| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
4. சதுக்கவாரோ
4. Catukkavāro
324. அத்தா²பத்தி ஸகவாசாய ஆபஜ்ஜதி, பரவாசாய வுட்டா²தி; அத்தா²பத்தி பரவாசாய ஆபஜ்ஜதி, ஸகவாசாய வுட்டா²தி; அத்தா²பத்தி ஸகவாசாய ஆபஜ்ஜதி, ஸகவாசாய வுட்டா²தி; அத்தா²பத்தி பரவாசாய ஆபஜ்ஜதி, பரவாசாய வுட்டா²தி. அத்தா²பத்தி காயேன ஆபஜ்ஜதி, வாசாய வுட்டா²தி; அத்தா²பத்தி வாசாய ஆபஜ்ஜதி, காயேன வுட்டா²தி; அத்தா²பத்தி காயேன ஆபஜ்ஜதி, காயேன வுட்டா²தி; அத்தா²பத்தி வாசாய ஆபஜ்ஜதி, வாசாய வுட்டா²தி. அத்தா²பத்தி பஸுத்தோ ஆபஜ்ஜதி, படிபு³த்³தோ⁴ வுட்டா²தி; அத்தா²பத்தி படிபு³த்³தோ⁴ ஆபஜ்ஜதி, பஸுத்தோ வுட்டா²தி; அத்தா²பத்தி பஸுத்தோ ஆபஜ்ஜதி, பஸுத்தோ வுட்டா²தி; அத்தா²பத்தி படிபு³த்³தோ⁴ ஆபஜ்ஜதி, படிபு³த்³தோ⁴ வுட்டா²தி. அத்தா²பத்தி அசித்தகோ ஆபஜ்ஜதி, ஸசித்தகோ வுட்டா²தி; அத்தா²பத்தி ஸசித்தகோ ஆபஜ்ஜதி, அசித்தகோ வுட்டா²தி; அத்தா²பத்தி அசித்தகோ ஆபஜ்ஜதி, அசித்தகோ வுட்டா²தி; அத்தா²பத்தி ஸசித்தகோ ஆபஜ்ஜதி, ஸசித்தகோ வுட்டா²தி. அத்தா²பத்தி ஆபஜ்ஜந்தோ தே³ஸேதி; தே³ஸெந்தோ ஆபஜ்ஜதி; அத்தா²பத்தி ஆபஜ்ஜந்தோ வுட்டா²தி; வுட்ட²ஹந்தோ ஆபஜ்ஜதி. அத்தா²பத்தி கம்மேன ஆபஜ்ஜதி, அகம்மேன வுட்டா²தி; அத்தா²பத்தி அகம்மேன ஆபஜ்ஜதி, கம்மேன வுட்டா²தி; அத்தா²பத்தி கம்மேன ஆபஜ்ஜதி, கம்மேன வுட்டா²தி; அத்தா²பத்தி அகம்மேன ஆபஜ்ஜதி, அகம்மேன வுட்டா²தி.
324. Atthāpatti sakavācāya āpajjati, paravācāya vuṭṭhāti; atthāpatti paravācāya āpajjati, sakavācāya vuṭṭhāti; atthāpatti sakavācāya āpajjati, sakavācāya vuṭṭhāti; atthāpatti paravācāya āpajjati, paravācāya vuṭṭhāti. Atthāpatti kāyena āpajjati, vācāya vuṭṭhāti; atthāpatti vācāya āpajjati, kāyena vuṭṭhāti; atthāpatti kāyena āpajjati, kāyena vuṭṭhāti; atthāpatti vācāya āpajjati, vācāya vuṭṭhāti. Atthāpatti pasutto āpajjati, paṭibuddho vuṭṭhāti; atthāpatti paṭibuddho āpajjati, pasutto vuṭṭhāti; atthāpatti pasutto āpajjati, pasutto vuṭṭhāti; atthāpatti paṭibuddho āpajjati, paṭibuddho vuṭṭhāti. Atthāpatti acittako āpajjati, sacittako vuṭṭhāti; atthāpatti sacittako āpajjati, acittako vuṭṭhāti; atthāpatti acittako āpajjati, acittako vuṭṭhāti; atthāpatti sacittako āpajjati, sacittako vuṭṭhāti. Atthāpatti āpajjanto deseti; desento āpajjati; atthāpatti āpajjanto vuṭṭhāti; vuṭṭhahanto āpajjati. Atthāpatti kammena āpajjati, akammena vuṭṭhāti; atthāpatti akammena āpajjati, kammena vuṭṭhāti; atthāpatti kammena āpajjati, kammena vuṭṭhāti; atthāpatti akammena āpajjati, akammena vuṭṭhāti.
1 சத்தாரோ அனரியவோஹாரா – அதி³ட்டே² தி³ட்ட²வாதி³தா, அஸ்ஸுதே ஸுதவாதி³தா, அமுதே முதவாதி³தா, அவிஞ்ஞாதே விஞ்ஞாதவாதி³தா. சத்தாரோ அரியவோஹாரா – அதி³ட்டே² அதி³ட்ட²வாதி³தா, அஸ்ஸுதே அஸ்ஸுதவாதி³தா, அமுதே அமுதவாதி³தா, அவிஞ்ஞாதே அவிஞ்ஞாதவாதி³தா. அபரேபி சத்தாரோ அனரியவோஹாரா – தி³ட்டே² அதி³ட்ட²வாதி³தா, ஸுதே அஸ்ஸுதவாதி³தா, முதே அமுதவாதி³தா, விஞ்ஞாதே அவிஞ்ஞாதவாதி³தா. சத்தாரோ அரியவோஹாரா – தி³ட்டே² தி³ட்ட²வாதி³தா, ஸுதே ஸுதவாதி³தா, முதே முதவாதி³தா, விஞ்ஞாதே விஞ்ஞாதவாதி³தா.
