| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
๔. จตุกฺกวาโร
4. Catukkavāro
๓๒๔. อตฺถาปตฺติ สกวาจาย อาปชฺชติ, ปรวาจาย วุฎฺฐาติ; อตฺถาปตฺติ ปรวาจาย อาปชฺชติ, สกวาจาย วุฎฺฐาติ; อตฺถาปตฺติ สกวาจาย อาปชฺชติ, สกวาจาย วุฎฺฐาติ; อตฺถาปตฺติ ปรวาจาย อาปชฺชติ, ปรวาจาย วุฎฺฐาติฯ อตฺถาปตฺติ กาเยน อาปชฺชติ, วาจาย วุฎฺฐาติ; อตฺถาปตฺติ วาจาย อาปชฺชติ, กาเยน วุฎฺฐาติ; อตฺถาปตฺติ กาเยน อาปชฺชติ, กาเยน วุฎฺฐาติ; อตฺถาปตฺติ วาจาย อาปชฺชติ, วาจาย วุฎฺฐาติฯ อตฺถาปตฺติ ปสุโตฺต อาปชฺชติ, ปฎิพุโทฺธ วุฎฺฐาติ; อตฺถาปตฺติ ปฎิพุโทฺธ อาปชฺชติ, ปสุโตฺต วุฎฺฐาติ; อตฺถาปตฺติ ปสุโตฺต อาปชฺชติ, ปสุโตฺต วุฎฺฐาติ; อตฺถาปตฺติ ปฎิพุโทฺธ อาปชฺชติ, ปฎิพุโทฺธ วุฎฺฐาติฯ อตฺถาปตฺติ อจิตฺตโก อาปชฺชติ, สจิตฺตโก วุฎฺฐาติ; อตฺถาปตฺติ สจิตฺตโก อาปชฺชติ, อจิตฺตโก วุฎฺฐาติ; อตฺถาปตฺติ อจิตฺตโก อาปชฺชติ, อจิตฺตโก วุฎฺฐาติ; อตฺถาปตฺติ สจิตฺตโก อาปชฺชติ, สจิตฺตโก วุฎฺฐาติฯ อตฺถาปตฺติ อาปชฺชโนฺต เทเสติ; เทเสโนฺต อาปชฺชติ; อตฺถาปตฺติ อาปชฺชโนฺต วุฎฺฐาติ; วุฎฺฐหโนฺต อาปชฺชติฯ อตฺถาปตฺติ กเมฺมน อาปชฺชติ, อกเมฺมน วุฎฺฐาติ; อตฺถาปตฺติ อกเมฺมน อาปชฺชติ, กเมฺมน วุฎฺฐาติ; อตฺถาปตฺติ กเมฺมน อาปชฺชติ, กเมฺมน วุฎฺฐาติ; อตฺถาปตฺติ อกเมฺมน อาปชฺชติ, อกเมฺมน วุฎฺฐาติฯ
324. Atthāpatti sakavācāya āpajjati, paravācāya vuṭṭhāti; atthāpatti paravācāya āpajjati, sakavācāya vuṭṭhāti; atthāpatti sakavācāya āpajjati, sakavācāya vuṭṭhāti; atthāpatti paravācāya āpajjati, paravācāya vuṭṭhāti. Atthāpatti kāyena āpajjati, vācāya vuṭṭhāti; atthāpatti vācāya āpajjati, kāyena vuṭṭhāti; atthāpatti kāyena āpajjati, kāyena vuṭṭhāti; atthāpatti vācāya āpajjati, vācāya vuṭṭhāti. Atthāpatti pasutto āpajjati, paṭibuddho vuṭṭhāti; atthāpatti paṭibuddho āpajjati, pasutto vuṭṭhāti; atthāpatti pasutto āpajjati, pasutto vuṭṭhāti; atthāpatti paṭibuddho āpajjati, paṭibuddho vuṭṭhāti. Atthāpatti acittako āpajjati, sacittako vuṭṭhāti; atthāpatti sacittako āpajjati, acittako vuṭṭhāti; atthāpatti acittako āpajjati, acittako vuṭṭhāti; atthāpatti sacittako āpajjati, sacittako vuṭṭhāti. Atthāpatti āpajjanto deseti; desento āpajjati; atthāpatti āpajjanto vuṭṭhāti; vuṭṭhahanto āpajjati. Atthāpatti kammena āpajjati, akammena vuṭṭhāti; atthāpatti akammena āpajjati, kammena vuṭṭhāti; atthāpatti kammena āpajjati, kammena vuṭṭhāti; atthāpatti akammena āpajjati, akammena vuṭṭhāti.
