| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
185. චතුමහාපදෙසකථා
185. Catumahāpadesakathā
305. ඉදං න කප්‌පතීතිආදීති ‘‘ඉදං න කප්‌පතී’’තිආදයො ඉමෙ චත්‌තාරො මහාපදෙසෙති යොජනා. අපස්‌සයං කත්‌වා දිසියන්‌ති එත්‌ථාති අපදෙසා ඔකාසා, අපස්‌සයං කත්‌වා දිසියන්‌ති එතෙහීති වා අපදෙසා කාරණා, ‘‘මහන්‌තා අපදෙසා මහාපදෙසා. තඤ්‌චාති මහාපදෙසසඞ්‌ඛාතං තඤ්‌ච සුත්‌තං, ගහෙත්‌වාති යොජනා. පරිමද්‌දන්‌තාති පුනප්‌පුනං මද්‌දන්‌තා, උපපරික්‌ඛන්‌තාති අත්‌ථො. ඉදන්‌ති කාරණං. තන්‌ති නවමහාඵලඅපරණ්‌ණං. තානීති ඛුද්‌දකඵලපානානි. හීති සච්‌චං.
305.Idaṃ na kappatītiādīti ‘‘idaṃ na kappatī’’tiādayo ime cattāro mahāpadeseti yojanā. Apassayaṃ katvā disiyanti etthāti apadesā okāsā, apassayaṃ katvā disiyanti etehīti vā apadesā kāraṇā, ‘‘mahantā apadesā mahāpadesā. Tañcāti mahāpadesasaṅkhātaṃ tañca suttaṃ, gahetvāti yojanā. Parimaddantāti punappunaṃ maddantā, upaparikkhantāti attho. Idanti kāraṇaṃ. Tanti navamahāphalaaparaṇṇaṃ. Tānīti khuddakaphalapānāni. Hīti saccaṃ.
තෙසන්‌ති ඡන්‌නං චීවරානං. තත්‌ථාති ඡසු අනුලොමචීවරෙසු. ‘‘පාණකෙහි සඤ්‌ජාතවත්‌ථ’’න්‌ති ඉමිනා කොසෙය්‍යවත්‌ථභාවං දස්‌සෙති. ද්‌වෙ පටාති චීනපටසොමාරපටා. දුකූලං සාණස්‌ස අනුලොමන්‌ති යොජනා.
Tesanti channaṃ cīvarānaṃ. Tatthāti chasu anulomacīvaresu. ‘‘Pāṇakehi sañjātavattha’’nti iminā koseyyavatthabhāvaṃ dasseti. Dve paṭāti cīnapaṭasomārapaṭā. Dukūlaṃ sāṇassa anulomanti yojanā.
තෙසංයෙවාති ද්‌වින්‌නං පත්‌තානමෙව. තෙසංයෙවාති තිණ්‌ණං තුම්‌බානමෙව. තෙසංයෙවාති ද්‌වින්‌නං කායබන්‌ධනානමෙව. සෙතච්‌ඡත්‌තන්‌ති සෙතෙහි වත්‌ථෙහි කතං ඡත්‌තං. තෙසංයෙවාති තිණ්‌ණං ඡත්‌තානමෙව.
Tesaṃyevāti dvinnaṃ pattānameva. Tesaṃyevāti tiṇṇaṃ tumbānameva. Tesaṃyevāti dvinnaṃ kāyabandhanānameva. Setacchattanti setehi vatthehi kataṃ chattaṃ. Tesaṃyevāti tiṇṇaṃ chattānameva.
