| Library / Tipiṭaka / д̇ибидага • Tipiṭaka / бариваара-адтагат̇аа • Parivāra-aṭṭhakathā |
жад̇уггаваараван̣н̣анаа
Catukkavāravaṇṇanā
324. жад̇уггзсу сагаваажааяа аабаж̇ж̇ад̇и бараваажааяа вудтаад̇ийд̇и важийд̣̇вааригам̣ бад̣̇асод̇хаммаад̣̇ибхзд̣̇ам̣ аабад̇д̇им̣ аабаж̇ж̇ид̇ваа д̇ин̣авад̇т̇аарагасамат̇адтаанам̣ г̇ад̇о барасса гаммаваажааяа вудтаад̇и . бараваажааяа аабаж̇ж̇ад̇и сагаваажааяа вудтаад̇ийд̇и баабигааяа д̣̇идтияаа аббадиниссаг̇г̇з барасса гаммаваажааяа аабаж̇ж̇ад̇и, буг̇г̇аласса санд̇игз д̣̇зсзнд̇о сагаваажааяа вудтаад̇и. сагаваажааяа аабаж̇ж̇ад̇и сагаваажааяа вудтаад̇ийд̇и важийд̣̇вааригам̣ бад̣̇асод̇хаммаад̣̇ибхзд̣̇ам̣ аабад̇д̇им̣ сагаваажааяа аабаж̇ж̇ад̇и, д̣̇зсзд̇ваа вудтаханд̇оби сагаваажааяа вудтаад̇и. бараваажааяа аабаж̇ж̇ад̇и бараваажааяа вудтаад̇ийд̇и яаавад̇ад̇ияагам̣ сан̇гхаад̣̇исзсам̣ барасса гаммаваажааяа аабаж̇ж̇ад̇и, вудтаханд̇оби барасса бариваасагаммаваажаад̣̇ийхи вудтаад̇и. д̇ад̇о барзсу гааяад̣̇вааригам̣ гааязна аабаж̇ж̇ад̇и, д̣̇зсзнд̇о ваажааяа вудтаад̇и. важийд̣̇вааригам̣ ваажааяа аабаж̇ж̇ад̇и, д̇ин̣авад̇т̇аарагз гааязна вудтаад̇и. гааяад̣̇вааригам̣ гааязнааабаж̇ж̇ад̇и, д̇амзва д̇ин̣авад̇т̇аарагз гааязна вудтаад̇и. важийд̣̇вааригам̣ ваажааяа аабаж̇ж̇ад̇и, д̇амзва д̣̇зсзнд̇о ваажааяа вудтаад̇и. сан̇гхигаман̃жасса ад̇д̇ано бажжад̇т̇аран̣зна анад̇т̇арад̇о гааяасампусанз ломаг̇ан̣анааяа аабаж̇ж̇ид̇аб̣б̣аабад̇д̇им̣ сахаг̇аарасзяяаабад̇д̇ин̃жа басуд̇д̇о аабаж̇ж̇ад̇и, баб̣уж̇жхид̇ваа бана аабаннабхаавам̣ н̃ад̇ваа д̣̇зсзнд̇о бадиб̣уд̣̇д̇хо вудтаад̇и. ж̇аг̇г̇анд̇о аабаж̇ж̇ид̇ваа бана д̇ин̣авад̇т̇аарагасамат̇адтаанз саяанд̇о бадиб̣уд̣̇д̇хо аабаж̇ж̇ад̇и басуд̇д̇о вудтаад̇и наама. бажчимабад̣̇ад̣̇ваяамби вуд̇д̇аанусаарзнзва взд̣̇ид̇аб̣б̣ам̣.
324. Catukkesu sakavācāya āpajjati paravācāya vuṭṭhātīti vacīdvārikaṃ padasodhammādibhedaṃ āpattiṃ āpajjitvā tiṇavatthārakasamathaṭṭhānaṃ gato parassa kammavācāya vuṭṭhāti . Paravācāya āpajjati sakavācāya vuṭṭhātīti pāpikāya diṭṭhiyā appaṭinissagge parassa kammavācāya āpajjati, puggalassa santike desento sakavācāya vuṭṭhāti. Sakavācāya āpajjati sakavācāya vuṭṭhātīti vacīdvārikaṃ padasodhammādibhedaṃ āpattiṃ sakavācāya āpajjati, desetvā vuṭṭhahantopi sakavācāya vuṭṭhāti. Paravācāya āpajjati paravācāya vuṭṭhātīti yāvatatiyakaṃ saṅghādisesaṃ parassa kammavācāya āpajjati, vuṭṭhahantopi parassa parivāsakammavācādīhi vuṭṭhāti. Tato paresu kāyadvārikaṃ kāyena āpajjati, desento vācāya vuṭṭhāti. Vacīdvārikaṃ vācāya āpajjati, tiṇavatthārake kāyena vuṭṭhāti. Kāyadvārikaṃ kāyenaāpajjati, tameva tiṇavatthārake kāyena vuṭṭhāti. Vacīdvārikaṃ vācāya āpajjati, tameva desento vācāya vuṭṭhāti. Saṅghikamañcassa attano paccattharaṇena anattharato kāyasamphusane lomagaṇanāya āpajjitabbāpattiṃ sahagāraseyyāpattiñca pasutto āpajjati, pabujjhitvā pana āpannabhāvaṃ ñatvā desento paṭibuddho vuṭṭhāti. Jagganto āpajjitvā pana tiṇavatthārakasamathaṭṭhāne sayanto paṭibuddho āpajjati pasutto vuṭṭhāti nāma. Pacchimapadadvayampi vuttānusāreneva veditabbaṃ.
