²பி⁴க்கு²னீனங் நேவ வத்து²னானத்ததா நோ ஆபத்தினானத்ததா. விஸுங் ஆபஜ்ஜந்தேஸுபி ஸேஸா ஸாதா⁴ரணாபத்தியோ ஆபஜ்ஜந்தேஸுபி ஏஸேவ நயோ.
Āgantukādicatukke sachattupāhano sasīsaṃ pāruto vihāraṃ pavisanto tattha vicaranto ca āgantukova āpajjati, no āvāsiko. Āvāsikavattaṃ akaronto pana āvāsiko āpajjati, no āgantuko. Sesaṃ kāyavacīdvārikaṃ āpattiṃ ubhopi āpajjanti, asādhāraṇaṃ āpattiṃ neva āgantuko āpajjati, no āvāsiko. Gamiyacatukkepi gamiyavattaṃ apūretvā gacchanto gamiko āpajjati, no āvāsiko. Āvāsikavattaṃ akaronto pana āvāsiko āpajjati, no gamiko. Sesaṃ ubhopi āpajjanti, asādhāraṇaṃ ubhopi nāpajjanti. Vatthunānattatādicatukke catunnaṃ pārājikānaṃ aññamaññaṃ vatthunānattatāva hoti,naāpattinānattatā. Sabbāpi hi sā pārājikāpattiyeva. Saṅghādisesādīsupi eseva nayo. Bhikkhussa ca bhikkhuniyā ca aññamaññaṃ kāyasaṃsagge bhikkhussa saṅghādiseso bhikkhuniyā pārājikanti evaṃ āpattinānattatāva hoti, na vatthunānattatā, ubhinnampi hi kāyasaṃsaggova vatthu. Tathā ‘‘lasuṇakkhādane bhikkhuniyā pācittiyaṃ, bhikkhussa dukkaṭa’’nti evamādināpettha nayena yojanā veditabbā. Catunnaṃ pārājikānaṃ terasahi saṅghādisesehi saddhiṃ vatthunānattatā ceva āpattinānattatāca. Evaṃ saṅghādisesādīnaṃ aniyatādīhi. Ādito paṭṭhāya cattāri pārājikāni ekato āpajjantānaṃ bhikkhubhikkhunīnaṃ neva vatthunānattatā no āpattinānattatā. Visuṃ āpajjantesupi sesā sādhāraṇāpattiyo āpajjantesupi eseva nayo.
வத்து²ஸபா⁴கா³தி³சதுக்கே பி⁴க்கு²ஸ்ஸ ச பி⁴க்கு²னியா ச காயஸங்ஸக்³கே³ வத்து²ஸபா⁴க³தா, நோ ஆபத்திஸபா⁴க³தா, சதூஸு பாராஜிகேஸு ஆபத்திஸபா⁴க³தா, நோ வத்து²ஸபா⁴க³தா. ஏஸ நயோ ஸங்கா⁴தி³ஸேஸாதீ³ஸு. பி⁴க்கு²ஸ்ஸ ச பி⁴க்கு²னியா ச சதூஸு பாராஜிகேஸு வத்து²ஸபா⁴க³தா சேவ ஆபத்திஸபா⁴க³தா ச. ஏஸ நயோ ஸப்³பா³ஸு ஸாதா⁴ரணாபத்தீஸு. அஸாதா⁴ரணாபத்தியங் நேவ வத்து²ஸபா⁴க³தா நோ ஆபத்திஸபா⁴க³தா. யோ ஹி புரிமசதுக்கே பட²மோ பஞ்ஹோ, ஸோ இத⁴ து³தியோ; யோ ச தத்த² து³தியோ, ஸோ இத⁴ பட²மோ. ததியசதுத்தே²ஸு நானாகரணங் நத்தி².
Vatthusabhāgādicatukke bhikkhussa ca bhikkhuniyā ca kāyasaṃsagge vatthusabhāgatā, no āpattisabhāgatā, catūsu pārājikesu āpattisabhāgatā, no vatthusabhāgatā. Esa nayo saṅghādisesādīsu. Bhikkhussa ca bhikkhuniyā ca catūsu pārājikesu vatthusabhāgatā ceva āpattisabhāgatā ca. Esa nayo sabbāsu sādhāraṇāpattīsu. Asādhāraṇāpattiyaṃ neva vatthusabhāgatā no āpattisabhāgatā. Yo hi purimacatukke paṭhamo pañho, so idha dutiyo; yo ca tattha dutiyo, so idha paṭhamo. Tatiyacatutthesu nānākaraṇaṃ natthi.
