| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. சதுமஹாராஜஸுத்தவண்ணனா
7. Catumahārājasuttavaṇṇanā
37. ஸத்தமே அமச்சா பாரிஸஜ்ஜாதி பரிசாரிகதே³வதா. இமங் லோகங் அனுவிசரந்தீதி அட்ட²மீதி³வஸே கிர ஸக்கோ தே³வராஜா சத்தாரோ மஹாராஜானோ ஆணாபேதி – ‘‘தாதா, அஜ்ஜ அட்ட²மீதி³வஸே மனுஸ்ஸலோகங் அனுவிசரித்வா புஞ்ஞானி கரொந்தானங் நாமகொ³த்தங் உக்³க³ண்ஹித்வா ஆக³ச்ச²தா²’’தி. தே க³ந்த்வா அத்தனோ பரிசாரகே பேஸெந்தி – ‘‘க³ச்ச²த², தாதா, மனுஸ்ஸலோகங் விசரித்வா புஞ்ஞகாரகானங் நாமகொ³த்தானி ஸுவண்ணபட்டே லிகி²த்வா ஆனேதா²’’தி. தே ததா² கரொந்தி. தேன வுத்தங் – ‘‘இமங் லோகங் அனுவிசரந்தீ’’தி. கச்சி ப³ஹூதிஆதி³ தேஸங் உபபரிக்கா²காரத³ஸ்ஸனத்த²ங் வுத்தங். ஏவங் உபபரிக்க²ந்தா ஹி தே அனுவிசரந்தி. தத்த² உபோஸத²ங் உபவஸந்தீதி மாஸஸ்ஸ அட்ட²வாரே உபோஸத²ங்கா³னி அதி⁴ட்ட²ஹந்தி. படிஜாக³ரொந்தீதி படிஜாக³ரஉபோஸத²கம்மங் நாம கரொந்தி. தங் கரொந்தா ஏகஸ்மிங் அத்³த⁴மாஸே சதுன்னங் உபோஸத²தி³வஸானங் பச்சுக்³க³மனானுக்³க³மனவஸேன கரொந்தி. பஞ்சமீஉபோஸத²ங் பச்சுக்³க³ச்ச²ந்தா சதுத்தி²யங் உபோஸதி²கா ஹொந்தி, அனுக³ச்ச²ந்தா ச²ட்டி²யங். அட்ட²மீஉபோஸத²ங் பச்சுக்³க³ச்ச²ந்தா ஸத்தமியங், அனுக³ச்ச²ந்தா நவமியங். சாதுத்³த³ஸிங் பச்சுக்³க³ச்ச²ந்தா தேரஸியங், பன்னரஸீஉபோஸத²ங் அனுக³ச்ச²ந்தா பாடிபதே³ உபோஸதி²கா ஹொந்தி. புஞ்ஞானி கரொந்தீதி ஸரணக³மனநிச்சஸீலபுப்ப²பூஜாத⁴ம்மஸ்ஸவனபதீ³பஸஹஸ்ஸஆரோபனவிஹாரகரணாதீ³னி நானப்பகாரானி புஞ்ஞானி கரொந்தி. தே ஏவங் அனுவிசரித்வா புஞ்ஞகம்மகாரகானங் நாமகொ³த்தானி ஸோவண்ணமயே பட்டே லிகி²த்வா ஆஹரித்வா சதுன்னங் மஹாராஜானங் தெ³ந்தி. புத்தா இமங் லோகங் அனுவிசரந்தீதி சதூஹி மஹாராஜேஹி புரிமனயேனேவ பஹிதத்தா அனுவிசரந்தி. தத³ஹூதி தங்தி³வஸங். உபோஸதே²தி உபோஸத²தி³வஸே.
