| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
சதுமஹாபதே³ஸகதா²வண்ணனா
Catumahāpadesakathāvaṇṇanā
305. பரிமத்³த³ந்தாதி உபபரிக்க²ந்தா. பத்துண்ணதே³ஸே ஸஞ்ஜாதவத்த²ங் பத்துண்ணங். கோஸெய்யவிஸேஸோதி ஹி அபி⁴தா⁴னகோஸே வுத்தங். சீனதே³ஸே ஸோமாரதே³ஸே ச ஸஞ்ஜாதவத்தா²னி சீனஸோமாரபடானி. பத்துண்ணாதீ³னி தீணி கோஸெய்யஸ்ஸ அனுலோமானி பாணகேஹி கதஸுத்தமயத்தா. இத்³தி⁴மயிகங் ஏஹிபி⁴க்கூ²னங் புஞ்ஞித்³தி⁴யா நிப்³ப³த்தசீவரங். தங் கோ²மாதீ³னங் அஞ்ஞதரங் ஹோதீதி தேஸங்யேவ அனுலோமங். தே³வதாஹி தி³ன்னசீவரங் தே³வத³த்தியங். தங் கப்பருக்கே² நிப்³ப³த்தங் ஜாலினீதே³வகஞ்ஞாய அனுருத்³த⁴த்தே²ரஸ்ஸ தி³ன்னவத்த²ஸதி³ஸங். தம்பி கோ²மாதீ³னஞ்ஞேவ அனுலோமங் ஹோதி தேஸு அஞ்ஞதரபா⁴வதோ. த்³வே படா தே³ஸனாமேனேவ வுத்தாதி தேஸங் ஸரூபத³ஸ்ஸனபரமேதங், நாஞ்ஞங் நிவத்தனபரங் பத்துண்ணபடஸ்ஸபி தே³ஸனாமேனேவ வுத்தத்தா. தும்பா³தி பா⁴ஜனானி . ப²லதும்போ³தி லாபு³ஆதி³. உத³கதும்போ³தி உத³குக்கி²பனககுடகோ. கிலஞ்ஜச்ச²த்தந்தி வேளுவிலீவேஹி வாயித்வா கதச²த்தங். ஸம்பி⁴ன்னரஸந்தி ஸம்மிஸ்ஸிதரஸங். பானகங் படிக்³க³ஹிதங் ஹோதீதி அம்ப³பானாதி³பானகங் படிக்³க³ஹிதங் ஹோதி, தங் விகாலேபி கப்பதி அஸம்பி⁴ன்னரஸத்தா. தேன தத³ஹுபடிக்³க³ஹிதேன ஸத்³தி⁴ந்தி தேன ஸத்தாஹகாலிகேன தத³ஹுபடிக்³க³ஹிதேன ஸத்³தி⁴ங். ஸேஸமெத்த² ஸுவிஞ்ஞெய்யமேவ.
305.Parimaddantāti upaparikkhantā. Pattuṇṇadese sañjātavatthaṃ pattuṇṇaṃ. Koseyyavisesoti hi abhidhānakose vuttaṃ. Cīnadese somāradese ca sañjātavatthāni cīnasomārapaṭāni. Pattuṇṇādīni tīṇi koseyyassa anulomāni pāṇakehi katasuttamayattā. Iddhimayikaṃ ehibhikkhūnaṃ puññiddhiyā nibbattacīvaraṃ. Taṃ khomādīnaṃ aññataraṃ hotīti tesaṃyeva anulomaṃ. Devatāhi dinnacīvaraṃ devadattiyaṃ. Taṃ kapparukkhe nibbattaṃ jālinīdevakaññāya anuruddhattherassa dinnavatthasadisaṃ. Tampi khomādīnaññeva anulomaṃ hoti tesu aññatarabhāvato. Dve paṭā desanāmeneva vuttāti tesaṃ sarūpadassanaparametaṃ, nāññaṃ nivattanaparaṃ pattuṇṇapaṭassapi desanāmeneva vuttattā. Tumbāti bhājanāni . Phalatumboti lābuādi. Udakatumboti udakukkhipanakakuṭako. Kilañjacchattanti veḷuvilīvehi vāyitvā katachattaṃ. Sambhinnarasanti sammissitarasaṃ. Pānakaṃ paṭiggahitaṃ hotīti ambapānādipānakaṃ paṭiggahitaṃ hoti, taṃ vikālepi kappati asambhinnarasattā. Tena tadahupaṭiggahitena saddhinti tena sattāhakālikena tadahupaṭiggahitena saddhiṃ. Sesamettha suviññeyyameva.
சதுமஹாபதே³ஸகதா²வண்ணனா நிட்டி²தா.
Catumahāpadesakathāvaṇṇanā niṭṭhitā.
பே⁴ஸஜ்ஜக்க²ந்த⁴கவண்ணனா நிட்டி²தா.
Bhesajjakkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 185. சதுமஹாபதே³ஸகதா² • 185. Catumahāpadesakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / சதுமஹாபதே³ஸகதா² • Catumahāpadesakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கேணியஜடிலவத்து²கதா²வண்ணனா • Keṇiyajaṭilavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சதுமஹாபதே³ஸகதா²வண்ணனா • Catumahāpadesakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 185. சதுமஹாபதே³ஸகதா² • 185. Catumahāpadesakathā