2 Cattāro anariyavohārā – adiṭṭhe diṭṭhavāditā, assute sutavāditā, amute mutavāditā, aviññāte viññātavāditā. Cattāro ariyavohārā – adiṭṭhe adiṭṭhavāditā, assute assutavāditā, amute amutavāditā, aviññāte aviññātavāditā. Aparepi cattāro anariyavohārā – diṭṭhe adiṭṭhavāditā, sute assutavāditā, mute amutavāditā, viññāte aviññātavāditā. Cattāro ariyavohārā – diṭṭhe diṭṭhavāditā, sute sutavāditā, mute mutavāditā, viññāte viññātavāditā.
சத்தாரோ பாராஜிகா பி⁴க்கூ²னங் பி⁴க்கு²னீஹி ஸாதா⁴ரணா; சத்தாரோ பாராஜிகா பி⁴க்கு²னீனங் பி⁴க்கூ²ஹி அஸாதா⁴ரணா. சத்தாரோ பரிக்கா²ரா – அத்தி² பரிக்கா²ரோ ரக்கி²தப்³போ³ கோ³பேதப்³போ³ மமாயிதப்³போ³ பரிபு⁴ஞ்ஜிதப்³போ³; அத்தி² பரிக்கா²ரோ ரக்கி²தப்³போ³ கோ³பேதப்³போ³ மமாயிதப்³போ³, ந பரிபு⁴ஞ்ஜிதப்³போ³; அத்தி² பரிக்கா²ரோ ரக்கி²தப்³போ³ கோ³பேதப்³போ³, ந மமாயிதப்³போ³ ந பரிபு⁴ஞ்ஜிதப்³போ³; அத்தி² பரிக்கா²ரோ ந ரக்கி²தப்³போ³ ந கோ³பேதப்³போ³, ந மமாயிதப்³போ³ ந பரிபு⁴ஞ்ஜிதப்³போ³. அத்தா²பத்தி ஸம்முகா² ஆபஜ்ஜதி, பரம்முகா² வுட்டா²தி; அத்தா²பத்தி பரம்முகா² ஆபஜ்ஜதி , ஸம்முகா² வுட்டா²தி; அத்தா²பத்தி ஸம்முகா² ஆபஜ்ஜதி, ஸம்முகா² வுட்டா²தி; அத்தா²பத்தி பரம்முகா² ஆபஜ்ஜதி, பரம்முகா² வுட்டா²தி. அத்தா²பத்தி அஜானந்தோ ஆபஜ்ஜதி, ஜானந்தோ வுட்டா²தி; அத்தா²பத்தி ஜானந்தோ ஆபஜ்ஜதி, அஜானந்தோ வுட்டா²தி; அத்தா²பத்தி அஜானந்தோ ஆபஜ்ஜதி, அஜானந்தோ வுட்டா²தி; அத்தா²பத்தி ஜானந்தோ ஆபஜ்ஜதி, ஜானந்தோ வுட்டா²தி.
Cattāro pārājikā bhikkhūnaṃ bhikkhunīhi sādhāraṇā; cattāro pārājikā bhikkhunīnaṃ bhikkhūhi asādhāraṇā. Cattāro parikkhārā – atthi parikkhāro rakkhitabbo gopetabbo mamāyitabbo paribhuñjitabbo; atthi parikkhāro rakkhitabbo gopetabbo mamāyitabbo, na paribhuñjitabbo; atthi parikkhāro rakkhitabbo gopetabbo, na mamāyitabbo na paribhuñjitabbo; atthi parikkhāro na rakkhitabbo na gopetabbo, na mamāyitabbo na paribhuñjitabbo. Atthāpatti sammukhā āpajjati, parammukhā vuṭṭhāti; atthāpatti parammukhā āpajjati , sammukhā vuṭṭhāti; atthāpatti sammukhā āpajjati, sammukhā vuṭṭhāti; atthāpatti parammukhā āpajjati, parammukhā vuṭṭhāti. Atthāpatti ajānanto āpajjati, jānanto vuṭṭhāti; atthāpatti jānanto āpajjati, ajānanto vuṭṭhāti; atthāpatti ajānanto āpajjati, ajānanto vuṭṭhāti; atthāpatti jānanto āpajjati, jānanto vuṭṭhāti.