ажид̇д̇агаабад̇д̇им̣ ажид̇д̇аго аабаж̇ж̇ад̇и наама. бажчаа д̣̇зсзнд̇о сажид̇д̇аго вудтаад̇и. сажид̇д̇агаабад̇д̇им̣ сажид̇д̇аго аабаж̇ж̇ад̇и наама. д̇ин̣авад̇т̇аарагадтаанз саяанд̇о ажид̇д̇аго вудтаад̇и. сзсабад̣̇ад̣̇ваяамби вуд̇д̇аанусаарзнзва взд̣̇ид̇аб̣б̣ам̣. яо сабхааг̇ам̣ аабад̇д̇им̣ д̣̇зсзд̇и, аяам̣ д̣̇зсанаабажжаяаа д̣̇уггадам̣ аабаж̇ж̇анд̇о баажид̇д̇ияаад̣̇ийсу ан̃н̃ад̇арам̣ д̣̇зсзд̇и, д̇ан̃жа д̣̇зсзнд̇о д̣̇уггадам̣ аабаж̇ж̇ад̇и. д̇ам̣ бана д̣̇уггадам̣ аабаж̇ж̇анд̇о баажид̇д̇ияаад̣̇ид̇о вудтаад̇и. баажид̇д̇ияаад̣̇ид̇о жа вудтаханд̇о д̇ам̣ аабаж̇ж̇ад̇и. ид̇и згасса буг̇г̇аласса згамзва баяог̇ам̣ санд̇хааяа ‘‘аабад̇д̇им̣ аабаж̇ж̇анд̇о д̣̇зсзд̇ий’’д̇и ид̣̇ам̣ жад̇уггам̣ вуд̇д̇анд̇и взд̣̇ид̇аб̣б̣ам̣.
Acittakāpattiṃ acittako āpajjati nāma. Pacchā desento sacittako vuṭṭhāti. Sacittakāpattiṃ sacittako āpajjati nāma. Tiṇavatthārakaṭṭhāne sayanto acittako vuṭṭhāti. Sesapadadvayampi vuttānusāreneva veditabbaṃ. Yo sabhāgaṃ āpattiṃ deseti, ayaṃ desanāpaccayā dukkaṭaṃ āpajjanto pācittiyādīsu aññataraṃ deseti, tañca desento dukkaṭaṃ āpajjati. Taṃ pana dukkaṭaṃ āpajjanto pācittiyādito vuṭṭhāti. Pācittiyādito ca vuṭṭhahanto taṃ āpajjati. Iti ekassa puggalassa ekameva payogaṃ sandhāya ‘‘āpattiṃ āpajjanto desetī’’ti idaṃ catukkaṃ vuttanti veditabbaṃ.
гаммажад̇уггз баабигааяа д̣̇идтияаа аббадиниссаг̇г̇аабад̇д̇им̣ гаммзна аабаж̇ж̇ад̇и, д̣̇зсзнд̇о агаммзна вудтаад̇и. виссадтиаад̣̇игам̣ агаммзна аабаж̇ж̇ад̇и, бариваасаад̣̇инаа гаммзна вудтаад̇и. саманубхаасанам̣ гаммзнзва аабаж̇ж̇ад̇и, гаммзна вудтаад̇и. сзсам̣ агаммзна аабаж̇ж̇ад̇и, агаммзна вудтаад̇и.
Kammacatukke pāpikāya diṭṭhiyā appaṭinissaggāpattiṃ kammena āpajjati, desento akammena vuṭṭhāti. Vissaṭṭhiādikaṃ akammena āpajjati, parivāsādinā kammena vuṭṭhāti. Samanubhāsanaṃ kammeneva āpajjati, kammena vuṭṭhāti. Sesaṃ akammena āpajjati,akammenavuṭṭhāti.
баригкааражад̇уггз батамо сагабаригкааро, д̣̇уд̇ияо сан̇гхигова д̇ад̇ияо жзд̇ияасанд̇аго, жад̇уд̇т̇о г̇ихибаригкааро. сажз бана со бад̇д̇ажийваранавагаммабхзсаж̇ж̇аанам̣ ад̇т̇ааяа аахадо ход̇и, аваабуран̣ам̣ д̣̇аад̇ум̣ анд̇о табаабзд̇ун̃жа ваддад̇и.
Parikkhāracatukke paṭhamo sakaparikkhāro, dutiyo saṅghikova tatiyo cetiyasantako, catuttho gihiparikkhāro. Sace pana so pattacīvaranavakammabhesajjānaṃ atthāya āhaṭo hoti, avāpuraṇaṃ dātuṃ anto ṭhapāpetuñca vaṭṭati.
саммукаажад̇уггз баабигааяа д̣̇идтияаа аббадиниссаг̇г̇аабад̇д̇им̣ сан̇гхасса саммукаа аабаж̇ж̇ад̇и, вудтаанагаалз бана сан̇гхзна гижжам̣ над̇т̇ийд̇и бараммукаа вудтаад̇и. виссадтиаад̣̇игам̣ бараммукаа аабаж̇ж̇ад̇и, сан̇гхасса саммукаа вудтаад̇и. саманубхаасанам̣ сан̇гхасса саммукаа зва аабаж̇ж̇ад̇и, саммукаа вудтаад̇и. сзсам̣ самбаж̇аанамусааваад̣̇аад̣̇ибхзд̣̇ам̣ бараммукаава аабаж̇ж̇ад̇и, бараммукаава вудтаад̇и. аж̇аананд̇ажад̇уггам̣ ажид̇д̇агажад̇уггасад̣̇исам̣.