1 จตฺตาโร อนริยโวหารา – อทิเฎฺฐ ทิฎฺฐวาทิตา, อสฺสุเต สุตวาทิตา, อมุเต มุตวาทิตา, อวิญฺญาเต วิญฺญาตวาทิตาฯ จตฺตาโร อริยโวหารา – อทิเฎฺฐ อทิฎฺฐวาทิตา, อสฺสุเต อสฺสุตวาทิตา, อมุเต อมุตวาทิตา, อวิญฺญาเต อวิญฺญาตวาทิตาฯ อปเรปิ จตฺตาโร อนริยโวหารา – ทิเฎฺฐ อทิฎฺฐวาทิตา, สุเต อสฺสุตวาทิตา, มุเต อมุตวาทิตา, วิญฺญาเต อวิญฺญาตวาทิตาฯ จตฺตาโร อริยโวหารา – ทิเฎฺฐ ทิฎฺฐวาทิตา, สุเต สุตวาทิตา, มุเต มุตวาทิตา, วิญฺญาเต วิญฺญาตวาทิตาฯ
2 Cattāro anariyavohārā – adiṭṭhe diṭṭhavāditā, assute sutavāditā, amute mutavāditā, aviññāte viññātavāditā. Cattāro ariyavohārā – adiṭṭhe adiṭṭhavāditā, assute assutavāditā, amute amutavāditā, aviññāte aviññātavāditā. Aparepi cattāro anariyavohārā – diṭṭhe adiṭṭhavāditā, sute assutavāditā, mute amutavāditā, viññāte aviññātavāditā. Cattāro ariyavohārā – diṭṭhe diṭṭhavāditā, sute sutavāditā, mute mutavāditā, viññāte viññātavāditā.
จตฺตาโร ปาราชิกา ภิกฺขูนํ ภิกฺขุนีหิ สาธารณา; จตฺตาโร ปาราชิกา ภิกฺขุนีนํ ภิกฺขูหิ อสาธารณาฯ จตฺตาโร ปริกฺขารา – อตฺถิ ปริกฺขาโร รกฺขิตโพฺพ โคเปตโพฺพ มมายิตโพฺพ ปริภุญฺชิตโพฺพ; อตฺถิ ปริกฺขาโร รกฺขิตโพฺพ โคเปตโพฺพ มมายิตโพฺพ, น ปริภุญฺชิตโพฺพ; อตฺถิ ปริกฺขาโร รกฺขิตโพฺพ โคเปตโพฺพ, น มมายิตโพฺพ น ปริภุญฺชิตโพฺพ; อตฺถิ ปริกฺขาโร น รกฺขิตโพฺพ น โคเปตโพฺพ, น มมายิตโพฺพ น ปริภุญฺชิตโพฺพฯ อตฺถาปตฺติ สมฺมุขา อาปชฺชติ, ปรมฺมุขา วุฎฺฐาติ; อตฺถาปตฺติ ปรมฺมุขา อาปชฺชติ , สมฺมุขา วุฎฺฐาติ; อตฺถาปตฺติ สมฺมุขา อาปชฺชติ, สมฺมุขา วุฎฺฐาติ; อตฺถาปตฺติ ปรมฺมุขา อาปชฺชติ, ปรมฺมุขา วุฎฺฐาติฯ อตฺถาปตฺติ อชานโนฺต อาปชฺชติ, ชานโนฺต วุฎฺฐาติ; อตฺถาปตฺติ ชานโนฺต อาปชฺชติ, อชานโนฺต วุฎฺฐาติ; อตฺถาปตฺติ อชานโนฺต อาปชฺชติ, อชานโนฺต วุฎฺฐาติ; อตฺถาปตฺติ ชานโนฺต อาปชฺชติ, ชานโนฺต วุฎฺฐาติฯ
Cattāro pārājikā bhikkhūnaṃ bhikkhunīhi sādhāraṇā; cattāro pārājikā bhikkhunīnaṃ bhikkhūhi asādhāraṇā. Cattāro parikkhārā – atthi parikkhāro rakkhitabbo gopetabbo mamāyitabbo paribhuñjitabbo; atthi parikkhāro rakkhitabbo gopetabbo mamāyitabbo, na paribhuñjitabbo; atthi parikkhāro rakkhitabbo gopetabbo, na mamāyitabbo na paribhuñjitabbo; atthi parikkhāro na rakkhitabbo na gopetabbo, na mamāyitabbo na paribhuñjitabbo. Atthāpatti sammukhā āpajjati, parammukhā vuṭṭhāti; atthāpatti parammukhā āpajjati , sammukhā vuṭṭhāti; atthāpatti sammukhā āpajjati, sammukhā vuṭṭhāti; atthāpatti parammukhā āpajjati, parammukhā vuṭṭhāti. Atthāpatti ajānanto āpajjati, jānanto vuṭṭhāti; atthāpatti jānanto āpajjati, ajānanto vuṭṭhāti; atthāpatti ajānanto āpajjati, ajānanto vuṭṭhāti; atthāpatti jānanto āpajjati, jānanto vuṭṭhāti.
