| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
चतुक्कवारवण्णना
Catukkavāravaṇṇanā
३२४. चतुक्केसु सोति गिहिपरिक्खारो। अवापुरणं दातुन्ति गब्भं विवरित्वा अन्तो परिक्खारट्ठपनत्थाय विवरणकुञ्चिकं दातुं। सङ्घत्थाय उपनीतं सयमेव अन्तो पटिसामितुम्पि वट्टति। तेनाह ‘‘अन्तो ठपापेतुञ्च वट्टती’’ति।
324. Catukkesu soti gihiparikkhāro. Avāpuraṇaṃ dātunti gabbhaṃ vivaritvā anto parikkhāraṭṭhapanatthāya vivaraṇakuñcikaṃ dātuṃ. Saṅghatthāya upanītaṃ sayameva anto paṭisāmitumpi vaṭṭati. Tenāha ‘‘anto ṭhapāpetuñca vaṭṭatī’’ti.
आदिकम्मिकेसु पठमं पुरिसलिङ्गं उप्पज्जतीति आह ‘‘पठमं उप्पन्नवसेना’’ति। पाळियं अनापत्ति वस्सच्छेदस्साति वस्सच्छेदसम्बन्धिनिया अनापत्तिया एवमत्थो। मन्तभासाति मन्ताय पञ्ञाय कथनं। ‘‘नवमभिक्खुनितो पट्ठाया’’ति इदं ‘‘अनुजानामि, भिक्खवे, अट्ठन्नं भिक्खुनीनं यथावुड्ढं अवसेसानं यथाकतिक’’न्ति (चूळव॰ ४२६) वचनतो आदितो अट्ठन्नं भिक्खुनीनं पच्चुट्ठातब्बत्ता वुत्तं।
Ādikammikesu paṭhamaṃ purisaliṅgaṃ uppajjatīti āha ‘‘paṭhamaṃ uppannavasenā’’ti. Pāḷiyaṃ anāpatti vassacchedassāti vassacchedasambandhiniyā anāpattiyā evamattho. Mantabhāsāti mantāya paññāya kathanaṃ. ‘‘Navamabhikkhunito paṭṭhāyā’’ti idaṃ ‘‘anujānāmi, bhikkhave, aṭṭhannaṃ bhikkhunīnaṃ yathāvuḍḍhaṃ avasesānaṃ yathākatika’’nti (cūḷava. 426) vacanato ādito aṭṭhannaṃ bhikkhunīnaṃ paccuṭṭhātabbattā vuttaṃ.
‘‘इध न कप्पन्तीति वदन्तोपि पच्चन्तिमेसु आपज्जती’’तिआदिना सञ्चिच्च कप्पियं अकप्पियन्ति वा अकप्पियं कप्पियन्ति वा कथेन्तस्स सब्बत्थ दुक्कटन्ति दस्सेति।
‘‘Idha na kappantīti vadantopi paccantimesu āpajjatī’’tiādinā sañcicca kappiyaṃ akappiyanti vā akappiyaṃ kappiyanti vā kathentassa sabbattha dukkaṭanti dasseti.
पुब्बकरणन्ति वुच्चतीति अट्ठकथासु वुत्तं, तानि इध परिवारे उद्धटानीति अधिप्पायो। इधाधिप्पेतानि पन दस्सेन्तो ‘‘छन्दपारिसुद्धी’’तिआदिमाह।
Pubbakaraṇanti vuccatīti aṭṭhakathāsu vuttaṃ, tāni idha parivāre uddhaṭānīti adhippāyo. Idhādhippetāni pana dassento ‘‘chandapārisuddhī’’tiādimāha.
चतुक्कवारवण्णना निट्ठिता।
Catukkavāravaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / ४. चतुक्कवारो • 4. Catukkavāro
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / चतुक्कवारवण्णना • Catukkavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / चतुक्कवारवण्णना • Catukkavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / चतुक्कवारवण्णना • Catukkavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / एकुत्तरिकनयो चतुक्कवारवण्णना • Ekuttarikanayo catukkavāravaṇṇanā