Sammukhācatukke pāpikāya diṭṭhiyā appaṭinissaggāpattiṃ saṅghassa sammukhā āpajjati, vuṭṭhānakāle pana saṅghena kiccaṃ natthīti parammukhā vuṭṭhāti. Vissaṭṭhiādikaṃ parammukhā āpajjati, saṅghassa sammukhā vuṭṭhāti. Samanubhāsanaṃ saṅghassa sammukhā eva āpajjati, sammukhā vuṭṭhāti. Sesaṃ sampajānamusāvādādibhedaṃ parammukhāva āpajjati, parammukhāva vuṭṭhāti. Ajānantacatukkaṃ acittakacatukkasadisaṃ.
лин̇г̇абаад̇убхаавзнаад̇и саяид̇ассзва бхигкусса ваа бхигкунияаа ваа лин̇г̇абаривад̇д̇з ж̇аад̇з сахаг̇аарасзяяаабад̇д̇и ход̇и ид̣̇амзва д̇ам̣ бадижжа вуд̇д̇ам̣. убхиннамби бана асаад̇хааран̣аабад̇д̇и лин̇г̇абаад̇убхаавзна вудтаад̇и. сахабадилаабхажад̇уггз яасса бхигкуно лин̇г̇ам̣ баривад̇д̇ад̇и, со саха лин̇г̇абадилаабхзна батамам̣ уббаннавасзна сздтабхаавзна жа буримам̣ бурисалин̇г̇ам̣ ж̇ахад̇и, бажчимз ид̇т̇илин̇г̇з бад̇идтаад̇и, бурисагуд̇д̇абурисаагаараад̣̇ивасзна бавад̇д̇аа гааяаважийвин̃н̃ад̇д̇ияо бадиббассамбханд̇и, бхигкууд̇и ваа бурисод̇и ваа звам̣ бавад̇д̇аа бан̣н̣ад̇д̇ияо нируж̇жханд̇и, яаани бхигкунийхи асаад̇хааран̣аани чажад̇д̇аалийса сигкаабад̣̇аани д̇зхи анаабад̇д̇иязва ход̇и. д̣̇уд̇ияажад̇уггз бана яассаа бхигкунияаа лин̇г̇ам̣ баривад̇д̇ад̇и, саа бажчаасамуббад̇д̇ияаа ваа хийнабхаавзна ваа бажчиманд̇и сан̇кяам̣ г̇ад̇ам̣ ид̇т̇илин̇г̇ам̣ ж̇ахад̇и, вуд̇д̇аббагаарзна буриманд̇и сан̇кяам̣ г̇ад̇з бурисалин̇г̇з бад̇идтаад̇и. вуд̇д̇авибарийд̇аа вин̃н̃ад̇д̇ияо бадиббассамбханд̇и, бхигкунийд̇и ваа ид̇т̇ийд̇и ваа звам̣ бавад̇д̇аа бан̣н̣ад̇д̇ияоби нируж̇жханд̇и, яаани бхигкуухи асаад̇хааран̣аани сад̇ам̣ д̇им̣сан̃жа сигкаабад̣̇аани, д̇зхи анаабад̇д̇иязва ход̇и.
Liṅgapātubhāvenāti sayitasseva bhikkhussa vā bhikkhuniyā vā liṅgaparivatte jāte sahagāraseyyāpatti hoti idameva taṃ paṭicca vuttaṃ. Ubhinnampi pana asādhāraṇāpatti liṅgapātubhāvena vuṭṭhāti. Sahapaṭilābhacatukke yassa bhikkhuno liṅgaṃ parivattati, so saha liṅgapaṭilābhena paṭhamaṃ uppannavasena seṭṭhabhāvena ca purimaṃ purisaliṅgaṃ jahati, pacchime itthiliṅge patiṭṭhāti, purisakuttapurisākārādivasena pavattā kāyavacīviññattiyo paṭippassambhanti, bhikkhūti vā purisoti vā evaṃ pavattā paṇṇattiyo nirujjhanti, yāni bhikkhunīhi asādhāraṇāni chacattālīsa sikkhāpadāni tehi anāpattiyeva hoti. Dutiyacatukke pana yassā bhikkhuniyā liṅgaṃ parivattati, sā pacchāsamuppattiyā vā hīnabhāvena vā pacchimanti saṅkhyaṃ gataṃ itthiliṅgaṃ jahati, vuttappakārena purimanti saṅkhyaṃ gate purisaliṅge patiṭṭhāti. Vuttaviparītā viññattiyo paṭippassambhanti, bhikkhunīti vā itthīti vā evaṃ pavattā paṇṇattiyopi nirujjhanti, yāni bhikkhūhi asādhāraṇāni sataṃ tiṃsañca sikkhāpadāni, tehi anāpattiyeva hoti.