37. Sattame amaccā pārisajjāti paricārikadevatā. Imaṃ lokaṃ anuvicarantīti aṭṭhamīdivase kira sakko devarājā cattāro mahārājāno āṇāpeti – ‘‘tātā, ajja aṭṭhamīdivase manussalokaṃ anuvicaritvā puññāni karontānaṃ nāmagottaṃ uggaṇhitvā āgacchathā’’ti. Te gantvā attano paricārake pesenti – ‘‘gacchatha, tātā, manussalokaṃ vicaritvā puññakārakānaṃ nāmagottāni suvaṇṇapaṭṭe likhitvā ānethā’’ti. Te tathā karonti. Tena vuttaṃ – ‘‘imaṃ lokaṃ anuvicarantī’’ti. Kaccibahūtiādi tesaṃ upaparikkhākāradassanatthaṃ vuttaṃ. Evaṃ upaparikkhantā hi te anuvicaranti. Tattha uposathaṃ upavasantīti māsassa aṭṭhavāre uposathaṅgāni adhiṭṭhahanti. Paṭijāgarontīti paṭijāgarauposathakammaṃ nāma karonti. Taṃ karontā ekasmiṃ addhamāse catunnaṃ uposathadivasānaṃ paccuggamanānuggamanavasena karonti. Pañcamīuposathaṃ paccuggacchantā catutthiyaṃ uposathikā honti, anugacchantā chaṭṭhiyaṃ. Aṭṭhamīuposathaṃ paccuggacchantā sattamiyaṃ, anugacchantā navamiyaṃ. Cātuddasiṃ paccuggacchantā terasiyaṃ, pannarasīuposathaṃ anugacchantā pāṭipade uposathikā honti. Puññāni karontīti saraṇagamananiccasīlapupphapūjādhammassavanapadīpasahassaāropanavihārakaraṇādīni nānappakārāni puññāni karonti. Te evaṃ anuvicaritvā puññakammakārakānaṃ nāmagottāni sovaṇṇamaye paṭṭe likhitvā āharitvā catunnaṃ mahārājānaṃ denti. Puttā imaṃ lokaṃ anuvicarantīti catūhi mahārājehi purimanayeneva pahitattā anuvicaranti. Tadahūti taṃdivasaṃ. Uposatheti uposathadivase.
ஸசே, பி⁴க்க²வே, அப்பகா ஹொந்தீதி சதுன்னங் மஹாராஜானங் அமச்சா பாரிஸஜ்ஜா தா தா கா³மனிக³மராஜதா⁴னியோ உபஸங்கமந்தி, ததோ தங் உபனிஸ்ஸாய அதி⁴வத்தா² தே³வதா ‘‘மஹாராஜானங் அமச்சா ஆக³தா’’தி பண்ணாகாரங் க³ஹெத்வா தேஸங் ஸந்திகங் க³ச்ச²ந்தி. தே பண்ணாகாரங் க³ஹெத்வா ‘‘கச்சி நு கோ² மாரிஸா ப³ஹூ மனுஸ்ஸா மத்தெய்யா’’தி வுத்தனயேன மனுஸ்ஸானங் புஞ்ஞபடிபத்திங் புச்சி²த்வா ‘‘ஆம, மாரிஸ, இமஸ்மிங் கா³மே அஸுகோ ச அஸுகோ ச புஞ்ஞானி கரொந்தீ’’தி வுத்தே தேஸங் நாமகொ³த்தங் லிகி²த்வா அஞ்ஞத்த² க³ச்ச²ந்தி. அத² சாதுத்³த³ஸியங் சதுன்னங் மஹாராஜானங் புத்தாபி தமேவ ஸுவண்ணபட்டங் க³ஹெத்வா தேனேவ நயேன அனுவிசரந்தா நாமகொ³த்தானி லிக²ந்தி. தத³ஹுபோஸதே² பன்னரஸே சத்தாரோபி மஹாராஜானோ தேனேவ நயேன தஸ்மிங்யேவ ஸுவண்ணபட்டே நாமகொ³த்தானி லிக²ந்தி. தே ஸுவண்ணபட்டபரிமாணேனேவ – ‘‘இமஸ்மிங் காலே மனுஸ்ஸா