உபஜ்ஜா²யசதுக்கே ஸத்³தி⁴விஹாரிகஸ்ஸ உபஜ்ஜா²யேன கத்தப்³ப³வத்தஸ்ஸ அகரணே ஆபத்திங் உபஜ்ஜா²யோ ஆபஜ்ஜதி, நோ ஸத்³தி⁴விஹாரிகோ உபஜ்ஜா²யஸ்ஸ கத்தப்³ப³வத்தங் அகரொந்தோ ஸத்³தி⁴விஹாரிகோ ஆபஜ்ஜதி, நோ உபஜ்ஜா²யோ; ஸேஸங் உபோ⁴பி ஆபஜ்ஜந்தி, அஸாதா⁴ரணங் உபோ⁴பி நாபஜ்ஜந்தி. ஆசரியசதுக்கேபி ஏஸேவ நயோ.
Upajjhāyacatukke saddhivihārikassa upajjhāyena kattabbavattassa akaraṇe āpattiṃ upajjhāyoāpajjati, no saddhivihāriko upajjhāyassa kattabbavattaṃ akaronto saddhivihāriko āpajjati, no upajjhāyo; sesaṃ ubhopi āpajjanti, asādhāraṇaṃ ubhopi nāpajjanti. Ācariyacatukkepi eseva nayo.
ஆதி³யந்தசதுக்கே பாத³ங் வா அதிரேகபாத³ங் வா ஸஹத்தா² ஆதி³யந்தோ க³ருகங் ஆபஜ்ஜதி, ஊனகபாத³ங் க³ண்ஹாஹீதி ஆணத்தியா அஞ்ஞங் பயோஜெந்தோ லஹுகங் ஆபஜ்ஜதி. ஏதேன நயேன ஸேஸபத³த்தயங் வேதி³தப்³ப³ங்.
Ādiyantacatukke pādaṃ vā atirekapādaṃ vā sahatthā ādiyanto garukaṃ āpajjati, ūnakapādaṃ gaṇhāhīti āṇattiyā aññaṃ payojento lahukaṃ āpajjati. Etena nayena sesapadattayaṃ veditabbaṃ.
அபி⁴வாத³னாரஹசதுக்கே பி⁴க்கு²னீனங் தாவ ப⁴த்தக்³கே³ நவமபி⁴க்கு²னிதோ பட்டா²ய உபஜ்ஜா²யாபி அபி⁴வாத³னாரஹா நோ பச்சுட்டா²னாரஹா. அவிஸேஸேன ச விப்பகதபோ⁴ஜனஸ்ஸ பி⁴க்கு²ஸ்ஸ யோ கோசி வுட்³ட⁴தரோ. ஸட்டி²வஸ்ஸஸ்ஸாபி பாரிவாஸிகஸ்ஸ ஸமீபக³தோ தத³ஹுபஸம்பன்னோபி பச்சுட்டா²னாரஹோ நோ அபி⁴வாத³னாரஹோ. அப்படிக்கி²த்தேஸு டா²னேஸு வுட்³டோ⁴ நவகஸ்ஸ அபி⁴வாத³னாரஹோ சேவ பச்சுட்டா²னாரஹோ ச. நவகோ பன வுட்³ட⁴ஸ்ஸ நேவ அபி⁴வாத³னாரஹோ ந பச்சுட்டா²னாரஹோ. ஆஸனாரஹசதுக்கஸ்ஸ பட²மபத³ங் புரிமசதுக்கே து³தியபதே³ன, து³தியபத³ஞ்ச பட²மபதே³ன அத்த²தோ ஸதி³ஸங்.
Abhivādanārahacatukke bhikkhunīnaṃ tāva bhattagge navamabhikkhunito paṭṭhāya upajjhāyāpi abhivādanārahā no paccuṭṭhānārahā. Avisesena ca vippakatabhojanassa bhikkhussa yo koci vuḍḍhataro. Saṭṭhivassassāpi pārivāsikassa samīpagato tadahupasampannopi paccuṭṭhānāraho no abhivādanāraho. Appaṭikkhittesu ṭhānesu vuḍḍho navakassa abhivādanāraho ceva paccuṭṭhānāraho ca. Navako pana vuḍḍhassa neva abhivādanāraho na paccuṭṭhānāraho. Āsanārahacatukkassa paṭhamapadaṃ purimacatukke dutiyapadena, dutiyapadañca paṭhamapadena atthato sadisaṃ.
