| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. චතුමහාරාජසුත්‌තං
7. Catumahārājasuttaṃ
37. ‘‘අට්‌ඨමියං, භික්‌ඛවෙ, පක්‌ඛස්‌ස චතුන්‌නං මහාරාජානං අමච්‌චා පාරිසජ්‌ජා ඉමං ලොකං අනුවිචරන්‌ති – ‘කච්‌චි බහූ මනුස්‌සා මනුස්‌සෙසු මත්‌තෙය්‍යා පෙත්‌තෙය්‍යා සාමඤ්‌ඤා බ්‍රහ්‌මඤ්‌ඤා කුලෙ ජෙට්‌ඨාපචායිනො උපොසථං උපවසන්‌ති පටිජාගරොන්‌ති පුඤ්‌ඤානි කරොන්‌තී’ති. චාතුද්‌දසිං, භික්‌ඛවෙ, පක්‌ඛස්‌ස චතුන්‌නං මහාරාජානං පුත්‌තා ඉමං ලොකං අනුවිචරන්‌ති – ‘කච්‌චි බහූ මනුස්‌සා මනුස්‌සෙසු මත්‌තෙය්‍යා පෙත්‌තෙය්‍යා සාමඤ්‌ඤා බ්‍රහ්‌මඤ්‌ඤා කුලෙ ජෙට්‌ඨාපචායිනො උපොසථං උපවසන්‌ති පටිජාගරොන්‌ති පුඤ්‌ඤානි කරොන්‌තී’ති. තදහු, භික්‌ඛවෙ, උපොසථෙ පන්‌නරසෙ චත්‌තාරො මහාරාජානො සාමඤ්‌ඤෙව ඉමං ලොකං අනුවිචරන්‌ති – ‘කච්‌චි බහූ මනුස්‌සා මනුස්‌සෙසු මත්‌තෙය්‍යා පෙත්‌තෙය්‍යා සාමඤ්‌ඤා බ්‍රහ්‌මඤ්‌ඤා කුලෙ ජෙට්‌ඨාපචායිනො උපොසථං උපවසන්‌ති පටිජාගරොන්‌ති පුඤ්‌ඤානි කරොන්‌තී’’’ති.
37. ‘‘Aṭṭhamiyaṃ, bhikkhave, pakkhassa catunnaṃ mahārājānaṃ amaccā pārisajjā imaṃ lokaṃ anuvicaranti – ‘kacci bahū manussā manussesu matteyyā petteyyā sāmaññā brahmaññā kule jeṭṭhāpacāyino uposathaṃ upavasanti paṭijāgaronti puññāni karontī’ti. Cātuddasiṃ, bhikkhave, pakkhassa catunnaṃ mahārājānaṃ puttā imaṃ lokaṃ anuvicaranti – ‘kacci bahū manussā manussesu matteyyā petteyyā sāmaññā brahmaññā kule jeṭṭhāpacāyino uposathaṃ upavasanti paṭijāgaronti puññāni karontī’ti. Tadahu, bhikkhave, uposathe pannarase cattāro mahārājāno sāmaññeva imaṃ lokaṃ anuvicaranti – ‘kacci bahū manussā manussesu matteyyā petteyyā sāmaññā brahmaññā kule jeṭṭhāpacāyino uposathaṃ upavasanti paṭijāgaronti puññāni karontī’’’ti.