จตูหากาเรหิ อาปตฺติํ อาปชฺชติ – กาเยน อาปชฺชติ, วาจาย อาปชฺชติ, กาเยน วาจาย อาปชฺชติ, กมฺมวาจาย อาปชฺชติฯ อปเรหิปิ จตูหากาเรหิ อาปตฺติํ อาปชฺชติ – สงฺฆมเชฺฌ, คณมเชฺฌ, ปุคฺคลสฺส สนฺติเก, ลิงฺคปาตุภาเวนฯ จตูหากาเรหิ อาปตฺติยา วุฎฺฐาติ – กาเยน วุฎฺฐาติ, วาจาย วุฎฺฐาติ, กาเยน วาจาย วุฎฺฐาติ, กมฺมวาจาย วุฎฺฐาติฯ อปเรหิปิ จตูหากาเรหิ อาปตฺติยา วุฎฺฐาติ – สงฺฆมเชฺฌ, คณมเชฺฌ, ปุคฺคลสฺส สนฺติเก, ลิงฺคปาตุภาเวนฯ สห ปฎิลาเภน ปุริมํ ชหติ, ปจฺฉิเม ปติฎฺฐาติ, วิญฺญตฺติโย ปฎิปฺปสฺสมฺภนฺติ, ปณฺณตฺติโย นิรุชฺฌนฺติฯ สห ปฎิลาเภน ปจฺฉิมํ ชหติ, ปุริเม ปติฎฺฐาติ, วิญฺญตฺติโย ปฎิปฺปสฺสมฺภนฺติ, ปปฺณตฺติโย นิรุชฺฌนฺติฯ จตโสฺส โจทนา – สีลวิปตฺติยา โจเทติ , อาจารวิปตฺติยา โจเทติ, ทิฎฺฐิวิปตฺติยา โจเทติ, อาชีววิปตฺติยา โจเทติฯ จตฺตาโร ปริวาสา – ปฎิจฺฉนฺนปริวาโส , อปฺปฎิจฺฉนฺนปริวาโส, สุทฺธนฺตปริวาโส, สโมธานปริวาโสฯ จตฺตาโร มานตฺตา – ปฎิจฺฉนฺนมานตฺตํ, อปฺปฎิจฺฉนฺนมานตฺตํ, ปกฺขมานตฺตํ, สโมธานมานตฺตํฯ จตฺตาโร มานตฺตจาริกสฺส ภิกฺขุโน รตฺติเจฺฉทา – สหวาโส, วิปฺปวาโส, อนาโรจนา, อูเน คเณ จรติฯ จตฺตาโร สามุกฺกํสา ฯ จตฺตาโร ปฎิคฺคหิตปริโภคา – ยาวกาลิกํ, ยามกาลิกํ, สตฺตาหกาลิกํ, ยาวชีวิกํฯ จตฺตาริ มหาวิกฎานิ – คูโถ, มุตฺตํ, ฉาริกา, มตฺติกาฯ จตฺตาริ กมฺมานิ – อปโลกนกมฺมํ, ญตฺติกมฺมํ, ญตฺติทุติยกมฺมํ, ญตฺติจตุตฺถกมฺมํฯ อปรานิปิ จตฺตาริ กมฺมานิ – อธเมฺมน วคฺคกมฺมํ, อธเมฺมน สมคฺคกมฺมํ, ธเมฺมน วคฺคกมฺมํ, ธเมฺมน สมคฺคกมฺมํฯ จตโสฺส วิปตฺติโย – สีลวิปตฺติ, อาจารวิปตฺติ, ทิฎฺฐิวิปตฺติ, อาชีววิปตฺติฯ จตฺตาริ อธิกรณานิ – วิวาทาธิกรณํ, อนุวาทาธิกรณํ, อาปตฺตาธิกรณํ, กิจฺจาธิกรณํฯ 3 จตฺตาโร ปริสทูสนา – ภิกฺขุ ทุสฺสีโล ปาปธโมฺม ปริสทูสโน, ภิกฺขุนี ทุสฺสีลา ปาปธมฺมา ปริสทูสนา, อุปาสโก ทุสฺสีโล ปาปธโมฺม ปริสทูสโน, อุปาสิกา ทุสฺสีลา ปาปธมฺมา ปริสทูสนาฯ จตฺตาโร ปริสโสภนา 4 – ภิกฺขุ สีลวา กลฺยาณธโมฺม ปริสโสภโน, ภิกฺขุนี สีลวตี กลฺยาณธมฺมา ปริสโสภนา, อุปาสโก สีลวา กลฺยาณธโมฺม ปริสโสภโน, อุปาสิกา สีลวตี กลฺยาณธมฺมา ปริสโสภนาฯ
Catūhākārehi āpattiṃ āpajjati – kāyena āpajjati, vācāya āpajjati, kāyena vācāya āpajjati, kammavācāya āpajjati. Aparehipi catūhākārehi āpattiṃ āpajjati – saṅghamajjhe, gaṇamajjhe, puggalassa santike, liṅgapātubhāvena. Catūhākārehi āpattiyā vuṭṭhāti – kāyena vuṭṭhāti, vācāya vuṭṭhāti, kāyena vācāya vuṭṭhāti, kammavācāya vuṭṭhāti. Aparehipi catūhākārehi āpattiyā vuṭṭhāti – saṅghamajjhe, gaṇamajjhe, puggalassa santike, liṅgapātubhāvena. Saha paṭilābhena purimaṃ jahati, pacchime patiṭṭhāti, viññattiyo