சதூஹாகாரேஹி ஆபத்திங் ஆபஜ்ஜதி – காயேன ஆபஜ்ஜதி, வாசாய ஆபஜ்ஜதி, காயேன வாசாய ஆபஜ்ஜதி, கம்மவாசாய ஆபஜ்ஜதி. அபரேஹிபி சதூஹாகாரேஹி ஆபத்திங் ஆபஜ்ஜதி – ஸங்க⁴மஜ்ஜே², க³ணமஜ்ஜே², புக்³க³லஸ்ஸ ஸந்திகே, லிங்க³பாதுபா⁴வேன. சதூஹாகாரேஹி ஆபத்தியா வுட்டா²தி – காயேன வுட்டா²தி, வாசாய வுட்டா²தி, காயேன வாசாய வுட்டா²தி, கம்மவாசாய வுட்டா²தி. அபரேஹிபி சதூஹாகாரேஹி ஆபத்தியா வுட்டா²தி – ஸங்க⁴மஜ்ஜே², க³ணமஜ்ஜே², புக்³க³லஸ்ஸ ஸந்திகே, லிங்க³பாதுபா⁴வேன. ஸஹ படிலாபே⁴ன புரிமங் ஜஹதி, பச்சி²மே பதிட்டா²தி, விஞ்ஞத்தியோ படிப்பஸ்ஸம்ப⁴ந்தி, பண்ணத்தியோ நிருஜ்ஜ²ந்தி. ஸஹ படிலாபே⁴ன பச்சி²மங் ஜஹதி, புரிமே பதிட்டா²தி, விஞ்ஞத்தியோ படிப்பஸ்ஸம்ப⁴ந்தி, பப்ணத்தியோ நிருஜ்ஜ²ந்தி. சதஸ்ஸோ சோத³னா – ஸீலவிபத்தியா சோதே³தி , ஆசாரவிபத்தியா சோதே³தி, தி³ட்டி²விபத்தியா சோதே³தி, ஆஜீவவிபத்தியா சோதே³தி. சத்தாரோ பரிவாஸா – படிச்ச²ன்னபரிவாஸோ , அப்படிச்ச²ன்னபரிவாஸோ, ஸுத்³த⁴ந்தபரிவாஸோ, ஸமோதா⁴னபரிவாஸோ. சத்தாரோ மானத்தா – படிச்ச²ன்னமானத்தங், அப்படிச்ச²ன்னமானத்தங், பக்க²மானத்தங், ஸமோதா⁴னமானத்தங். சத்தாரோ மானத்தசாரிகஸ்ஸ பி⁴க்கு²னோ ரத்திச்சே²தா³ – ஸஹவாஸோ, விப்பவாஸோ, அனாரோசனா, ஊனே க³ணே சரதி. சத்தாரோ ஸாமுக்கங்ஸா . சத்தாரோ படிக்³க³ஹிதபரிபோ⁴கா³ – யாவகாலிகங், யாமகாலிகங், ஸத்தாஹகாலிகங், யாவஜீவிகங். சத்தாரி மஹாவிகடானி – கூ³தோ², முத்தங், சா²ரிகா, மத்திகா. சத்தாரி கம்மானி – அபலோகனகம்மங், ஞத்திகம்மங், ஞத்திது³தியகம்மங், ஞத்திசதுத்த²கம்மங். அபரானிபி சத்தாரி கம்மானி – அத⁴ம்மேன வக்³க³கம்மங், அத⁴ம்மேன ஸமக்³க³கம்மங், த⁴ம்மேன வக்³க³கம்மங், த⁴ம்மேன ஸமக்³க³கம்மங். சதஸ்ஸோ விபத்தியோ – ஸீலவிபத்தி, ஆசாரவிபத்தி, தி³ட்டி²விபத்தி, ஆஜீவவிபத்தி. சத்தாரி அதி⁴கரணானி – விவாதா³தி⁴கரணங், அனுவாதா³தி⁴கரணங், ஆபத்தாதி⁴கரணங், கிச்சாதி⁴கரணங். 3 சத்தாரோ பரிஸதூ³ஸனா – பி⁴க்கு² து³ஸ்ஸீலோ பாபத⁴ம்மோ பரிஸதூ³ஸனோ, பி⁴க்கு²னீ து³ஸ்ஸீலா பாபத⁴ம்மா பரிஸதூ³ஸனா, உபாஸகோ து³ஸ்ஸீலோ பாபத⁴ம்மோ பரிஸதூ³ஸனோ, உபாஸிகா து³ஸ்ஸீலா பாபத⁴ம்மா பரிஸதூ³ஸனா. சத்தாரோ பரிஸஸோப⁴னா 4 – பி⁴க்கு² ஸீலவா கல்யாணத⁴ம்மோ பரிஸஸோப⁴னோ, பி⁴க்கு²னீ ஸீலவதீ கல்யாணத⁴ம்மா பரிஸஸோப⁴னா, உபாஸகோ ஸீலவா கல்யாணத⁴ம்மோ பரிஸஸோப⁴னோ, உபாஸிகா ஸீலவதீ கல்யாணத⁴ம்மா பரிஸஸோப⁴னா.
Catūhākārehi āpattiṃ āpajjati – kāyena āpajjati, vācāya āpajjati, kāyena vācāya āpajjati, kammavācāya āpajjati. Aparehipi catūhākārehi āpattiṃ āpajjati – saṅghamajjhe, gaṇamajjhe, puggalassa santike, liṅgapātubhāvena. Catūhākārehi āpattiyā vuṭṭhāti – kāyena vuṭṭhāti, vācāya vuṭṭhāti, kāyena vācāya vuṭṭhāti, kammavācāya vuṭṭhāti. Aparehipi catūhākārehi āpattiyā vuṭṭhāti – saṅghamajjhe, gaṇamajjhe, puggalassa santike, liṅgapātubhāvena. Saha paṭilābhena purimaṃ jahati, pacchime patiṭṭhāti, viññattiyo paṭippassambhanti, paṇṇattiyo nirujjhanti. Saha paṭilābhena pacchimaṃ jahati, purime patiṭṭhāti, viññattiyo paṭippassambhanti, papṇattiyo nirujjhanti. Catasso codanā – sīlavipattiyā codeti , ācāravipattiyā codeti, diṭṭhivipattiyā codeti, ājīvavipattiyā codeti. Cattāro parivāsā – paṭicchannaparivāso , appaṭicchannaparivāso, suddhantaparivāso, samodhānaparivāso. Cattāro mānattā – paṭicchannamānattaṃ, appaṭicchannamānattaṃ, pakkhamānattaṃ, samodhānamānattaṃ. Cattāro mānattacārikassa bhikkhuno ratticchedā – sahavāso, vippavāso, anārocanā, ūne gaṇe carati. Cattāro sāmukkaṃsā . Cattāro paṭiggahitaparibhogā – yāvakālikaṃ, yāmakālikaṃ, sattāhakālikaṃ, yāvajīvikaṃ. Cattāri mahāvikaṭāni – gūtho, muttaṃ, chārikā, mattikā. Cattāri kammāni – apalokanakammaṃ, ñattikammaṃ, ñattidutiyakammaṃ, ñatticatutthakammaṃ. Aparānipi cattāri kammāni – adhammena vaggakammaṃ, adhammena samaggakammaṃ, dhammena vaggakammaṃ, dhammena samaggakammaṃ. Catasso vipattiyo – sīlavipatti, ācāravipatti, diṭṭhivipatti, ājīvavipatti. Cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ. 5 Cattāro parisadūsanā – bhikkhu dussīlo pāpadhammo parisadūsano, bhikkhunī dussīlā pāpadhammā parisadūsanā, upāsako dussīlo pāpadhammo parisadūsano, upāsikā dussīlā pāpadhammā parisadūsanā. Cattāro parisasobhanā 6 – bhikkhu sīlavā kalyāṇadhammo parisasobhano, bhikkhunī sīlavatī kalyāṇadhammā parisasobhanā, upāsako sīlavā kalyāṇadhammo parisasobhano, upāsikā sīlavatī kalyāṇadhammā parisasobhanā.
அத்தா²பத்தி ஆக³ந்துகோ ஆபஜ்ஜதி, நோ ஆவாஸிகோ; அத்தா²பத்தி ஆவாஸிகோ ஆபஜ்ஜதி, நோ ஆக³ந்துகோ; அத்தா²பத்தி ஆக³ந்துகோ சேவ ஆபஜ்ஜதி ஆவாஸிகோ ச அத்தா²பத்தி நேவ ஆக³ந்துகோ ஆபஜ்ஜதி, நோ ஆவாஸிகோ. அத்தா²பத்தி க³மிகோ ஆபஜ்ஜதி, நோ ஆவாஸிகோ; அத்தா²பத்தி ஆவாஸிகோ ஆபஜ்ஜதி, நோ க³மிகோ; அத்தா²பத்தி க³மிகோ சேவ ஆபஜ்ஜதி ஆவாஸிகோ ச; அத்தா²பத்தி நேவ க³மிகோ ஆபஜ்ஜதி நோ ஆவாஸிகோ. அத்தி² வத்து²னானத்ததா நோ ஆபத்தினானத்ததா, அத்தி² ஆபத்தினானத்ததா நோ வத்து²னானத்ததா, அத்தி² வத்து²னானத்ததா சேவ ஆபத்தினானத்ததா ச, அத்தி² நேவ வத்து²னானத்ததா நோ ஆபத்தினானத்ததா. அத்தி² வத்து²ஸபா⁴க³தா நோ ஆபத்திஸபா⁴க³தா, அத்தி² ஆபத்திஸபா⁴க³தா நோ வத்து²ஸபா⁴க³தா, அத்தி² வத்து²ஸபா⁴க³தா சேவ ஆபத்திஸபா⁴க³தா ச அத்தி² நேவ வத்து²ஸபா⁴க³தா நோ ஆபத்திஸபா⁴க³தா. அத்தா²பத்தி உபஜ்ஜா²யோ ஆபஜ்ஜதி நோ ஸத்³தி⁴விஹாரிகோ, அத்தா²பத்தி ஸத்³தி⁴விஹாரிகோ ஆபஜ்ஜதி நோ உபஜ்ஜா²யோ, அத்தா²பத்தி உபஜ்ஜா²யோ சேவ ஆபஜ்ஜதி ஸத்³தி⁴விஹாரிகோ ச, அத்தா²பத்தி நேவ உபஜ்ஜா²யோ ஆபஜ்ஜதி நோ ஸத்³தி⁴விஹாரிகோ. அத்தா²பத்தி ஆசரியோ ஆபஜ்ஜதி நோ அந்தேவாஸிகோ, அத்தா²பத்தி அந்தேவாஸிகோ ஆபஜ்ஜதி நோ ஆசரியோ, அத்தா²பத்தி ஆசரியோ சேவ ஆபஜ்ஜதி அந்தேவாஸிகோ ச, அத்தா²பத்தி நேவ ஆசரியோ ஆபஜ்ஜதி நோ அந்தேவாஸிகோ. சத்தாரோ பச்சயா அனாபத்தி வஸ்ஸச்சே²த³ஸ்ஸ – ஸங்கோ⁴ வா பி⁴ன்னோ ஹோதி, ஸங்க⁴ங் வா பி⁴ந்தி³துகாமா ஹொந்தி, ஜீவிதந்தராயோ வா ஹோதி, ப்³ரஹ்மசரியந்தராயோ வா ஹோதி. சத்தாரி வசீது³ச்சரிதானி – முஸாவாதோ³, பிஸுணா வாசா, ப²ருஸா வாசா, ஸம்ப²ப்பலாபோ. சத்தாரி வசீஸுசரிதானி – ஸச்சவாசா, அபிஸுணா வாசா, ஸண்ஹா வாசா, மந்தா பா⁴ஸா. அத்தி² ஆதி³யந்தோ க³ருகங் ஆபத்திங் ஆபஜ்ஜதி, பயோஜெந்தோ லஹுகங்; அத்தி² ஆதி³யந்தோ லஹுகங் ஆபத்திங் ஆபஜ்ஜதி, பயோஜெந்தோ க³ருகங், அத்தி² ஆதி³யந்தோபி பயோஜெந்தோபி க³ருகங் ஆபத்திங் ஆபஜ்ஜதி; அத்தி² ஆதி³யந்தோபி பயோஜெந்தோபி லஹுகங் ஆபத்திங் ஆபஜ்ஜதி.
