| Library / Tipiṭaka / തിപിടക • Tipiṭaka / സാരത്ഥദീപനീ-ടീകാ • Sāratthadīpanī-ṭīkā |
ചതുമഹാപദേസകഥാവണ്ണനാ
Catumahāpadesakathāvaṇṇanā
൩൦൫. പരിമദ്ദന്താതി ഉപപരിക്ഖന്താ. പത്തുണ്ണദേസേ സഞ്ജാതവത്ഥം പത്തുണ്ണം. കോസേയ്യവിസേസോതി ഹി അഭിധാനകോസേ വുത്തം. ചീനദേസേ സോമാരദേസേ ച സഞ്ജാതവത്ഥാനി ചീനസോമാരപടാനി. പത്തുണ്ണാദീനി തീണി കോസേയ്യസ്സ അനുലോമാനി പാണകേഹി കതസുത്തമയത്താ. ഇദ്ധിമയികം ഏഹിഭിക്ഖൂനം പുഞ്ഞിദ്ധിയാ നിബ്ബത്തചീവരം. തം ഖോമാദീനം അഞ്ഞതരം ഹോതീതി തേസംയേവ അനുലോമം. ദേവതാഹി ദിന്നചീവരം ദേവദത്തിയം. തം കപ്പരുക്ഖേ നിബ്ബത്തം ജാലിനീദേവകഞ്ഞായ അനുരുദ്ധത്ഥേരസ്സ ദിന്നവത്ഥസദിസം. തമ്പി ഖോമാദീനഞ്ഞേവ അനുലോമം ഹോതി തേസു അഞ്ഞതരഭാവതോ. ദ്വേ പടാ ദേസനാമേനേവ വുത്താതി തേസം സരൂപദസ്സനപരമേതം, നാഞ്ഞം നിവത്തനപരം പത്തുണ്ണപടസ്സപി ദേസനാമേനേവ വുത്തത്താ. തുമ്ബാതി ഭാജനാനി . ഫലതുമ്ബോതി ലാബുആദി. ഉദകതുമ്ബോതി ഉദകുക്ഖിപനകകുടകോ. കിലഞ്ജച്ഛത്തന്തി വേളുവിലീവേഹി വായിത്വാ കതഛത്തം. സമ്ഭിന്നരസന്തി സമ്മിസ്സിതരസം. പാനകം പടിഗ്ഗഹിതം ഹോതീതി അമ്ബപാനാദിപാനകം പടിഗ്ഗഹിതം ഹോതി, തം വികാലേപി കപ്പതി അസമ്ഭിന്നരസത്താ. തേന തദഹുപടിഗ്ഗഹിതേന സദ്ധിന്തി തേന സത്താഹകാലികേന തദഹുപടിഗ്ഗഹിതേന സദ്ധിം. സേസമേത്ഥ സുവിഞ്ഞേയ്യമേവ.
305.Parimaddantāti upaparikkhantā. Pattuṇṇadese sañjātavatthaṃ pattuṇṇaṃ. Koseyyavisesoti hi abhidhānakose vuttaṃ. Cīnadese somāradese ca sañjātavatthāni cīnasomārapaṭāni. Pattuṇṇādīni tīṇi koseyyassa anulomāni pāṇakehi katasuttamayattā. Iddhimayikaṃ ehibhikkhūnaṃ puññiddhiyā nibbattacīvaraṃ. Taṃ khomādīnaṃ aññataraṃ hotīti tesaṃyeva anulomaṃ. Devatāhi dinnacīvaraṃ devadattiyaṃ. Taṃ kapparukkhe nibbattaṃ jālinīdevakaññāya anuruddhattherassa dinnavatthasadisaṃ. Tampi khomādīnaññeva anulomaṃ hoti tesu aññatarabhāvato. Dve paṭā desanāmeneva vuttāti tesaṃ sarūpadassanaparametaṃ, nāññaṃ nivattanaparaṃ pattuṇṇapaṭassapi desanāmeneva vuttattā. Tumbāti bhājanāni . Phalatumboti lābuādi. Udakatumboti udakukkhipanakakuṭako. Kilañjacchattanti veḷuvilīvehi vāyitvā katachattaṃ. Sambhinnarasanti sammissitarasaṃ. Pānakaṃ paṭiggahitaṃ hotīti ambapānādipānakaṃ paṭiggahitaṃ hoti, taṃ vikālepi kappati asambhinnarasattā. Tena tadahupaṭiggahitena saddhinti tena sattāhakālikena tadahupaṭiggahitena saddhiṃ. Sesamettha suviññeyyameva.
ചതുമഹാപദേസകഥാവണ്ണനാ നിട്ഠിതാ.
Catumahāpadesakathāvaṇṇanā niṭṭhitā.
ഭേസജ്ജക്ഖന്ധകവണ്ണനാ നിട്ഠിതാ.
Bhesajjakkhandhakavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / വിനയപിടക • Vinayapiṭaka / മഹാവഗ്ഗപാളി • Mahāvaggapāḷi / ൧൮൫. ചതുമഹാപദേസകഥാ • 185. Catumahāpadesakathā
അട്ഠകഥാ • Aṭṭhakathā / വിനയപിടക (അട്ഠകഥാ) • Vinayapiṭaka (aṭṭhakathā) / മഹാവഗ്ഗ-അട്ഠകഥാ • Mahāvagga-aṭṭhakathā / ചതുമഹാപദേസകഥാ • Catumahāpadesakathā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വജിരബുദ്ധി-ടീകാ • Vajirabuddhi-ṭīkā / കേണിയജടിലവത്ഥുകഥാവണ്ണനാ • Keṇiyajaṭilavatthukathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വിമതിവിനോദനീ-ടീകാ • Vimativinodanī-ṭīkā / ചതുമഹാപദേസകഥാവണ്ണനാ • Catumahāpadesakathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / ൧൮൫. ചതുമഹാപദേസകഥാ • 185. Catumahāpadesakathā