жад̇д̇ааро саамуггам̣саад̇и жад̇д̇ааро махаабад̣̇зсаа, д̇з хи бхаг̇авад̇аа ануббаннз вад̇т̇умхи саяам̣ уггам̣сид̇ваа угкибид̇ваа табид̇ад̇д̇аа ‘‘саамуггам̣саа’’д̇и вужжанд̇и. барибхог̇аад̇и аж̇жхохаран̣ийяабарибхог̇аа , уд̣̇агам̣ бана агаалигад̇д̇аа аббадиг̇г̇ахид̇агам̣ ваддад̇и. яаавагаалигаад̣̇ийни аббадиг̇г̇ахид̇агаани аж̇жхохарид̇ум̣ на вадданд̇и. жад̇д̇аари махаавигадаани гаалод̣̇иссад̇д̇аа яат̇аавуд̇д̇з гаалз вадданд̇и. убаасаго сийлаваад̇и бан̃жа ваа д̣̇аса ваа сийлаани г̇обаяамаано.
Cattāro sāmukkaṃsāti cattāro mahāpadesā, te hi bhagavatā anuppanne vatthumhi sayaṃ ukkaṃsitvā ukkhipitvā ṭhapitattā ‘‘sāmukkaṃsā’’ti vuccanti. Paribhogāti ajjhoharaṇīyaparibhogā , udakaṃ pana akālikattā appaṭiggahitakaṃ vaṭṭati. Yāvakālikādīni appaṭiggahitakāni ajjhoharituṃ na vaṭṭanti. Cattāri mahāvikaṭāni kālodissattā yathāvutte kāle vaṭṭanti. Upāsako sīlavāti pañca vā dasa vā sīlāni gopayamāno.
ааг̇анд̇угаад̣̇ижад̇уггз сачад̇д̇убаахано сасийсам̣ бааруд̇о вихаарам̣ бависанд̇о д̇ад̇т̇а вижаранд̇о жа ааг̇анд̇угова аабаж̇ж̇ад̇и, но ааваасиго. ааваасигавад̇д̇ам̣ агаронд̇о бана ааваасиго аабаж̇ж̇ад̇и, но ааг̇анд̇уго. сзсам̣ гааяаважийд̣̇вааригам̣ аабад̇д̇им̣ убхоби аабаж̇ж̇анд̇и, асаад̇хааран̣ам̣ аабад̇д̇им̣ нзва ааг̇анд̇уго аабаж̇ж̇ад̇и, но ааваасиго. г̇амияажад̇уггзби г̇амияавад̇д̇ам̣ абуурзд̇ваа г̇ажчанд̇о г̇амиго аабаж̇ж̇ад̇и, но ааваасиго. ааваасигавад̇д̇ам̣ агаронд̇о бана ааваасиго аабаж̇ж̇ад̇и, но г̇амиго. сзсам̣ убхоби аабаж̇ж̇анд̇и, асаад̇хааран̣ам̣ убхоби наабаж̇ж̇анд̇и. вад̇т̇унаанад̇д̇ад̇аад̣̇ижад̇уггз жад̇уннам̣ баарааж̇игаанам̣ ан̃н̃аман̃н̃ам̣ вад̇т̇унаанад̇д̇ад̇аава ход̇и,нааабад̇д̇инаанад̇д̇ад̇аа. саб̣б̣ааби хи саа баарааж̇игаабад̇д̇иязва. сан̇гхаад̣̇исзсаад̣̇ийсуби зсзва наяо. бхигкусса жа бхигкунияаа жа ан̃н̃аман̃н̃ам̣ гааяасам̣саг̇г̇з бхигкусса сан̇гхаад̣̇исзсо бхигкунияаа баарааж̇иганд̇и звам̣ аабад̇д̇инаанад̇д̇ад̇аава ход̇и, на вад̇т̇унаанад̇д̇ад̇аа, убхиннамби хи гааяасам̣саг̇г̇ова вад̇т̇у. д̇ат̇аа ‘‘ласун̣агкаад̣̇анз бхигкунияаа баажид̇д̇ияам̣, бхигкусса д̣̇уггада’’нд̇и звамаад̣̇инаабзд̇т̇а наязна яож̇анаа взд̣̇ид̇аб̣б̣аа. жад̇уннам̣ баарааж̇игаанам̣ д̇зрасахи сан̇гхаад̣̇исзсзхи сад̣̇д̇хим̣ вад̇т̇унаанад̇д̇ад̇аа жзва аабад̇д̇инаанад̇д̇ад̇аа жа. звам̣ сан̇гхаад̣̇исзсаад̣̇ийнам̣ анияад̇аад̣̇ийхи. аад̣̇ид̇о бадтааяа жад̇д̇аари баарааж̇игаани згад̇о аабаж̇ж̇анд̇аанам̣ бхигкубхигкунийнам̣ нзва вад̇т̇унаанад̇д̇ад̇аа но аабад̇д̇инаанад̇д̇ад̇аа. висум̣ аабаж̇ж̇анд̇зсуби сзсаа саад̇хааран̣аабад̇д̇ияо аабаж̇ж̇анд̇зсуби зсзва наяо.