Atthāpatti āgantuko āpajjati, no āvāsiko; atthāpatti āvāsiko āpajjati, no āgantuko; atthāpatti āgantuko ceva āpajjati āvāsiko ca atthāpatti neva āgantuko āpajjati, no āvāsiko. Atthāpatti gamiko āpajjati, no āvāsiko; atthāpatti āvāsiko āpajjati, no gamiko; atthāpatti gamiko ceva āpajjati āvāsiko ca; atthāpatti neva gamiko āpajjati no āvāsiko. Atthi vatthunānattatā no āpattinānattatā, atthi āpattinānattatā no vatthunānattatā, atthi vatthunānattatā ceva āpattinānattatā ca, atthi neva vatthunānattatā no āpattinānattatā. Atthi vatthusabhāgatā no āpattisabhāgatā, atthi āpattisabhāgatā no vatthusabhāgatā, atthi vatthusabhāgatā ceva āpattisabhāgatā ca atthi neva vatthusabhāgatā no āpattisabhāgatā. Atthāpatti upajjhāyo āpajjati no saddhivihāriko, atthāpatti saddhivihāriko āpajjati no upajjhāyo, atthāpatti upajjhāyo ceva āpajjati saddhivihāriko ca, atthāpatti neva upajjhāyo āpajjati no saddhivihāriko. Atthāpatti ācariyo āpajjati no antevāsiko, atthāpatti antevāsiko āpajjati no ācariyo, atthāpatti ācariyo ceva āpajjati antevāsiko ca, atthāpatti neva ācariyo āpajjati no antevāsiko. Cattāro paccayā anāpatti vassacchedassa – saṅgho vā bhinno hoti, saṅghaṃ vā bhinditukāmā honti, jīvitantarāyo vā hoti, brahmacariyantarāyo vā hoti. Cattāri vacīduccaritāni – musāvādo, pisuṇā vācā, pharusā vācā, samphappalāpo. Cattāri vacīsucaritāni – saccavācā, apisuṇā vācā, saṇhā vācā, mantā bhāsā. Atthi ādiyanto garukaṃ āpattiṃ āpajjati, payojento lahukaṃ; atthi ādiyanto lahukaṃ āpattiṃ āpajjati, payojento garukaṃ, atthi ādiyantopi payojentopi garukaṃ āpattiṃ āpajjati; atthi ādiyantopi payojentopi lahukaṃ āpattiṃ āpajjati.
அத்தி² புக்³க³லோ அபி⁴வாத³னாரஹோ, நோ பச்சுட்டா²னாரஹோ; அத்தி² புக்³க³லோ பச்சுட்டா²னாரஹோ, நோ அபி⁴வாத³னாரஹோ; அத்தி² புக்³க³லோ அபி⁴வாத³னாரஹோ சேவ பச்சுட்டா²னாரஹோ ச; அத்தி² புக்³க³லோ நேவ அபி⁴வாத³னாரஹோ நோ பச்சுட்டா²னாரஹோ. அத்தி² புக்³க³லோ ஆஸனாரஹோ, நோ அபி⁴வாத³னாரஹோ; அத்தி² புக்³க³லோ அபி⁴வாத³னாரஹோ, நோ ஆஸனாரஹோ; அத்தி² புக்³க³லோ ஆஸனாரஹோ சேவ அபி⁴வாத³னாரஹோ ச; அத்தி² புக்³க³லோ நேவ ஆஸனாரஹோ நோ அபி⁴வாத³னாரஹோ. அத்தா²பத்தி காலே ஆபஜ்ஜதி, நோ விகாலே; அத்தா²பத்தி விகாலே ஆபஜ்ஜதி, நோ காலே; அத்தா²பத்தி காலே சேவ ஆபஜ்ஜதி விகாலே ச; அத்தா²பத்தி நேவ காலே ஆபஜ்ஜதி நோ விகாலே. அத்தி² படிக்³க³ஹிதங் காலே கப்பதி, நோ விகாலே; அத்தி² படிக்³க³ஹிதங் விகாலே கப்பதி, நோ காலே; அத்தி² படிக்³க³ஹிதங் காலே சேவ கப்பதி விகாலே ச; அத்தி² படிக்³க³ஹிதங் நேவ காலே கப்பதி நோ விகாலே. அத்தா²பத்தி பச்சந்திமேஸு ஜனபதே³ஸு ஆபஜ்ஜதி, நோ மஜ்ஜி²மேஸு; அத்தா²பத்தி மஜ்ஜி²மேஸு ஜனபதே³ஸு ஆபஜ்ஜதி, நோ பச்சந்திமேஸு; அத்தா²பத்தி பச்சந்திமேஸு சேவ ஜனபதே³ஸு ஆபஜ்ஜதி மஜ்ஜி²மேஸு ச; அத்தா²பத்தி நேவ பச்சந்திமேஸு ஜனபதே³ஸு ஆபஜ்ஜதி நோ மஜ்ஜி²மேஸு. அத்தி² பச்சந்திமேஸு ஜனபதே³ஸு கப்பதி, நோ மஜ்ஜி²மேஸு; அத்தி² மஜ்ஜி²மேஸு ஜனபதே³ஸு கப்பதி, நோ பச்சந்திமேஸு; அத்தி² பச்சந்திமேஸு சேவ ஜனபதே³ஸு கப்பதி மஜ்ஜி²மேஸு ச; அத்தி² நேவ பச்சந்திமேஸு ஜனபதே³ஸு கப்பதி நோ மஜ்ஜி²மேஸு. அத்தா²பத்தி அந்தோ ஆபஜ்ஜதி, நோ ப³ஹி; அத்தா²பத்தி ப³ஹி ஆபஜ்ஜதி, நோ அந்தோ; அத்தா²பத்தி அந்தோ சேவ ஆபஜ்ஜதி ப³ஹி ச; அத்தா²பத்தி நேவ அந்தோ ஆபஜ்ஜதி நோ ப³ஹி. அத்தா²பத்தி அந்தோஸீமாய ஆபஜ்ஜதி, நோ ப³ஹிஸீமாய; அத்தா²பத்தி ப³ஹிஸீமாய ஆபஜ்ஜதி, நோ அந்தோஸீமாய; அத்தா²பத்தி அந்தோஸீமாய சேவ ஆபஜ்ஜதி ப³ஹிஸீமாய ச; அத்தா²பத்தி நேவ அந்தோஸீமாய ஆபஜ்ஜதி நோ ப³ஹிஸீமாய. அத்தா²பத்தி கா³மே ஆபஜ்ஜதி, நோ அரஞ்ஞே; அத்தா²பத்தி அரஞ்ஞே ஆபஜ்ஜதி, நோ கா³மே; அத்தா²பத்தி கா³மே சேவ ஆபஜ்ஜதி அரஞ்ஞே ச; அத்தா²பத்தி நேவ கா³மே ஆபஜ்ஜதி நோ அரஞ்ஞே.
Atthi puggalo abhivādanāraho, no paccuṭṭhānāraho; atthi puggalo paccuṭṭhānāraho, no abhivādanāraho; atthi puggalo abhivādanāraho ceva paccuṭṭhānāraho ca; atthi puggalo neva abhivādanāraho no paccuṭṭhānāraho. Atthi puggalo āsanāraho, no abhivādanāraho; atthi puggalo abhivādanāraho, no āsanāraho; atthi puggalo āsanāraho ceva abhivādanāraho ca; atthi puggalo neva āsanāraho no abhivādanāraho. Atthāpatti kāle āpajjati, no vikāle; atthāpatti vikāle āpajjati, no kāle; atthāpatti kāle ceva āpajjati vikāle ca; atthāpatti neva kāle āpajjati no vikāle. Atthi paṭiggahitaṃ kāle kappati, no vikāle; atthi paṭiggahitaṃ vikāle kappati, no kāle; atthi paṭiggahitaṃ kāle ceva kappati vikāle ca; atthi paṭiggahitaṃ neva kāle kappati no vikāle. Atthāpatti paccantimesu janapadesu āpajjati, no majjhimesu; atthāpatti majjhimesu janapadesu āpajjati, no paccantimesu; atthāpatti paccantimesu ceva janapadesu āpajjati majjhimesu ca; atthāpatti neva paccantimesu janapadesu āpajjati no majjhimesu. Atthi paccantimesu janapadesu kappati, no majjhimesu; atthi majjhimesu janapadesu kappati, no paccantimesu; atthi paccantimesu ceva janapadesu kappati majjhimesu ca; atthi neva paccantimesu janapadesu kappati no majjhimesu. Atthāpatti anto āpajjati, no bahi; atthāpatti bahi āpajjati, no anto; atthāpatti anto ceva āpajjati bahi ca; atthāpatti neva anto āpajjati no bahi. Atthāpatti antosīmāya āpajjati, no bahisīmāya; atthāpatti bahisīmāya āpajjati, no antosīmāya; atthāpatti antosīmāya ceva āpajjati bahisīmāya ca; atthāpatti neva antosīmāya āpajjati no bahisīmāya. Atthāpatti gāme āpajjati, no araññe; atthāpatti araññe āpajjati, no gāme; atthāpatti gāme ceva āpajjati araññe ca; atthāpatti neva gāme āpajjati no araññe.