காலசதுக்கே பவாரெத்வா பு⁴ஞ்ஜந்தோ காலே ஆபஜ்ஜதி நோ விகாலே, விகாலபோ⁴ஜனாபத்திங் விகாலே ஆபஜ்ஜதி நோ காலே, ஸேஸங் காலே சேவ ஆபஜ்ஜதி விகாலே ச, அஸாதா⁴ரணங் நேவ காலே நோ விகாலே. படிக்³க³ஹிதசதுக்கே புரேப⁴த்தங் படிக்³க³ஹிதாமிஸங் காலே கப்பதி நோ விகாலே. பானகங் விகாலே கப்பதி, புனதி³வஸம்ஹி நோ காலே. ஸத்தாஹகாலிகங் யாவஜீவிகங் காலே சேவ கப்பதி விகாலே ச. அத்தனோ அத்தனோ காலாதீதங் யாவகாலிகாதி³த்தயங் அகப்பியமங்ஸங் உக்³க³ஹிதகமப்படிக்³க³ஹிதகஞ்ச நேவ காலே கப்பதி நோ விகாலே.
Kālacatukke pavāretvā bhuñjanto kāle āpajjati no vikāle, vikālabhojanāpattiṃ vikāle āpajjati no kāle, sesaṃ kāle ceva āpajjati vikāle ca, asādhāraṇaṃ neva kāle no vikāle. Paṭiggahitacatukke purebhattaṃ paṭiggahitāmisaṃ kāle kappati no vikāle. Pānakaṃ vikāle kappati, punadivasamhi no kāle. Sattāhakālikaṃ yāvajīvikaṃ kāle ceva kappati vikāle ca. Attano attano kālātītaṃ yāvakālikādittayaṃ akappiyamaṃsaṃ uggahitakamappaṭiggahitakañca neva kāle kappati no vikāle.
பச்சந்திமசதுக்கே ஸமுத்³தே³ ஸீமங் ப³ந்த⁴ந்தோ பச்சந்திமேஸு ஜனபதே³ஸு ஆபஜ்ஜதி, நோ மஜ்ஜி²மேஸு; பஞ்சவக்³கே³ன க³ணேன உபஸம்பாதெ³ந்தோ கு³ணங்கு³ணூபாஹனங் து⁴வனஹானங் சம்மத்த²ரணானி ச மஜ்ஜி²மேஸு ஜனபதே³ஸு ஆபஜ்ஜதி நோ பச்சந்திமேஸு. இமானி சத்தாரி ‘‘இத⁴ ந கப்பந்தீ’’தி வத³ந்தோபி பச்சந்திமேஸு ஆபஜ்ஜதி, ‘‘இத⁴ கப்பந்தீ’’தி வத³ந்தோ பன மஜ்ஜி²மேஸு ஆபஜ்ஜதி. ஸேஸாபத்திங் உப⁴யத்த² ஆபஜ்ஜதி, அஸாதா⁴ரணங் ந கத்த²சி ஆபஜ்ஜதி. து³தியசதுக்கே பஞ்சவக்³கே³ன க³ணேன உபஸம்பதா³தி³ சதுப்³பி³த⁴ம்பி வத்து² பச்சந்திமேஸு ஜனபதே³ஸு கப்பதி. ‘‘இத³ங் கப்பதீ’’தி தீ³பேதும்பி தத்தே²வ கப்பதி நோ மஜ்ஜி²மேஸு. ‘‘இத³ங் ந கப்பதீ’’தி தீ³பேதுங் பன மஜ்ஜி²மேஸு ஜனபதே³ஸு கப்பதி நோ பச்சந்திமேஸு . ஸேஸங் ‘‘அனுஜானாமி பி⁴க்க²வே பஞ்ச லோணானீ’’திஆதி³ அனுஞ்ஞாதகங் உப⁴யத்த² கப்பதி. யங் பன அகப்பியந்தி படிக்கி²த்தங், தங் உப⁴யத்தா²பி ந கப்பதி.