සම්‌භින්‌නරසන්‌ති සංසග්‌ගරසං. එත්‌ථ භිජ්‌ජිත්‌ථාති භින්‌නොති වචනත්‌ථෙන භිදිධාතු ද්‌විධාකරණසඞ්‌ඛාතො භෙදත්‌ථො හොති, ධාත්‌වත්‌ථබාධකෙන සංත්‍යූපසග්‌ගෙන භිදිධාතුයා භෙදත්‌ථං බාධෙත්‌වා සංසග්‌ගත්‌ථවාචකො හොතීති දට්‌ඨබ්‌බං. ඡල්‌ලිම්‌පීති තචම්‌පි. සකලෙනෙවාති ඡල්‌ලියා එව. පායාසෙන අසංසට්‌ඨං යං සබ්‌බීති යොජනා. තානීති තක්‌කොලජාතිඵලාදීනි. යට්‌ඨිමධුකාදීසුපීති මධුලට්‌ඨිකාදීසුපි. ‘‘ලට්‌ඨිමධුකාදීසුපී’’ති වා පාඨො, සො අපාඨොයෙව. යං යන්‌ති වත්‌ථු. යථාති යෙනාකාරෙන, ධොවියමානෙ තච්‌ඡියමානෙති සම්‌බන්‌ධො.
Sambhinnarasanti saṃsaggarasaṃ. Ettha bhijjitthāti bhinnoti vacanatthena bhididhātu dvidhākaraṇasaṅkhāto bhedattho hoti, dhātvatthabādhakena saṃtyūpasaggena bhididhātuyā bhedatthaṃ bādhetvā saṃsaggatthavācako hotīti daṭṭhabbaṃ. Challimpīti tacampi. Sakalenevāti challiyā eva. Pāyāsena asaṃsaṭṭhaṃ yaṃ sabbīti yojanā. Tānīti takkolajātiphalādīni. Yaṭṭhimadhukādīsupīti madhulaṭṭhikādīsupi. ‘‘Laṭṭhimadhukādīsupī’’ti vā pāṭho, so apāṭhoyeva. Yaṃ yanti vatthu. Yathāti yenākārena, dhoviyamāne tacchiyamāneti sambandho.
සම්‌භින්‌නරසන්‌ති වත්‌වා තමෙවත්‌ථං දස්‌සෙතුං වුත්‌තං ‘‘සංසට්‌ඨ’’න්‌ති. සභාවන්‌ති යාවකාලං කප්‌පියසභාවං . තස්‌මාති යස්‌මා උපනෙති, තස්‌මා. තෙනාති සත්‌තාහකාලිකෙන. තදහුපටිග්‌ගහිතන්‌ති තදහෙව පටිග්‌ගහිතං. ද්‌වීහපටිග්‌ගහිතෙන සත්‌තාහකාලිකෙනාති සම්‌බන්‌ධො.
Sambhinnarasanti vatvā tamevatthaṃ dassetuṃ vuttaṃ ‘‘saṃsaṭṭha’’nti. Sabhāvanti yāvakālaṃ kappiyasabhāvaṃ . Tasmāti yasmā upaneti, tasmā. Tenāti sattāhakālikena. Tadahupaṭiggahitanti tadaheva paṭiggahitaṃ. Dvīhapaṭiggahitena sattāhakālikenāti sambandho.
එත්‌ථාති කාලිකසංසග්‌ගෙ. ආපත්‌තියො වෙදිතබ්‌බාති යථාක්‌කමං ආපත්‌තියො වෙදිතබ්‌බා. සබ්‌බත්‌ථාති සබ්‌බස්‌මිං භෙසජ්‌ජක්‌ඛන්‌ධකෙ.
Etthāti kālikasaṃsagge. Āpattiyo veditabbāti yathākkamaṃ āpattiyo veditabbā. Sabbatthāti sabbasmiṃ bhesajjakkhandhake.
ඉති භෙසජ්‌ජක්‌ඛන්‌ධකවණ්‌ණනාය යොජනා සමත්‌තා.
Iti bhesajjakkhandhakavaṇṇanāya yojanā samattā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 185. චතුමහාපදෙසකථා • 185. Catumahāpadesakathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / චතුමහාපදෙසකථා • Catumahāpadesakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / චතුමහාපදෙසකථාවණ්‌ණනා • Catumahāpadesakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / කෙණියජටිලවත්‌ථුකථාවණ්‌ණනා • Keṇiyajaṭilavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / චතුමහාපදෙසකථාවණ්‌ණනා • Catumahāpadesakathāvaṇṇanā