சதஸ்ஸோ சோத³னா – வத்து²ஸந்த³ஸ்ஸனா, ஆபத்திஸந்த³ஸ்ஸனா, ஸங்வாஸபடிக்கே²போ , ஸாமீசிபடிக்கே²போ. சத்தாரோ புப்³ப³கிச்சா. சத்தாரோ பத்தகல்லா. சத்தாரி அனஞ்ஞபாசித்தியானி. சதஸ்ஸோ பி⁴க்கு²ஸம்முதியோ. 7 சத்தாரி அக³திக³மனானி – ச²ந்தா³க³திங் க³ச்ச²தி, தோ³ஸாக³திங் க³ச்ச²தி, மோஹாக³திங் க³ச்ச²தி, ப⁴யாக³திங் க³ச்ச²தி. சத்தாரி நாக³திக³மனானி – ந ச²ந்தா³க³திங் க³ச்ச²தி, ந தோ³ஸாக³திங் க³ச்ச²தி, ந மோஹாக³திங் க³ச்ச²தி, ந ப⁴யாக³திங் க³ச்ச²தி. சதூஹங்கே³ஹி ஸமன்னாக³தோ அலஜ்ஜீ பி⁴க்கு² ஸங்க⁴ங் பி⁴ந்த³தி – ச²ந்தா³க³திங் க³ச்ச²ந்தோ, தோ³ஸாக³திங் க³ச்ச²ந்தோ, மோஹாக³திங் க³ச்ச²ந்தோ, ப⁴யாக³திங் க³ச்ச²ந்தோ. சதூஹங்கே³ஹி ஸமன்னாக³தோ பேஸலோ பி⁴க்கு² பி⁴ன்னங் ஸங்க⁴ங் ஸமக்³க³ங் கரோதி – ந ச²ந்தா³க³திங் க³ச்ச²ந்தோ, ந தோ³ஸாக³திங் க³ச்ச²ந்தோ, ந மோஹாக³திங் க³ச்ச²ந்தோ, ந ப⁴யாக³திங் க³ச்ச²ந்தோ. சதூஹங்கே³ஹி ஸமன்னாக³தஸ்ஸ பி⁴க்கு²னோ வினயோ ந புச்சி²தப்³போ³ – ச²ந்தா³க³திங் க³ச்ச²தி, தோ³ஸாக³திங் க³ச்ச²தி, மோஹாக³திங் க³ச்ச²தி , ப⁴யாக³திங் க³ச்ச²தி. சதூஹங்கே³ஹி ஸமன்னாக³தேன பி⁴க்கு²னா வினயோ ந புச்சி²தப்³போ³ – ச²ந்தா³க³திங் க³ச்ச²தி, தோ³ஸாக³திங் க³ச்ச²தி, மோஹாக³திங் க³ச்ச²தி, ப⁴யாக³திங் க³ச்ச²தி. சதூஹங்கே³ஹி ஸமன்னாக³தஸ்ஸ பி⁴க்கு²னோ வினயோ ந விஸ்ஸஜ்ஜேதப்³போ³ – ச²ந்தா³க³திங் க³ச்ச²தி, தோ³ஸாக³திங் க³ச்ச²தி, மோஹாக³திங் க³ச்ச²தி, ப⁴யாக³திங் க³ச்ச²தி. சதூஹங்கே³ஹி ஸமன்னாக³தேன பி⁴க்கு²னா வினயோ ந விஸ்ஸஜ்ஜேதப்³போ³ – ச²ந்தா³க³திங் க³ச்ச²தி, தோ³ஸாக³திங் க³ச்ச²தி, மோஹாக³திங் க³ச்ச²தி, ப⁴யாக³திங் க³ச்ச²தி. சதூஹங்கே³ஹி ஸமன்னாக³தஸ்ஸ பி⁴க்கு²னோ அனுயோகோ³ ந தா³தப்³போ³ – ச²ந்தா³க³திங் க³ச்ச²தி , தோ³ஸாக³திங் க³ச்ச²தி, மோஹாக³திங் க³ச்ச²தி, ப⁴யாக³திங் க³ச்ச²தி. சதூஹங்கே³ஹி ஸமன்னாக³தே பி⁴க்கு²னா ஸத்³தி⁴ங் வினயோ ந ஸாகச்சி²தப்³போ³ – ச²ந்தா³க³திங் க³ச்ச²தி, தோ³ஸாக³திங் க³ச்ச²தி, மோஹாக³திங் க³ச்ச²தி, ப⁴யாக³திங் க³ச்ச²தி. அத்தா²பத்தி கி³லானோ ஆபஜ்ஜதி, நோ அகி³லானோ; அத்தா²பத்தி அகி³லானோ ஆபஜ்ஜதி, நோ கி³லானோ; அத்தா²பத்தி கி³லானோ சேவ ஆபஜ்ஜதி அகி³லானோ ச; அத்தா²பத்தி நேவ கி³லானோ ஆபஜ்ஜதி நோ அகி³லானோ. சத்தாரி அத⁴ம்மிகானி பாதிமொக்க²ட்ட²பனானி. சத்தாரி த⁴ம்மிகானி பாதிமொக்க²ட்ட²பனானி.