அப்பகா, இமஸ்மிங் காலே ப³ஹுகா’’தி ஜானந்தி. தங் ஸந்தா⁴ய ‘‘ஸசே, பி⁴க்க²வே, அப்பகா ஹொந்தி மனுஸ்ஸா’’திஆதி³ வுத்தங். தே³வானங் தாவதிங்ஸானந்தி பட²மங் அபி⁴னிப்³ப³த்தே தெத்திங்ஸ தே³வபுத்தே உபாதா³ய ஏவங்லத்³த⁴னாமானங். தேஸங் பன உப்பத்திகதா² தீ³க⁴னிகாயே ஸக்கபஞ்ஹஸுத்தவண்ணனாய வித்தா²ரிதா. தேனாதி தேன ஆரோசனேன, தேன வா புஞ்ஞகாரகானங் அப்பகபா⁴வேன. தி³ப்³பா³ வத, போ⁴, காயா பரிஹாயிஸ்ஸந்தீதி நவனவானங் தே³வபுத்தானங் அபாதுபா⁴வேன தே³வகாயா பரிஹாயிஸ்ஸந்தி, ரமணீயங் த³ஸயோஜனஸஹஸ்ஸங் தே³வனக³ரங் ஸுஞ்ஞங் ப⁴விஸ்ஸதி. பரிபூரிஸ்ஸந்தி அஸுரகாயாதி சத்தாரோ அபாயா பரிபூரிஸ்ஸந்தி. இமினா ‘‘மயங் பரிபுண்ணே தே³வனக³ரே தே³வஸங்க⁴மஜ்ஜே² நக்க²த்தங் கீளிதுங் ந லபி⁴ஸ்ஸாமா’’தி அனத்தமனா ஹொந்தி. ஸுக்கபக்கே²பி இமினாவ உபாயேன அத்தோ² வேதி³தப்³போ³.
Sace, bhikkhave, appakā hontīti catunnaṃ mahārājānaṃ amaccā pārisajjā tā tā gāmanigamarājadhāniyo upasaṅkamanti, tato taṃ upanissāya adhivatthā devatā ‘‘mahārājānaṃ amaccā āgatā’’ti paṇṇākāraṃ gahetvā tesaṃ santikaṃ gacchanti. Te paṇṇākāraṃ gahetvā ‘‘kacci nu kho mārisā bahū manussā matteyyā’’ti vuttanayena manussānaṃ puññapaṭipattiṃ pucchitvā ‘‘āma, mārisa, imasmiṃ gāme asuko ca asuko ca puññāni karontī’’ti vutte tesaṃ nāmagottaṃ likhitvā aññattha gacchanti. Atha cātuddasiyaṃ catunnaṃ mahārājānaṃ puttāpi tameva suvaṇṇapaṭṭaṃ gahetvā teneva nayena anuvicarantā nāmagottāni likhanti. Tadahuposathe pannarase cattāropi mahārājāno teneva nayena tasmiṃyeva suvaṇṇapaṭṭe nāmagottāni likhanti. Te suvaṇṇapaṭṭaparimāṇeneva – ‘‘imasmiṃ kāle manussā appakā, imasmiṃ kāle bahukā’’ti jānanti. Taṃ sandhāya ‘‘sace, bhikkhave, appakā honti manussā’’tiādi vuttaṃ. Devānaṃ tāvatiṃsānanti paṭhamaṃ abhinibbatte tettiṃsa devaputte upādāya evaṃladdhanāmānaṃ. Tesaṃ pana uppattikathā dīghanikāye sakkapañhasuttavaṇṇanāya vitthāritā. Tenāti tena ārocanena, tena vā puññakārakānaṃ appakabhāvena. Dibbā vata, bho, kāyā parihāyissantīti navanavānaṃ devaputtānaṃ apātubhāvena devakāyā parihāyissanti, ramaṇīyaṃ dasayojanasahassaṃ devanagaraṃ suññaṃ bhavissati. Paripūrissanti asurakāyāti cattāro apāyā paripūrissanti. Iminā ‘‘mayaṃ paripuṇṇe devanagare devasaṅghamajjhe nakkhattaṃ kīḷituṃ na labhissāmā’’ti anattamanā honti. Sukkapakkhepi imināva upāyena attho veditabbo.
