| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೧೮೫. ಚತುಮಹಾಪದೇಸಕಥಾ
185. Catumahāpadesakathā
೩೦೫. ಇದಂ ನ ಕಪ್ಪತೀತಿಆದೀತಿ ‘‘ಇದಂ ನ ಕಪ್ಪತೀ’’ತಿಆದಯೋ ಇಮೇ ಚತ್ತಾರೋ ಮಹಾಪದೇಸೇತಿ ಯೋಜನಾ। ಅಪಸ್ಸಯಂ ಕತ್ವಾ ದಿಸಿಯನ್ತಿ ಏತ್ಥಾತಿ ಅಪದೇಸಾ ಓಕಾಸಾ, ಅಪಸ್ಸಯಂ ಕತ್ವಾ ದಿಸಿಯನ್ತಿ ಏತೇಹೀತಿ ವಾ ಅಪದೇಸಾ ಕಾರಣಾ, ‘‘ಮಹನ್ತಾ ಅಪದೇಸಾ ಮಹಾಪದೇಸಾ। ತಞ್ಚಾತಿ ಮಹಾಪದೇಸಸಙ್ಖಾತಂ ತಞ್ಚ ಸುತ್ತಂ, ಗಹೇತ್ವಾತಿ ಯೋಜನಾ। ಪರಿಮದ್ದನ್ತಾತಿ ಪುನಪ್ಪುನಂ ಮದ್ದನ್ತಾ, ಉಪಪರಿಕ್ಖನ್ತಾತಿ ಅತ್ಥೋ। ಇದನ್ತಿ ಕಾರಣಂ। ತನ್ತಿ ನವಮಹಾಫಲಅಪರಣ್ಣಂ। ತಾನೀತಿ ಖುದ್ದಕಫಲಪಾನಾನಿ। ಹೀತಿ ಸಚ್ಚಂ।
305.Idaṃ na kappatītiādīti ‘‘idaṃ na kappatī’’tiādayo ime cattāro mahāpadeseti yojanā. Apassayaṃ katvā disiyanti etthāti apadesā okāsā, apassayaṃ katvā disiyanti etehīti vā apadesā kāraṇā, ‘‘mahantā apadesā mahāpadesā. Tañcāti mahāpadesasaṅkhātaṃ tañca suttaṃ, gahetvāti yojanā. Parimaddantāti punappunaṃ maddantā, upaparikkhantāti attho. Idanti kāraṇaṃ. Tanti navamahāphalaaparaṇṇaṃ. Tānīti khuddakaphalapānāni. Hīti saccaṃ.
ತೇಸನ್ತಿ ಛನ್ನಂ ಚೀವರಾನಂ। ತತ್ಥಾತಿ ಛಸು ಅನುಲೋಮಚೀವರೇಸು। ‘‘ಪಾಣಕೇಹಿ ಸಞ್ಜಾತವತ್ಥ’’ನ್ತಿ ಇಮಿನಾ ಕೋಸೇಯ್ಯವತ್ಥಭಾವಂ ದಸ್ಸೇತಿ। ದ್ವೇ ಪಟಾತಿ ಚೀನಪಟಸೋಮಾರಪಟಾ। ದುಕೂಲಂ ಸಾಣಸ್ಸ ಅನುಲೋಮನ್ತಿ ಯೋಜನಾ।
Tesanti channaṃ cīvarānaṃ. Tatthāti chasu anulomacīvaresu. ‘‘Pāṇakehi sañjātavattha’’nti iminā koseyyavatthabhāvaṃ dasseti. Dve paṭāti cīnapaṭasomārapaṭā. Dukūlaṃ sāṇassa anulomanti yojanā.
ತೇಸಂಯೇವಾತಿ ದ್ವಿನ್ನಂ ಪತ್ತಾನಮೇವ। ತೇಸಂಯೇವಾತಿ ತಿಣ್ಣಂ ತುಮ್ಬಾನಮೇವ। ತೇಸಂಯೇವಾತಿ ದ್ವಿನ್ನಂ ಕಾಯಬನ್ಧನಾನಮೇವ। ಸೇತಚ್ಛತ್ತನ್ತಿ ಸೇತೇಹಿ ವತ್ಥೇಹಿ ಕತಂ ಛತ್ತಂ। ತೇಸಂಯೇವಾತಿ ತಿಣ್ಣಂ ಛತ್ತಾನಮೇವ।
Tesaṃyevāti dvinnaṃ pattānameva. Tesaṃyevāti tiṇṇaṃ tumbānameva. Tesaṃyevāti dvinnaṃ kāyabandhanānameva. Setacchattanti setehi vatthehi kataṃ chattaṃ. Tesaṃyevāti tiṇṇaṃ chattānameva.