Catasso codanā – vatthusandassanā, āpattisandassanā, saṃvāsapaṭikkhepo , sāmīcipaṭikkhepo. Cattāro pubbakiccā. Cattāro pattakallā. Cattāri anaññapācittiyāni. Catasso bhikkhusammutiyo. 8 Cattāri agatigamanāni – chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati. Cattāri nāgatigamanāni – na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchati. Catūhaṅgehi samannāgato alajjī bhikkhu saṅghaṃ bhindati – chandāgatiṃ gacchanto, dosāgatiṃ gacchanto, mohāgatiṃ gacchanto, bhayāgatiṃ gacchanto. Catūhaṅgehi samannāgato pesalo bhikkhu bhinnaṃ saṅghaṃ samaggaṃ karoti – na chandāgatiṃ gacchanto, na dosāgatiṃ gacchanto, na mohāgatiṃ gacchanto, na bhayāgatiṃ gacchanto. Catūhaṅgehi samannāgatassa bhikkhuno vinayo na pucchitabbo – chandāgatiṃ gacchati, dosāgatiṃ gacchati, mohāgatiṃ gacchati , bhayāgatiṃ gacchati. Catūhaṅgehi samannāgatena bhikkhunā vinayo na pucchitabbo – chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati. Catūhaṅgehi samannāgatassa bhikkhuno vinayo na vissajjetabbo – chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati. Catūhaṅgehi samannāgatena bhikkhunā vinayo na vissajjetabbo – chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati. Catūhaṅgehi samannāgatassa bhikkhuno anuyogo na dātabbo – chandāgatiṃ gacchati , dosāgatiṃ gacchati, mohāgatiṃ gacchati, bhayāgatiṃ gacchati. Catūhaṅgehi samannāgate bhikkhunā saddhiṃ vinayo na sākacchitabbo – chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati. Atthāpatti gilāno āpajjati, no agilāno; atthāpatti agilāno āpajjati, no gilāno; atthāpatti gilāno ceva āpajjati agilāno ca; atthāpatti neva gilāno āpajjati no agilāno. Cattāri adhammikāni pātimokkhaṭṭhapanāni. Cattāri dhammikāni pātimokkhaṭṭhapanāni.
சதுக்கங் நிட்டி²தங்.
Catukkaṃ niṭṭhitaṃ.
தஸ்ஸுத்³தா³னங் –
Tassuddānaṃ –
ஸகவாசாய காயேன, பஸுத்தோ ச அசித்தகோ;
Sakavācāya kāyena, pasutto ca acittako;
ஆபஜ்ஜந்தோ ச கம்மேன, வோஹாரா சதுரோ ததா².
Āpajjanto ca kammena, vohārā caturo tathā.
பி⁴க்கூ²னங் பி⁴க்கு²னீனஞ்ச, பரிக்கா²ரோ ச ஸம்முகா²;
Bhikkhūnaṃ bhikkhunīnañca, parikkhāro ca sammukhā;
அஜானகாயே மஜ்ஜே² ச, வுட்டா²தி து³விதா⁴ ததா².
Ajānakāye majjhe ca, vuṭṭhāti duvidhā tathā.
படிலாபே⁴ன சோத³னா, பரிவாஸா ச வுச்சதி;
Paṭilābhena codanā, parivāsā ca vuccati;
மானத்தசாரிகா சாபி, ஸாமுக்கங்ஸா படிக்³க³ஹி.
Mānattacārikā cāpi, sāmukkaṃsā paṭiggahi.
மஹாவிகடகம்மானி, புன கம்மே விபத்தியோ;
Mahāvikaṭakammāni, puna kamme vipattiyo;
அதி⁴கரணா து³ஸ்ஸீலா ச, ஸோப⁴னாக³ந்துகேன ச.
Adhikaraṇā dussīlā ca, sobhanāgantukena ca.
க³மிகோ வத்து²னானத்தா, ஸபா⁴கு³பஜ்ஜா²யேன ச;
Gamiko vatthunānattā, sabhāgupajjhāyena ca;
ஆசரியோ பச்சயா வா, து³ச்சரிதங் ஸுசரிதங்.
Ācariyo paccayā vā, duccaritaṃ sucaritaṃ.
ஆதி³யந்தோ புக்³க³லோ ச, அரஹோ ஆஸனேன ச;
Ādiyanto puggalo ca, araho āsanena ca;
காலே ச கப்பதி சேவ, பச்சந்திமேஸு கப்பதி.
Kāle ca kappati ceva, paccantimesu kappati.
அந்தோ அந்தோ ச ஸீமாய, கா³மே ச சோத³னாய ச;
Anto anto ca sīmāya, gāme ca codanāya ca;
புப்³ப³கிச்சங் பத்தகல்லங், அனஞ்ஞா ஸம்முதியோ ச.
Pubbakiccaṃ pattakallaṃ, anaññā sammutiyo ca.
அக³தி நாக³தி சேவ, அலஜ்ஜீ பேஸலேன ச;
Agati nāgati ceva, alajjī pesalena ca;
புச்சி²தப்³பா³ து³வே சேவ, விஸ்ஸஜ்ஜெய்யா ததா² து³வே;
Pucchitabbā duve ceva, vissajjeyyā tathā duve;
அனுயோகோ³ ச ஸாகச்சா², கி³லானோ ட²பனேன சாதி.
Anuyogo ca sākacchā, gilāno ṭhapanena cāti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / சதுக்கவாரவண்ணனா • Catukkavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / சதுக்கவாரவண்ணனா • Catukkavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / சதுக்கவாரவண்ணனா • Catukkavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சதுக்கவாரவண்ணனா • Catukkavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஏகுத்தரிகனயோ சதுக்கவாரவண்ணனா • Ekuttarikanayo catukkavāravaṇṇanā