paṭippassambhanti, paṇṇattiyo nirujjhanti. Saha paṭilābhena pacchimaṃ jahati, purime patiṭṭhāti, viññattiyo paṭippassambhanti, papṇattiyo nirujjhanti. Catasso codanā – sīlavipattiyā codeti , ācāravipattiyā codeti, diṭṭhivipattiyā codeti, ājīvavipattiyā codeti. Cattāro parivāsā – paṭicchannaparivāso , appaṭicchannaparivāso, suddhantaparivāso, samodhānaparivāso. Cattāro mānattā – paṭicchannamānattaṃ, appaṭicchannamānattaṃ, pakkhamānattaṃ, samodhānamānattaṃ. Cattāro mānattacārikassa bhikkhuno ratticchedā – sahavāso, vippavāso, anārocanā, ūne gaṇe carati. Cattāro sāmukkaṃsā . Cattāro paṭiggahitaparibhogā – yāvakālikaṃ, yāmakālikaṃ, sattāhakālikaṃ, yāvajīvikaṃ. Cattāri mahāvikaṭāni – gūtho, muttaṃ, chārikā, mattikā. Cattāri kammāni – apalokanakammaṃ, ñattikammaṃ, ñattidutiyakammaṃ, ñatticatutthakammaṃ. Aparānipi cattāri kammāni – adhammena vaggakammaṃ, adhammena samaggakammaṃ, dhammena vaggakammaṃ, dhammena samaggakammaṃ. Catasso vipattiyo – sīlavipatti, ācāravipatti, diṭṭhivipatti, ājīvavipatti. Cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ. 5 Cattāro parisadūsanā – bhikkhu dussīlo pāpadhammo parisadūsano, bhikkhunī dussīlā pāpadhammā parisadūsanā, upāsako dussīlo pāpadhammo parisadūsano, upāsikā dussīlā pāpadhammā parisadūsanā. Cattāro parisasobhanā 6 – bhikkhu sīlavā kalyāṇadhammo parisasobhano, bhikkhunī sīlavatī kalyāṇadhammā parisasobhanā, upāsako sīlavā kalyāṇadhammo parisasobhano, upāsikā sīlavatī kalyāṇadhammā parisasobhanā.
อตฺถาปตฺติ อาคนฺตุโก อาปชฺชติ, โน อาวาสิโก; อตฺถาปตฺติ อาวาสิโก อาปชฺชติ, โน อาคนฺตุโก; อตฺถาปตฺติ อาคนฺตุโก เจว อาปชฺชติ อาวาสิโก จ อตฺถาปตฺติ เนว อาคนฺตุโก อาปชฺชติ, โน อาวาสิโกฯ อตฺถาปตฺติ คมิโก อาปชฺชติ, โน อาวาสิโก; อตฺถาปตฺติ อาวาสิโก อาปชฺชติ, โน คมิโก; อตฺถาปตฺติ คมิโก เจว อาปชฺชติ อาวาสิโก จ; อตฺถาปตฺติ เนว คมิโก อาปชฺชติ โน อาวาสิโกฯ อตฺถิ วตฺถุนานตฺตตา โน อาปตฺตินานตฺตตา, อตฺถิ อาปตฺตินานตฺตตา โน วตฺถุนานตฺตตา, อตฺถิ วตฺถุนานตฺตตา เจว อาปตฺตินานตฺตตา จ, อตฺถิ เนว วตฺถุนานตฺตตา โน อาปตฺตินานตฺตตาฯ อตฺถิ วตฺถุสภาคตา โน อาปตฺติสภาคตา, อตฺถิ อาปตฺติสภาคตา โน วตฺถุสภาคตา, อตฺถิ วตฺถุสภาคตา เจว อาปตฺติสภาคตา จ อตฺถิ เนว วตฺถุสภาคตา โน อาปตฺติสภาคตาฯ อตฺถาปตฺติ อุปชฺฌาโย อาปชฺชติ โน สทฺธิวิหาริโก, อตฺถาปตฺติ สทฺธิวิหาริโก อาปชฺชติ โน อุปชฺฌาโย, อตฺถาปตฺติ อุปชฺฌาโย เจว อาปชฺชติ สทฺธิวิหาริโก จ, อตฺถาปตฺติ เนว อุปชฺฌาโย อาปชฺชติ โน สทฺธิวิหาริโกฯ อตฺถาปตฺติ อาจริโย อาปชฺชติ โน อเนฺตวาสิโก, อตฺถาปตฺติ อเนฺตวาสิโก อาปชฺชติ โน อาจริโย, อตฺถาปตฺติ อาจริโย เจว อาปชฺชติ อเนฺตวาสิโก จ, อตฺถาปตฺติ เนว อาจริโย อาปชฺชติ โน อเนฺตวาสิโกฯ จตฺตาโร ปจฺจยา อนาปตฺติ วสฺสเจฺฉทสฺส – สโงฺฆ วา ภิโนฺน โหติ, สงฺฆํ วา ภินฺทิตุกามา โหนฺติ, ชีวิตนฺตราโย วา โหติ, พฺรหฺมจริยนฺตราโย วา โหติฯ จตฺตาริ วจีทุจฺจริตานิ – มุสาวาโท, ปิสุณา วาจา, ผรุสา วาจา, สมฺผปฺปลาโปฯ จตฺตาริ วจีสุจริตานิ – สจฺจวาจา, อปิสุณา วาจา, สณฺหา วาจา, มนฺตา ภาสาฯ อตฺถิ อาทิยโนฺต ครุกํ อาปตฺติํ อาปชฺชติ, ปโยเชโนฺต ลหุกํ; อตฺถิ อาทิยโนฺต ลหุกํ อาปตฺติํ อาปชฺชติ, ปโยเชโนฺต ครุกํ, อตฺถิ อาทิยโนฺตปิ ปโยเชโนฺตปิ ครุกํ อาปตฺติํ อาปชฺชติ; อตฺถิ อาทิยโนฺตปิ ปโยเชโนฺตปิ ลหุกํ อาปตฺติํ อาปชฺชติฯ
Atthāpatti āgantuko āpajjati, no āvāsiko; atthāpatti āvāsiko āpajjati, no āgantuko; atthāpatti āgantuko ceva āpajjati āvāsiko ca atthāpatti neva āgantuko āpajjati, no āvāsiko. Atthāpatti gamiko āpajjati, no āvāsiko; atthāpatti āvāsiko āpajjati, no gamiko; atthāpatti gamiko ceva āpajjati āvāsiko ca; atthāpatti neva gamiko āpajjati no āvāsiko. Atthi vatthunānattatā no āpattinānattatā, atthi āpattinānattatā no vatthunānattatā, atthi vatthunānattatā ceva āpattinānattatā ca, atthi neva vatthunānattatā no āpattinānattatā. Atthi vatthusabhāgatā no āpattisabhāgatā, atthi āpattisabhāgatā no vatthusabhāgatā, atthi vatthusabhāgatā ceva āpattisabhāgatā ca atthi neva vatthusabhāgatā no āpattisabhāgatā. Atthāpatti upajjhāyo āpajjati no saddhivihāriko, atthāpatti saddhivihāriko āpajjati no upajjhāyo, atthāpatti upajjhāyo ceva āpajjati saddhivihāriko ca, atthāpatti neva upajjhāyo āpajjati no saddhivihāriko. Atthāpatti ācariyo āpajjati no antevāsiko, atthāpatti antevāsiko āpajjati no ācariyo, atthāpatti ācariyo ceva āpajjati antevāsiko ca, atthāpatti neva ācariyo āpajjati no antevāsiko. Cattāro paccayā anāpatti vassacchedassa – saṅgho vā bhinno hoti, saṅghaṃ vā bhinditukāmā honti, jīvitantarāyo vā hoti, brahmacariyantarāyo vā hoti. Cattāri vacīduccaritāni – musāvādo, pisuṇā vācā, pharusā vācā, samphappalāpo. Cattāri vacīsucaritāni – saccavācā, apisuṇā vācā, saṇhā vācā, mantā bhāsā. Atthi ādiyanto garukaṃ āpattiṃ āpajjati, payojento lahukaṃ; atthi ādiyanto lahukaṃ āpattiṃ āpajjati, payojento garukaṃ, atthi ādiyantopi payojentopi garukaṃ āpattiṃ āpajjati; atthi ādiyantopi payojentopi lahukaṃ āpattiṃ āpajjati.