Āgantukādicatukke sachattupāhano sasīsaṃ pāruto vihāraṃ pavisanto tattha vicaranto ca āgantukova āpajjati, no āvāsiko. Āvāsikavattaṃ akaronto pana āvāsiko āpajjati, no āgantuko. Sesaṃ kāyavacīdvārikaṃ āpattiṃ ubhopi āpajjanti, asādhāraṇaṃ āpattiṃ neva āgantuko āpajjati, no āvāsiko. Gamiyacatukkepi gamiyavattaṃ apūretvā gacchanto gamiko āpajjati, no āvāsiko. Āvāsikavattaṃ akaronto pana āvāsiko āpajjati, no gamiko. Sesaṃ ubhopi āpajjanti, asādhāraṇaṃ ubhopi nāpajjanti. Vatthunānattatādicatukke catunnaṃ pārājikānaṃ aññamaññaṃ vatthunānattatāva hoti,naāpattinānattatā. Sabbāpi hi sā pārājikāpattiyeva. Saṅghādisesādīsupi eseva nayo. Bhikkhussa ca bhikkhuniyā ca aññamaññaṃ kāyasaṃsagge bhikkhussa saṅghādiseso bhikkhuniyā pārājikanti evaṃ āpattinānattatāva hoti, na vatthunānattatā, ubhinnampi hi kāyasaṃsaggova vatthu. Tathā ‘‘lasuṇakkhādane bhikkhuniyā pācittiyaṃ, bhikkhussa dukkaṭa’’nti evamādināpettha nayena yojanā veditabbā. Catunnaṃ pārājikānaṃ terasahi saṅghādisesehi saddhiṃ vatthunānattatā ceva āpattinānattatāca. Evaṃ saṅghādisesādīnaṃ aniyatādīhi. Ādito paṭṭhāya cattāri pārājikāni ekato āpajjantānaṃ bhikkhubhikkhunīnaṃ neva vatthunānattatā no āpattinānattatā. Visuṃ āpajjantesupi sesā sādhāraṇāpattiyo āpajjantesupi eseva nayo.
вад̇т̇усабхааг̇аад̣̇ижад̇уггз бхигкусса жа бхигкунияаа жа гааяасам̣саг̇г̇з вад̇т̇усабхааг̇ад̇аа, но аабад̇д̇исабхааг̇ад̇аа, жад̇уусу баарааж̇игзсу аабад̇д̇исабхааг̇ад̇аа, но вад̇т̇усабхааг̇ад̇аа. зса наяо сан̇гхаад̣̇исзсаад̣̇ийсу. бхигкусса жа бхигкунияаа жа жад̇уусу баарааж̇игзсу вад̇т̇усабхааг̇ад̇аа жзва аабад̇д̇исабхааг̇ад̇аа жа. зса наяо саб̣б̣аасу саад̇хааран̣аабад̇д̇ийсу. асаад̇хааран̣аабад̇д̇ияам̣ нзва вад̇т̇усабхааг̇ад̇аа но аабад̇д̇исабхааг̇ад̇аа. яо хи буримажад̇уггз батамо бан̃хо, со ид̇ха д̣̇уд̇ияо; яо жа д̇ад̇т̇а д̣̇уд̇ияо, со ид̇ха батамо. д̇ад̇ияажад̇уд̇т̇зсу наанаагаран̣ам̣ над̇т̇и.
Vatthusabhāgādicatukke bhikkhussa ca bhikkhuniyā ca kāyasaṃsagge vatthusabhāgatā, no āpattisabhāgatā, catūsu pārājikesu āpattisabhāgatā, no vatthusabhāgatā. Esa nayo saṅghādisesādīsu. Bhikkhussa ca bhikkhuniyā ca catūsu pārājikesu vatthusabhāgatā ceva āpattisabhāgatā ca. Esa nayo sabbāsu sādhāraṇāpattīsu. Asādhāraṇāpattiyaṃ neva vatthusabhāgatā no āpattisabhāgatā. Yo hi purimacatukke paṭhamo pañho, so idha dutiyo; yo ca tattha dutiyo, so idha paṭhamo. Tatiyacatutthesu nānākaraṇaṃ natthi.
убаж̇жхааяажад̇уггз сад̣̇д̇хивихааригасса убаж̇жхааязна гад̇д̇аб̣б̣авад̇д̇асса агаран̣з аабад̇д̇им̣ убаж̇жхааяо аабаж̇ж̇ад̇и, но сад̣̇д̇хивихаариго убаж̇жхааяасса гад̇д̇аб̣б̣авад̇д̇ам̣ агаронд̇о сад̣̇д̇хивихаариго аабаж̇ж̇ад̇и, но убаж̇жхааяо; сзсам̣ убхоби аабаж̇ж̇анд̇и, асаад̇хааран̣ам̣ убхоби наабаж̇ж̇анд̇и. аажарияажад̇уггзби зсзва наяо.
Upajjhāyacatukke saddhivihārikassa upajjhāyena kattabbavattassa akaraṇe āpattiṃ upajjhāyoāpajjati, no saddhivihāriko upajjhāyassa kattabbavattaṃ akaronto saddhivihāriko āpajjati, no upajjhāyo; sesaṃ ubhopi āpajjanti, asādhāraṇaṃ ubhopi nāpajjanti. Ācariyacatukkepi eseva nayo.
аад̣̇ияанд̇ажад̇уггз баад̣̇ам̣ ваа ад̇ирзгабаад̣̇ам̣ ваа сахад̇т̇аа аад̣̇ияанд̇о г̇аругам̣ аабаж̇ж̇ад̇и, уунагабаад̣̇ам̣ г̇ан̣хаахийд̇и аан̣ад̇д̇ияаа ан̃н̃ам̣ баяож̇знд̇о лахугам̣ аабаж̇ж̇ад̇и. зд̇зна наязна сзсабад̣̇ад̇д̇аяам̣ взд̣̇ид̇аб̣б̣ам̣.
Ādiyantacatukke pādaṃ vā atirekapādaṃ vā sahatthā ādiyanto garukaṃ āpajjati, ūnakapādaṃ gaṇhāhīti āṇattiyā aññaṃ payojento lahukaṃ āpajjati. Etena nayena sesapadattayaṃ veditabbaṃ.
абхиваад̣̇анаарахажад̇уггз бхигкунийнам̣ д̇аава бхад̇д̇аг̇г̇з навамабхигкунид̇о бадтааяа убаж̇жхааяааби абхиваад̣̇анаарахаа но бажжудтаанаарахаа. ависзсзна жа виббагад̇абхож̇анасса бхигкусса яо гожи вуд̣дхад̇аро. садтивассассааби баариваасигасса самийбаг̇ад̇о д̇ад̣̇ахубасамбанноби бажжудтаанаарахо но абхиваад̣̇анаарахо. аббадигкид̇д̇зсу таанзсу вуд̣дхо навагасса абхиваад̣̇анаарахо жзва бажжудтаанаарахо жа. наваго бана вуд̣дхасса нзва абхиваад̣̇анаарахо на бажжудтаанаарахо. аасанаарахажад̇уггасса батамабад̣̇ам̣ буримажад̇уггз д̣̇уд̇ияабад̣̇зна, д̣̇уд̇ияабад̣̇ан̃жа батамабад̣̇зна ад̇т̇ад̇о сад̣̇исам̣.
Abhivādanārahacatukke bhikkhunīnaṃ tāva bhattagge navamabhikkhunito paṭṭhāya upajjhāyāpi abhivādanārahā no paccuṭṭhānārahā. Avisesena ca vippakatabhojanassa bhikkhussa yo koci vuḍḍhataro. Saṭṭhivassassāpi pārivāsikassa samīpagato tadahupasampannopi paccuṭṭhānāraho no abhivādanāraho. Appaṭikkhittesu ṭhānesu vuḍḍho navakassa abhivādanāraho ceva paccuṭṭhānāraho ca. Navako pana vuḍḍhassa neva abhivādanāraho na paccuṭṭhānāraho. Āsanārahacatukkassa paṭhamapadaṃ purimacatukke dutiyapadena, dutiyapadañca paṭhamapadena atthato sadisaṃ.
гаалажад̇уггз баваарзд̇ваа бхун̃ж̇анд̇о гаалз аабаж̇ж̇ад̇и но вигаалз, вигаалабхож̇анаабад̇д̇им̣ вигаалз аабаж̇ж̇ад̇и но гаалз, сзсам̣ гаалз жзва аабаж̇ж̇ад̇и вигаалз жа, асаад̇хааран̣ам̣ нзва гаалз но вигаалз. бадиг̇г̇ахид̇ажад̇уггз бурзбхад̇д̇ам̣ бадиг̇г̇ахид̇аамисам̣ гаалз габбад̇и но вигаалз. баанагам̣ вигаалз габбад̇и, бунад̣̇ивасамхи но гаалз. сад̇д̇аахагаалигам̣ яааваж̇ийвигам̣ гаалз жзва габбад̇и вигаалз жа. ад̇д̇ано ад̇д̇ано гаалаад̇ийд̇ам̣ яаавагаалигаад̣̇ид̇д̇аяам̣ агаббияамам̣сам̣ уг̇г̇ахид̇агамаббадиг̇г̇ахид̇аган̃жа нзва гаалз габбад̇и но вигаалз.
Kālacatukke pavāretvā bhuñjanto kāle āpajjati no vikāle, vikālabhojanāpattiṃ vikāle āpajjati no kāle, sesaṃ kāle ceva āpajjati vikāle ca, asādhāraṇaṃ neva kāle no vikāle. Paṭiggahitacatukke purebhattaṃ paṭiggahitāmisaṃ kāle kappati no vikāle. Pānakaṃ vikāle kappati, punadivasamhi no kāle. Sattāhakālikaṃ yāvajīvikaṃ kāle ceva kappati vikāle ca. Attano attano kālātītaṃ yāvakālikādittayaṃ akappiyamaṃsaṃ uggahitakamappaṭiggahitakañca neva kāle kappati no vikāle.