‘‘සචෙ, භික්‌ඛවෙ, අප්‌පකා හොන්‌ති මනුස්‌සා මනුස්‌සෙසු මත්‌තෙය්‍යා පෙත්‌තෙය්‍යා සාමඤ්‌ඤා බ්‍රහ්‌මඤ්‌ඤා කුලෙ ජෙට්‌ඨාපචායිනො උපොසථං උපවසන්‌ති පටිජාගරොන්‌ති පුඤ්‌ඤානි කරොන්‌ති. තමෙනං, භික්‌ඛවෙ, චත්‌තාරො මහාරාජානො දෙවානං තාවතිංසානං සුධම්‌මාය සභාය සන්‌නිසින්‌නානං සන්‌නිපතිතානං ආරොචෙන්‌ති – ‘අප්‌පකා ඛො, මාරිසා, මනුස්‌සා මනුස්‌සෙසු මත්‌තෙය්‍යා පෙත්‌තෙය්‍යා සාමඤ්‌ඤා බ්‍රහ්‌මඤ්‌ඤා කුලෙ ජෙට්‌ඨාපචායිනො උපොසථං උපවසන්‌ති පටිජාගරොන්‌ති පුඤ්‌ඤානි කරොන්‌තී’ති. තෙන ඛො, භික්‌ඛවෙ , දෙවා තාවතිංසා අනත්‌තමනා හොන්‌ති – ‘දිබ්‌බා වත, භො, කායා පරිහායිස්‌සන්‌ති, පරිපූරිස්‌සන්‌ති අසුරකායා’’’ති.
‘‘Sace, bhikkhave, appakā honti manussā manussesu matteyyā petteyyā sāmaññā brahmaññā kule jeṭṭhāpacāyino uposathaṃ upavasanti paṭijāgaronti puññāni karonti. Tamenaṃ, bhikkhave, cattāro mahārājāno devānaṃ tāvatiṃsānaṃ sudhammāya sabhāya sannisinnānaṃ sannipatitānaṃ ārocenti – ‘appakā kho, mārisā, manussā manussesu matteyyā petteyyā sāmaññā brahmaññā kule jeṭṭhāpacāyino uposathaṃ upavasanti paṭijāgaronti puññāni karontī’ti. Tena kho, bhikkhave , devā tāvatiṃsā anattamanā honti – ‘dibbā vata, bho, kāyā parihāyissanti, paripūrissanti asurakāyā’’’ti.
‘‘සචෙ පන, භික්‌ඛවෙ, බහූ හොන්‌ති මනුස්‌සා මනුස්‌සෙසු මත්‌තෙය්‍යා පෙත්‌තෙය්‍යා සාමඤ්‌ඤා බ්‍රහ්‌මඤ්‌ඤා කුලෙ ජෙට්‌ඨාපචායිනො උපොසථං උපවසන්‌ති පටිජාගරොන්‌ති පුඤ්‌ඤානි කරොන්‌ති. තමෙනං, භික්‌ඛවෙ , චත්‌තාරො මහාරාජානො දෙවානං තාවතිංසානං සුධම්‌මාය සභාය සන්‌නිසින්‌නානං සන්‌නිපතිතානං ආරොචෙන්‌ති – ‘බහූ ඛො , මාරිසා, මනුස්‌සා මනුස්‌සෙසු මත්‌තෙය්‍යා පෙත්‌තෙය්‍යා සාමඤ්‌ඤා බ්‍රහ්‌මඤ්‌ඤා කුලෙ ජෙට්‌ඨාපචායිනො උපොසථං උපවසන්‌ති පටිජාගරොන්‌ති පුඤ්‌ඤානි කරොන්‌තී’ති. තෙන, භික්‌ඛවෙ, දෙවා තාවතිංසා අත්‌තමනා හොන්‌ති – ‘දිබ්‌බා වත, භො, කායා පරිපූරිස්‌සන්‌ති, පරිහායිස්‌සන්‌ති අසුරකායා’’’ති.
‘‘Sace pana, bhikkhave, bahū honti manussā manussesu matteyyā petteyyā sāmaññā brahmaññā kule jeṭṭhāpacāyino uposathaṃ upavasanti paṭijāgaronti puññāni karonti. Tamenaṃ, bhikkhave , cattāro mahārājāno devānaṃ tāvatiṃsānaṃ sudhammāya sabhāya sannisinnānaṃ sannipatitānaṃ ārocenti – ‘bahū kho , mārisā, manussā manussesu matteyyā petteyyā sāmaññā brahmaññā kule jeṭṭhāpacāyino uposathaṃ upavasanti paṭijāgaronti puññāni karontī’ti. Tena, bhikkhave, devā tāvatiṃsā attamanā honti – ‘dibbā vata, bho, kāyā paripūrissanti, parihāyissanti asurakāyā’’’ti.