பூ⁴தபுப்³ப³ங், பி⁴க்க²வே, ஸக்கோ தே³வானமிந்தோ³தி அத்தனோ ஸக்கதே³வராஜகாலங் ஸந்தா⁴ய கதே²தி. ஏகஸ்ஸ வா ஸக்கஸ்ஸ அஜ்ஜா²ஸயங் க³ஹெத்வா கதே²தீதி வுத்தங். அனுனயமானோதி அனுபோ³த⁴யமானோ. தாயங் வேலாயந்தி தஸ்மிங் காலே.
Bhūtapubbaṃ, bhikkhave, sakko devānamindoti attano sakkadevarājakālaṃ sandhāya katheti. Ekassa vā sakkassa ajjhāsayaṃ gahetvā kathetīti vuttaṃ. Anunayamānoti anubodhayamāno. Tāyaṃ velāyanti tasmiṃ kāle.
பாடிஹாரியபக்க²ஞ்சாதி எத்த² பாடிஹாரியபக்கோ² நாம அந்தோவஸ்ஸே தேமாஸங் நிப³த்³து⁴போஸதோ², தங் அஸக்கொந்தஸ்ஸ த்³வின்னங் பவாரணானங் அந்தரே ஏகமாஸங் நிப³த்³து⁴போஸதோ², தம்பி அஸக்கொந்தஸ்ஸ பட²மபவாரணதோ பட்டா²ய ஏகோ அத்³த⁴மாஸோ பாடிஹாரியபக்கோ²யேவ நாம. அட்ட²ங்க³ஸுஸமாக³தந்தி அட்ட²ஹி கு³ணங்கே³ஹி ஸமன்னாக³தங். யோபிஸ்ஸ மாதி³ஸோ நரோதி யோபி ஸத்தோ மாதி³ஸோ ப⁴வெய்ய. ஸக்கோபி கிர வுத்தப்பகாரஸ்ஸ உபோஸத²கம்மஸ்ஸ கு³ணங் ஜானித்வா த்³வே தே³வலோகஸம்பத்தியோ பஹாய மாஸஸ்ஸ அட்ட² வாரே உபோஸத²ங் உபவஸதி. தஸ்மா ஏவமாஹ. அபரோ நயோ – யோபிஸ்ஸ மாதி³ஸோ நரோதி யோபி ஸத்தோ மாதி³ஸோ அஸ்ஸ, மயா பத்தங் ஸம்பத்திங் பாபுணிதுங் இச்செ²ய்யாதி அத்தோ². ஸக்கா ஹி ஏவரூபேன உபோஸத²கம்மேன ஸக்கஸம்பத்திங் பாபுணிதுந்தி அயமெத்த² அதி⁴ப்பாயோ.
Pāṭihāriyapakkhañcāti ettha pāṭihāriyapakkho nāma antovasse temāsaṃ nibaddhuposatho, taṃ asakkontassa dvinnaṃ pavāraṇānaṃ antare ekamāsaṃ nibaddhuposatho, tampi asakkontassa paṭhamapavāraṇato paṭṭhāya eko addhamāso pāṭihāriyapakkhoyeva nāma. Aṭṭhaṅgasusamāgatanti aṭṭhahi guṇaṅgehi samannāgataṃ. Yopissamādiso naroti yopi satto mādiso bhaveyya. Sakkopi kira vuttappakārassa uposathakammassa guṇaṃ jānitvā dve devalokasampattiyo pahāya māsassa aṭṭha vāre uposathaṃ upavasati. Tasmā evamāha. Aparo nayo – yopissa mādiso naroti yopi satto mādiso assa, mayā pattaṃ sampattiṃ pāpuṇituṃ iccheyyāti attho. Sakkā hi evarūpena uposathakammena sakkasampattiṃ pāpuṇitunti ayamettha adhippāyo.