бажжанд̇имажад̇уггз самуд̣̇д̣̇з сиймам̣ б̣анд̇ханд̇о бажжанд̇имзсу ж̇анабад̣̇зсу аабаж̇ж̇ад̇и, но маж̇жхимзсу; бан̃жаваг̇г̇зна г̇ан̣зна убасамбаад̣̇знд̇о г̇ун̣ан̇г̇ун̣уубааханам̣ д̇хуванахаанам̣ жаммад̇т̇аран̣аани жа маж̇жхимзсу ж̇анабад̣̇зсу аабаж̇ж̇ад̇и но бажжанд̇имзсу. имаани жад̇д̇аари ‘‘ид̇ха на габбанд̇ий’’д̇и вад̣̇анд̇оби бажжанд̇имзсу аабаж̇ж̇ад̇и, ‘‘ид̇ха габбанд̇ий’’д̇и вад̣̇анд̇о бана маж̇жхимзсу аабаж̇ж̇ад̇и. сзсаабад̇д̇им̣ убхаяад̇т̇а аабаж̇ж̇ад̇и, асаад̇хааран̣ам̣ на гад̇т̇ажи аабаж̇ж̇ад̇и. д̣̇уд̇ияажад̇уггз бан̃жаваг̇г̇зна г̇ан̣зна убасамбад̣̇аад̣̇и жад̇уб̣б̣ид̇хамби вад̇т̇у бажжанд̇имзсу ж̇анабад̣̇зсу габбад̇и. ‘‘ид̣̇ам̣ габбад̇ий’’д̇и д̣̇ийбзд̇умби д̇ад̇т̇зва габбад̇и но маж̇жхимзсу. ‘‘ид̣̇ам̣ на габбад̇ий’’д̇и д̣̇ийбзд̇ум̣ бана маж̇жхимзсу ж̇анабад̣̇зсу габбад̇и но бажжанд̇имзсу . сзсам̣ ‘‘ануж̇аанаами бхигкавз бан̃жа лон̣ааний’’д̇иаад̣̇и анун̃н̃аад̇агам̣ убхаяад̇т̇а габбад̇и. яам̣ бана агаббияанд̇и бадигкид̇д̇ам̣, д̇ам̣ убхаяад̇т̇ааби на габбад̇и.
Paccantimacatukke samudde sīmaṃ bandhanto paccantimesu janapadesu āpajjati, no majjhimesu; pañcavaggena gaṇena upasampādento guṇaṅguṇūpāhanaṃ dhuvanahānaṃ cammattharaṇāni ca majjhimesu janapadesu āpajjati no paccantimesu. Imāni cattāri ‘‘idha na kappantī’’ti vadantopi paccantimesu āpajjati, ‘‘idha kappantī’’ti vadanto pana majjhimesu āpajjati. Sesāpattiṃ ubhayattha āpajjati, asādhāraṇaṃ na katthaci āpajjati. Dutiyacatukke pañcavaggena gaṇena upasampadādi catubbidhampi vatthu paccantimesu janapadesu kappati. ‘‘Idaṃ kappatī’’ti dīpetumpi tattheva kappati no majjhimesu. ‘‘Idaṃ na kappatī’’ti dīpetuṃ pana majjhimesu janapadesu kappati no paccantimesu. Sesaṃ ‘‘anujānāmi bhikkhave pañca loṇānī’’tiādi anuññātakaṃ ubhayattha kappati. Yaṃ pana akappiyanti paṭikkhittaṃ, taṃ ubhayatthāpi na kappati.
анд̇оаад̣̇ижад̇уггз анубакаж̇ж̇а сзяяаад̣̇им̣ анд̇о аабаж̇ж̇ад̇и но б̣ахи, аж̇жхогаасз сан̇гхигаман̃жаад̣̇ийни нигкибид̇ваа баггаманд̇о б̣ахи аабаж̇ж̇ад̇и но анд̇о, сзсам̣ анд̇о жзва б̣ахи жа, асаад̇хааран̣ам̣ нзва анд̇о на б̣ахи. анд̇осиймаад̣̇ижад̇уггз ааг̇анд̇уго вад̇д̇ам̣ абуурзнд̇о анд̇осиймааяа аабаж̇ж̇ад̇и, г̇амияо б̣ахисиймааяа мусааваад̣̇аад̣̇им̣ анд̇осиймааяа жа б̣ахисиймааяа жа аабаж̇ж̇ад̇и,асаад̇хааран̣ам̣ на гад̇т̇ажи.г̇аамажад̇уггз анд̇арагхарабадисам̣яуд̇д̇ам̣ сзкияабан̃н̃ад̇д̇им̣ г̇аамз аабаж̇ж̇ад̇и но аран̃н̃з. бхигкуний арун̣ам̣ удтаабаяамаанаа аран̃н̃з аабаж̇ж̇ад̇и но г̇аамз. мусааваад̣̇аад̣̇им̣ г̇аамз жзва аабаж̇ж̇ад̇и аран̃н̃з жа, асаад̇хааран̣ам̣ на гад̇т̇ажи.
Antoādicatukke anupakhajja seyyādiṃ anto āpajjati no bahi, ajjhokāse saṅghikamañcādīni nikkhipitvā pakkamanto bahi āpajjati no anto, sesaṃ anto ceva bahi ca, asādhāraṇaṃ neva anto na bahi. Antosīmādicatukke āgantuko vattaṃ apūrento antosīmāya āpajjati, gamiyo bahisīmāya musāvādādiṃ antosīmāya ca bahisīmāya ca āpajjati,asādhāraṇaṃ na katthaci.Gāmacatukke antaragharapaṭisaṃyuttaṃ sekhiyapaññattiṃ gāme āpajjati no araññe. Bhikkhunī aruṇaṃ uṭṭhāpayamānā araññe āpajjati no gāme. Musāvādādiṃ gāme ceva āpajjati araññe ca, asādhāraṇaṃ na katthaci.