‘‘භූතපුබ්‌බං, භික්‌ඛවෙ, සක්‌කො දෙවානමින්‌දො දෙවෙ තාවතිංසෙ අනුනයමානො තායං වෙලායං ඉමං ගාථං අභාසි –
‘‘Bhūtapubbaṃ, bhikkhave, sakko devānamindo deve tāvatiṃse anunayamāno tāyaṃ velāyaṃ imaṃ gāthaṃ abhāsi –
‘‘චාතුද්‌දසිං පඤ්‌චදසිං, යා ච පක්‌ඛස්‌ස අට්‌ඨමී;
‘‘Cātuddasiṃ pañcadasiṃ, yā ca pakkhassa aṭṭhamī;
පාටිහාරියපක්‌ඛඤ්‌ච, අට්‌ඨඞ්‌ගසුසමාගතං;
Pāṭihāriyapakkhañca, aṭṭhaṅgasusamāgataṃ;
‘‘සා ඛො පනෙසා, භික්‌ඛවෙ, සක්‌කෙන දෙවානමින්‌දෙන ගාථා දුග්‌ගීතා න සුගීතා දුබ්‌භාසිතා න සුභාසිතා. තං කිස්‌ස හෙතු? සක්‌කො හි, භික්‌ඛවෙ, දෙවානමින්‌දො අවීතරාගො අවීතදොසො අවීතමොහො.
‘‘Sā kho panesā, bhikkhave, sakkena devānamindena gāthā duggītā na sugītā dubbhāsitā na subhāsitā. Taṃ kissa hetu? Sakko hi, bhikkhave, devānamindo avītarāgo avītadoso avītamoho.
‘‘යො ච ඛො සො, භික්‌ඛවෙ, භික්‌ඛු අරහං ඛීණාසවො වුසිතවා බ්‍රහ්‌මචරියො කතකරණීයො ඔහිතභාරො අනුප්‌පත්‌තසදත්‌ථො පරික්‌ඛීණභවසංයොජනො සම්‌මදඤ්‌ඤා විමුත්‌තො, තස්‌ස ඛො එතං, භික්‌ඛවෙ, භික්‌ඛුනො 3 කල්‌ලං වචනාය –
‘‘Yo ca kho so, bhikkhave, bhikkhu arahaṃ khīṇāsavo vusitavā brahmacariyo katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, tassa kho etaṃ, bhikkhave, bhikkhuno 4 kallaṃ vacanāya –
‘‘චාතුද්‌දසිං පඤ්‌චදසිං, යා ච පක්‌ඛස්‌ස අට්‌ඨමී;
‘‘Cātuddasiṃ pañcadasiṃ, yā ca pakkhassa aṭṭhamī;
පාටිහාරියපක්‌ඛඤ්‌ච, අට්‌ඨඞ්‌ගසුසමාගතං;
Pāṭihāriyapakkhañca, aṭṭhaṅgasusamāgataṃ;
උපොසථං උපවසෙය්‍ය, යොපිස්‌ස මාදිසො නරො’’ති.
Uposathaṃ upavaseyya, yopissa mādiso naro’’ti.
‘‘තං කිස්‌ස හෙතු? සො හි, භික්‌ඛවෙ, භික්‌ඛු වීතරාගො වීතදොසො වීතමොහො’’ති. සත්‌තමං.
‘‘Taṃ kissa hetu? So hi, bhikkhave, bhikkhu vītarāgo vītadoso vītamoho’’ti. Sattamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. චතුමහාරාජසුත්‌තවණ්‌ණනා • 7. Catumahārājasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7. චතුමහාරාජසුත්‌තවණ්‌ණනා • 7. Catumahārājasuttavaṇṇanā