อตฺถิ ปุคฺคโล อภิวาทนารโห, โน ปจฺจุฎฺฐานารโห; อตฺถิ ปุคฺคโล ปจฺจุฎฺฐานารโห, โน อภิวาทนารโห; อตฺถิ ปุคฺคโล อภิวาทนารโห เจว ปจฺจุฎฺฐานารโห จ; อตฺถิ ปุคฺคโล เนว อภิวาทนารโห โน ปจฺจุฎฺฐานารโหฯ อตฺถิ ปุคฺคโล อาสนารโห, โน อภิวาทนารโห; อตฺถิ ปุคฺคโล อภิวาทนารโห, โน อาสนารโห; อตฺถิ ปุคฺคโล อาสนารโห เจว อภิวาทนารโห จ; อตฺถิ ปุคฺคโล เนว อาสนารโห โน อภิวาทนารโหฯ อตฺถาปตฺติ กาเล อาปชฺชติ, โน วิกาเล; อตฺถาปตฺติ วิกาเล อาปชฺชติ, โน กาเล; อตฺถาปตฺติ กาเล เจว อาปชฺชติ วิกาเล จ; อตฺถาปตฺติ เนว กาเล อาปชฺชติ โน วิกาเลฯ อตฺถิ ปฎิคฺคหิตํ กาเล กปฺปติ, โน วิกาเล; อตฺถิ ปฎิคฺคหิตํ วิกาเล กปฺปติ, โน กาเล; อตฺถิ ปฎิคฺคหิตํ กาเล เจว กปฺปติ วิกาเล จ; อตฺถิ ปฎิคฺคหิตํ เนว กาเล กปฺปติ โน วิกาเลฯ อตฺถาปตฺติ ปจฺจนฺติเมสุ ชนปเทสุ อาปชฺชติ, โน มชฺฌิเมสุ; อตฺถาปตฺติ มชฺฌิเมสุ ชนปเทสุ อาปชฺชติ, โน ปจฺจนฺติเมสุ; อตฺถาปตฺติ ปจฺจนฺติเมสุ เจว ชนปเทสุ อาปชฺชติ มชฺฌิเมสุ จ; อตฺถาปตฺติ เนว ปจฺจนฺติเมสุ ชนปเทสุ อาปชฺชติ โน มชฺฌิเมสุฯ อตฺถิ ปจฺจนฺติเมสุ ชนปเทสุ กปฺปติ, โน มชฺฌิเมสุ; อตฺถิ มชฺฌิเมสุ ชนปเทสุ กปฺปติ, โน ปจฺจนฺติเมสุ; อตฺถิ ปจฺจนฺติเมสุ เจว ชนปเทสุ กปฺปติ มชฺฌิเมสุ จ; อตฺถิ เนว ปจฺจนฺติเมสุ ชนปเทสุ กปฺปติ โน มชฺฌิเมสุฯ อตฺถาปตฺติ อโนฺต อาปชฺชติ, โน พหิ; อตฺถาปตฺติ พหิ อาปชฺชติ, โน อโนฺต; อตฺถาปตฺติ อโนฺต เจว อาปชฺชติ พหิ จ; อตฺถาปตฺติ เนว อโนฺต อาปชฺชติ โน พหิฯ อตฺถาปตฺติ อโนฺตสีมาย อาปชฺชติ, โน พหิสีมาย; อตฺถาปตฺติ พหิสีมาย อาปชฺชติ, โน อโนฺตสีมาย; อตฺถาปตฺติ อโนฺตสีมาย เจว อาปชฺชติ พหิสีมาย จ; อตฺถาปตฺติ เนว อโนฺตสีมาย อาปชฺชติ โน พหิสีมายฯ อตฺถาปตฺติ คาเม อาปชฺชติ, โน อรเญฺญ; อตฺถาปตฺติ อรเญฺญ อาปชฺชติ, โน คาเม; อตฺถาปตฺติ คาเม เจว อาปชฺชติ อรเญฺญ จ; อตฺถาปตฺติ เนว คาเม อาปชฺชติ โน อรเญฺญฯ
Atthi puggalo abhivādanāraho, no paccuṭṭhānāraho; atthi puggalo paccuṭṭhānāraho, no abhivādanāraho; atthi puggalo abhivādanāraho ceva paccuṭṭhānāraho ca; atthi puggalo neva abhivādanāraho no paccuṭṭhānāraho. Atthi puggalo āsanāraho, no abhivādanāraho; atthi puggalo abhivādanāraho, no āsanāraho; atthi puggalo āsanāraho ceva abhivādanāraho ca; atthi puggalo neva āsanāraho no abhivādanāraho. Atthāpatti kāle āpajjati, no vikāle; atthāpatti vikāle āpajjati, no kāle; atthāpatti kāle ceva āpajjati vikāle ca; atthāpatti neva kāle āpajjati no vikāle. Atthi paṭiggahitaṃ kāle kappati, no vikāle; atthi paṭiggahitaṃ vikāle kappati, no kāle; atthi paṭiggahitaṃ kāle ceva kappati vikāle ca; atthi paṭiggahitaṃ neva kāle kappati no vikāle. Atthāpatti paccantimesu janapadesu āpajjati, no majjhimesu; atthāpatti majjhimesu janapadesu āpajjati, no paccantimesu; atthāpatti paccantimesu ceva janapadesu āpajjati majjhimesu ca; atthāpatti neva paccantimesu janapadesu āpajjati no majjhimesu. Atthi paccantimesu janapadesu kappati, no majjhimesu; atthi majjhimesu janapadesu kappati, no paccantimesu; atthi paccantimesu ceva janapadesu kappati majjhimesu ca; atthi neva paccantimesu janapadesu kappati no majjhimesu. Atthāpatti anto āpajjati, no bahi; atthāpatti bahi āpajjati, no anto; atthāpatti anto ceva āpajjati bahi ca; atthāpatti neva anto āpajjati no bahi. Atthāpatti antosīmāya āpajjati, no bahisīmāya; atthāpatti bahisīmāya āpajjati, no antosīmāya; atthāpatti antosīmāya ceva āpajjati bahisīmāya ca; atthāpatti neva antosīmāya āpajjati no bahisīmāya. Atthāpatti gāme āpajjati, no araññe; atthāpatti araññe āpajjati, no gāme; atthāpatti gāme ceva āpajjati araññe ca; atthāpatti neva gāme āpajjati no araññe.