Paccantimacatukke samudde sīmaṃ bandhanto paccantimesu janapadesu āpajjati, no majjhimesu; pañcavaggena gaṇena upasampādento guṇaṅguṇūpāhanaṃ dhuvanahānaṃ cammattharaṇāni ca majjhimesu janapadesu āpajjati no paccantimesu. Imāni cattāri ‘‘idha na kappantī’’ti vadantopi paccantimesu āpajjati, ‘‘idha kappantī’’ti vadanto pana majjhimesu āpajjati. Sesāpattiṃ ubhayattha āpajjati, asādhāraṇaṃ na katthaci āpajjati. Dutiyacatukke pañcavaggena gaṇena upasampadādi catubbidhampi vatthu paccantimesu janapadesu kappati. ‘‘Idaṃ kappatī’’ti dīpetumpi tattheva kappati no majjhimesu. ‘‘Idaṃ na kappatī’’ti dīpetuṃ pana majjhimesu janapadesu kappati no paccantimesu. Sesaṃ ‘‘anujānāmi bhikkhave pañca loṇānī’’tiādi anuññātakaṃ ubhayattha kappati. Yaṃ pana akappiyanti paṭikkhittaṃ, taṃ ubhayatthāpi na kappati.
அந்தோஆதி³சதுக்கே அனுபக²ஜ்ஜ ஸெய்யாதி³ங் அந்தோ ஆபஜ்ஜதி நோ ப³ஹி, அஜ்ஜோ²காஸே ஸங்கி⁴கமஞ்சாதீ³னி நிக்கி²பித்வா பக்கமந்தோ ப³ஹி ஆபஜ்ஜதி நோ அந்தோ, ஸேஸங் அந்தோ சேவ ப³ஹி ச, அஸாதா⁴ரணங் நேவ அந்தோ ந ப³ஹி. அந்தோஸீமாதி³சதுக்கே ஆக³ந்துகோ வத்தங் அபூரெந்தோ அந்தோஸீமாய ஆபஜ்ஜதி, க³மியோ ப³ஹிஸீமாய முஸாவாதா³தி³ங் அந்தோஸீமாய ச ப³ஹிஸீமாய ச ஆபஜ்ஜதி,அஸாதா⁴ரணங் ந கத்த²சி.கா³மசதுக்கே அந்தரக⁴ரபடிஸங்யுத்தங் ஸேகி²யபஞ்ஞத்திங் கா³மே ஆபஜ்ஜதி நோ அரஞ்ஞே. பி⁴க்கு²னீ அருணங் உட்டா²பயமானா அரஞ்ஞே ஆபஜ்ஜதி நோ கா³மே. முஸாவாதா³தி³ங் கா³மே சேவ ஆபஜ்ஜதி அரஞ்ஞே ச, அஸாதா⁴ரணங் ந கத்த²சி.
Antoādicatukke anupakhajja seyyādiṃ anto āpajjati no bahi, ajjhokāse saṅghikamañcādīni nikkhipitvā pakkamanto bahi āpajjati no anto, sesaṃ anto ceva bahi ca, asādhāraṇaṃ neva anto na bahi. Antosīmādicatukke āgantuko vattaṃ apūrento antosīmāya āpajjati, gamiyo bahisīmāya musāvādādiṃ antosīmāya ca bahisīmāya ca āpajjati,asādhāraṇaṃ na katthaci.Gāmacatukke antaragharapaṭisaṃyuttaṃ sekhiyapaññattiṃ gāme āpajjati no araññe. Bhikkhunī aruṇaṃ uṭṭhāpayamānā araññe āpajjati no gāme. Musāvādādiṃ gāme ceva āpajjati araññe ca, asādhāraṇaṃ na katthaci.