жад̇д̇ааро буб̣б̣агижжаад̇и ‘‘саммаж̇ж̇аний бад̣̇ийбо жа уд̣̇агам̣ аасанзна жаа’’д̇и ид̣̇ам̣ жад̇уб̣б̣ид̇хам̣ буб̣б̣агаран̣анд̇и вужжад̇ийд̇и вуд̇д̇ам̣. ‘‘чанд̣̇абаарисуд̣̇д̇хиуд̇угкаанам̣ бхигкуг̇ан̣анаа жа оваад̣̇о’’д̇и имз бана ‘‘жад̇д̇ааро буб̣б̣агижжаа’’д̇и взд̣̇ид̇аб̣б̣аа. жад̇д̇ааро бад̇д̇агаллаад̇и убосат̇о яаавад̇игаа жа бхигкуу гаммаббад̇д̇аа д̇з ааг̇ад̇аа хонд̇и, сабхааг̇аабад̇д̇ияо на виж̇ж̇анд̇и, важ̇ж̇анийяаа жа буг̇г̇алаа д̇асмим̣ на хонд̇и, бад̇д̇агалланд̇и вужжад̇ийд̇и. жад̇д̇аари анан̃н̃абаажид̇д̇ияаанийд̇и ‘‘зд̇ад̣̇зва бажжаяам̣ гарид̇ваа анан̃н̃ам̣ баажид̇д̇ияа’’нд̇и звам̣ вуд̇д̇аани анубакаж̇ж̇асзяяаагаббанасигкаабад̣̇ам̣ ‘‘зхаавусо г̇аамам̣ ваа ниг̇амам̣ ваа’’д̇и сигкаабад̣̇ам̣, сан̃жижжа гуггужжаубад̣̇аханам̣, убассуд̇ид̇идтананд̇и имаани жад̇д̇аари. жад̇ассо бхигкусаммуд̇ияод̇и ‘‘згарад̇д̇амби жз бхигку д̇ижийварзна виббавасзяяа ан̃н̃ад̇ра бхигкусаммуд̇ияаа, ан̃н̃ам̣ навам̣ сант̇ад̇ам̣ гаараабзяяа ан̃н̃ад̇ра бхигкусаммуд̇ияаа, д̇ад̇о жз уд̇д̇ари виббавасзяяа ан̃н̃ад̇ра бхигкусаммуд̇ияаа, д̣̇удтуллам̣ аабад̇д̇им̣ анубасамбаннасса аарожзяяа ан̃н̃ад̇ра бхигкусаммуд̇ияаа’’д̇и звам̣ ааг̇ад̇аа д̇зрасахи саммуд̇ийхи муд̇д̇аа саммуд̇ияо. г̇илаанажад̇уггз ан̃н̃абхзсаж̇ж̇зна гаран̣ийязна лолад̇ааяа ан̃н̃ам̣ вин̃н̃аабзнд̇о г̇илаано аабаж̇ж̇ад̇и, абхзсаж̇ж̇агаран̣ийязна бхзсаж̇ж̇ам̣ вин̃н̃аабзнд̇о аг̇илаано аабаж̇ж̇ад̇и, мусааваад̣̇аад̣̇им̣ убхоби аабаж̇ж̇анд̇и, асаад̇хааран̣ам̣ убхоби наабаж̇ж̇анд̇и. сзсам̣ саб̣б̣ад̇т̇а уд̇д̇аанамзваад̇и.
Cattāropubbakiccāti ‘‘sammajjanī padīpo ca udakaṃ āsanena cā’’ti idaṃ catubbidhaṃ pubbakaraṇanti vuccatīti vuttaṃ. ‘‘Chandapārisuddhiutukkhānaṃ bhikkhugaṇanā ca ovādo’’ti ime pana ‘‘cattāro pubbakiccā’’ti veditabbā. Cattāro pattakallāti uposatho yāvatikā ca bhikkhū kammappattā te āgatā honti, sabhāgāpattiyo na vijjanti, vajjanīyā ca puggalā tasmiṃ na honti, pattakallanti vuccatīti. Cattāri anaññapācittiyānīti ‘‘etadeva paccayaṃ karitvā anaññaṃ pācittiya’’nti evaṃ vuttāni anupakhajjaseyyākappanasikkhāpadaṃ ‘‘ehāvuso gāmaṃ vā nigamaṃ vā’’ti sikkhāpadaṃ, sañcicca kukkuccaupadahanaṃ, upassutitiṭṭhananti imāni cattāri. Catasso bhikkhusammutiyoti ‘‘ekarattampi ce bhikkhu ticīvarena vippavaseyya aññatra bhikkhusammutiyā, aññaṃ navaṃ santhataṃ kārāpeyya aññatra bhikkhusammutiyā, tato ce uttari vippavaseyya aññatra bhikkhusammutiyā, duṭṭhullaṃ āpattiṃ anupasampannassa āroceyya aññatra bhikkhusammutiyā’’ti evaṃ āgatā terasahi sammutīhi muttā sammutiyo. Gilānacatukke aññabhesajjena karaṇīyena lolatāya aññaṃ viññāpento gilāno āpajjati, abhesajjakaraṇīyena bhesajjaṃ viññāpento agilāno āpajjati, musāvādādiṃ ubhopi āpajjanti, asādhāraṇaṃ ubhopi nāpajjanti. Sesaṃ sabbattha uttānamevāti.
жад̇уггаваараван̣н̣анаа нидтид̇аа.
Catukkavāravaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / бариваарабаал̣и • Parivārapāḷi / 4. жад̇уггавааро • 4. Catukkavāro
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / жад̇уггаваараван̣н̣анаа • Catukkavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / жад̇уггаваараван̣н̣анаа • Catukkavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / жад̇уггаваараван̣н̣анаа • Catukkavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / згуд̇д̇ариганаяо жад̇уггаваараван̣н̣анаа • Ekuttarikanayo catukkavāravaṇṇanā