จตโสฺส โจทนา – วตฺถุสนฺทสฺสนา, อาปตฺติสนฺทสฺสนา, สํวาสปฎิเกฺขโป , สามีจิปฎิเกฺขโปฯ จตฺตาโร ปุพฺพกิจฺจาฯ จตฺตาโร ปตฺตกลฺลาฯ จตฺตาริ อนญฺญปาจิตฺติยานิฯ จตโสฺส ภิกฺขุสมฺมุติโยฯ 7 จตฺตาริ อคติคมนานิ – ฉนฺทาคติํ คจฺฉติ, โทสาคติํ คจฺฉติ, โมหาคติํ คจฺฉติ, ภยาคติํ คจฺฉติฯ จตฺตาริ นาคติคมนานิ – น ฉนฺทาคติํ คจฺฉติ, น โทสาคติํ คจฺฉติ, น โมหาคติํ คจฺฉติ, น ภยาคติํ คจฺฉติฯ จตูหเงฺคหิ สมนฺนาคโต อลชฺชี ภิกฺขุ สงฺฆํ ภินฺทติ – ฉนฺทาคติํ คจฺฉโนฺต, โทสาคติํ คจฺฉโนฺต, โมหาคติํ คจฺฉโนฺต, ภยาคติํ คจฺฉโนฺตฯ จตูหเงฺคหิ สมนฺนาคโต เปสโล ภิกฺขุ ภินฺนํ สงฺฆํ สมคฺคํ กโรติ – น ฉนฺทาคติํ คจฺฉโนฺต, น โทสาคติํ คจฺฉโนฺต, น โมหาคติํ คจฺฉโนฺต, น ภยาคติํ คจฺฉโนฺตฯ จตูหเงฺคหิ สมนฺนาคตสฺส ภิกฺขุโน วินโย น ปุจฺฉิตโพฺพ – ฉนฺทาคติํ คจฺฉติ, โทสาคติํ คจฺฉติ, โมหาคติํ คจฺฉติ , ภยาคติํ คจฺฉติฯ จตูหเงฺคหิ สมนฺนาคเตน ภิกฺขุนา วินโย น ปุจฺฉิตโพฺพ – ฉนฺทาคติํ คจฺฉติ, โทสาคติํ คจฺฉติ, โมหาคติํ คจฺฉติ, ภยาคติํ คจฺฉติฯ จตูหเงฺคหิ สมนฺนาคตสฺส ภิกฺขุโน วินโย น วิสฺสเชฺชตโพฺพ – ฉนฺทาคติํ คจฺฉติ, โทสาคติํ คจฺฉติ, โมหาคติํ คจฺฉติ, ภยาคติํ คจฺฉติฯ จตูหเงฺคหิ สมนฺนาคเตน ภิกฺขุนา วินโย น วิสฺสเชฺชตโพฺพ – ฉนฺทาคติํ คจฺฉติ, โทสาคติํ คจฺฉติ, โมหาคติํ คจฺฉติ, ภยาคติํ คจฺฉติฯ จตูหเงฺคหิ สมนฺนาคตสฺส ภิกฺขุโน อนุโยโค น ทาตโพฺพ – ฉนฺทาคติํ คจฺฉติ , โทสาคติํ คจฺฉติ, โมหาคติํ คจฺฉติ, ภยาคติํ คจฺฉติฯ จตูหเงฺคหิ สมนฺนาคเต ภิกฺขุนา สทฺธิํ วินโย น สากจฺฉิตโพฺพ – ฉนฺทาคติํ คจฺฉติ, โทสาคติํ คจฺฉติ, โมหาคติํ คจฺฉติ, ภยาคติํ คจฺฉติฯ อตฺถาปตฺติ คิลาโน อาปชฺชติ, โน อคิลาโน; อตฺถาปตฺติ อคิลาโน อาปชฺชติ, โน คิลาโน; อตฺถาปตฺติ คิลาโน เจว อาปชฺชติ อคิลาโน จ; อตฺถาปตฺติ เนว คิลาโน อาปชฺชติ โน อคิลาโนฯ จตฺตาริ อธมฺมิกานิ ปาติโมกฺขฎฺฐปนานิฯ จตฺตาริ ธมฺมิกานิ ปาติโมกฺขฎฺฐปนานิฯ
Catasso codanā – vatthusandassanā, āpattisandassanā, saṃvāsapaṭikkhepo , sāmīcipaṭikkhepo. Cattāro pubbakiccā. Cattāro pattakallā. Cattāri anaññapācittiyāni. Catasso bhikkhusammutiyo. 8 Cattāri agatigamanāni – chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati. Cattāri nāgatigamanāni – na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchati. Catūhaṅgehi samannāgato alajjī bhikkhu saṅghaṃ bhindati – chandāgatiṃ gacchanto, dosāgatiṃ gacchanto, mohāgatiṃ gacchanto, bhayāgatiṃ gacchanto. Catūhaṅgehi samannāgato pesalo bhikkhu bhinnaṃ saṅghaṃ samaggaṃ karoti – na chandāgatiṃ gacchanto, na dosāgatiṃ gacchanto, na mohāgatiṃ gacchanto, na bhayāgatiṃ gacchanto. Catūhaṅgehi samannāgatassa bhikkhuno vinayo na pucchitabbo – chandāgatiṃ gacchati, dosāgatiṃ gacchati, mohāgatiṃ gacchati , bhayāgatiṃ gacchati. Catūhaṅgehi samannāgatena bhikkhunā vinayo na pucchitabbo – chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati. Catūhaṅgehi samannāgatassa bhikkhuno vinayo na vissajjetabbo – chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati. Catūhaṅgehi samannāgatena bhikkhunā vinayo na vissajjetabbo – chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati. Catūhaṅgehi samannāgatassa bhikkhuno anuyogo na dātabbo – chandāgatiṃ gacchati , dosāgatiṃ gacchati, mohāgatiṃ gacchati, bhayāgatiṃ gacchati. Catūhaṅgehi samannāgate bhikkhunā saddhiṃ vinayo na sākacchitabbo – chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati. Atthāpatti gilāno āpajjati, no agilāno; atthāpatti agilāno āpajjati, no gilāno; atthāpatti gilāno ceva āpajjati agilāno ca; atthāpatti neva gilāno āpajjati no agilāno. Cattāri adhammikāni pātimokkhaṭṭhapanāni. Cattāri dhammikāni pātimokkhaṭṭhapanāni.