ಸಮ್ಭಿನ್ನರಸನ್ತಿ ಸಂಸಗ್ಗರಸಂ। ಏತ್ಥ ಭಿಜ್ಜಿತ್ಥಾತಿ ಭಿನ್ನೋತಿ ವಚನತ್ಥೇನ ಭಿದಿಧಾತು ದ್ವಿಧಾಕರಣಸಙ್ಖಾತೋ ಭೇದತ್ಥೋ ಹೋತಿ, ಧಾತ್ವತ್ಥಬಾಧಕೇನ ಸಂತ್ಯೂಪಸಗ್ಗೇನ ಭಿದಿಧಾತುಯಾ ಭೇದತ್ಥಂ ಬಾಧೇತ್ವಾ ಸಂಸಗ್ಗತ್ಥವಾಚಕೋ ಹೋತೀತಿ ದಟ್ಠಬ್ಬಂ। ಛಲ್ಲಿಮ್ಪೀತಿ ತಚಮ್ಪಿ। ಸಕಲೇನೇವಾತಿ ಛಲ್ಲಿಯಾ ಏವ। ಪಾಯಾಸೇನ ಅಸಂಸಟ್ಠಂ ಯಂ ಸಬ್ಬೀತಿ ಯೋಜನಾ। ತಾನೀತಿ ತಕ್ಕೋಲಜಾತಿಫಲಾದೀನಿ। ಯಟ್ಠಿಮಧುಕಾದೀಸುಪೀತಿ ಮಧುಲಟ್ಠಿಕಾದೀಸುಪಿ। ‘‘ಲಟ್ಠಿಮಧುಕಾದೀಸುಪೀ’’ತಿ ವಾ ಪಾಠೋ, ಸೋ ಅಪಾಠೋಯೇವ। ಯಂ ಯನ್ತಿ ವತ್ಥು। ಯಥಾತಿ ಯೇನಾಕಾರೇನ, ಧೋವಿಯಮಾನೇ ತಚ್ಛಿಯಮಾನೇತಿ ಸಮ್ಬನ್ಧೋ।
Sambhinnarasanti saṃsaggarasaṃ. Ettha bhijjitthāti bhinnoti vacanatthena bhididhātu dvidhākaraṇasaṅkhāto bhedattho hoti, dhātvatthabādhakena saṃtyūpasaggena bhididhātuyā bhedatthaṃ bādhetvā saṃsaggatthavācako hotīti daṭṭhabbaṃ. Challimpīti tacampi. Sakalenevāti challiyā eva. Pāyāsena asaṃsaṭṭhaṃ yaṃ sabbīti yojanā. Tānīti takkolajātiphalādīni. Yaṭṭhimadhukādīsupīti madhulaṭṭhikādīsupi. ‘‘Laṭṭhimadhukādīsupī’’ti vā pāṭho, so apāṭhoyeva. Yaṃ yanti vatthu. Yathāti yenākārena, dhoviyamāne tacchiyamāneti sambandho.
ಸಮ್ಭಿನ್ನರಸನ್ತಿ ವತ್ವಾ ತಮೇವತ್ಥಂ ದಸ್ಸೇತುಂ ವುತ್ತಂ ‘‘ಸಂಸಟ್ಠ’’ನ್ತಿ। ಸಭಾವನ್ತಿ ಯಾವಕಾಲಂ ಕಪ್ಪಿಯಸಭಾವಂ । ತಸ್ಮಾತಿ ಯಸ್ಮಾ ಉಪನೇತಿ, ತಸ್ಮಾ। ತೇನಾತಿ ಸತ್ತಾಹಕಾಲಿಕೇನ। ತದಹುಪಟಿಗ್ಗಹಿತನ್ತಿ ತದಹೇವ ಪಟಿಗ್ಗಹಿತಂ। ದ್ವೀಹಪಟಿಗ್ಗಹಿತೇನ ಸತ್ತಾಹಕಾಲಿಕೇನಾತಿ ಸಮ್ಬನ್ಧೋ।
Sambhinnarasanti vatvā tamevatthaṃ dassetuṃ vuttaṃ ‘‘saṃsaṭṭha’’nti. Sabhāvanti yāvakālaṃ kappiyasabhāvaṃ . Tasmāti yasmā upaneti, tasmā. Tenāti sattāhakālikena. Tadahupaṭiggahitanti tadaheva paṭiggahitaṃ. Dvīhapaṭiggahitena sattāhakālikenāti sambandho.
ಏತ್ಥಾತಿ ಕಾಲಿಕಸಂಸಗ್ಗೇ। ಆಪತ್ತಿಯೋ ವೇದಿತಬ್ಬಾತಿ ಯಥಾಕ್ಕಮಂ ಆಪತ್ತಿಯೋ ವೇದಿತಬ್ಬಾ। ಸಬ್ಬತ್ಥಾತಿ ಸಬ್ಬಸ್ಮಿಂ ಭೇಸಜ್ಜಕ್ಖನ್ಧಕೇ।
Etthāti kālikasaṃsagge. Āpattiyo veditabbāti yathākkamaṃ āpattiyo veditabbā. Sabbatthāti sabbasmiṃ bhesajjakkhandhake.
ಇತಿ ಭೇಸಜ್ಜಕ್ಖನ್ಧಕವಣ್ಣನಾಯ ಯೋಜನಾ ಸಮತ್ತಾ।
Iti bhesajjakkhandhakavaṇṇanāya yojanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೧೮೫. ಚತುಮಹಾಪದೇಸಕಥಾ • 185. Catumahāpadesakathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಚತುಮಹಾಪದೇಸಕಥಾ • Catumahāpadesakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಚತುಮಹಾಪದೇಸಕಥಾವಣ್ಣನಾ • Catumahāpadesakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಕೇಣಿಯಜಟಿಲವತ್ಥುಕಥಾವಣ್ಣನಾ • Keṇiyajaṭilavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಚತುಮಹಾಪದೇಸಕಥಾವಣ್ಣನಾ • Catumahāpadesakathāvaṇṇanā
