| Library / Tipiṭaka / ਤਿਪਿਟਕ • Tipiṭaka / ਮਹਾવਗ੍ਗਪਾਲ਼ਿ • Mahāvaggapāḷi |
੧੮੫. ਚਤੁਮਹਾਪਦੇਸਕਥਾ
185. Catumahāpadesakathā
੩੦੫. ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਕਿਸ੍ਮਿਞ੍ਚਿ ਕਿਸ੍ਮਿਞ੍ਚਿ ਠਾਨੇ ਕੁਕ੍ਕੁਚ੍ਚਂ ਉਪ੍ਪਜ੍ਜਤਿ – ‘‘ਕਿਂ ਨੁ ਖੋ ਭਗવਤਾ ਅਨੁਞ੍ਞਾਤਂ, ਕਿਂ ਅਨਨੁਞ੍ਞਾਤ’’ਨ੍ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਯਂ, ਭਿਕ੍ਖવੇ, ਮਯਾ ‘ਇਦਂ ਨ ਕਪ੍ਪਤੀ’ਤਿ ਅਪ੍ਪਟਿਕ੍ਖਿਤ੍ਤਂ ਤਞ੍ਚੇ ਅਕਪ੍ਪਿਯਂ ਅਨੁਲੋਮੇਤਿ, ਕਪ੍ਪਿਯਂ ਪਟਿਬਾਹਤਿ, ਤਂ વੋ ਨ ਕਪ੍ਪਤਿ। ਯਂ, ਭਿਕ੍ਖવੇ, ਮਯਾ ‘ਇਦਂ ਨ ਕਪ੍ਪਤੀ’ਤਿ ਅਪ੍ਪਟਿਕ੍ਖਿਤ੍ਤਂ ਤਞ੍ਚੇ ਕਪ੍ਪਿਯਂ ਅਨੁਲੋਮੇਤਿ, ਅਕਪ੍ਪਿਯਂ ਪਟਿਬਾਹਤਿ, ਤਂ વੋ ਕਪ੍ਪਤਿ। ਯਂ, ਭਿਕ੍ਖવੇ, ਮਯਾ ‘ਇਦਂ ਕਪ੍ਪਤੀ’ਤਿ ਅਨਨੁਞ੍ਞਾਤਂ ਤਞ੍ਚੇ ਅਕਪ੍ਪਿਯਂ ਅਨੁਲੋਮੇਤਿ, ਕਪ੍ਪਿਯਂ ਪਟਿਬਾਹਤਿ, ਤਂ વੋ ਨ ਕਪ੍ਪਤਿ। ਯਂ, ਭਿਕ੍ਖવੇ, ਮਯਾ ‘ਇਦਂ ਕਪ੍ਪਤੀ’ਤਿ ਅਨਨੁਞ੍ਞਾਤਂ, ਤਞ੍ਚੇ ਕਪ੍ਪਿਯਂ ਅਨੁਲੋਮੇਤਿ, ਅਕਪ੍ਪਿਯਂ ਪਟਿਬਾਹਤਿ, ਤਂ વੋ ਕਪ੍ਪਤੀ’’ਤਿ।
305. Tena kho pana samayena bhikkhūnaṃ kismiñci kismiñci ṭhāne kukkuccaṃ uppajjati – ‘‘kiṃ nu kho bhagavatā anuññātaṃ, kiṃ ananuññāta’’nti? Bhagavato etamatthaṃ ārocesuṃ. ‘‘Yaṃ, bhikkhave, mayā ‘idaṃ na kappatī’ti appaṭikkhittaṃ tañce akappiyaṃ anulometi, kappiyaṃ paṭibāhati, taṃ vo na kappati. Yaṃ, bhikkhave, mayā ‘idaṃ na kappatī’ti appaṭikkhittaṃ tañce kappiyaṃ anulometi, akappiyaṃ paṭibāhati, taṃ vo kappati. Yaṃ, bhikkhave, mayā ‘idaṃ kappatī’ti ananuññātaṃ tañce akappiyaṃ anulometi, kappiyaṃ paṭibāhati, taṃ vo na kappati. Yaṃ, bhikkhave, mayā ‘idaṃ kappatī’ti ananuññātaṃ, tañce kappiyaṃ anulometi, akappiyaṃ paṭibāhati, taṃ vo kappatī’’ti.
ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਪ੍ਪਤਿ ਨੁ ਖੋ ਯਾવਕਾਲਿਕੇਨ ਯਾਮਕਾਲਿਕਂ, ਨ ਨੁ ਖੋ ਕਪ੍ਪਤਿ? ਕਪ੍ਪਤਿ ਨੁ ਖੋ ਯਾવਕਾਲਿਕੇਨ ਸਤ੍ਤਾਹਕਾਲਿਕਂ, ਨ ਨੁ ਖੋ ਕਪ੍ਪਤਿ? ਕਪ੍ਪਤਿ ਨੁ ਖੋ ਯਾવਕਾਲਿਕੇਨ ਯਾવਜੀવਿਕਂ, ਨ ਨੁ ਖੋ ਕਪ੍ਪਤਿ? ਕਪ੍ਪਤਿ ਨੁ ਖੋ ਯਾਮਕਾਲਿਕੇਨ ਸਤ੍ਤਾਹਕਾਲਿਕਂ, ਨ ਨੁ ਖੋ ਕਪ੍ਪਤਿ? ਕਪ੍ਪਤਿ ਨੁ ਖੋ ਯਾਮਕਾਲਿਕੇਨ ਯਾવਜੀવਿਕਂ, ਨ ਨੁ ਖੋ ਕਪ੍ਪਤਿ? ਕਪ੍ਪਤਿ ਨੁ ਖੋ ਸਤ੍ਤਾਹਕਾਲਿਕੇਨ ਯਾવਜੀવਿਕਂ, ਨ ਨੁ ਖੋ ਕਪ੍ਪਤੀ’’ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਯਾવਕਾਲਿਕੇਨ, ਭਿਕ੍ਖવੇ, ਯਾਮਕਾਲਿਕਂ, ਤਦਹੁ ਪਟਿਗ੍ਗਹਿਤਂ ਕਾਲੇ ਕਪ੍ਪਤਿ, વਿਕਾਲੇ ਨ ਕਪ੍ਪਤਿ। ਯਾવਕਾਲਿਕੇਨ, ਭਿਕ੍ਖવੇ, ਸਤ੍ਤਾਹਕਾਲਿਕਂ, ਤਦਹੁ ਪਟਿਗ੍ਗਹਿਤਂ ਕਾਲੇ ਕਪ੍ਪਤਿ, વਿਕਾਲੇ ਨ ਕਪ੍ਪਤਿ। ਯਾવਕਾਲਿਕੇਨ, ਭਿਕ੍ਖવੇ, ਯਾવਜੀવਿਕਂ, ਤਦਹੁ ਪਟਿਗ੍ਗਹਿਤਂ ਕਾਲੇ ਕਪ੍ਪਤਿ, વਿਕਾਲੇ ਨ ਕਪ੍ਪਤਿ। ਯਾਮਕਾਲਿਕੇਨ, ਭਿਕ੍ਖવੇ, ਸਤ੍ਤਾਹਕਾਲਿਕਂ, ਤਦਹੁ ਪਟਿਗ੍ਗਹਿਤਂ ਯਾਮੇ ਕਪ੍ਪਤਿ, ਯਾਮਾਤਿਕ੍ਕਨ੍ਤੇ ਨ ਕਪ੍ਪਤਿ। ਯਾਮਕਾਲਿਕੇਨ, ਭਿਕ੍ਖવੇ, ਯਾવਜੀવਿਕਂ, ਤਦਹੁ ਪਟਿਗ੍ਗਹਿਤਂ ਯਾਮੇ ਕਪ੍ਪਤਿ, ਯਾਮਾਤਿਕ੍ਕਨ੍ਤੇ ਨ ਕਪ੍ਪਤਿ। ਸਤ੍ਤਾਹਕਾਲਿਕੇਨ, ਭਿਕ੍ਖવੇ, ਯਾવਜੀવਿਕਂ ਪਟਿਗ੍ਗਹਿਤਂ, ਸਤ੍ਤਾਹਂ ਕਪ੍ਪਤਿ, ਸਤ੍ਤਾਹਾਤਿਕ੍ਕਨ੍ਤੇ ਨ ਕਪ੍ਪਤੀ’’ਤਿ।
Atha kho bhikkhūnaṃ etadahosi – ‘‘kappati nu kho yāvakālikena yāmakālikaṃ, na nu kho kappati? Kappati nu kho yāvakālikena sattāhakālikaṃ, na nu kho kappati? Kappati nu kho yāvakālikena yāvajīvikaṃ, na nu kho kappati? Kappati nu kho yāmakālikena sattāhakālikaṃ, na nu kho kappati? Kappati nu kho yāmakālikena yāvajīvikaṃ, na nu kho kappati? Kappati nu kho sattāhakālikena yāvajīvikaṃ, na nu kho kappatī’’ti? Bhagavato etamatthaṃ ārocesuṃ. ‘‘Yāvakālikena, bhikkhave, yāmakālikaṃ, tadahu paṭiggahitaṃ kāle kappati, vikāle na kappati. Yāvakālikena, bhikkhave, sattāhakālikaṃ, tadahu paṭiggahitaṃ kāle kappati, vikāle na kappati. Yāvakālikena, bhikkhave, yāvajīvikaṃ, tadahu paṭiggahitaṃ kāle kappati, vikāle na kappati. Yāmakālikena, bhikkhave, sattāhakālikaṃ, tadahu paṭiggahitaṃ yāme kappati, yāmātikkante na kappati. Yāmakālikena, bhikkhave, yāvajīvikaṃ, tadahu paṭiggahitaṃ yāme kappati, yāmātikkante na kappati. Sattāhakālikena, bhikkhave, yāvajīvikaṃ paṭiggahitaṃ, sattāhaṃ kappati, sattāhātikkante na kappatī’’ti.
ਚਤੁਮਹਾਪਦੇਸਕਥਾ ਨਿਟ੍ਠਿਤਾ।
Catumahāpadesakathā niṭṭhitā.
ਭੇਸਜ੍ਜਕ੍ਖਨ੍ਧਕੋ ਛਟ੍ਠੋ।
Bhesajjakkhandhako chaṭṭho.
Related texts:
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਗ੍ਗ-ਅਟ੍ਠਕਥਾ • Mahāvagga-aṭṭhakathā / ਚਤੁਮਹਾਪਦੇਸਕਥਾ • Catumahāpadesakathā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਚਤੁਮਹਾਪਦੇਸਕਥਾવਣ੍ਣਨਾ • Catumahāpadesakathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਕੇਣਿਯਜਟਿਲવਤ੍ਥੁਕਥਾવਣ੍ਣਨਾ • Keṇiyajaṭilavatthukathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਚਤੁਮਹਾਪਦੇਸਕਥਾવਣ੍ਣਨਾ • Catumahāpadesakathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ੧੮੫. ਚਤੁਮਹਾਪਦੇਸਕਥਾ • 185. Catumahāpadesakathā