சத்தாரோ புப்³ப³கிச்சாதி ‘‘ஸம்மஜ்ஜனீ பதீ³போ ச உத³கங் ஆஸனேன சா’’தி இத³ங் சதுப்³பி³த⁴ங் புப்³ப³கரணந்தி வுச்சதீதி வுத்தங். ‘‘ச²ந்த³பாரிஸுத்³தி⁴உதுக்கா²னங் பி⁴க்கு²க³ணனா ச ஓவாதோ³’’தி இமே பன ‘‘சத்தாரோ புப்³ப³கிச்சா’’தி வேதி³தப்³பா³. சத்தாரோ பத்தகல்லாதி உபோஸதோ² யாவதிகா ச பி⁴க்கூ² கம்மப்பத்தா தே ஆக³தா ஹொந்தி, ஸபா⁴கா³பத்தியோ ந விஜ்ஜந்தி, வஜ்ஜனீயா ச புக்³க³லா தஸ்மிங் ந ஹொந்தி, பத்தகல்லந்தி வுச்சதீதி. சத்தாரி அனஞ்ஞபாசித்தியானீதி ‘‘ஏததே³வ பச்சயங் கரித்வா அனஞ்ஞங் பாசித்திய’’ந்தி ஏவங் வுத்தானி அனுபக²ஜ்ஜஸெய்யாகப்பனஸிக்கா²பத³ங் ‘‘ஏஹாவுஸோ கா³மங் வா நிக³மங் வா’’தி ஸிக்கா²பத³ங், ஸஞ்சிச்ச குக்குச்சஉபத³ஹனங், உபஸ்ஸுதிதிட்ட²னந்தி இமானி சத்தாரி. சதஸ்ஸோ பி⁴க்கு²ஸம்முதியோதி ‘‘ஏகரத்தம்பி சே பி⁴க்கு² திசீவரேன விப்பவஸெய்ய அஞ்ஞத்ர பி⁴க்கு²ஸம்முதியா, அஞ்ஞங் நவங் ஸந்த²தங் காராபெய்ய அஞ்ஞத்ர பி⁴க்கு²ஸம்முதியா, ததோ சே உத்தரி விப்பவஸெய்ய அஞ்ஞத்ர பி⁴க்கு²ஸம்முதியா, து³ட்டு²ல்லங் ஆபத்திங் அனுபஸம்பன்னஸ்ஸ ஆரோசெய்ய அஞ்ஞத்ர பி⁴க்கு²ஸம்முதியா’’தி ஏவங் ஆக³தா தேரஸஹி ஸம்முதீஹி முத்தா ஸம்முதியோ. கி³லானசதுக்கே அஞ்ஞபே⁴ஸஜ்ஜேன கரணீயேன லோலதாய அஞ்ஞங் விஞ்ஞாபெந்தோ கி³லானோ ஆபஜ்ஜதி, அபே⁴ஸஜ்ஜகரணீயேன பே⁴ஸஜ்ஜங் விஞ்ஞாபெந்தோ அகி³லானோ ஆபஜ்ஜதி, முஸாவாதா³தி³ங் உபோ⁴பி ஆபஜ்ஜந்தி, அஸாதா⁴ரணங் உபோ⁴பி நாபஜ்ஜந்தி. ஸேஸங் ஸப்³ப³த்த² உத்தானமேவாதி.
Cattāropubbakiccāti ‘‘sammajjanī padīpo ca udakaṃ āsanena cā’’ti idaṃ catubbidhaṃ pubbakaraṇanti vuccatīti vuttaṃ. ‘‘Chandapārisuddhiutukkhānaṃ bhikkhugaṇanā ca ovādo’’ti ime pana ‘‘cattāro pubbakiccā’’ti veditabbā. Cattāro pattakallāti uposatho yāvatikā ca bhikkhū kammappattā te āgatā honti, sabhāgāpattiyo na vijjanti, vajjanīyā ca puggalā tasmiṃ na honti, pattakallanti vuccatīti. Cattāri anaññapācittiyānīti ‘‘etadeva paccayaṃ karitvā anaññaṃ pācittiya’’nti evaṃ vuttāni anupakhajjaseyyākappanasikkhāpadaṃ ‘‘ehāvuso gāmaṃ vā nigamaṃ vā’’ti sikkhāpadaṃ, sañcicca kukkuccaupadahanaṃ, upassutitiṭṭhananti imāni cattāri. Catasso bhikkhusammutiyoti ‘‘ekarattampi ce bhikkhu ticīvarena vippavaseyya aññatra bhikkhusammutiyā, aññaṃ navaṃ santhataṃ kārāpeyya aññatra bhikkhusammutiyā, tato ce uttari vippavaseyya aññatra bhikkhusammutiyā, duṭṭhullaṃ āpattiṃ anupasampannassa āroceyya aññatra bhikkhusammutiyā’’ti evaṃ āgatā terasahi sammutīhi muttā sammutiyo. Gilānacatukke aññabhesajjena karaṇīyena lolatāya aññaṃ viññāpento gilāno āpajjati, abhesajjakaraṇīyena bhesajjaṃ viññāpento agilāno āpajjati, musāvādādiṃ ubhopi āpajjanti, asādhāraṇaṃ ubhopi nāpajjanti. Sesaṃ sabbattha uttānamevāti.
சதுக்கவாரவண்ணனா நிட்டி²தா.
Catukkavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 4. சதுக்கவாரோ • 4. Catukkavāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / சதுக்கவாரவண்ணனா • Catukkavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / சதுக்கவாரவண்ணனா • Catukkavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சதுக்கவாரவண்ணனா • Catukkavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஏகுத்தரிகனயோ சதுக்கவாரவண்ணனா • Ekuttarikanayo catukkavāravaṇṇanā
