| Library / Tipiṭaka / ติปิฎก • Tipiṭaka / สารตฺถทีปนี-ฎีกา • Sāratthadīpanī-ṭīkā |
จตุมหาปเทสกถาวณฺณนา
Catumahāpadesakathāvaṇṇanā
๓๐๕. ปริมทฺทนฺตาติ อุปปริกฺขนฺตาฯ ปตฺตุณฺณเทเส สญฺชาตวตฺถํ ปตฺตุณฺณํฯ โกเสยฺยวิเสโสติ หิ อภิธานโกเส วุตฺตํฯ จีนเทเส โสมารเทเส จ สญฺชาตวตฺถานิ จีนโสมารปฎานิฯ ปตฺตุณฺณาทีนิ ตีณิ โกเสยฺยสฺส อนุโลมานิ ปาณเกหิ กตสุตฺตมยตฺตาฯ อิทฺธิมยิกํ เอหิภิกฺขูนํ ปุญฺญิทฺธิยา นิพฺพตฺตจีวรํฯ ตํ โขมาทีนํ อญฺญตรํ โหตีติ เตสํเยว อนุโลมํฯ เทวตาหิ ทินฺนจีวรํ เทวทตฺติยํฯ ตํ กปฺปรุเกฺข นิพฺพตฺตํ ชาลินีเทวกญฺญาย อนุรุทฺธเตฺถรสฺส ทินฺนวตฺถสทิสํฯ ตมฺปิ โขมาทีนเญฺญว อนุโลมํ โหติ เตสุ อญฺญตรภาวโตฯ เทฺว ปฎา เทสนาเมเนว วุตฺตาติ เตสํ สรูปทสฺสนปรเมตํ, นาญฺญํ นิวตฺตนปรํ ปตฺตุณฺณปฎสฺสปิ เทสนาเมเนว วุตฺตตฺตาฯ ตุมฺพาติ ภาชนานิ ฯ ผลตุโมฺพติ ลาพุอาทิฯ อุทกตุโมฺพติ อุทกุกฺขิปนกกุฎโกฯ กิลญฺชจฺฉตฺตนฺติ เวฬุวิลีเวหิ วายิตฺวา กตฉตฺตํฯ สมฺภินฺนรสนฺติ สมฺมิสฺสิตรสํฯ ปานกํ ปฎิคฺคหิตํ โหตีติ อมฺพปานาทิปานกํ ปฎิคฺคหิตํ โหติ, ตํ วิกาเลปิ กปฺปติ อสมฺภินฺนรสตฺตาฯ เตน ตทหุปฎิคฺคหิเตน สทฺธินฺติ เตน สตฺตาหกาลิเกน ตทหุปฎิคฺคหิเตน สทฺธิํฯ เสสเมตฺถ สุวิเญฺญยฺยเมวฯ
305.Parimaddantāti upaparikkhantā. Pattuṇṇadese sañjātavatthaṃ pattuṇṇaṃ. Koseyyavisesoti hi abhidhānakose vuttaṃ. Cīnadese somāradese ca sañjātavatthāni cīnasomārapaṭāni. Pattuṇṇādīni tīṇi koseyyassa anulomāni pāṇakehi katasuttamayattā. Iddhimayikaṃ ehibhikkhūnaṃ puññiddhiyā nibbattacīvaraṃ. Taṃ khomādīnaṃ aññataraṃ hotīti tesaṃyeva anulomaṃ. Devatāhi dinnacīvaraṃ devadattiyaṃ. Taṃ kapparukkhe nibbattaṃ jālinīdevakaññāya anuruddhattherassa dinnavatthasadisaṃ. Tampi khomādīnaññeva anulomaṃ hoti tesu aññatarabhāvato. Dve paṭā desanāmeneva vuttāti tesaṃ sarūpadassanaparametaṃ, nāññaṃ nivattanaparaṃ pattuṇṇapaṭassapi desanāmeneva vuttattā. Tumbāti bhājanāni . Phalatumboti lābuādi. Udakatumboti udakukkhipanakakuṭako. Kilañjacchattanti veḷuvilīvehi vāyitvā katachattaṃ. Sambhinnarasanti sammissitarasaṃ. Pānakaṃ paṭiggahitaṃ hotīti ambapānādipānakaṃ paṭiggahitaṃ hoti, taṃ vikālepi kappati asambhinnarasattā. Tena tadahupaṭiggahitena saddhinti tena sattāhakālikena tadahupaṭiggahitena saddhiṃ. Sesamettha suviññeyyameva.
จตุมหาปเทสกถาวณฺณนา นิฎฺฐิตาฯ
Catumahāpadesakathāvaṇṇanā niṭṭhitā.
เภสชฺชกฺขนฺธกวณฺณนา นิฎฺฐิตาฯ
Bhesajjakkhandhakavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi / ๑๘๕. จตุมหาปเทสกถา • 185. Catumahāpadesakathā
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / จตุมหาปเทสกถา • Catumahāpadesakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / เกณิยชฎิลวตฺถุกถาวณฺณนา • Keṇiyajaṭilavatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / จตุมหาปเทสกถาวณฺณนา • Catumahāpadesakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๑๘๕. จตุมหาปเทสกถา • 185. Catumahāpadesakathā