จตุกฺกํ นิฎฺฐิตํฯ
Catukkaṃ niṭṭhitaṃ.
ตสฺสุทฺทานํ –
Tassuddānaṃ –
สกวาจาย กาเยน, ปสุโตฺต จ อจิตฺตโก;
Sakavācāya kāyena, pasutto ca acittako;
อาปชฺชโนฺต จ กเมฺมน, โวหารา จตุโร ตถาฯ
Āpajjanto ca kammena, vohārā caturo tathā.
ภิกฺขูนํ ภิกฺขุนีนญฺจ, ปริกฺขาโร จ สมฺมุขา;
Bhikkhūnaṃ bhikkhunīnañca, parikkhāro ca sammukhā;
อชานกาเย มเชฺฌ จ, วุฎฺฐาติ ทุวิธา ตถาฯ
Ajānakāye majjhe ca, vuṭṭhāti duvidhā tathā.
ปฎิลาเภน โจทนา, ปริวาสา จ วุจฺจติ;
Paṭilābhena codanā, parivāsā ca vuccati;
มานตฺตจาริกา จาปิ, สามุกฺกํสา ปฎิคฺคหิฯ
Mānattacārikā cāpi, sāmukkaṃsā paṭiggahi.
มหาวิกฎกมฺมานิ, ปุน กเมฺม วิปตฺติโย;
Mahāvikaṭakammāni, puna kamme vipattiyo;
อธิกรณา ทุสฺสีลา จ, โสภนาคนฺตุเกน จฯ
Adhikaraṇā dussīlā ca, sobhanāgantukena ca.
คมิโก วตฺถุนานตฺตา, สภาคุปชฺฌาเยน จ;
Gamiko vatthunānattā, sabhāgupajjhāyena ca;
อาจริโย ปจฺจยา วา, ทุจฺจริตํ สุจริตํฯ
Ācariyo paccayā vā, duccaritaṃ sucaritaṃ.
อาทิยโนฺต ปุคฺคโล จ, อรโห อาสเนน จ;
Ādiyanto puggalo ca, araho āsanena ca;
กาเล จ กปฺปติ เจว, ปจฺจนฺติเมสุ กปฺปติฯ
Kāle ca kappati ceva, paccantimesu kappati.
อโนฺต อโนฺต จ สีมาย, คาเม จ โจทนาย จ;
Anto anto ca sīmāya, gāme ca codanāya ca;
ปุพฺพกิจฺจํ ปตฺตกลฺลํ, อนญฺญา สมฺมุติโย จฯ
Pubbakiccaṃ pattakallaṃ, anaññā sammutiyo ca.
อคติ นาคติ เจว, อลชฺชี เปสเลน จ;
Agati nāgati ceva, alajjī pesalena ca;
ปุจฺฉิตพฺพา ทุเว เจว, วิสฺสเชฺชยฺยา ตถา ทุเว;
Pucchitabbā duve ceva, vissajjeyyā tathā duve;
อนุโยโค จ สากจฺฉา, คิลาโน ฐปเนน จาติฯ
Anuyogo ca sākacchā, gilāno ṭhapanena cāti.
Footnotes:
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / จตุกฺกวารวณฺณนา • Catukkavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / จตุกฺกวารวณฺณนา • Catukkavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / จตุกฺกวารวณฺณนา • Catukkavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / จตุกฺกวารวณฺณนา • Catukkavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / เอกุตฺตริกนโย จตุกฺกวารวณฺณนา • Ekuttarikanayo catukkavāravaṇṇanā
