| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. சதுமஹாராஜஸுத்தவண்ணனா
7. Catumahārājasuttavaṇṇanā
37. ஸத்தமே அமா ஸஹ வத்தந்தி தஸ்மிங் தஸ்மிங் கிச்சேதி அமச்சா, ஸஹிதா. பரிஸதி ப⁴வாதி பாரிஸஜ்ஜா, பரிவாரட்டா²னியா பரிஸாபரியாபன்னா. தேனாஹ ‘‘பரிசாரிகதே³வதா’’தி. தாதாதி ஆலபனங். ஏவந்தி ‘‘கச்சி ப³ஹூ மனுஸ்ஸா’’திஆதி³னா வுத்தாகாரேன. அட்ட² வாரேதி ஏகஸ்மிங் அட்³ட⁴மாஸே சதுக்க²த்துங் ததா² இதரஸ்மிந்தி ஏவங் அட்ட² வாரே. அதி⁴ட்ட²ஹந்தீதி அதி⁴திட்ட²ந்தி. படிஜாக³ரொந்தீதி படி படி ஜாக³ரொந்தி. புஞ்ஞங் கரொந்தா ஹி ஸத்தா ஜாக³ரொந்தி நாம காதப்³ப³கிச்சப்பஸுதத்தா, இதரே பன ஸுபந்தி நாம ஸஹிதபரஹிதவிமுத்தத்தா. சாதுத்³த³ஸிஉபோஸத²ஸ்ஸ அனுக³மனங் விய பன்னரஸிஉபோஸத²ஸ்ஸ பச்சுக்³க³மனங் ந லப்³ப⁴தி தி³வஸாபா⁴வதோ.
37. Sattame amā saha vattanti tasmiṃ tasmiṃ kicceti amaccā, sahitā. Parisati bhavāti pārisajjā, parivāraṭṭhāniyā parisāpariyāpannā. Tenāha ‘‘paricārikadevatā’’ti. Tātāti ālapanaṃ. Evanti ‘‘kacci bahū manussā’’tiādinā vuttākārena. Aṭṭha vāreti ekasmiṃ aḍḍhamāse catukkhattuṃ tathā itarasminti evaṃ aṭṭha vāre. Adhiṭṭhahantīti adhitiṭṭhanti. Paṭijāgarontīti paṭi paṭi jāgaronti. Puññaṃ karontā hi sattā jāgaronti nāma kātabbakiccappasutattā, itare pana supanti nāma sahitaparahitavimuttattā. Cātuddasiuposathassa anugamanaṃ viya pannarasiuposathassa paccuggamanaṃ na labbhati divasābhāvato.
ததோதி ததோ ததோ. தங் உபனிஸ்ஸாயாதி தா தா கா³மனிக³மராஜதா⁴னியோ உபனிஸ்ஸாய. அதி⁴வத்தா²தி ஆராமவனருக்கா²தீ³ஸு அதி⁴வத்தா² தே³வதா. தேதி தே தே³வா. ஸந்தா⁴ய கதே²தீதி ப⁴க³வா கதே²தி. வுத்தந்தி அட்ட²கதா²யங் வுத்தங்.
Tatoti tato tato. Taṃ upanissāyāti tā tā gāmanigamarājadhāniyo upanissāya. Adhivatthāti ārāmavanarukkhādīsu adhivatthā devatā. Teti te devā. Sandhāya kathetīti bhagavā katheti. Vuttanti aṭṭhakathāyaṃ vuttaṃ.
நிச்சங் நிப³த்³த⁴ங் உபோஸதோ² ஸங்வச்ச²ரே ஸங்வச்ச²ரே படி படி ஹரிதப்³ப³தோ பவத்தேதப்³ப³தோ பாடிஹாரியபக்கோ² நாம. கு³ணங்கே³ஹீதி உபோஸத²ங்கே³ஹி.
Niccaṃ nibaddhaṃ uposatho saṃvacchare saṃvacchare paṭi paṭi haritabbato pavattetabbato pāṭihāriyapakkho nāma. Guṇaṅgehīti uposathaṅgehi.
வுத்த²வாஸோதி வுஸிதப்³ரஹ்மசரியவாஸோ. கத்தப்³ப³கிச்சந்தி து³க்கா²தீ³ஸு பரிஞ்ஞாதாதி³கிச்சங். ஓதாரெத்வாதி ச²ட்³டெ³த்வா. பரிக்கீ²ணப⁴வஸங்யோஜனோதி ஸப்³ப³ஸோ கீ²ணப⁴வப³ந்த⁴னோ. காரணேன ஜானித்வாதி விபஸ்ஸனாபஞ்ஞாஸஹிதாய மக்³க³பஞ்ஞாய சத்தாரி அரியஸச்சானி ஜானித்வா.
Vutthavāsoti vusitabrahmacariyavāso. Kattabbakiccanti dukkhādīsu pariññātādikiccaṃ. Otāretvāti chaḍḍetvā. Parikkhīṇabhavasaṃyojanoti sabbaso khīṇabhavabandhano. Kāraṇena jānitvāti vipassanāpaññāsahitāya maggapaññāya cattāri ariyasaccāni jānitvā.
ஜானந்தோதி ‘‘அரஹந்தானங் அனுகரணப்படிபத்தி ஏஸா, யதி³த³ங் ஸம்மதே³வ உபோஸதா²னுட்டா²ன’’ந்தி ஏவங் உபோஸத²கம்மஸ்ஸ கு³ணங் ஜானந்தோ. ஏவரூபேனாதி யாதி³ஸோ ப⁴க³வதோ உபோஸத²பா⁴வோ விஹிதோ, ஏவரூபேன அரஹந்தானுகரணேன உபோஸத²கம்மேன. ஸக்கா பஹிதத்தோ விபஸ்ஸனங் உஸ்ஸுக்காபெத்வா கீ²ணாஸவஸம்பத்திங் பாபுணிதுங். அட்ட²மங் உத்தானத்த²மேவ ஸத்தமே வுத்தனயத்தா.
Jānantoti ‘‘arahantānaṃ anukaraṇappaṭipatti esā, yadidaṃ sammadeva uposathānuṭṭhāna’’nti evaṃ uposathakammassa guṇaṃ jānanto. Evarūpenāti yādiso bhagavato uposathabhāvo vihito, evarūpena arahantānukaraṇena uposathakammena. Sakkā pahitatto vipassanaṃ ussukkāpetvā khīṇāsavasampattiṃ pāpuṇituṃ. Aṭṭhamaṃ uttānatthameva sattame vuttanayattā.
சதுமஹாராஜஸுத்தவண்ணனா நிட்டி²தா.
Catumahārājasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. சதுமஹாராஜஸுத்தங் • 7. Catumahārājasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. சதுமஹாராஜஸுத்தவண்ணனா • 7. Catumahārājasuttavaṇṇanā