வுஸிதவாதி வுத்த²வாஸோ. கதகரணீயோதி சதூஹி மக்³கே³ஹி கத்தப்³ப³கிச்சங் கத்வா டி²தோ. ஓஹிதபா⁴ரோதி க²ந்த⁴பா⁴ரகிலேஸபா⁴ரஅபி⁴ஸங்கா²ரபா⁴ரே ஓதாரெத்வா டி²தோ. அனுப்பத்தஸத³த்தோ²தி ஸத³த்தோ² வுச்சதி அரஹத்தங், தங் அனுப்பத்தோ. பரிக்கீ²ணப⁴வஸங்யோஜனோதி யேன ஸங்யோஜனேன ப³த்³தோ⁴ ப⁴வேஸு ஆகட்³டீ⁴யதி, தஸ்ஸ கீ²ணத்தா பரிக்கீ²ணப⁴வஸங்யோஜனோ. ஸம்மத³ஞ்ஞா விமுத்தோதி ஹேதுனா நயேன காரணேன ஜானித்வா விமுத்தோ. கல்லங் வசனாயாதி யுத்தங் வத்துங்.
Vusitavāti vutthavāso. Katakaraṇīyoti catūhi maggehi kattabbakiccaṃ katvā ṭhito. Ohitabhāroti khandhabhārakilesabhāraabhisaṅkhārabhāre otāretvā ṭhito. Anuppattasadatthoti sadattho vuccati arahattaṃ, taṃ anuppatto. Parikkhīṇabhavasaṃyojanoti yena saṃyojanena baddho bhavesu ākaḍḍhīyati, tassa khīṇattā parikkhīṇabhavasaṃyojano. Sammadaññā vimuttoti hetunā nayena kāraṇena jānitvā vimutto. Kallaṃ vacanāyāti yuttaṃ vattuṃ.
யோபிஸ்ஸ மாதி³ஸோ நரோதி யோபி மாதி³ஸோ கீ²ணாஸவோ அஸ்ஸ, ஸோபி ஏவரூபங் உபோஸத²ங் உபவஸெய்யாதி உபோஸத²கம்மஸ்ஸ கு³ணங் ஜானந்தோ ஏவங் வதெ³ய்ய. அபரோ நயோ யோபிஸ்ஸ மாதி³ஸோ நரோதி யோபி ஸத்தோ மாதி³ஸோ அஸ்ஸ, மயா பத்தங் ஸம்பத்திங் பாபுணிதுங் இச்செ²ய்யாதி அத்தோ². ஸக்கா ஹி ஏவரூபேன உபோஸத²கம்மேன கீ²ணாஸவஸம்பத்திங் பாபுணிதுந்தி அயமெத்த² அதி⁴ப்பாயோ. அட்ட²மங் உத்தானத்த²மேவ.
Yopissa mādiso naroti yopi mādiso khīṇāsavo assa, sopi evarūpaṃ uposathaṃ upavaseyyāti uposathakammassa guṇaṃ jānanto evaṃ vadeyya. Aparo nayo yopissa mādiso naroti yopi satto mādiso assa, mayā pattaṃ sampattiṃ pāpuṇituṃ iccheyyāti attho. Sakkā hi evarūpena uposathakammena khīṇāsavasampattiṃ pāpuṇitunti ayamettha adhippāyo. Aṭṭhamaṃ uttānatthameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. சதுமஹாராஜஸுத்தங் • 7. Catumahārājasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. சதுமஹாராஜஸுத்தவண்ணனா • 7. Catumahārājasuttavaṇṇanā
